3–9 Aperila

Eseta

“Le Tuugamau e, O Fea o i ai Lou Manumalo?”

Faaaoga lou taimi ma tamaiti e fesoasoani ai ia latou vaai i le Eseta o se vaitau e olioli ai i le Faaola ma faaloloto ai lo latou lotofaafetai mo Lana taulaga. O manatu o i lenei otootoga e mafai ona fetuunai e fesoasoani ai ia te oe e aoao tamaiti o soo se vaitausaga.

Valaaulia le Fefaasoaai

Faaali atu ata o le Faaola i Ketesemane, i luga o le satauro, ma ina ua mavae Lona Toetu (tagai i le ata i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma le Tusi Ata o le Talalelei, nu. 56–60). Fai atu i tamaiti e faasoa mai mea latou te iloa e uiga i mea tutupu o loo faaalia i ata.

Aoao atu le Aoaoga Faavae: Tamaiti Laiti

O Iesu Keriso o lo’u Faaola.

A o e faitau e uiga i le Togiola a Iesu Keriso, manatunatu loloto pe mafai faapefea ona e fesoasoani i tamaiti ia lagonaina le tele o le alofa o Iesu ia i latou.

Gaoioiga e Mafai Ona Fai

• Faaali atu se ata o Iesu, ma fai atu i tamaiti e faasoa mai mea latou te iloa e uiga i mea sa Ia faia mo i tatou. Tuu atu lau molimau i le alofa o le Faaola ma Lona mana e laveai ai i tatou mai le agasala. Uu i luga se faaata, ma tuu i tamaiti e feauaua’i e tilotilo i ai. A o faia e tamaiti taitasi, fai atu i ai, “E alofa Iesu ia [ta’u le igoa o le tamaitiiti], ma e mafai e Ia ona fesoasoani ia [igoa o le tamaitiiti] ia toe mau faatasi ma le Tama Faalelagi.”

• Faaali se ata o Iesu o loo Tatalo i Ketesemane (Tusi Ata o le Talalelei, nu. 56) a o e faamatalaina le tala ia Iesu o loo puapuagatia i Ketesemane mo agasala a le lalolagi (tagai Mataio 26:36–46; Luka 22:39–44). Molimau atu ona o Lona puapuagatia, ua mafai ai ona faamagaloina i tatou pe a tatou faia se filifiliga sese. E mafai foi ona e faaaogaina le “Mataupu 51: Ua Puapuagatia Iesu i le Faatoaga o Ketesemane” (i le Tala o le Feagaiga Fou, 129–32, po o le vitio talafeagai o loo i le ChurchofJesusChrist.org).

• Usu faatasi se pese e faatatau i le alofa o Iesu mo i tatou, e pei o le “Le Alofa o Lo’u Faaola” (Tusipese a Tamaiti, 42--43). Fesoasoani i tamaiti ia iloa upu o le pese e faamatala ai le alofa o le Faaola. O le a se mea e fesoasoani tatou te lagona ai Lona alofa? E faapefea ona tatou fesoasoani atu i isi ia lagona Lona alofa?

Ua Toetu o Ia, saunia e Greg Olsen

Ona na maliu Iesu ma sa toetu mai, o le a ou toe ola ai foi.

E mafai faapefea ona e fesoasoani i tamaiti ia malamalama faapea ona o Iesu Keriso, o le a toetutu ai foi i tatou ma e pele ia i tatou i se aso?

Gaoioiga e Mafai Ona Fai

• Aoao i le fanau le tala o le Eseta e faaaoga ai ata o Keriso i Ketesemane, luga o le satauro, ma ina ua mavae Lona Toetu (tagai Tusi Ata o le Talalelei, nu. 56–60 ma le ata o i le itulau atoa o le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Tuu atu i ni nai tamaiti e uu i luga ia ata a o e faamatalaina le tala. Ta’u i tamaiti e uiga i ni nai tagata sa vaai ia Iesu ina ua toetu o Ia, e pei o Maria (tagai Ioane 20:1–18) po o Toma (tagai Ioane 20:24–29).

• Fesili i tamaiti pe aisea tatou te faamanatuina ai le Eseta. Faamalamalama atu o le Eseta tatou te faamanatuina ai le aso na toetu mai ai Iesu Keriso. Fesili pe i ai ni tamaiti e fia faasoa mai mea e fai e o latou aiga e manatua ai le Toetu o Iesu Keriso.

• Faamalamalama atu o le toetu o lona uiga o le toe ola pe a mavae ona tatou oti. Tuu atu lau molimau e faapea ona o Iesu Keriso, o le a tatou toetutu ai—o le a tatou toe ola pe a mavae ona tatou oti, ma o le a tatou le toe oti lava.

