6–12 Mati

Mataio 9–10; Mareko 5; Luka 9

“Ua Auina atu e Iesu o Lenei Toasefulu ma le Toalua”

A o e faitauina le Mataio 9–10; Mareko 5; ma le Luka 9, e mafai ona e maua musumusuga mai le Agaga Paia. O nei uunaiga, faatasi ai ma le Sau, Mulimuli Mai ia te Au—Mo Tagata Taitoatasi ma Aiga ma lenei otootoga, e mafai ona fesoasoani i au tapenaga e aoao atu.

Valaaulia le Fefaasoaai

Valaaulia tamaiti e faasoa mai se mea na latou faia e fesoasoani ai i se tasi i lenei vaiaso. O le a le mea na fai e le Faaola e fesoasoani ai i isi?

Aoao atu le Aoaoga Faavae: Tamaiti Laiti

Mataio 9:18–30; Mareko 5:22–43

E i ai ia Iesu le mana e faamalolo ai a’u.

Sa faaalia pea lava pea e le Faaola Lona mana e faamalolo ai i latou o e sa faatuatua ia te Ia. E mafai ona e fesoasoani i tamaiti o loo e aoaoina e fausia lo latou faatuatua i Lona mana faamalolo.

Gaoioiga e Mafai Ona Fai

• Tau atu i tamaiti le tala i le afafine o Iairo (tagai Mareko 5:22–23, 35–43). I le taimi talafeagai i le tala, faitau upu a Iesu “Ou te fai atu ia te oe, tulai ia” (fuaiupu 41), ma valaaulia tamaiti e tutu i luga. Fesoasoani i tamaiti ia malamalama o loo ia Iesu le mana e faamalolo ai tagata ma aumai ia i tatou le ola e faavavau.

• Faaali atu se ata o le tala i le Mataio 9:20–22 a o e faitauina nei fuaiupu. Fesoasoani i tamaiti e tauloto le fasifuaitau “Ua e ola i lou faatuatua” (fuaiupu 22). Ina ia faia lenei mea, e mafai ona e atofa atu i tamaiti taitasi se upu, ona fai atu lea i tamaiti e fai mai a latou upu i le faasologa sao mo ni nai taimi. Na faapefea ona faaalia e le fafine sa i ai lona faatuatua ia Iesu Keriso? O a mea e mafai ona tatou faia e faaali atu ai e i ai lo tatou faatuatua ia Keriso?

• Fai i tamaiti e moeiini mata ma faalogologo a o e faitau mai le Mataio 9:27–30. Ao e faitau e uiga ia Iesu o loo faamaloloina tagata tauaso, valaaulia tamaiti e pupula o latou mata. Valaaulia tamaiti e talanoa e uiga i o latou lagona pe ana faapea na faamaloloina i latou e Iesu.

• Faaaoga le itulau o gaoioiga o lenei vaiaso e fesoasoani ai i tamaiti e aoao le tala i le faatuina mai e le Faaola o le afafine o Iairo mai le oti.

Faalagolago i le Alii, saunia e Liz Lemon Swindle

Mataio 10:1–10

Na valaauina e Iesu ia Aposetolo e Toasefululua ma avatu ia i latou le mana e faia ai Lana galuega.

O iloa e tamaiti o e aoaoina e i ai a tatou Aposetolo e Toasefululua i aso nei? E mafai faapefea ona e faaaogaina nei fuaiupu e aoao atu ai i latou e uiga i le taua o Aposetolo o ona po nei ma pe o a mea na valaauina i latou e fai?

Gaoioiga e Mafai Ona Fai

• Aotele le Mataio 10:1–10 i ni faaupuga faigofie. Faamalamalama atu ua valaauina e Iesu ia Aposetolo e fesoasoani ia te Ia e fausia Lana Ekalesia. Tuu i tamaiti e faitau Aposetolo o i le ata O Keriso o Loo Faauuina Aposetolo (Tusi Ata o le Talalelei, nu. 38) ma i se ata o Aposetolo e Toasefululua o i ai nei (tagai ChurchofJesusChrist.org po o se lomiga o le konafesi aoao o le Liahona). Faamalamalama atu e toasefululua a tatou Aposetolo i le taimi nei, e pei foi o le taimi o Iesu. Faasoa atu lau molimau i Aposetolo a le Alii ma se mea na latou aoaoina talu ai nei.

• Nana ata o Aposetolo o i ai nei, ia faataamilo i le potu (mo ata, tagai i le lomiga o le konafesi aoao lata mai o le Liahona). Valaaulia tamaiti e sue ata, ma ta’u atu sina mea itiiti e uiga i Aposetolo taitasi (tagai “Meet Today’s Prophets and Apostles” i le ChurchofJesusChrist.org).

• Valaaulia se tamaitiiti e uu i luga se ata o le Au Peresitene Sili ma se ata o le Korama a Aposetolo e Toasefululua. Fai i le tamaitiiti e taitai isi tamaiti faataamilo i le potu i se ata o Iesu. Molimau atu o perofeta ma aposetolo e taitaia i tatou ia Iesu Keriso.

Aoao atu le Aoaoga Faavae: Tamaiti Matutua

Mataio 9:18–30; Mareko 5:22–43

E i ai ia Iesu le mana e faamalolo ai a’u.

O le faitauina o tala e uiga i le faamaloloina e le Faaola o tagata e mafai ona fesoasoani i tamaiti o loo e aoaoina e fausia ai lo latou faatuatua ia te Ia. O nei tala e mafai foi ona fesoasoani ia i latou e lagona ai Lona agaalofa ma le alofa.

