27 Fepuari–5 Mati

Mataio 8; Mareko 2–4; Luka 7

“Ua E Ola i Lou Faatuatua”

Ia faaeteete e aua le faanatinatia lou su‘esu‘eina o tusitusiga paia. Faaalu le taimi e mafaufau loloto ai ma le agaga tatalo, e tusa lava pe o le a le lava ai lou taimi e faitau uma ai fuaiupu. O nei taimi o le mafaufau loloto e masani ona ta‘ita‘i atu ai i faaaliga faaletagata lava ia.

Tusi Faamaumau Ou Lagona Uunai

O se tasi o savali aupito manino i le Feagaiga Fou o le, o Iesu Keriso o se fomai [faamalolo]. E tele tala e uiga i le Faaola na faamaloloina e mama’i ma puapuagatia—mai se fafine na ma’i vevela e oo atu i le tama na oti a se fafine ua oti lana tane. Aisea ua faamamafaina ai le faamalologa faaletino? O a ni savali atonu o i ai iina mo i tatou i nei vavega? E moni o se tasi o savali iloagofie o Iesu Keriso o le Alo o le Atua, ua i ai le mana i mea uma, e aofia ai tiga ma le atoatoa faaletino. Ae o se isi faauigaga o loo maua i Ana afioga i le au tusiupu masalosalo: “Ina ia outou iloa o iai ile Atalii o le tagata i le lalolagi le pule e faamagalo ai agasala” (Mareko 2:10). O le mea la lea, a e faitau e uiga i se tagata tauaso po o se lepela ua faamaloloins, atonu e te mafaufau i le faamalologa—faaleagaga ma le faaletino—lea e mafai ona e maua mai le Faaola ma faalogo atu o Ia fetalai mai ia te oe, “Ua e ola i lou faatuatua” (Luka 7:50).

Manatu mo Suesuega Faaletagata Lava Ia o Tusitusiga Paia

Mataio 8; Mareko 2–3; Luka 7

E mafai e le Faaola ona faamalolo vaivaiga ma ma’i.

O nai mataupu ia o loo tusifaamaumauina ai le tele o taimi o faamalologa ofoofogia na faia e le Faaola. A o e suesueina nei faamalologa, vaavaai mo ni savali e tatau ona i ai mo oe. Atonu e te fesili ifo ia te oe lava: O le a se mea o aoao mai i le tala e uiga i le faatuatua ia Iesu Keriso? O le a se mea ua aoao mai e le tala e uiga i le Faaola? O le a se mea o finagalo le Atua ou te aoao mai i lenei vavega? O nisi nei o faataitaiga, ae o loo tele lava isi vavega:

• O se lepela (Mataio 8:1–4)

• O se auauna a le taitai o le toaselau (Mataio 8:5–13; Luka 7:1–10)

• O le tina o le ava a Peteru (Mataio 8:14–15)

• O se tagata ma’i pipili (Mareko 2:1–12)

• O se tagata na gase lona lima (Mareko 3:1–5)

• O le tama a le fafine Naina ua oti lana tane (Luka 7:11–16)

Tagai foi i le David A. Bednar, “Taliaina o le Finagalo ma le Taimi a le Alii,” Liahona, Aok. 2016, 17–23; Neil L. Andersen, “Manu’a,” Liahona, Nov. 2018, 83–86.

Mareko 2:15–17; Luka 7:36–50

Na afio mai Iesu Keriso ia le ta’usalaina e agasala ae ia faamalolo i latou.

A o e faitau i nei fuaiupu e uiga i fegalegaleaiga a Iesu ma le au tusiupu ma Faresaio, atonu e te mafaufau pe o e vaaia ai oe lava i nei tala. Mo se faataitaiga, pe o pei ou mafaufauga ma faatinoga o mafaufauga ma faatinoga a Simona le Faresaio? E faapefea ona e faamatalaina le eseesega i le va o le ala na vaai ai Iesu i tagata agasala ma le ala na vaai ai Faresaio e pei o Simona ia i latou? Mafaufau pe faamata o a ni lagona o i latou o e o loo tosoina i lalo e agasala pe a latou i ai faatasi ma le Faaola. O a ni o latou lagona pe a latou faatasi ma oe?

Atonu e te mafaufau loloto foi pe o faapefea ona pei oe o le fafine o loo faamatalaina i le Luka 7:36–50. O le a se taimi na e lagonaina ai le alofa ma le alofamutimutivale lea na faaali atu e le Faaola ia te ia? O le a se mea ua e aoao mai i lana faataitaiga o le faatuatua, alofa, ma le lotomaulalo?

Tagai foi Ioane 3:17; Luka 9:51–56; Dieter F. Uchtdorf, “O Le Meaalofa o le Alofa Tunoa,” Liahona, Me 2015, 107–10.