• Faaaoga se totinilima e aoao atu ai tamaiti e tofu uma i tatou ma se tino (e faatusa i le totinilima) ma se agaga (e faatusa i se lima). A tatou oti o le a tuueseeseina o tatou agaga ma o tatou tino. O le a ola pea o tatou agaga, ae leai o tatou tino. A tatou toetutu, ona toe o mai faatasi ai lea o o tatou agaga ma tino. Tuu i tamaiti e feauauai e faamaulu le totinilima ma toe aveese.

• Usu faatasi se pese o le Eseta e pei o le “Pe Na Toe Soifua Moni Mai Ea Iesu?” po o le “Ua Toetu Iesu,” (Tusipese a Tamaiti, 45, 44), ma faaali atu i tamaiti ata o Iesu ina ua mavae Lona toetu (tagai Tusi Ata o le Talalelei, nu. 59–61).

• Faaali atu se ata o se tasi e te iloa ua oti. Faasoa atu lau molimau o le a toetu o ia ona o le TogIola ma le Toetu o Iesu Keriso.

• Matamata faatasi le vitio “Jesus Is Resurrected” po o le “The Risen Lord Appears to the Apostles” (ChurchofJesusChrist.org). Pe faaali se isi vitio o le Eseta o loo maua i le Easter.ComeuntoChrist.org.

Aoao atu le Aoaoga Faavae: Tamaiti Matutua

Sa puapuagatia Iesu Keriso mo au i Ketesemane ma luga o le satauro.

A o e suesue i tusitusiga paia i lenei vaiaso, mafaufau loloto pe mafai faapefea ona e fesoasoani i tamaiti e fausia lo latou faatuatua ia Iesu Keriso ma Lana Togiola.

Gaoioiga e Mafai Ona Fai

• Faitau faatasi ma tamaiti le Luka 22:39–44 ma fuaiupu filifilia mai le Mataio 27:29–50. Valaaulia i latou e vaavaai mo upu e fesoasoani ai ia i latou ia malamalama i mea na oo i ai le Faaola i Ketesemane ma luga o le satauro.

• Fesoasoani i tamaiti e tauloto le mataupu faavae lona tolu o le faatuatua. Tuu atu lau molimau o Iesu Keriso o loo i ai le mana e laveai ai i tatou mai agasala ma mai le oti.

• Fesoasoani i tamaiti e sauniuni ni lauga pupuu e uiga i le Togiola a Iesu Keriso e mafai ona latou faasoa atu i isi. Fautuaina i latou e faaaofia ai ma se mau ma a latou molimau i a latou lauga. Afai latou te manaomia se fesoasoani faaopoopo, e mafai ona latou faitau “Togiola, Togiolaina” i le Taiala i Tusitusiga Paia (scriptures.ChurchofJesusChrist.org).

Ona na maliu Iesu ma sa toetu mai, o le a ou toe ola ai foi.

O tamaiti o loo e aoaoina o le a i ai se aso e oti ai foi se e pele pe afai e lei tupu mai lena mea. Ia faamalamalama atu ona ua toetu Iesu Keriso, o le a faapea foi ona tatou toetutu uma ai.

Gaoioiga e Mafai Ona Fai

• Faaali atu ata nu. 57–59 i le Tusi Ata o le Talalelei, ma fai i tamaiti e faafetaui ia ata ma fasifuaitau nei: Mataio 27:29–38, 59–60; Ioane 20:10–18.

• Valaaulia tamaiti e faitau taitoatasi le “Toetu” i le Taiala i Tusitusiga Paia (scriptures.ChurchofJesusChrist.org) ma sue se mea latou te mananao e aoao atu i o latou aiga. Tuu atu le taimi i tamaiti e faasoa mai mea sa latou mauaina.

• Fesoasoani i tamaiti e vaavaai i le faasino autu o le Tusipese a Tamaiti e sue ai se pese latou te mananao e usu e uiga ia Iesu Keriso po o le Toetu. Usu faatasi le pese, ma fesili atu i tamaiti po o a mea ua latou aoaoina mai lenei pese.

• Faaali le vitio “Jesus Is Resurrected” (ChurchofJesusChrist.org), ma valaaulia ni nai tamaiti e faasoa mai a latou molimau e uiga i le Togiola ma le Toetu o le Faaola. (E mafai ona e fai atu i nei tamaiti e fai lenei mea i ni nai aso a o lei amataina le vasega ina ia mafai ona latou saunia.) Valaaulia tamaiti e tusi i lalo a latou molimau e faasoa i le fale.

Uunaia le Aoaoina i le Aiga

Ina ia fesoasoani i tamaiti e faasoa atu i o latou aiga mea sa latou aoaoina, fautuaina i latou e usu se pese e uiga ia Iesu Keriso i le fale i le vaiaso lenei.

Faaleleia o Lo Tatou Aoao Atu

E manuia tamaiti i le fai faafia. Aua le fefe e fai faafia ia gaoioiga, aemaise lava mo tamaiti laiti. O le faifaafia o le a fesoasoani i tamaiti e manatua ai mea e te aoaoina atu.