11–17 Setema

2 Korinito 1–7

“Ia Outou Lelei ma le Atua”

Amata au tapenapenaga i le faitauina o le 2 Korinito 1–7. O leSau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i nei mataupu, ma e mafai ona avatu e lenei otootoga ia te oe ni manatu faafaiaoga.

Valaaulia le Fefaasoaai

Atonu na tusia e nisi o tamaiti o lau vasega ni tusi i lenei vaiaso e uiga i le ala e avea ai se tagata o le aiga o se faataitaiga lelei o se soo o Iesu Keriso (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga). Afai na latou tusia, vave fesili i ai e faasoa ane se tusi i le vasega. Pe fesili foi i tamaiti e faasoa ane se isi mea sa latou aoaoina.

Aoao atu le Aoaoga Faavae: Tamaiti Laiti

2 Korinito 1:3–4

E faamafanafanaina au e le Tama Faalelagi, ma e mafai ona ou faamafanafanaina isi.

E mafai faapefea ona e avatu i tamaiti lagona mautinoa o le a faamafanafanaina i latou e le Tama Faalelagi? E mafai faapefea ona e fautuaina i latou e faamafanafana atu i isi?

Gaoioiga e Mafai Ona Fai

• Faaali atu i tamaiti ni mea e maua ai le mafanafana, e pei o se palanikeke po o se fusimanua. Fesili i tamaiti pe o le a le mea e faamafanafanaina ai i latou pe a faanoanoa pe fefefe pe i ai foi isi faafitauli. Faitau faatasi ma tamaiti le 2 Korinito 1:3–4 ma faamalamalama i ai o “puapuaga” o se isi upu lea mo faafitauli faigata. Faasoa atu ni nai auala sa faamafanafanaina ai oe e le Tama Faalelagi, ma molimau atu o le a Ia faamafanafanaina foi tamaiti.

• Faaali atu ata o tagata o loo papatisoina (tagai Tusi Ata o le Talalelei, nu. 103–4) a o e faitauina le 2 Korinito 1:4 i tamaiti. Faamalamalama atu pe a tatou papatiso, tatou te folafola atu tatou te faamafanafana atu i isi. E mafai faapefea ona tatou mulimuli i le fautuaga a Paulo e “faamafanafana atu i latou ua maua i se puapuaga”?

2 Korinito 2:7–8, 10

E mafai ona ou faamagalo atu i isi.

Filifili mai gaoioiga nei—pe aumai foi ni au lava—e fesoasoani ai e faamalolosia le manao o tamaiti e faamagalo atu i isi.

Gaoioiga e Mafai Ona Fai

• Faamalamalama atu i tamaiti sa manao Paulo i le Au Paia i Korinito e faamagalo se tagata sa agasala. Faitau le 2 Korinito 2:7–8,10, ma valaaulia tamaiti e tuu o latou lima i luga o o latou fatu i taimi uma latou te faalogoina ai upu ia faamagalo atu ma le faamagalo atu i ai.

• Valaaulia ia tamaiti e faatino mai taga pe faapefea ona latou tali atu i tulaga e faia ai e se tagata se mea le alofa. Tuu atu ia latou feauaua’i e fai mai “Malie lou loto” ma le “Ou te faamagalo ia te oe.” E faapefea ona tatou fesoasoani i tagata ia iloa ua tatou faamagaloina i latou? Faamalamalama atu o se tasi auala o le “faamauina lou alofa,” pe faaali atu lou alofa ia i latou (2 Korinito 2:8).

2 Korinito 4:1–2

Ou te talitonu i le faamaoni.

Na aoao atu e Paulo e faapea o auauna a Keriso ua latou “lafoai mea lilo e mama ai.” Mafaufau mo auala e mafai ona e faamalolosia ai le manao o tamaiti ia faamaoni i mea uma.

Gaoioiga e Mafai Ona Fai

• Fesoasoani i tamaiti e tauloto le fasifuaitau “Matou te talitonu i le faamaoni” (Mataupu Faavae o le Faatuatua 1:13). Tusi le fasifuaitau lea i taulima pepa e mafai e tamaiti ona teuteu ma fai. Faamalamalama atu o le faamaoni e aofia ai le tautala i le mea moni.

• Fai i tamaiti e sii o latou lima pe a e ta’ua se mea e moni ae tuutuu i lalo pe a e ta’ua se mea e le moni. Fai ni faaupuga faigofie ae e iloagofie, e pei o le “O le aso o le Aso Sa” po o le “E tolu o’u isu.” Toe fai mo ni nai taimi le gaoioiga, ma feauaua’i tamaiti e faia ia faaupuga moni ma sese. Aisea e finagalo ai le Tama Faalelagi ia tatou tau atu le mea moni?

• Faaali le vitio “A Visit with Elder Ulisses Soares” (ChurchofJesusChrist.org). O le a se mea na aoaoina e Elder Soares talavou e uiga i le faamaoni? Fautuaina tamaiti e saunia mo a latou feagaiga o le papatisoga e ala i le faamaoni.

Aoao atu le Aoaoga Faavae: Tamaiti Matutua

2 Korinito 1:3–4

E faamafanafana au e le Tama Faalelagi, ma e mafai foi ona ou faamafanafana i isi.

O le manatua o le ala na faamafanafana ai i tatou e le Atua e mafai ona musuia ai tatou e ofo atu le faamafanafanaga i isi.

