“28 Aokuso–3 Setema

1 Korinito 8–13

“O Outou o le Tino o Keriso”

A o e faitauina le 1 Korinito 8–13, faalogologo mo uunaiga mai le Agaga e uiga i le auala e aoao atu ai mataupu faavae i nei mataupu. Manatua soo se manatu mo gaoioiga e mafai ona fetuunai mo tamaiti e matutua atu ma tamaiti e laiti ifo.

Valaaulia le Fefaasoaai

Valaaulia ia tamaiti e faasoa mai se mea sa latou faia i le taimi o le sauniga faamanatuga e mafaufau ai e uiga ia Iesu.

Aoao atu le Aoaoga Faavae: Tamaiti Laiti

1 Korinito 10:13

O le a fesoasoani mai le Tama Faalelagi ia te au e faia filifiliga amiotonu.

E le faigofie i taimi uma ona filifili le mea sao, ma e silafia e le Tama Faalelagi lena mea. Pe a tatou ole atu, o le a Ia fesoasoani mai ia i tatou aua e finagalo o Ia ia tatou manuia.

Gaoioiga e Mafai Ona Fai

• Faitau le 1 Korinito 10:13 i tamaiti, ma valaaulia i latou e lūlū o latou ulu pe a latou faalogo i upu “tofotofo” po o le “tofotofoga.” Faamatala po o le a le uiga o lenei fuaiupu ia te oe.

• Faamatala ni nai tala pupuu o tagata o e o le a tauau e faia se filifiliga sese. A o faalogologo tamaiti, valaaulia i latou e tuu i luga a latou lima po o se pepa faailoga taofi pe a fai e le tagata o i le tala se filifiliga sese. O le a le filifiliga sao? Molimau atu o le a fesoasoani le Tama Faalelagi ia i tatou e filifili le mea tonu.

• Faaali atu se ata o Iesu, ma usu faatasi ma tamaiti se pese e uiga ia te Ia, e pei o le “O Loo Ou Taumafai e Avea e Pei o Iesu” (Tusipese a Tamaiti, 40-41). Talanoa pe faapefea e le manatuaina o Iesu ona fesoasoani ia te oe e faia filifiliga lelei. Faaali atu ata o isi mea e fesoasoani ia i tatou e faia filifiliga lelei, e pei o matua po o tusitusiga paia. Fesili i tamaiti pe o le a le mea e fesoasoani ia i latou e faia filifiliga lelei.

1 Korinito 12:4, 7–12

Ua faamanuiaina au e le Tama Faalelagi i meaalofa faaleagaga.

Ua tuuina mai e le Tama Faalelagi i Ana fanau uma ia meaalofa faaleagaga. O a meaalofa faaleagaga o e vaaia i tamaiti o loo e faiaoga ai?

Gaoioiga e Mafai Ona Fai

• Fai i tamaiti e tusi se ata o se meaalofa e fiafia i ai ua latou mauaina. Faamalamalama atu ua aumaia e le Tama Faalelagi ia i tatou ia meaalofa faaleagaga e faamalolosia ai lo tatou faatuatua ma fesoasoani ai ia i tatou e faamanuia isi. Faasoa atu i tamaiti nisi o meaalofa faaleagaga o loo faamatala mai i le 1 Korinito 12:7–11.

• Tusi se faaupuga mo tamaiti taitasi, e faamatala ai se meaalofa faaleagaga ua e vaaia ia te ia (pe e mafai foi ona e valaaulia ia matua e tusia na faaupuga). Tuu ia faamatalaga i totonu o teutusi. Faataga ia tamaiti e tatala a latou meaalofa, ma fesoasoani ia i latou e faitau e uiga ia latou meaalofa faaleagaga.

Ua tuuina mai e le Tama Faalelagi i Ana fanau uma ia meaalofa faaleagaga.

1 Korinito 13

E mafai ona ou alofa i isi.

Ua aoao mai e tusitusiga paia e faapea o le alofa mama o “le alofa le pona o Keriso” (Moronae 7:47). E mafai faapefea ona e fesoasoani i tamaiti e atiae ma faaali atu le alofa faa-Keriso?

Gaoioiga e Mafai Ona Fai

• Faitau le 1 Korinito 13:13 ma le Moronae 7:47, ma fesoasoani i tamaiti e toe fai mai le fuaitau “O le alofa mama o le alofa le pona o Keriso.” Faaali atu ata o Iesu o loo alofa ma agalelei atu, ma fesili i tamaiti pe na faapefea ona Ia faalia le alofa i isi (tagai Tusi Ata o le Talalelei mo manatu).

• Usu se pese e uiga i le alofa i isi, e pei o le “Fetalai Mai Iesu e Alofa i Tagata Uma” po o le “Ia Fealofani” (Tusipese a Tamaiti, 39, 74), faatasi ma tamaiti. Faaali atu ni ata o tagata esese (e pei o se matua, se tei, se faiaoga, po o se uo), ma fesili i tamaiti e faasoa mai pe mafai faapefea ona latou auauna atu i lena tagata. Valaaulia ia tamaiti e mafaufau i se tasi e mafai ona latou auauna atu i ai ma tusi se faaupuga pe tusi se ata e avatu i lena tagata. Afai latou te manaomia nisi manatu i le ala e auauna atu ai, faaali le vitio “Pass It On” (ChurchofJesusChrist.org).

