6–12 Mati

Mataio 9–10; Mareko 5; Luka 9

“Ua Auina atu e Iesu o Lenei Toasefulu ma le Toalua”

O manatu mo su‘esu‘ega o i lenei otootoga e mo le fesoasoani ia te oe i le sailia o uiga patino i mau. Ae peitai, e le tatau ona latou suia ai faaaliga patino e te ono maua e uiga i fuaitau e su‘esu‘e po o auala e su‘esu‘e ai.

Tusifaamaumau Ou Lagona Uuna‘i

Sa vave ona salalau le tala o vavega o faamalologa a Iesu. Sa mulimuli atu le motu o tagata ia te Ia, ma le faamoemoe mo se mapusaga mai o latou ma’i. Ae ina ua silasila atu le Faaola i le motu o tagata, sa sili atu isi mea sa ia silasila i ai nai lo na o o latou ma’i faaletino. I le faatumulia ai i le alofa, sa Ia silasila atu i “mamoe ua leai so latou leoleo” (Mataio 9:36). “E tele le saito e seleseleina, a o le aufaigaluega e toaitiiti ia” (Mataio 9:37) O lea na Ia valaauina ai Aposetolo e toasefululua, “ma avatu ia te i latou le mana,” ma auina atu i latou e aoao atu ma auauna atu “i mamoe o le aiga o Isaraelu ua leiloa” (Mataio 10:1, 6). O le taimi nei ua faapena foi ona tele le manaomia o le au faigaluega e auauna atu i fanau a le Tama Faalelagi. O loo i ai lava Aposetolo e toasefululua, ae ua toatele atu soo o Iesu Keriso nai lo le taimi muamua—o tagata o e ua mafai ona tautino atu i le lalolagi uma, “Ua latalata mai le malo o le lagi” (Mataio 10:7).

Manatu mo Suesuega Faaletagata Lava Ia o Tusitusiga Paia

Mataio 9:18–26; Mareko 5:22–43

“Aua e te mata’u, tau lava ina e faatuatua.”

O le taimi muamua na talosaga atu ai Iairo ia Iesu e faamalolo lona afafine, o le sa “o le a oti nei lava,” sa matuai aioi atu Iairo peitai sa i ai le faamoemoe: “Maliu atu ma ia e faaee ou aao i luga ia te ia, … ona ola ai lea o ia” (Mareko 5:23). Ma ao la o atu i ai, sa ta’u atu e se avefeau ia Iairo ua tuai: “Ua oti lou afafine: se a le mea e te faalavelave ai pea i le Aoao?” (fuaiupu 35). E faapena foi, atonu na pei na tuai foi le fafine o loo faamatalaina i le Mareko 5:25–34, o lē ua 12 tausaga o pagatia i se ma’i.

Ao e faitau i nei tala, atonu e te mafaufau i mea e manaomia ona faamalolo i lou olaga po o lou aiga—e aofia ai mea ua foliga mai “o le a oti nei lava” pe ua tuai mo se faamalologa. O le a se mea ua faagaeetia ai oe e uiga i faaaliga o le faatuatua i nei tala? Ia maitau foi fetalaiga a Iesu i le fafine ma ia Iairo. O le a se mea e te lagona o loo Ia fai atu ia te oe?

Tagai foi Luka 8:41–56; Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42; Aoaoga a Peresitene o le Ekalesia: Gordon B. Hinckley (2016), 333–42.

Faalagolago ia Ieova, saunia e Liz Lemon Swindle

Mataio 10; Luka 9:1–6

E tuuina atu e le Alii i Ana auauna le mana e fai ai Lana galuega.

O le faatonuga na tuu mai e Iesu i le Mataio 10 i Ana Aposetolo, e mafai foi ona faatatau ia i tatou, aua e tofu i tatou uma ma se vaega i le galuega a le Alii. O le a le mana na tuu atu e Keriso i Ana Aposetolo e fesoasoani latou te faataunuu ai la latou misiona? E mafai faapefea ona e maua Lona mana i le galuega na tofia oe e fai? (tagai 2 Korinito 6:1–10; Mataupu Faavae ma Feagaiga 121:34–46).

A o e faitauina le poloaiga na tuu atu e Keriso i Ana Aposetolo, e te ono maua ni lagona uunai e uiga i le glauega e finagalo le Alii e te faia. E mafai ona fesoasoani se siata e pei o lea e te faatulagaina ai ou mafaufauga.

Mataio 10	O lagona uunai ua ou mauaina
Na tuu atu e le Faaola i Ona soo le mana.	O le a tuu mai e le Atua ia te au le mana ou te moomia e fai ai la’u galuega.

