o le Samaria agalelei

O Le Samaria Agalelei, saunia e Dan Burr

17–23 Aperila

Mataio 18; Luka 10

“Se A Se Mea Ou Te Faia Ou te Maua ai le Ola e Faavavau”

A o e faitauina ma le agaga tatalo ma manatunatu loloto i le Mataio 18 ma le Luka 10, mata‘itu ia uuna‘iga filemu a le Agaga Paia. O le a ia ta’u atu ia te oe pe faapefea ona faatatau nei a‘oa‘oga ma tala ia te oe. Tusi faamaumau lagona uuna‘ia e te maua.

Tusi Faamaumau Ou Lagona Uuna‘i

Pe a e fai atu se fesili i le Alii, e te ono maua se tali e te le‘i mafaufauina. O ai lo’u tuaoi? Soo se tasi e mana‘omia lau fesoasoani ma le alofa. O ai ea e sili i le malo o le lagi? O se tamaitiiti. Pe ua lava ea le faamagalo faafitu o se na faatausuai mai E leai, e tatau ona faafitugafulu ni fitu ona e faamagalo atu. (Tagai Luka 10:29–37; Mataio 18:4, 21–22.) O tali e le’i mafaufauina mai le Alii e mafai ona valaaulia ai i tatou e sui le ala tatou te mafaufau, manatu, ma faatino ai. Afai o e sailia le finagalo o le Alii ona o lou manao moni e aoao mai ia te Ia, o le a aoao oe e le Alii i le ala e te ola ai i se ala e tau atu ai i le ola e faavavau faatasi ma Ia.

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 18:21–35

E tatau ona ou faamagalo i isi pe afai ou te manao ia maua le faamagaloga mai le Alii.

O le fautuaga a Peteru faapea e mafai ona ia faamagaloina faafitu se tasi atonu e foliga mai ua matua agalelei tele, ae na aoao atu e Iesu se tulafono maualuga atu. O Lana tali, “Ou te le fai atu ia te oe, seia atu fitu, a Ia fitugafulu ni fitu” (fuaiupu 22), sa lei aoao mai e uiga i fuainumera ae sa faatatau i le atinaeina o se uiga faa-Keriso o le faamagalo atu. A o e faitauina le faataoto i le auauna le alofa, manatunatu loloto i taimi na e lagonaina ai le alofa ma le alofa mutimutivale o le Atua. Pe i ai se tagata e manao ia lagonaina lou alofa ma le alofamutimutivale?

Sa tuuina mai e Elder David E. Sorenson le lapataiga taua lenei: “E ui lava e tatau ona tatou faamagalo atu i se tuaoi e faatiga mai ia te i tatou, ae e tatau lava ona tatou galulue i se auala lelei e puipuia mai ai lena tiga po o le manua mai le toe tupu mai. … O le faamagalo atu e le manaomia ai lo tatou taliaina po o le faapalepale i le leaga. … Peitai, a o tatou tetee atu i agasala, e le tatau ona tatou faatagaina le inoino po o le ita e puleaina o tatou mafaufauga po o faatinoga” (“O Le Loto Faamagalo E Suia ai le Oona Matuitui i le Alofa,” Liahona, Me 2003, 12).

Luka 10:1–20

O ai le au Fitugafulu?

I le mulimuli ai i se mamanu sa faavaeina i taimi o le Feagaiga Tuai, (tagai Esoto 24:1; Numera 11:16), na “tofia [e Iesu Keriso] isi toafitugafulu,” e faaopoopo i Aposetolo e Toasefululua, e molimau ia te Ia, folafola Lana talalelei, ma lagolago atu ia te Ia i Lana galuega. O loo faaauau pea lenei mamanu i le Ekalesia toefuataiina. Ua valaauina Fitugafulu e fesoasoani i le Toasefululua i la latou misona o ni molimau faapitoa a Iesu Keriso i le lalolagi uma.

tagai foi i le Mataupu Faavae ma Feagaiga 107:25–26, 33–34, 97

Luka 10:25–37

Ina ia maua le ola e faavavau, e tatau ona ou alofa i le Atua ma alofa i lo’u tuaoi e pei o a’u lava.

E aoga le manatua o le faataoto i le Samaria agalelei o le auala lea na tali atu ai Iesu i fesili e lua: “Se a se mea ou te faia ou te maua ai le ola e faavavau?” ma le “O ai lo’u tuaoi?” (Luka 10:25, 29). A o e faitauina lenei faataoto, ia manatua fesili nei. O a tali ua e maua?

I ona po o Iesu, sa tele seneturi na i ai le feitaga’i i le va o Iutaia ma tagata Samaria. O tagata Samaria o ni e tupuga mai Iutaia sa nonofo i Samaria o e sa fenonofoa’i ma tagata o Nuuese. Sa manatu Iutaia ua leaga tagata Samaria i lo latou faapaaga ma Nuuese ma ua latou liliuese ai. E faimalaga tagata Iutaia i le tele o maila ina ia alofia ai lo latou ui atu i Samaria. (Tagai foi Luka 9:52–54; 17:11–18; Ioane 4:9; 8:48.)

