Aua Tou te Matatau, saunia e Michael Malm

13–19 Mati

Mataio 11–12; Luka 11

“O Au Foi e Malolo Ai Outou”

O manatu mo le aoao atu i lenei otootoga e mafai ona fesoasoani e musuia ai o oe lava manatu fatufatuai. Faitalia oe pe fetuutuunai i manaoga o tamaiti o loo e aoaoina.

Valaaulia le Fefaasoaai

Fautuaina tamaiti e faasoa mai mea e mafai ona latou faia e tapuai ai i le Alii i le aso Sapati.

Aoao atu le Aoaoga Faavae: Tamaiti Laiti

Mataio 11:28–30

O le a fesoasoani Iesu ia te a’u ao ou sau ia te Ia.

E mafai e tamaiti ona lagona le mafanafana i le iloa o le a fesoasoani Iesu ia te i latou i a latou avega pe a latou o mai ia te Ia.

O Gaoioiga e Mafai Ona Fai

• Faitau le Mataio 11:28–30, ma faaali le ata o povi o loo tauave se amoga i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga. Fai atu i tamaiti e faasino i povi ma le amo. Faamatala atu e mafai e na povi ona tauamo faatasi se mamafa e sili atu nai lo le mea e mafai pe ana tosoina taitoatasi. Molimau atu a tatou lagona le faanoanoa, popole, po o le fefefe, e mafai ona tatou sailia Iesu ma o le a fesoasoani o Ia ia te i tatou.

• Fai i se tamaitiiti e sii se mea mamafa. A faigata ia te ia, ona ofo atu lea o se fesoasoani. E faapefea ona fesoasoani Iesu ia i tatou e fai ni mea faigata? Faasoa atu se aafiaga na e lagonaina ai na fesoasoani Iesu ia te oe e faia se mea faigata, ma fai atu i tamaiti e faasoa mai ni a latou lava aafiaga.

Mataio 12:1–13

E mafai ona ou tausia le Aso Sapati ia paia.

O a ni nai auala malie e mafai ona e aoao atu ai tamaiti e uiga i le aso Sapati ma aisea tatou te tausia ai ia paia?

O Gaoioiga e Mafai Ona Fai

• Faitau leotele le Mataio 12:10–13 . Valaaulia tamaiti e tutu i luga ma nonofo i lalo i taimi taitasi e ta’ua ai le “Sapati,” ma toe fai faatasi ma i latou le fasifuaitau “E [talafeagai] ai ona agalelei i le sapati” (Mataio 12:12). O le a so latou manatu o le a le uiga o lena mea?

• Faaali atu se kalena i tamaiti ma faailoga le aso Sapati mo i latou. O a mea tatou te fai i isi aso o le vaiaso? O le a se mea e mafai ona tatou faia i le Sapati ia ese ai mai isi aso? (tagai Isaia 58:13–14).

• Fai i tamaiti e tusi ata o mea e mafai ona latou faia i le aso Sapati (tagai i le itulau o gaoioiga o lenei vaiaso).

• Valaaulia tamaiti e fatu ni taga e fesoasoani ia i latou e manatua ai auala tatou te sauniuni ai mo le Sapati a o latou usuina le pese “Aso Toonai” (Tusipese a Tamaiti, 105).

• Tusi ata o mata, taliga, se gutu, ma lima i luga o le laupapa. Fai i tamaiti e ta’u atu po o a mea a nei vaega o o tatou tino e mafai ona fai e tausia ai le paia o le aso Sapati.

Luka 11:11–13

Ua tuuina mai e le Tama Faalelagi ia i tatou ni meaalofa lelei.

O le aoaoga a le Faaola i le Luka 11:11–13 e mafai ona fesoasoani i tamaiti o loo e aoaoina ia malamalama e alofa le Tama Faalelagi ia i latou ma e finagalo e faamanuia i latou.

O Gaoioiga e Mafai Ona Fai

• Faaaoga se lesona faatino e faapupula ai aoaoga a le Faaola i le Luka 11:11–13. Mo se faataitaiga, e mafai ona e tuuina se maa i totonu o se taga falaoa pe tuu se ata o se akarava i totonu o se katuni fuamoa. Fai atu i tamaiti e mate mai po o le a le mea o i totonu, ona faaali atu lea ia i latou. Valaaulia i latou e sui le maa po o le ata i se fasi falaoa po o se fuamoa. Faitau le Luka 11:11–13, ma faasoa atu lau molimau e alofa le Tama Faalelagi ia i tatou, tali mai i a tatou tatalo, ma tuuina mai ia i tatou le tele o faamanuiaga e ala i Lona Agaga.

