Iesu o loo savavali ma le ‘au soo o tau‘ave ‘ato falaoa

27 Mati–2 Aperila.

Mataio 14; Mareko 6; Ioane 5–6

“Aua Tou Te Matata’u”

A o e faitauina le Mataio 14; Mareko 6; ma le Ioane 5–6, vaavaai mo upumoni e ‘anoa ia te oe. Atonu e te fesili ifo ia te oe lava ni fesili e pei o le “E faapefea ona fetaui ia te a‘u tala o i nei mataupu? “O a savali ua ou mauaina mo lo’u olaga?” po o le “Mata o le a se mea ou te fia faasoa atu i lo’u aiga ma isi?”

Tusifaamaumau Ou Lagona Uuna‘i

Mata o le a se mea na musuia Peteru e tu‘ua le saogalemu o lona vaa i le totonugalemu o le Sami o Kalilaia i le taimi o se afa matautia? O le a le mea na tata’i atu ai o ia e talitonu afai e mafai e Iesu ona savali i luga o le vai, e mafai foi e ia? E le mafai ona tatou iloa ma le mautinoa, ae peitai atonu na malamalama Peteru na afio mai le Alo o le Atua e le na ona faia o mea ofoofogia mo tagata ae ia faamamanaina foi tagata e faapei o Peteru e faia foi mea ofoofogia. O le valaaulia a Iesu, i lona aotelega, o le “Sau, mulimuli mai ia te au” (Luka 18:22). Na talia faatasi e Peteru lenei valaaulia, ma sa naunau o ia e toe taliaina, tusa pe iu ai ina feagai ma le atuatuvale ma le faia o mea e foliga e le mafai. Atonu o le a le fai mai le Alii ia i tatou e oso ese mai se vaa i le taulotoaiga o se afa pe saofaga atu sina falaoa itiiti pe a fiaafe tagata e fiaaai, ae atonu e fesili mai o Ia ia tatou talia faatonuga e tuuina mai pe a tatou le matuai malamalama atoatoa i ai. Po o a lava Ana valaaulia ia te i tatou, atonu o nisi taimi e foliga mai o se mea e ofo ai pe taufaafefe foi. Ae e mafai ona tutupu vavega pe afai tatou te, pei o Peteru, tuu ese o tatou popolega, o tatou masalosaloga, ma lo tatou malamalama utiuti ae mulimuli atu ma le faatuatua ia te Ia.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Ioane 5:16–47

E faamamalu e Iesu Keriso Lona Tama

O le sootaga a le Tama Faalelagi ma Ana fanau taitoatasi e ao ina o se sootaga e paia. I nei fuaiupu, sa tuu mai ai e Iesu Keriso se faataitaiga musuia e mulimuli ai i la tatou sootaga ma le Tama Faalelagi. Faitau le Ioane 5:16–47, ma maka pe matau taimi taitasi e ta’ua ai le upu Tama Pe faapefea ona faamamaluina e le Alo le Tama, ma pe mafai faapefea ona e mulimuli i Lana faataitaiga? O le a se mea ua e aoao mai pe faapefea lagona o le Tama i le Alo? O a ni mea o musuia oe e faia e faamalosi ai le lua mafutaga ma lou Tama Faalelagi?

Tagai foi Ioane 17; Jeffrey R. Holland, “O Le Silisiliese o le Atua,” Liahona, Nov. 2003, 70–73.

areto ma i’a

Na fafagaina faavavega e Iesu le lima afe o tagata i falaoa e lima ma i’a e lua.

Mataio 14:15–21; Mareko 6:33–44; Ioane 6:5–14

E mafai e le Faaola ona faalauteleina ni taulaga maualalo e faataunuuina ai Ona faamoemoega.

Pe na i ai se taimi na e lagonaina ai lou le agavaa e faafetaiaia manaoga uma e te vaaia i lou siomaga—i lou fale, i au fegalegaleaiga, po o le nuu? Atonu ai na lagonaina e soo o Iesu le le agavaa ina ua Ia fai atu ia te i latou e fafaga le silia ma le lima afe o tagata fiaaai i le taimi sa na o le lima potoi areto ma i’a e lua na i ai. A o e faitau e uiga i le vavega sa sosoo ai, manatunatu loloto pe na faapefea ona faaaoga e le Atua o taulaga faatauvaa ole auaunaga e faamanuiaina ai i latou o siomia oe. Pe na faapefea ona Ia faalauteleina au taumafaiga ao e auauna atu ia te Ia? Mafaufau i le faamatalaga lenei mai ia Sister Michelle D. Craig: “E mafai e oe ma a’u ona avatu mea ua ia i ta’ua ia Keriso, ma o le a Ia faateleina a tatou taumafaiga. O mea e te ofoina atu ua sili atu ona lava—e tusa po o a ou sesē ma vaivaiga faaletagata—pe afai e te faalagolago i le alofa tunoa o le Atua” (“Lē Faamalieina Faaleagaga,” Liahona, Nov. 2018, 54).