Tagai foi Mareko 6:7–13; Mataupu Faavae o le Faatuatua 1:6; Bible Dictionary, “Apostle”; “Jesus Calls Twelve Apostles to Preach and Bless Others” (vitio, ChurchofJesusChrist.org

Mataio 10:17–20

Pe a ou i ai i le galuega a le Alii, o le a Ia musuia a’u i mea ou te tautala atu ai.

Na muai silafia e le Alii o le a sauaina Ona soo ma fesiligia lo latou faatuatua—se mea e pei o mea e ono oo i ai soo o aso nei. Ae na Ia folafola atu i Ona soo o le a latou iloa i le Agaga le mea latou te fai atu ai. Pe ua i ai sou aafiaga ina ua faataunuuina lenei folafolaga paia i lou olaga, atonu ina ua e tuuina atu lau molimau, tuu atu se faamanuiaga, pe fai se talanoaga ma se tasi? Mafaufau e faasoa atu i se e pele ia te oe ou aafiaga pe tusia foi i se tusi talaaga. O le a le mea ua musuia oe e fai ina ia e maua soo ai ni aafiaga faapena?

Tagai foi Luka 12:11–12; Mataupu Faavae ma Feagaiga 84:85.

Mataio 10:34–39

O le a le uiga o le fetalaiga a Iesu “Ou te lei sau e avatu le filemu, a o le pelu”?

Na aoao mai Elder D. Todd Christofferson: “Ou te mautinoa o le toatele o outou ua teena ma tuliese e le tama ma le tina, uso ma tuafafine, a o e taliaina le talalelei a Iesu Keriso ma ulu atu i Ana feagaiga. I se auala se tasi po o le isi, e manaomia e lou alofa sili i le Keriso le ositaulaga o sootaga sa pele ia te oe, ma na maligi ou loimata e tele. Ae faatasi ai ma lou lava alofa e le faaitiitia, e te tumau mautu i lalo o lenei satauro, ma faaalia ai lou lava le maasiasi i le Alo o le Atua” (“Finding Your Life,” Ensign, Mar. 2016, 28).

O lea naunautai e lafoai sootaga faapelepele ina ia mulimuli i le Faaola e oo mai ma se folafolaga faapea “o le faamaumau i lona ola ona o a’u, e maua e ia” (Mataio 10:39).

Manatu mo Suesuega Faaleaiga o Tusitusiga Paia ma Afiafi Faaleaiga

Mareko 5:22–43.A o faitau faatasi e lou aiga le tala lenei, atonu tou te taofi e fesili atu i tagata o le aiga, pe o a ni o latou lagona pe ana o i latou o Iairo, le fafine, po o isi tagata o loo i le tala. E mafai ona e faaali atu ata o le tala, e pei o na o loo i le otootoga lenei. O faaalia faapefea e nei ata le faatuatua o tagata o loo i tala? (Tagai foi i vitio “Jesus Raises the Daughter of Jairus,” ma le “Jesus Heals a Woman of Faith” i le ChurchofJesusChrist.org.) Atonu foi e te mafaufau i nisi o luitau o feagai ma lou aiga: E mafai faapefea ona tatou faaaogaina Lana faataitaiga, “Aua e te mata’u, tau lava ina e faatuatua”? (Mareko 5:36).

Mataio 10:39; Luka 9:23–26.Mata o le a le uiga o le ia “māumau” o tatou ola ina ia “maua” ai? (Mataio 10:39). Atonu e mafai e tagata o le aiga ona faasoa mai ni aafiaga o faaalia ai aoaoga a Iesu i nei fuaiupu.

Mataio 10:40.E faapefea e oe ma lou aiga i le mauaina ma le mulimuli ai i fautuaga a Aposetolo i ona po nei? O faapefea ona tatou latalata atili ia Iesu Keriso ona o lo tatou usiusitai i a latou fautuaga?

Luka 9:19:61–62.O le a le uiga o le tepa i tua pe a ua uma ona tuu o tatou lima i le suotosina? Aisea o le a le fetaui ai mo i tatou lea uiga faaalia mo le malo o le Atua?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Ou Te Le Masalo,” Viiga, nu. 67.

Faaleleia o Suesuega Faaletagata Lava Ia

Faalogo i le Agaga. A o e suesue, mataitu ou mafaufauga ma lagona (tagai Mataupu Faavae ma Feagaiga 8:2–3) tusa lava pe foliga mai e le faia i mea o loo e faitauina. O na lagona uunai atonu o mea tonu lava na e finagalo le Atua ia e iloa ma faia.

Talitha Cumi, saunia e Eva Koleva Timothy