• Usu faatasi se pese e faatatau i le alofa o le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). O a ni meaalofa lelei ua Ia tuuina mai ia i tatou? Fai atu i tamaiti e tusi ni ata o faamanuiaga mai le Tama Faalelagi latou te lotofaafetai ai.

Aoao atu le Aoaoga Faavae: Tamaiti Matutua

Mataio 11:28–30

O le a fesoasoani Iesu ia te au pe a ou sau ia te Ia.

E mafai faapefea ona e fesoasoani i tamaiti ia malamalama o le a avatu e le Faaola ia i latou le malologa mai o latou luitau pe a latou o mai ia te Ia?

O Gaoioiga e Mafai Ona Fai

• Valaaulia tamaiti e faasoa mai se taimi na latou popole ai pe atuatuvale ai i se mea. Valaaulia i latou e suesue le Mataio 11:28–30 mo se fautuaga e mafai ona fesoasoani ia te i latou i ni tulaga foi faapea. E faapefea e le Faaola ona “tuuina mai [ia i tatou] le malologa”? (fuaiupu 28).

• Valaaulia tamaiti e tusi ata o mea o loo latou faia e o mai ai ia Iesu ma aoao ia te Ia.

• Fesoasoani i tamaiti e tauloto le mataupu faavae o le faatuatua lona fa. Talanoa ma i latou pe faapefea e uluai mataupu faavae ma sauniga taitasi o le talalelei ona fesoasoani ia i tatou e talia le valaaulia a Iesu, “O mai ia te au” (Mataio 11:28).

Mataio 12:1–13

O le Sapati o se aso e faia ai mea lelei lea ou te latalata atu ai i le Atua.

O tamaiti e te aoaoina o le a faamalolosia a o e faamamafaina faamoemoega ma faamanuiaga o le tausia o le aso Sapati ia paia.

O Gaoioiga e Mafai Ona Fai

• Valaaulia se tamaitiiti e faafoliga o ia o le tamaloa lea na faamalolo lona lima e Ie Faaola (tagai Mataio 12:10–13). E mafai e se isi tamaitiiti ona fesili atu ia te ia ni fesili e uiga i le aafiaga.

• Faitau faatasi le Mataio 12:12. O a ni mea lelei e mafai ona tatou faia i le Sapati? Tuu i tamaiti e tusi ata o latou manatu i le itulau o gaoioiga o le vaiaso lenei, otioti ia fasipepa, ona feauaua’i lea e tuu faatasi paso a isi.

• Nanā ni ata eseese o tagata sa faia ni mea lelei lea e faaalia ai lo latou alolofa mo le Tama Faalelagi i le aso Sapati. Fai i tamaiti e sue ni ata ma faasoa mai pe faapefea ona faaalia lo tatou alofa i le Atua i le faia o mea o i ata.

Ua Taumamafa Soo i Saito i le Sapati, saunia e James Tissot

Luka 11:37–42

O a‘u amioga ma lo’u loto e tatau ona mamā a‘ia’i.

Na aoao mai le Faaola e le lava le foliga amiotonu i isi. O o tatou mafaufauga, lagona, ma faatinoga patino e tatau foi ona mama.

O Gaoioiga e Mafai Ona Fai

• Ina ia faapupula mea o loo aoao mai e nei fuaiupu, faaali atu i tamaiti se ipu po o se isi koneteina e mama fafo ae palapala totonu. Fesoasoani ia i latou e mafaufau po o le a le mea e ono faatusa i ai “fafo o le ipu”. O le a le mea ua faatusa i ai le “vaega pito i totonu”? Aisea e taua ai le faamamaina o fafo ma totonu?

• Faitau faatasi nisi mau e faamamafa ai le amiotonu i o tatou loto ma a tatou faatinoga—mo se faataitaiga, Salamo 24:3–5; Mataio 15:7–8; Moronae 7:6–9. Talanoaina pe aisea e finagalo ai le Faaola ia mama faaleagaga o tatou loto ma faatinoga patino.

Fautuaina le Aoaoina i le Aiga

Valaaulia tamaiti e faasoa atu i o latou aiga ni manatu ia tausia ai le paia o le Sapati.

Faaleleia o Lo Tatou Aoao Atu

Fai atu fesili. “O se fesili e valaaulia ai tagata aoao e tau mai se mataupu faavae o le talalelei i a latou lava upu—aemaise lava i le amataga o le vasega—e mafai ona fesoasoani ia te oe e iloilo ai pe o le a le tele o se taimi e tatau ona e faaalu i le suesueina o lena mataupu faavae i le vasega” (Aoao Atu i le Ala a le Faaola, 32).