Mataio 14:22–33; Mareko 6:45–52; Ioane 6:15–21

Ua valaaulia au e Iesu Keriso e tuu ese o’u popolega ma masalosaloga ae faaaoga le faatuatua ia te Ia.

Vaai faalemafaufau i faamatalaga o le vaaiga o loo faamatala mai i le Mataio 14:22–33; Mareko 6:45–52; ma le Ioane 6:15–21. Mafaufau pe mata o a ni lagona o Peteru ma isi soo. O le a se mea ua e aoaoina mai le faataitaiga a le Faaola i nei upu ma faatinoga i nei fuaiupu? O le a se mea ua aoao mai upu ma faatinoga a Peteru? (Tagai foi 1 Nifae 3:7.) O le a se mea o valaaulia oe e le Alii e fai e foliga faapei o le laa ese mai le vaa? O le a se mea ua e maua i nei fuaiupu ua avatu ai ia te oe le lototoa e faaaoga lou faatuatua ia Iesu Keriso?

Ioane 6:22–71

I le avea ai o se soo o Iesu Keriso, e tatau ona ou naunau e talitonu ma talia le upumoni, tusa lava pe faigata ona fai.

Ina ua faasino Iesu ia te Ia lava o “le areto o le ola” (Ioane 6:48), e toatele sa manatu i lenei fetalaiga o se “upu faigata” (Ioane 6:60). E mafai faapefea e upu a Peteru i le Ioane 6:68–69 ona fesoasoani ia te oe i taimi e foliga mai ua faigata ai ona talia pe ola i aoaoga faavae a le Faaola? O le a se mea ua faagaeetia ai oe e uiga i le molimau a Peteru? O a ni nai “upu o le ola e faavavau” (Ioane 6:68) ua fesoasoani ia te oe e tautino atu e mulimuli i le Faaola?

Tagai foi M. Russell Ballard, “O Ai Ea a Matou O I Ai?,” Liahona, Nov. 2016, 90–92.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 14:15–21..Mafaufau pe ono faapefea ona e fesoasoani i lou aiga e vaai faalemafaufau pe fia se tele o ni falaoa ma ia o le a fafagaina ai tagata e lima afe. O le a se mea o aoao mai ai i tatou e le vavega i le Mataio 14:15–21 e uiga i le Faaola? Mafaufau e faasoa atu se aafiaga i se taimi na e lagonaina ai sa le’i lava ni au mea e ofo atu ae na faateleina e le Faaola au taumafaiga.

Mataio 14:22–33.E ono fiafia lou aiga e toefaatino le tala o i fuaiupu nei. Mata aisea na ono fefefe ai le au soo? Aisea na mafai ai e Peteru ona faatoilalo lona fefe ma tuua le vaa? Na faapefea ona ia faaalia le faatuatua e ui ina ua amata ona magoto? E faapefea ona tatou pei o Peteru i nisi o taimi?

Ioane 5:1–16.Valaaulia tagata o le aiga e matau taimi o loo ta’u mai ai le fasifuaitau “ua e malolo” i nei fuaiupu. Ua mafai faapefea e Iesu Keriso ona faamalolo tagata? O anafea ma sa faapefea foi ona Ia faamalolo i tatou?

Ioane 6:28–58.Tufa ia tofu tagata taitasi o le aiga ma se fasi falaoa e ‘ai, ma talanoaina aoga tatou te maua mai le falaoa ma isi meaai maloloina. Ona sailiili faatasi lea o fuaiupu nei, ma vaavaai pe aisea na faaigoa ai e Iesu Keriso o Ia lava o le “areto o le ola” (Ioane 6:35). Mata o le a le uiga o le “ai” le areto o le ola? (tagai D.Todd Christofferson, “O Le Areto Ola Na Alu Ifo Mai le Lagi” Liahona, Nov. 2017, 36–39).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Ma’eu le Poto ma le Alofa,” Viiga, nu. 109.

Faaleleia Suesuega Faaletagata Lava Ia

Sailia ou lava malamalamaaga faaleagaga. I lau lava suesuega ma suesuega faaleaiga, aua nei faatuaoia oe lava i mau o loo ta’u atu i otootoga nei. E ono i ai ni savali a le Alii mo oe inei mataupu e le o aofia ai ii. Ia sailiili i ai ma le agaga tatalo.

O Iesu o loo sisi ae i luga Peteru mai le vai

Against the Wind, saunia e Liz Lemon Swindle