20–26 Mati

Mataio 13; Luka 8;13

“O Le Ua i ai Taliga e Faalogo Ai, ina Faalogo Mai ia o Ia”

O faataoto o ni tala faigofie e mafai ona faagauai i ai tamaiti. O lenei otootoga ma le Sau, MulimuliMai ia te Au—Mo Tagata Taitoatasi ma Aiga e mafai ona fesoasoani ia te oe e faaaoga faataoto a le Faaola e aoao atu ai i tamaiti upumoni taua.

Valaaulia le Fefaasoaai

Aumai ni mea eseese e mafai ona fesoasoani i tamaiti e manatua ai ni nai faataoto i le Mataio 13, e pei o se fatu, se penina, po o pusa ‘oa. Valaaulia tamaiti e faasoa mai mea latou te manatua e uiga i faataoto.

Aoao atu le Aoaoga Faavae: Tamaiti Laiti

Mataio 13:1–23

E manaomia ona ou sauniuni e aoao i aoaoga a Iesu.

Atonu e le malamalama tamaiti laiti ifo i faatusa uma o i le faataoto o le lulu saito, ae e mafai ona latou aoaoina upumoni faigofie o le talalelei o loo aoao mai ai. E mafai faapefea ona e fesoasoani ia latou malamalama pe faapefea ona fesootai lenei faataoto ia i latou.

Gaoioiga e Mafai Ona Fai

• Faaali ni ituaiga eleele eseese (po o ni ata o eleele) a o e aoteleina le Mataio 13:3–8. Tuu atu i tamaiti taitasi se fatu, ma fesili atu po o le a se mea e mafai ona latou faia e fesoasoani ai ia ola fatu. Faamalamalama atu o a tatou molimau e pei o fatu. E faapefea ona tatou fesoasoani i a tatou “fatu” molimau ia tuputupu ae?

• Faaaoga le itulau o gaoioiga o lenei vaiaso e fesoasoani ai i tamaiti ia malamalama i ituaiga eleele taitasi o loo faamatala mai i le Mataio 13 ma aoao mai e uiga i o tatou loto. Fesili i tamaiti pe o le fea ituaiga o loto e manao Iesu latou te maua ina ia latou aoao ai i Ana aoaoga.

• Faitau le Mataio 13:9, 15, ma valaaulia tamaiti e faasino i itutino eseese o o latou tino pe a latou faalogo o ta’u. E mafai faapefea ona e faaaogaina nei itutino e aoao ai i aoaoga a Iesu?

Mataio13:24–30, 36–43, 47–48

E finagalo le Tama Faalelagi ia ou filifili le mea sa’o.

O nisi o faataoto a Iesu ua aoao mai ai o le aso mulimuli, o le a tuueseese ai e le Atua e amioleaga mai e amiotonu. E mafai faapefea ona e faaaogaina ia faataoto e musuia ai tamaiti e filifili le mea sa’o?

Gaoioiga e Mafai Ona Fai

• Tuu atu i tamaiti e faatino mai i taga le faataoto i le saito ma le titania (tagai Mataio 13:24–30). Faamalamalama o le saito e faatusa i tagata o e faia filifiliga amiotonu, a o le titania (vao leaga) e faatusa i tagata e le faia filifiliga amiotonu. E i ai se aso, o le a faapotopoto ai e le Tama Faalelagi ia tagata amiotonu e nonofo faatasi ma Ia.

• Tuu atu i tamaiti ni nai faataitaiga o filifiliga sa‘o ma le sese. Fai atu i tamaiti e fai mai “filifiliga o le saito” pe a e faamatalaina se filifiliga sa‘o ma se “filifiliga titania” pe a e faamatalaina se filifiliga sese.

• Aumai ni ata o ‘au saito, ma tuu i tamaiti e tusi i luga o ata ni auala e mafai ai ona latou amiotonu.

Mataio 13:44–46

O lo’u avea ai ma tagata o Le Ekalesia a Iesu Keriso o le Au Paia o Aso e Gata Ai o se ‘oa.

E mafai faapefea ona e faaaogaina le atafaatusa o le ‘oa ma penina taua e fesoasoani ai i tamaiti ia malamalama i le taua o le avea ma se tasi o le Ekalesia a Keriso?

Gaoioiga E Mafai Ona Fai

• Nana ni ata o se pusa ‘oa ma se penina i le potu, ma tuu i tamaiti e sue. Faaaoga ia ata e aoao atu ai e uiga i faataoto i le Mataio 13:44–46. Talanoa pe aisea e ono lafoai ai e se tasi mea uma ua ia i latou mo se penina matagofie po o se oa i se fanua. Faamatala atu o nisi taimi e tatau ai ona tatou lafoai se mea lelei mo se mea e sili atu le lelei. Ta’u i tamaiti pe aisea e taua ai le talalelei ia te oe.

• Tuu se pusa o ni meafaitino po o ni ata e faatusa i “oa” i Le Ekalesia a Iesu Keriso o le Au Paia o Aso e Gata Ai, e pei o le Faaola, malumalu po o le Tusi a Mamona. Fai i tamaiti taitasi e filifili se meafaitino po o se ata ma talanoa pe aisea ua avea ai ma ‘oa.

