20–26 Mati

Mataio 13; Luka 8;13

“O Le Ua i ai Taliga e Faalogo ai, ina Faalogo Mai ia o Ia”

A o e faitauina le Mataio 13 ma le Luka 8;13, mafaufau pe o le a faapefea ona e saunia oe lava e “faalogo” ma talisapaia a‘oa‘oga a le Faaola i nei faataoto. O le a se mea o le a e faia e faaaoga ai nei a‘oa‘oga i lou olaga?

Tusifaamaumau Ou Lagona Uuna‘i

O nisi o a‘oa‘oga aupito manatua pea a le Faaola sa aumai i ni tala faigofie e ta’ua o fa‘ata‘oto. Sa sili atu i le na o se talafaatusa malie e uiga i mea faitino masani po o mea na tutupu. Sa aofia ai upumoni maoa‘e e uiga i le malo o le Atua mo i latou o e sa saunia faaleagaga. O se tasi o ulua‘i fa‘ata‘oto na tusia i le Feagaiga Fou—o le fa‘ata‘oto i le lulu saito (tagai Mataio 13:3–23)—e valaaulia ai i tatou e su‘esu‘e lo tatou saunia e talia le afioga a le Atua. “Aua o ai lava e taliaina,” na fetalai ai Iesu, “o ia lea o le a tuuina atu i ai, ma o le a ia maua atili ai lava” (Faaliliuga a Iosefa Samita, Mataio 13:10 [i le Mataio 13:12, vaefaamatalagaa]). O lea a o tatou sauniuni e suesue i faataoto a le Faaola—po o soo Sana aoaoga—o se nofoaga lelei e amata ai o le suesueina lea o o tatou loto ma ia filimaoti pe o tatou tuuina le upu a le Atua i se “eleele lelei” (Mataio 13:8) ia ola ai, ma fuga mai, ma talaulau, ma fua mai ai ni fua o le a faamanuiaina tele ai i tatou ma o tatou aiga

Manatu mo Suesuega Faaletagata Lava Ia o Tusitusiga Paia

Mataio 13:3-23; Luka 8:8:4–15; 13:6–9

E tatau ona saunia lo’u loto ia maua le afioga a le Atua.

Aisea e talia gofie ai i isi taimi e o tatou loto le upumoni, ae o isi taimi e tofotofoina ai i tatou ia teenaina? O le faitauina o le faataoto i le tagata lulu saito e mafai ona tuuina atu ai se avanoa lelei e mafaufau ai, po o le a le lelei o loo e maua ai le upumoni mai le Alii. Atonu e aoga le faafetaui o fuaiupu 3–8 o le Mataio 13 ma faaliliuga o loo tuuina mai i fuaiupu 18–23. O le a se mea e mafai ona e faia e atinae ai se “eleele lelei” ia te oe lava ia? O a nisi o “vaotuitui” e taofia ai oe mai le faalogo ma mulimuli i le afioga a le Atua? E mafai faapefea ona e faatoilaloina nei “vaotuitui”?

O au suesuega o lenei faataoto e mafai foi ona faatosina ai le ala e te faitaua ai le faataoto i le Luka 13:6–9. O le a le “fua” o loo sailia e le Alii mai ia i tatou? E faapefea ona tatou tausia o tatou eleele ina ia tatou “fua mai”?

Tagai foi i le Mosaea 2:9; Alema 12:10–11; 32:28–43; Dallin H. Oaks, “O Le Faataoto i le Lulu Saito,” Liahona, Me 2015, 32–35.

Mataio 13:24–35, 44–52; Luka 13:18–21

Ua fesoasoani faataoto a Iesu ua ou malamalama ai i le ola ma le taunuuga o Lana Ekalesia.

Sa aoao mai le Perofeta o Iosefa Samita e faapea o faataoto o i le Mataio 13 o loo faamatala mai ai le ola ma le taunuuga o le Ekalesia i aso e gata ai. Atonu e te toe iloiloina upu a le Perofeta i le Aoaoga a Peresitene o le Ekalesia: Iosefa Samita (2007), 293–303, ao e mafaufau po o a ni mea e aoao atu e faataoto nei ia te oe e uiga i le Ekalesia a le Alii:

• O le saito ma le titania (13:24–30, 36–43)

• O le fua o le sinapi (Mataio 13:31–32)

• O le mea faafefeteina (13:33)

• O le oa natia ma le penina tau tele (13:44–46)

• O le upega (13:47–50)

• O le matai o le aiga (13:52)

A uma ona manatunatu loloto i nei faataoto, o le a se mea ua musuia oe e fai ina ia atili auai atoatoa i le galuega a le Ekalesia a Keriso i aso e gata ai?