O le a sou manatu aisea na filifili ai e le Faaolaia Samaria, o se sa inosia e Iutaia, e fai ma faataitaiga o le lotoalofa ma le alofa i se tuaoi? O le a se mea ua musuia oe e lenei faataoto e fai?

Tagai foi Mosaea 2:17; “Parable of the Good Samaritan” and “A Good Samaritan” (vitio), ChurchofJesusChrist.org).

Luka 10:38–42

Tatou te filifili “lena mea lelei” i le faia o filifiliga i aso taitasi e tau atu i le ola e faavavau.

I le Luka 10:38–42, sa valaaulia malie e Iesu ia Mareta ia ese lona mafaufau e uiga i le ala sa ia faaaluina ai lona taimi. Ina ua uma ona sii mai o nei fuaiupu, sa aoao mai Sister Carlo F. McConkie: “Afai o le a tatou paia, e ao ona tatou aoao ia saofafai i vae o le Paia e Toatasi o Isaraelu ma tuu atu le taimi i mea paia. O tatou tuueseina le telefoni, lisi e le muta o mea e fai, ma popolega faalelalolagi? O le tatalo, suesue, ma le usiusitai i le afioga a le Atua e valaaulia ai Lona alofa faamamaina ma faamalolo e oo mai i totonu o o tatou agaga. Sei o tatou faaaluina se taimi e faapaia ai, ina ia mafai ona faatumuina i tatou i Lona Agaga paia ma le faapaiaina” (“O Le Matagofie o le Paia,” Liahona, Me 2017, 11). Atonu foi e te manao e iloilo po o faapefea ona e faaaluina lou taimi —e oo lava i mea lelei. Pe o i ai se mea “e manaomia” (fuaiupu 42) tele atu se mataituuga e tuu i ai?

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 18:1–11.Aisea e manao ai Iesu ia tatou avea faapei o se tamaitiiti? O a ni uiga auaumama e i ai i tamaiti e mafai ona tatou atinaeina e avea atili ai e pei o Keriso? (tagai Mosaea 3:19).

Iesu ma tamaiti

E finagalo Iesu i Ona soo ia avea e faapei o tama iti.

Mataio 18:15.E mafai faapefea ona tatou faaaogaina le fautuaga i le Mataio 18:15 o fegalegaleaiga a lo tatou aiga? E faapefea ona faamanuiaina lo tatou aiga i le faia o lea mea?

Mataio 18:21–35.O le a se mea o aoao mai e lenei faataoto ia i tatou e uiga ia Iesu Keriso? O le a se mea o aoao mai ia i tatou e uiga i le ala tatou te taulima ai isi?

Luka 10:25–37.E mafai ona fiafia tagata o le aiga i le faiga o ni ofu faaleaganuu ma faatino le faataoto lenei? E faapefea ona tatou pei o tagata eseese o loo i le faataoto? E faapefea ona pei le Faaola o le Samaria agalelei? E mafai faapefea ona tatou faapei o le Samaria agalelei?

Atonu tou te usuina faatasi se viiga po o se pese a tamaiti e lagolagoina upumoni o loo i lenei faataoto. O tasi faataitaiga o le “Faaola e, Ia Ou Alofa” (Viiga, nu. 150) ae e tele isi. Atonu e fiafia tagata o le aiga e su’e se viiga po o se pese ma faamatala le ala e fesootai ai i le faataoto.

Luka 10:38–42.Pe faigata ea ona faaofi mea faaleagaga i le fuafuaga o mea fai a lou aiga? O le tala ia Maria ma Mareta e mafai ona musuia ai se fono faaleaiga po o se afiafi faaleaiga i le ala e fai ai ia lelei atu lenei mea. I le avea ai o se aiga, e mafai ona tou faia se lisi o auala e filifili ai “lea mea lelei” (Luka 10:42).

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Fetalai Mai Iesu e Alofa i Tagata Uma,” Tusipese a Tamaiti, 39.

Faaleleia o Lo Tatou Aoao Atu

Faafailele se siosiomaga alofa. O lagona o tagata o le aiga ma le ala e taulima ai e le tasi le isi e mafai ona matua tosina ai le agaga i lo outou fale. Fesoasoani i tagata uma o le aiga e fai a latou vaega ile atinaeina o se aiga alofa, ma le faaaloalo ina ia lagona ai e tagata uma le saogalemu e fefaasoaai aafiaga, fesili, ma molimau. (Tagai Aoao Atu i le Ala a le Faaola,15.)

Keriso faatasi ma Maria ma Mareta

Keriso i le Fale o Maria ma Mareta, saunia e Walter Rane