3–9 Aperila

Eseta

“Le Tu‘ugamau e, O Fea o i ai Lou Manumalo?”

A o e faitauina molimau i le Toetu o le Faaola i lenei ‘oto‘otoga, ia matau lagona ma u‘una‘iga e te maua mai le Agaga Paia.

Tusifaamaumau Ou Lagona Uuna‘i

I le vaiaso faai‘u o le soifuaga o le Faaola, e tele Iutaia na vagavagaia o Ia sa auai i le faatinoga o tu ma aga o le Paseka. Sa latou saunia meaai, lagiina pese, ma sa faapotopoto faatasi e manatua ai le lavea‘iina o le aiga o Isaraelu mai le nofopologa ia Aikupoto. Sa faalogologo aiga i le tala i le agelu o le faafanoga na pasi a’e i luga o fale o o latou tua‘a, o e sa faailogaina o latou faitotoa i le toto o le tama‘i mamoe. E ui ina matua faatumulia nei faafiafiaga i faailoga o le lavea‘iga, ae e toaitiiti lava i latou na iloa o Iesu Keriso, o le Tamai Mamoe a le Atua, ua toeitiiti ona lavea‘iina lea o i latou mai le nofopologa ai i le agasala ma le oti—e ala i Lona puapuagatia, o Lona maliu, ma Lona Toetu. E ui foi i lea, sa i ai foi i latou o e sa iloaina Iesu o lo latou Mesia folafolaina, o lo latou Faaola e faavavau. Mai lava i lena taimi, sa tu‘uina mai ai lava e soo o Iesu Keriso ia molimau i le lalolagi uma “na maliu Keriso ma sui o a tatou agasala … ; na tanu foi o ia, ma toe tu mai i le aso tolu” (1 Korinito 15:3–4).

Manatu mo Suesuega Faaletagata Lava Ia o Tusitusiga Paia

Mataio 21–28

Ua laveaiina a’u e Iesu Keriso mai le agasala ma le oti, faamalolosia a’u i o’u vaivaiga, ma faamafanafanaina a’u i o’u tofotofoga.

O se tasi auala e taulai atu ai i faamanuiaga o le Togiola a le Faaola i lenei vaiaso, o le faaalu lea o se taimi i aso taitasi e faitau ai e uiga i le toe vaiaso o le soifuaga o Iesu (o se faasologa lea o le faitauga e mafai ona fai). O a mea ua e maua i nei mataupu ua fesoasoani e te lagonaina ai le alofa o le Faaola? Mafaufau loloto i mea o aoao ai oe e nei mataupu e uiga i le ala e mafai ai ona Ia laveai oe mai agasala, oti, tofotofoga ma vaivaiga. O faapefea ona e faaaogaina le faatuatua i Lona mana e laveai ai?

• Aso Sa: O le ulu atu logologoa i Ierusalema (Mataio 21:6–11)

• Aso Gafua: Faamamaina o le malumalu (Mataio 21:12–16)

• Aso Lua: Aoao atu i Ierusalema (Mataio 21–23)

• Aso Lulu: Faaauau ona aoao atu (Mataio 24–25)

• Aso Tofi: O le Paseka ma puapuaga o Keriso i le Faatoaga o Ketesemane (Mataio 26)

• Aso Faraile: Faamasinoga, Faasatauroga, ma le tanuga (Mataio 27:1–61)

• Aso Toonai: Ua taoto le tino o Iesu i le tuugamau (Mataio 27:62–66) a o galue o Ia i le lalolagi o agaga (Mataupu Faavae ma Feagaiga 138)

• Aso Sa: O le Toetu o Iesu Keriso ma le faaali atu i Ona soo (Mataio 28:1–10)

Tagai foi i le Easter.ComeuntoChrist.org.

Faasatauroga, saunia e Louise Parker

Mataio 28:1–10; Luka 24:13–35; Ioane 20:19–29; 1 Korinito 15:1–8, 55

Ua tuu atu e Paulo le faamaoniga o le Toetu o Iesu Keriso.

Manatu pe mata o a ni lagona o le au soo i le matamata atu ia Iesu o tauemuina, soona faia, ma faasatauroina. Sa latou molimauina Lona mana, lagonaina le moni o Ana aoaoga, ma sa faatuatua o Ia o le Alo o le Atua. O le molimauina o Lona maliu atonu na mafua ai ona lagona e Ono soo le faavauvau ma le le mautonu. Ae e lei pine ae avea i latou ma molimau i le vavega maoae o Lona Toetu.

O le a se mea ua mafai ona e aoao mai tala a i latou o e sa molimauina le Faaola Toetu? Maka pe matau aafiaga o tagata taitasi i le Mataio 28:1–10; Luka 24:13–35; Ioane 20:19–29; ma le 1 Korinito 15:1–8,55. (O isi molimau o le Keriso toetu e mafai ona maua i le 3 Nifae 11; Mamona 1:15; Eteru 12:38–39; Mataupu Faavae ma Feagaiga 76:19–24; 110:1–10; ma le Iosefa Samita—Talafaasolopito 1:15–17.) O le a se mea e faagaeetia ai oe i molimau a nei molimau? Ina ua mavae le Toetu o le Faaola, sa toetutu mai isi ma faaali atu i le toatele (tagai Mataio 27:52–53; 3 Nifae 23:9). E faapefea e lou faatuatua i le Faaola ma le folafolaga o le toetutu ona faatosinaina le ala e te ola ai?