• Usu faatasi le “O Le Ekalesia a Iesu Keriso” (Tusipese a Tamaiti, 48), ma fai atu i tamaiti e talanoa e uiga i mafuaaga latou te faafetai ai mo le Ekalesia a le Faaola. Molimau atu i faamanuiaga ua e maua ona o le avea ai o oe ma tagata o le Ekalesia.

Aoao atu le Aoaoga Faavae: Tamaiti Matutua

Mataio 13:1–23

E manaomia ona ou saunia lo’u loto e talia aoaoga a Iesu.

E mafai faapefea ona e fesoasoani i tamaiti ia iloa le taua o le i ai o se loto agamalu ma naunautai ina ia mafai ai e Iesu ona aoao i latou?

Gaoioiga E Mafai Ona Fai

• Tofi tamaiti taitasi e faitau e uiga i se tasi o ituaiga eleele e fa o i le Mataio 13:4–8. Valaaulia i latou e vaavaai mo mea na tupu i fatu i ituaiga eleele sa latou faitau ai ma faasoa mai. E mafai faapefea ona avea o tatou loto e faapei o ituaiga eleele eseese? (tagai Mataio 13:19–23).

• Faaali atu i tamaiti se ata o se togalaau. O le a le mea e manaomia ona i ai le eleele ina ia ola ai laau? Faaali atu se ata o se eleele papa po o se eleele matuitui. Aisea o le a faigata ai ona ola laau i lenei ituaiga o eleele? E mafai faapefea ona faamautinoa ua pei o tatou loto o le eleele lelei ina ia mafai ai ona tatou talia aoaoga a le Faaola?

• Valaaulia tamaiti e faitau le Mataio 13:15–17. Tusi se ata o se mata, taliga, ma le fatu i luga o le laupapa. E faapefea ona tatou faaaogaina nei mea taitasi e aoao ai i aoaoga a Iesu?

Mataio 13:24–30, 36–43

E mafai ona ou filifilia le mea sa’o e tusa pe le faia e i latou e siomia au.

A e faitauina nei fuaiupu ma e mafaufau i tamaiti, o a ni lagona uunai e oo mai ia te oe?

Gaoioiga E Mafai Ona Fai

• Valaaulia tamaiti e tusi ata o ni vaaiga eseese mai le faataoto i le saito ma le titania, o loo maua i le Mataio 13:24–30, ma faasoa mai i le vasega a latou ata. Fai i ai e faaigoa a latou atatusi e faaaoga ai le faauigaga o le faataoto o loo maua i le Mataio 13:36–43. Atonu e manaomia ona e faamalamalama atu o titania o ni vao leaga.

• Afai e mafai, faaali se ata o le saito ma le titania. Faamalamalama atu o le saito ma le titania o le a tutupu faatasi seia oo i le seleselega (iuga o le lalolagi). Ua aoao mai i lenei mea o loo tatou ola faatasi ma le lelei ma le leaga o siomia ai i tatou, ma e tatau ona tatou faaeteete e filifili le mea sa’o. Fai i tamaiti e faasoa mai pe mafai faapefea ona latou iloa le eseesega i le va o le lelei ma le leaga.

Mataio 13:44–46

O lo’u avea ai ma tagata o Le Ekalesia a Iesu Keriso o le Au Paia o Aso e Gata Ai o se ‘oa.

O vaai ia tamaiti o loo e aoaoina o lo latou avea ai ma tagata o le Ekalesia o se ‘oa taua? Atonu o le talanoaina o faataoto i le Mataio 13:44–46 e mafai ona fesoasoani ia i latou e faasoa mai ai o latou lagona e uiga i le Ekalesia a le Faaola.

Gaoioiga E Mafai Ona Fai

• Valaaulia tamaiti e faitau le Mataio 13:44–46 ia i latou lava ma faasoa atu faataoto i a latou lava upu i se tasi o le vasega.

• Otioti ni lio e faatusa i ni tupe siliva, ona tuu lea i se pusa ‘oa. Valaaulia tamaiti e piki se tupe siliva ma tusi ai i luga se mea se tasi ua latou fiafia ai e avea o se tagata o le Ekalesia. Fai i tamaiti e faasoa mai mea sa latou tusia i luga o a latou tupe.

• Valaaulia se tagata o le uarota e faamatala i tamaiti lana tala o lona liua ma faamatala mai po o le a le mea na ia ositaulagaina ina ia auai ai i Le Ekalesia a Iesu Keriso o le Au Paia o Aso e Gata Ai. Pe fai atu i tamaiti e talanoa e uiga i osigataulaga latou te faia mo le Alii ma Lana Ekalesia.

Uunaia le Aoaoina i le Aiga

Valaaulia tamaiti e aoao o latou aiga e uiga i se tasi o faataoto sa latou aoaoina i le Peraimeri.

Faaleleia o Lo Tatou Aoao Atu

E fiafia tamaiti e faasoa atu mea o loo latou aoaoina. E ui ina laiti tamaiti, e mafai e i latou ona faamalolosia tagata o o latou aiga. Fautuaina i latou e faasoa atu i o latou aiga mea na latou aoaoina i le Peraimeri. (Tagai Aoao Atu i le Ala a le Faaola,30.)