Mataio 8:18–22; Mareko 3:31–35

O le avea ai o se soo o Iesu Keriso o lona uiga o lo’u tuu faamuamua lea o Ia i lo’u olaga.

I nei fuaiupu, ua aoao mai ai e Iesu e faapea o le avea ai ma Ona soo e moomia ai lo tatou tuufaamuamua o Ia i o tatou olaga, tusa lava pe o nisi taimi e tatau ai ona tatou ositaulagaina isi mea e taua ia i tatou. A o e suesueina nei fuaitau, manatunatu loloto i lou lava tulaga o se soo. Aisea e tatau ai i soo ona naunau e tuu faamuamua le Faaola? Mata o le a se mea e tatau ona e lafoai ina ia tuufaamuamua ai Iesu? (Tagai foi Luka 9:57–62.)

Mataio 8:23–27; Mareko 4:35–41

Ua ia Iesu Keriso le mana e aumaia ai le filemu i le lotolotoi o matagi o le olaga.

Pe na i ai se taimi na e lagona ai le mea na lagona e soo o Iesu i le matagi i le vasa—vaavaai atu i peau o le sami ua faatumulia ai le vaa ma tuufesili ai, “Le Aoao e, e te le manatu mai ea ia te i matou a fano?”

I le Mareko 4:35–41, o le a e maua ai fesili e fa. Tusi fesili taitasi, ma manatunatu loloto i mea o loo aoao mai ai e uiga i le faafetaia’ia ma le faatuatua ia Iesu Keriso, o luitau o le olaga. E faapefea e le Faaola ona aumaia le filemu i matagi o lou olaga?

Tagai foi Lisa L. Harkness, “Inā Malū Ia,” Liahona, Nov. 2020, 80–82.

Mai le Fefe i le Faatuatua, saunia e Howard Lyon

Manatu mo Suesuega Faaleaiga o Tusitusiga Paia ma Afiafi Faaleaiga

Mataio 8; Mareko 2–4; Luka 7.Mafaufau e fai se lisi o vavega o loo faamatalaina i nei mataupu. Taumafai e sue pe tusi ni ata o nisi o na vavega (tagai i le Tusi Ata o le Talalelei po o le ChurchofJesusChrist.org). E mafai e tagata taitasi o le aiga ona faaaoga ata e faamatala ai se tasi o vavega ma faasoa atu mea latou te aoao mai ai. Atonu e te faasoa atu nisi o faataitaiga o vavega na e vaaia pe faitau i ai i o tatou aso.

Tagai foi i vitio “Widow of Nain” ma le “Calming the Tempest” (ChurchofJesusChrist.org).

Mataio 8:5–13, Luka 7:1–10.O le a se mea e uiga i le taitai o le toaselau na faagaeetiaina ai Iesu? E mafai faapefea ona tatou faaali atu le faatuatua talitutusa ia Iesu Keriso?

Mareko 2:1–12.E mafai ona fesoasoani le “Mataupu 23: The Man Who Could Not Walk,” (i Tala o le Feagaiga Fou, 57–58, po o le vitio e o faatasi ai i le ChurchofJesusChrist.org) i lou aiga e talanoa ai le Mareko 2:1–12. (Tagai foi i le vitio “Jesus Forgives Sins and Heals a Man Stricken with Palsy” i luga o le ChurchofJesusChrist.org.) E mafai faapefea ona tatou pei o uo a le tagata na le mafai ona savali? O ai na pei o lena ituaiga uo ia i tatou?

Mareko 4:35–41.Mata e mafai ona fesoasoani lenei tala i tagata o le aiga pe a latou lagona le fefefe? Atonu e mafai ona latou faitauina le fuaiupu 39 ma faasoa mai aafiaga i ni taimi na fesoasoani ai le Faaola ia i latou ia lagona le filemu.

Atonu e fiafia tamaiti e faafoliga o loo latou i ai i luga o se vaa i se sami matagia ao faitau e se tasi le Mareko 4:35–38. Ma, a faitau e se tasi le fuaiupu 39, e mafai ona latou faafoliga o loo latou i luga o se vaa i se sami malū. E mafai foi ona outou pepese faatasi i se pese e uiga i le mauaina o le filemu i le Faaola, e pei o le“Matai e, Ua Sou le Vasa” (Viiga, nu. 58). O a ni fuaitau o le pese o aoao mai e uiga i le filemu lea e ofo mai e Iesu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Matai e, Ua Sou le Vasa,” Viiga, nu. 85.

Faaleleia o Lo Tatou Aoao Atu

Ia avanoa ma maua gofie. O nisi o avanoa aupito lelei o le aoao atu e amata i fesili po o atugaluga i loto o tagata o le aiga. Ia faailoa atu i tagata o le aiga e ala i au upu ma faatinoga o loo e naunau e faalogo atu ia i latou. (Tagai i le Aoao Atu i le Ala a le Faaola,16.)

O Keriso ma le Tagata Supa, saunia e J. Kirk Richards