O Le Liuaina o Keriso

O Le Liuaina, saunia e Carl Heinrich Bloch

10–16 Aperila

Mataio 15–17; Mareko 7–9

“O Oe o le Keriso”

O le faitauina o tusitusiga e valaaulia ai le Agaga Paia i lou olaga. O se tasi o misiona taua a le Agaga Paia o le molimau lea ia Iesu Keriso. A o e faitau i tusitusiga i le vaiaso lenei, ia gaua‘i atu i lagona faaleagaga na faamalosia ai lau molimau i le Faaola.

Tusifaamaumau Ou Lagona Uuna‘i

Pe le mata‘utia ea le tapa e le au Faresaio ma le au Satukaio ia faailoa atu e Iesu “se faailoga mai le lagi”? Pe le’i lava ea Ana mau vavega e tele ua lauiloa? Ae faapefea Ana a‘oa‘oga mamana po o auala e tele sa Ia faataunuuina ai valo‘aga anamua? O la latou tapa faamalosi e lei uunaia ona o se le lava o faailoga ae o se le mananao e “iloatino ia faailoga” ma taliaina. (Tagai Mataio 16:1–4.)

O Peteru, pei foi o le au Faresaio ma le au Satukaio, sa molimauina ia vavega a le Faaola ma sa faalogo i Ana aoaoga. Ae o le molimau maioio a Peteru, “O oe o le Keriso, le Alo o le Atua soifua,” e lei maua mai i sane faaletino—lona “tino ma le toto.” O lana molimau sa faaali atu ia te ia e lo tatou “Tama oi le lagi.” Faaaliga o le papa lea ua faatu e le Faaola Lana Ekalesia i lena taimi ma i le taimi nei—o faaaliga mai le lagi i Ana auauna. Ma o le papa lea e mafai ona tatou fausia ai lo tatou avea ma soo—o le faaaliga o Iesu o le Keriso ma o Ana auauna o loo umia “ki o le malo.” A tatou atinae i luga o lenei faavae, “e le mafai e faitotoa o seoli ona manumalo ia [i tatou]” (Mataio 16:15–19).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 16:13–17

O se molimau ia Iesu Keriso e oo mai e ala i faaaliga.

Afai e fesili mai Iesu Keriso i tagata i aso nei, “Pe se a le upu a tagata ia te Au le Atalii o le Tagata?” mata o le a se latou tala? E faapefea ona e tali atu pe a fesili atu Iesu ia te oe, “Pe se a la outou upu ia te au po o ai?” (Tagai Mataio 16:13–15.)

Manatunatu loloto i lau molimau i le Faaola ma pe na faapefea ona e mauaina. O le a se mea ua e aoaoina mai le Mataio 16:15–17 e mafai ona faamalosia ai? A e manao e aoao atili e uiga i molimau ma faaaliga patino, sailiili i mau nei: Ioane 15:26; 2 Nifae 31:17–18; Alema 5:45–48; ma le Mataupu Faavae ma Feagaiga 8:2–3.

Tagai foi “President Nelson: Hear Him—Personal Revelation” (vitio), ChurchofJesusChrist.org.

Mataio 16:13–19; 17:1–9; Mareko 9:2–9

“O ki o le malo o le lagi” ua i ai i le lalolagi i aso nei.

“O “ki o le malo o le lagi” ia na folafola mai e le Faaola e avatu ia Peteru o ki o le perisitua (Mataio 16:19). O a ki o le perisitua? Aisea tatou te manaomia ai? Mafaufau loloto i fesili nei a o e faitau e uiga i le folafolaga a le Faaola i le Mataio 16:13–19 ma lona faataunuuina i le Mataio 17:1–9; Mareko 9:2–9 (tagai foi Faaliliuga a Iosefa Samita, Mareko 9:3 [i le Mareko 9:4, vaefaamatalaga a]).

O isi punaoa e fesoasoani ia te oe e aoao ai e uiga i ki o le perisitua e aofia ai le Mataupu Faavae ma Feagaiga 65:2; 107:18–20; 110:11–16; 128:9–11; “Ki o le Perisitua” i le Taiala i Tuisitusiga paia (scriptures.ChurchofJesusChrist.org); ma le savali a Elder Gary E. Stevenson “O Fea o I Ai Ki ma le Pule o le Perisitua?,” (Liahona, Me 2016, 29–32). A o suesue i nei punaoa, mafaufau e fai se lisi o mea ua e aoao mai e uiga i ki o le perisitua ma faamanuiaga e maua mai ai. Aisea e te manatu ai o se ki o se faailoga lelei mo le aia tatau e taitai ai le auaunaga faaleperisitua?

Tagai foi Dallin H. Oaks, “O Le Perisitua Mekisateko ma Ki,” Liahona, Me 2020, 69–72; Bible Dictionary, “Transfiguration, Mount of.”

faatagata o Peteru o loo umia ki

O ki o le perisitua o le pule lea e faatonutonu ai le faaaogaaga o le perisitua.