Tagai foi i le Taiala i Tusitusiga Paia, “Malo o le Atua po o le Malo o le Lagi,” “Faataoto,” scriptures.ChurchofJesusChrist.org.

O le talalelei a Iesu Keriso o se “penina tau tele” (Mataio 13:46).

Mataio 13:24–30, 36–43

E ao ona ola le amiotonu faatasi ma e amioleaga seia oo i le iuga o le lalolagi.

O se tasi auala e faavasega ai lenei faataoto o le tusi lea o se ata o le faataoto ma faaigoa i faaliliuga o i le Mataio 13:36–43 ma le Mataupu Faavae ma Feaaiga 86:1–7. O le titania “o se vao e oona, lea vagana ua oo ina oso mai fua, e talitutusa ma le foliga mai o le saito” (Bible Dictionary, “Tares”) O a upumoni o i lenei faataoto ua musuia ai oe e tumau faamaoni e ui i le amioleaga o i le lalolagi?

Luka 8:1–3

O a ni auala na auauna atu ai ni “fafine e toatele” i le Faaola?

“Sa malaga ni soo fafine faatasi ma Iesu ma le Toasefululua, ma aoao mai ai faaleagaga ia [Iesu] ma auauna atu ia te Ia i le tino. … E le gata ina maua le auaunaga a Iesu—o le tala fiafia o Lana talalelei ma faamanuiaga o Lona mana faamalolo—sa auauna atu foi nei fafine ia te Ia, ma avatu a latou mea ma le loto faamaoni” (O Afafine i Lo’u Malo [2017],4). O tamaitai o e na mulimuli i le Faaola sa latou tuuina mai foi se molimau mamana ia te Ia (tagai Linda K. Burton, “O Fafine Mausali,” Liahona, Me 2017, 12–15).

Manatu mo Suesuega Faaletaiga o Tusitusiga Paia ma Afiafi Faaleaiga

Mataio 13.A o faitauina e tagata o lou aiga ia faataoto a le Faaola, atonu latou te fiafia e mafaufau i ni a latou lava faataoto e aoao mai ai ia lava upumoni e uiga i le malo o le lagi (le Ekalesia), e faaaoga ai mea faitino po o tulaga latou te masani ai.

Mataio 13:3–23; Luka 8:4–15.A uma ona faitau faatasi le faataoto i le lulu saito, atonu e talanoaina e lou aiga ia fesili e pei o nei: O a ni mea e faia o tatou “eleele” (o tatou loto) ia “papa” pe “fetinaiina” le upu? E mafai faapefea ona tatou mautinoa o lo tatou eleele e lelei ma fua tele?

Afai e i ai ni au fanau laiti i lou aiga, e mafai ona malie pe a valaaulia tagata o le aiga e faatino ni auala eseese e saunia ai o tatou loto e faalogo i le afioga a le Atua a e mate mai e isi tagata o le aiga pe o le a la latou mea la e fai.

Mataio 13:13–16.E mafai faapefea ona e fesoasoani i tagata o lou aiga ia malamalama i le taua o le talia ma le naunautai o le afioga a Keriso? Ina ia faaali atu “ua faalogogata [ia] taliga e faalogo,” atonu e te pupunia taliga o se tagata o le aiga a o e faitauina lemu le Mataio 13:13–16. O le a le tele o le malamalama o lena tagata o le aiga mai fuaiupu? O a ni auala tatou te faamatala ai o tatou mata, taliga ma loto i le afioga a le Atua?

Mataio 13:44–46.O mea e tutusa ai tagata e toalua i nei faataoto? E i ai ni mea faaopoopo e tatau ona tatou faia o ni tagata taitasi ma o se aiga ina ia faamuamua ai le malo o le ua i o tatou olaga?

Luka 13:11–17.Pe na maua e tagata o le aiga ni aafiaga na mafua ai ona latou lagona le le mafai ona latou “tu sa’o i luga”? O tatou iloa se isi tagata o i ai ni lagona faapea? E mafai faapefea ona tatou fesoasoani atu? E faapefea e le Faaola ona “tatalaina” i tatou mai o tatou vaivaiga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “We Are Sowing,” Hymns, nu. 216.

Faaleleia o Lo Tatou Aoao Atu

Tauloto se mau. Filifili se mau e anoa faapitoa i lou aiga, ma valaaulia tagata o le aiga e taulotoina. Na aoao mai Elder Richard G. Scott, “O se mau ua taulotoina e avea o se uo tumau e le faavaivaia i se taimi o le olaga” (“O Le Mana o Tusitusiga Paia,” Liahona, Nov. 2011, 6).

Faataoto i le Lulu Saito, saunia e George Soper