Gaoioiga e Mafai Ona Fai

• A o e faitauina le 2 Korinito 1:3–4, fai i tamaiti e faalogologo mo se tali i le fesili “O le a le mea e fai e le Atua mo i tatou?” Fesoasoani i tamaiti e lisi mai ni auala e faamafanafana ai i tatou e le Atua. Valaaulia ia tamaiti e faasoa mai ni aafiaga ina na latou faanoanoa pe popole pe fefefe foi ma sa faamafanafanaina i latou e le Atua.

• Valaaulia tamaiti e faasoa mai ni auala e mafai ai ona tatou tausia la tatou feagaiga o le papatisoga e faamafanafana i isi (tagai Mosaea 18:9). Tuu atu ia i latou se taimi e mafaufau ai i se tasi latou te iloaina e manaomia le faamafanafanaga ma fai se fuafuaga e aapa atu ai i lena tagata.

2 Korinito 2:5–11

E mafai ona ou faamagalo atu i isi.

E mafai ona faigata ona faamagalo i isi pe a latou agaleaga mai ia i tatou. Peitai o le a iloa e tamaiti o loo e faiaoga ai le alofa, filemu, ma le fiafia a o latou aoao e faamagalo atu.

Gaoioiga e Mafai Ona Fai

• Ta’u i tamaiti sa i ai se tasi i Korinito sa agasala ma “sa faatupuina ai le tiga” mo le Au Paia (tagai 2 Korinito 2:5). Fai i tamaiti e sue le 2 Korinito 2:7–8 e sue ai le mea na manao ai Paulo i le Au Paia e fai.

• Faasoa mai se aafiaga na e faamagalo ai i se tasi—pe sa faamagalo ai oe e se isi—ma faamatala pe o a ni ou lagona mulimuli ane. Pe faasoa atu le vitio “The Goal: A Story of Faith, Friendship and Forgiveness” (ChurchofJesusChrist.org). Valaaulia tamaiti e faasoa mai foi a latou aafiaga i le faamagaloga.

2 Korinito 5:6–7

Ou te “savali i le faatuatua, ae le o le tino mai o mea.”

Mafaufau pe mafai faapefea ona e fautuaina tamaiti e tausi i poloaiga a le Atua tusa lava pe latou te le o vaai i faamanuiaga latou te manao vave i ai.

Gaoioiga e Mafai Ona Fai

• Faitau faatasi ma tamaiti le 2 Korinito 5:6–7 ma le Alema 32:21 ma fai i ai e vaavaai mo upu ma fasifuaitau ia e fesoasoani e faamanino ai le uiga o le faatuatua. Fai atu ia i latou e tusi i lalo a latou faauigaga ma faasoa atu i le tasi ma le isi.

• Valaaulia se tasi o tamaiti e moeiini ona mata, ma fai i isi tamaiti e tuu atu ia te ia faatonuga e fesoasoani ai na te faamaeaina le galuega e pei o le fausiaina o se ‘olo i poloka pe savali i le isi itu o le potu. E fesoasoani faapefea lenei gaoioiga tatou te malamalama ai i le uiga o le “savali i le faatuatua” i le Atua?

• Faaali le vitio “Reunited by Faith” (ChurchofJesusChrist.org), ma fesili i tamaiti pe na faapefea ona savali le alii talavou i le vitio e ala i le faatuatua. Faasoa atu se aafiaga ina ua e savali i le faatuatua, ma uunaia tamaiti e faasoa mai ni aafiaga.

2 Korinito 7:8–10

Tiga e tusa i le Atua e taitai atu ai au ia salamo.

O se tulaga masani lava le lagona e tamaiti le mama po o le maasiasi pe a maua i latou o faia se mea sese. Fesoasoani ia latou iloa le eseesega o nei lagona o le tiga faaleatua, lea e tau atu ai i le salamo moni.

Gaoioiga e Mafai Ona Fai

• Faamalamalama atu o le 2 Korinito 7:8–10, sa faasino atu ai e Paulo i se tusi sa ia tusia muamua i le Au Paia, ma lapataia ai i latou ma le lototoa e uiga ia latou agasala. Faitau faatasi fuaiupu nei. Aisea na fiafia ai Paulo ina ua tiga le Au Paia? Ta’u i ai o lenei ituaiga o tiga e ta’u o le tiga e tusa i le Atua.

• Fai i tamaiti e mafaufau i se taimi sa latou faia ai se mea sese ma sa latou lagona ai le faanoanoa e uiga i ai. Valaaulia i latou e fesili ifo ia i latou lava, “Aisea na ou lagona ai le leaga?” ona faasoa mai lea o a latou tali. Tusi a latou tali i luga o le laupapa (mo se faataitaiga, “Sa ou fefe o le a ou oo i faafitauli” po o le “Sa ou iloa sa ou le fiafia i le Tama Faalelagi” po o le “Sa ou faia se tasi e tagi”). O le fea o tali o i le laupapa e foliga e pei o le “tiga i la le Atua”? (2 Korinito 7:10). Aisea e sili atu ai le tiga i la le Atua nai lo isi ituaiga o faanoanoaga e mafai ona tatou lagona pe a uma ona tatou faia o se mea sese?

Uunaia le Aoaoina i le Aiga

Valaaulia tamaiti e faasoa atu i o latou aiga se tasi o gaoioiga mai le vasega i le aso, atonu i le taimi o se afiafi faaleaiga.

Faaleleia o Lo Tatou Aoao Atu

Faaali atu se mau. Filifili se fuaiupu o mau e te manatu e ‘anoa ma faaali i totonu o lou potuaoga i le mea o le a tele ina vaai i ai tamaiti. Atonu e mafai ona feauaua’i tamaiti e filifili se mau e faaali.