Mataio 17:14–21; Mareko 9:14–29

Pe a sailia se faatuatua sili atu, e mafai ona ou amata i le faatuatua ua ia te au.

O le tama o loo ta’ua i le Mataio 17 ma le Mareko 9 sa i ai ni mafuaaga e lagona le le mautonu e mafai e Iesu ona faamalolo lona atalii. Sa ia talosaga atu i soo o Iesu e faamalolo lona atalii, ae le mafai ona latou faia. Ae ina ua ia ole atu i le Faaola mo se vavega, sa ia filifili e faaali atu le faatuatua. “Le Alii e, ua ou faatuatua,” na ia fai atu ai. Ma, i le faailoa atu sa le atoatoa lona faatuatua, sa ia faaopoopo atu ai, “Ia e fesoasoani i lo’u le faatuatua.”

O le a le mea sa aoao atu e le Agaga ia te oe a o e faitau i lenei vavega? Ua faapefea ona fesoasoani le Tama Faalelagi ia te oe ia faateleina lou faatuatua? O le a se mea e mafai ona e faia e atinae ai i luga o lou faatuatua ua i ai? Atonu e mafai ona e faia se lisi o mau, savali o konafesi, po o aafiaga na faamalosia ai lou faatuatua.

Tagai foi Jeffrey R. Holland, “Le Alii e, ua Ou Faatuatua,” Liahona, Me 2013, 93–95.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 15:7–9; Mareko 7:6–7.O le a le eseesega i le va o le ava i le Atua i o tatou laugutu po o upu, ma le faamamaluina o Ia i o tatou loto?

Mataio 15:17–20; Mareko 7:18–23.Aisea tatou te faaeteete ai i mea tatou te tuu i totonu o o tatou gutu? E faavae i mea na aoao mai e Iesu i nei fuaiupu, aisea la e tatau ai ona tatou faaeteete atili e uiga i mea e o mai i fafo o o tatou gutu—ma mai fafo o tatou loto? E mafai faapefea ona tatou tausia o tatou loto ia mama?

Mataio 16:15–17.E faapefea ona faaali mai e le Atua ia i tatou o Iesu “o le Keriso, o le Alo o le Atua soifua”? (fuaiupu 16). E mafai faapefea ona tatou saunia i tatou lava ia maua lenei faaaliga mai ia te Ia?

Mataio 16:13–19; 17:1–9.Ina ia aoao le fanau e uiga i ki o le perisitua, e mafai ona e faamatalaina le tala a Elder Gary E. Stevenson e uiga i le le mafai ona alu i totonu o lana taavale ona sa loka (tagai i le vitio “Where Are the Keys?” i le ChurchofJesusChrist.org). E mafai ona e tuu atu i lau fanau e faaaoga ki e tatala ai le fale, le taavale, po o isi loka. Mafaufau e faasino atu se ata o le Peresitene o le Ekalesia ma molimau atu o loo ia umia ki uma o le perisitua, e faapei ona sa faia e Peteru.

Mataio 17:20.O perofeta e faatuatua ia Iesu Keriso ua latou fulia moni ia mauga (tagai Iakopo 4:6; Mose 7:13). Ae o le mea masani lava, e le o le vavega lena tatou te manaomia. Na aoao mai Peresitene Russell M. Nelson: “Afai e laitiiti lo tatou faatuatua e pei o le fua o le sinapi, e mafai ona fesoasoani le Alii ia i tatou e aveesea mauga o le lotovaivai ma le masalosalo i galuega o i luma atu o i tatou a o tatou auauna atu faatasi ma fanau a le Atua, e aofia ai tagata o aiga, tagata o le Ekalesia, ma i latou e le o ni tagata o le Ekalesia” (“Precious Gifts from God,” Liahona, Me 2018, 10). O a ni mauga i o tatou olaga e manaomia ona fuliese? E mafai faapefea ona faaalia le faatuatua i le mana o le Atua e fesoasoani ai ia i tatou e fuliese nei mauga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Ou Te Talitonu ia Iesu,” Viiga,, nu.71

Faaleleia o Lo Tatou Aoao Atu

Faapotopoto soo faatasi. Na aoao mai Peresitene Henry B. Eyring: “Aua lava nei misia se avanoa e faapotopoto faatasi ai le fanau e aoao i aoaoga faavae a Iesu Keriso. E seasea maua na taimi pe a faatusatusa i taumafaiga a le fili” (“The Power of Teaching Doctrine,” Ensign,, May 1999,74).

o le tamaloa ma lona atalii ma’i i luma o Iesu

Le Aoao e, ua Ou Au Mai ia te Oe Lou Atalii, saunia e Walter Rane