Gaoioiga e Mafai Ona Fai

• Faitau faatasi tala ia Iesu o loo faamaloloina tagata o loo maua i le Mataio 9:20–22, 27–30 ma le Mareko 5:22–23, 35–43 (pe faaali vitio “Jesus Heals a Woman of Faith” ma le “Jesus Raises the Daughter of Jairus” i le ChurchofJesusChrist.org). Na faapefea e tagata i nei tala ona faaalia lo latou faatuatua ia Iesu Keriso? O le a se mea ua tatou aoao e uiga i le Faaola mai nei tala?

• Valaaulia tamaiti e faasoa mai ni aafiaga ina ua latou maua pe maua e se tasi latou te iloa se faamanuiaga faaleperisitua mo le faamalologa o e mamai. Na faapefea ona faamaloloina pe faamanuiaina i latou? Faamalamalama atu o nisi taimi o se faamalologa faavavega e le o le finagalo lea o le Alii, ae e mafai lava ona faamanuiaina i tatou i Lona alofa ma le mafanafana.

Mataio 10:1–10

E mafai e Aposetolo e Toasefululua ona aoao a’u e uiga ia Iesu.

E mafai faapefea ona fesoasoani le aoao e uiga i Aposetolo e Toasefululua i ona po o Keriso i tamaiti e malamalama atili ai i mea e fai e Aposetolo e Toasefululua i aso nei?

Gaoioiga e Mafai Ona Fai

• Faaali ata o Aposetolo i ona po o Iesu ma i o tatou aso (tagai O Keriso o Loo Faauuina Aposetolo [Tusi Ata o le Talalelei, nu. 38] ma se lomiga talu ai nei o le konafesi i le Liahona). Fai i tamaiti e faitau le Mataio 10:7 e sue ai po o a mea e fai e Aposetolo (tagai foi Luka 9:1–2, 6; Mataupu Faavae ma Feagaiga 107:23).

• Valaaulia tamaiti e tusi i luga o le laupapa ia igoa o le toatele o uluai Aposetolo e mafai ona latou manatuaina. Ona fai atu lea ia i latou e lisi mai ni Aposetolo soifua i le toatele e mafai ona latou manatuaina. Tuu atu ia i latou e siaki a latou lisi i le Mataio 10:2–4 ma se lomiga talu ai nei o le konafesi o le Liahona. E mafai foi ona e faia se taaloga faafetaui lea e faafetaui ai e tamaiti suafa o Aposetolo soifua taitasi i lona ata. O ata e mafai ona maua i le ChurchofJesusChrist.org.

• I ni nai aso a o lei amataina le vasega, valaaulia ni nai tamaiti e o mai saunia e faasoa mai se tala na faamatalaina e se tasi o Aposetolo soifua (tagai i lomiga o le Liahona mo ni manatu). Na faapefea ona faaaoga e lena Aposetolo le tala e musuia ai i tatou ia avea atili e faapei o le Faaola?

• Faasoa mai ni nai faataitaiga o molimau a Aposetolo o ona po nei ia Keriso ma tamaiti (tagai i savali o le konafesi aoao talu ai nei po o le “O Le Keriso Soifua: O Molimau a Aposetolo” [ChurchofJesusChrist.org]).

• Fesoasoani i tamaiti e tauloto ma ia malamalama i le Mataupu Faavae o le Faatuatua 1:6.

Luka 9:23–25

O le mulimuli ia Iesu Keriso e manaomia ai le ositaulaga.

E faapefea ona e fesoasoani i tamaiti ia malamalama i le uiga o le “faama’umau” o latou olaga a o latou mulimuli i le Faaola?

Gaoioiga e Mafai Ona Fai

• Tau atu i tamaiti e uiga i se taimi na e lafoai ai se mea ina ia maua ai se mea e sili atu. Valaaulia tamaiti e faasoa mai ni faataitaiga e patino ia i latou. Ona faitau faatasi lea o le Luka 9:23–25. Faamatala atu e finagalo Iesu ia tatou naunau e lafoai soo se mea ina ia mulimuli atu ia te Ia. E ui atonu e le o fetalai mai o Ia ia i tatou e lafoai moni o tatou olaga, ae o le a le mea ua Ia poloaiina i tatou e foai atu? (tagai Faaliliuga a Iosefa Samita, Mataio 16:26 [i le Mataio 16:24, vaefaamatalaga u]).

• Tusi ni uiga auaumama faaKeriso i luga o fasipepa ma faafeagai o na uiga i isi fasipepa (e pei o le alofa ma le manatu faapito, lotomaualalo ma le faamaualuga, ma isi mea faapena). Tusi upu faasaogalemu ma le faama’umau o ni ulutala i luga o le laupapa, ma valaaulia tamaiti e faavasega ia uiga auaumama i lalo o ulutala talafeagai. Tuu atu i tamaiti se taimi e mafaufau loloto ai i uiga faaKeriso i luga o le laupapa ma filifili se tasi e atiae atoatoa atili.

Uunaia le Aoaoina i le Aiga

Valaaulia tamaiti e faaaoga le itulau o gaoioiga o le vaiaso lenei e aoao atu ai o latou aiga e uiga i le faamaloloina e Iesu o le afafine o Iairo.

Faaleleia o Lo Tatou Aoao Atu

Fautuaina le migao. Fesoasoani i tamaiti ia malamalama o se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese pe faaalia se ata o Iesu.