Tagai foi “Ua Toetu mai Iesu,” “O le Alii Toetu ua Faaali atu i le Au Aposetolo,” “Amuia i Latou O E Lei Vaai, Ae Talitonu Mai Pea” (vitio, ChurchofJesusChrist.org.

1 Peteru 1:3–11

Ua aumaia e Iesu Keriso ia te au le faamoemoe ma le olioli.

O a upu po o fasifuaitau o i le 1 Peteru 1:3–11 ua avatu ai ia te oe le faamoemoe ona o Iesu Keriso? O anafea na e lagona ai lena faamoemoe?

Na molimau mai Elder Gerrit W. Gong e faapea, o le Toetu “ua maua ai le faamoemoe e i latou o e ua leai ni aao; o e ua le mafai ona pupula, faalogo, pe savavali; po o e ua e faapea, o le manatu ua leiloloa i faama’i ogaoga, faama’i o le mafaufau, po o isi gafatia ua faaitiitia. Na te sueina i tatou ia maua. Na te faaatoatoaina i tatou. … [Ma,] talu ai ‘ua togiola ai e le Atua lava ia mo agasala a le lalolagi’ [Alema 42:15], … Na te mafai, faatasi ai ma le alofa mutimutivale, ona fesoasoani ia i latou e tusa ai ma o tatou vaivaiga. … Tatou te salamo ma faia mea uma tatou te mafaia. Na te siomia i tatou e faavavau ‘i aao o lona alofa’ [2 Nifae 1:15]” (“Osana ma Aleluia—O Le Iesu Keriso Soifua: O Le Fatu lea o le Toefuataiga ma le Eseta,” Liahona, Me 2020, 54).

Tagai foi Alema 27:28; 36:1–24; 3 Nifae 9:11–17; Moronae 7:40–41.

Manatu mo Suesuega Faaleaiga o Tusitusiga Paia ma Afiafi Faaleaiga

ComeuntoChrist.org.O leEaster.ComeuntoChrist.org o loo i ai se faasologa o taimi ma faamatalaga o mea na tutupu i aso taitasi o le vaiaso mulimuli o le soifuaga o le Faaola. O aso taitasi o le vaiaso e mafai e lou aiga ona toe iloilo nei faamatalaga ia iloa ai mea na faia e le Faaola i lena aso, pe e mafai foi ona outou faitau o se aiga i mau e uiga i Lona vaiaso mulimuli (tagai i se lisi fautuaina o loo i le vaega o “Manatu mo Suesuega Faaletagata Lava Ia o Tusitusiga Paia”).

Viiga ma le Tusipese a Tamaiti.Mafaufau e usu faatasi ni pese e uiga i le Togiola ma le Toetu o le Faaola i le vaiaso lenei, e aofia ai ni pese tou te tau le masani ai. (Tagai i le faasino autu o le Viiga po o le Tusipese a Tamaiti, i lalo o autu e pei o le “Togiola,” “Eseta,” po o le “Toetu.”) Ina ia fesoasoani i tagata o le aiga e aoao ia pese, e mafai ona e faaali i ai ata e o faatasi ma upu.

“Jesus Christ” tuufaatasiga i le Gospel Library.O le tuufaatasiga a le Gospel Library ua faaautuina “Jesus Christ” e aofia ai vitio, galuega o faatufugaga, ma musika e mafai ona fesoasoani i lou aiga e faamanatu ai le Toetu o le Faaola i lenei Eseta.

“O Le Keriso Soifua: O Le Molimau a Aposetolo,”Ia faitau o se aiga le “O Le Keriso Soifua: O Le Molimau a le Au Aposetolo” (ChurchofJesusChrist.org). Valaaulia tagata taitoatasi o le aiga e filifili se savali o le Eseta mai lenei molimau e faasoa atu i isi. Mo se faataitaiga, e mafai ona e faia ni pepa i ai se savali e faaali i luga o le upega tafailagi, i luga o tou faitotoa pito i luma, po o totonu o le tou fale.

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ua Toetu Iesu,” Tusipese a Tamaiti, 44.

Faaleleia o Suesuega Faaletagata Lava Ia

Faatutu ni sini e mafai ona ausia. O le faaalu o ni nai minute faaopoopo i se aso e suesue ai i tusitusiga paia e mafai ona faamanuia ai lou olaga. Tautino atu e suesue i aso taitasi, sue se ala e faamanatu ai ia te oe lava lau tautinoga, ma faia le mea sili e te mafaia e mulimulita’i ai i ai. Afai ua galo ia oe, aua le fiu. Na’o le toe amata lava.

Ketesemane, saunia e Adam Abram