Aoao atu le Aoaoga Faavae: Tamaiti Matutua

1 Korinito 10:13

O le a fesoasoani mai le Tama Faalelagi ia te au e tetee atu i faaosoosoga

O folafolaga i lenei fuaiupu e mafai ona maua ai e fanau le talitonuga mautinoa e mafai ona latou tetee atu i faaosoosoga faatasi ai ma le fesoasoani a le Tama Faalelagi.

Gaoioiga e Mafai Ona Fai

• Valaaulia tamaiti e faitau i ni paga le 1 Korinito 10:13 ma aotele le fuaiupu ia latou lava upu. Fai i tamaiti e faasoa mai se aafiaga na fesoasoani ai le Tama Faalelagi ia i latou e aloese pe tetee atu i faaosoosoga. O le a se mea e mafai ona fai e faalagolago ai i le Tama Faalelagi pe a faaosoosoina i tatou?

• Tusi i ni fasipepa ia faaosoosoga e ono feagai ma tamaiti i le aso. Valaaulia ia tamaiti e tofu filifili se pepa ma faasoa mai ia mea na tuuina mai e le Tama Faalelagi e fesoasoani ai ia te i tatou e aloese pe tetee atu i nei faaosoosoga. Mo nisi manatu, faitau faatasi le Alema 13:28–29.

1 Korinito 11:23--29

I le taimi o le faamanatuga, e mafai ona ou mafaufau e uiga i auala o loo ou mulimuli ai i le Faaola.

Fesoasoani i tamaiti o loo e aoaoina ia iloa o le faamanatuga o se avanoa e “suesue” ai i latou lava ma faafou a latou feagaiga o le papatisoga e auauna atu ai i le Alii ma tausi Ana poloaiga (1 Korinito 11:28).

Gaoioiga e Mafai Ona Fai

• Fai i se tamaitiiti e faitau le 1 Korinito 11:28. O le a le uiga o le “suesue” ifo ia i tatou lava a o lei aai ma feinu i le faamanatuga? Fai i tamaiti e mafaufau i isi tagata o e suesueina mea, e pei o fomai, leoleo nanā, po o saienitisi (mo se faataitaiga, o fomai e suesueina i tatou ina ia mautinoa o loo tatou maloloina). Pe a tatou aai ma feinu i le faamanatuga, o le a se mea e mafai ona tatou faia e suesue ai pe o faapefea ona tatou ola i a tatou feagaiga o le papatisoga?

• Fai i tamaiti e fai se lisi o mea e mafai ona latou mafaufau i ai pe a latou aai ma feinu i le faamanatuga. Valaaulia i latou e faaaoga a latou lisi e fai ma faamanatu e suesue ifo ai i latou lava i le taimi o le faamanatuga.

1 Korinito 12:4, 7–12, 31; 13:1–8

E i ai a’u meaalofa faaleagaga.

Sa aoao mai e Paulo e faapea o meaalofa a le agaga ua “tuuina mai i tagata uma” (1 Korinito 12:7). E mafai ona fesoasoani lea mataupu faavae i tamaiti e fausia ai o latou lagona o le taua o le tagata lava ia, aemaise ai pe a latou faaaogaina a latou meaalofa e faamanuia ai isi.

Gaoioiga e Mafai Ona Fai

• Fai i tamaiti e tusi i le laupapa ia meaalofa faaleagaga latou te mauaina i le 1 Korinito12:7–11; 13:2. Valaaulia i latou e sue soo se meaalofa faaopoopo o loo ta’ua i le Moronae 10:8–18 ma le Mataupu Faavae ma Feagaiga 46:13–26. Faasoa atu ia i latou nisi o meaalofa faaleagaga faaopoopo o loo ta’ua e Elder Marvin J. Ashton: “O le meaalofa o le fesili; o le meaalofa o le faalogo; … o le meaalofa o le aloese mai le femisaa’i; … o le meaalofa o le sailia o le amiotonu; o le meaalofa o le le faamasino atu; o le meaalofa o le vaavaai atu i le Atua mo le taitaiga; … o le meaalofa o le manatu alofa mo isi; … o le meaalofa o le ofoina atu o le tatalo; o le meaalofa o le tuuina atu o se molimau maoae” (“There Are Many Gifts,” Ensign, Nov. 1987, 20). Valaaulia ia tamaiti e talanoa e uiga i meaalofa faaleagaga latou te vaaia i le tasi ma le isi.

• A o lei amataina le vasega, fesili i matua o tamaiti e uiga i meaalofa latou te vaaia ia latou fanau, pe mafaufau foi oe lava e uiga i meaalofa a tamaiti. Tau atu i tamaiti e uiga i nei meaalofa. Valaaulia ia tamaiti e tusi i lalo se auala se tasi o le a latou faaaoga ai a latou meaalofa e faamanuia ai se tasi i lenei vaiaso.

• Faamatala ni tulaga eseese e mafai ai e tagata ona faaaoga se meaalofa faaleagaga mai le 1 Korinito 12:7–10. Valaaulia ia tamaiti e faailoa mai ia meaalofa faaleagaga e mafai ona faaaoga i tulaga taitasi.

Uunaia le Aoaoina i le Aiga

Fautua atu i tamaiti e talanoa ma o latou aiga i se mea na outou talanoaina i le vasega. Mo se faataitaiga, e mafai ona e valaaulia tamaiti e faasoa a latou meaalofa faaleagaga ma o latou aiga ma fesili i tagata o latou aiga poʻo a a latou meaalofa.

Faaleleia o Lo Tatou Aoao Atu

Tuuina atu ni valaaulia e faaaloalogia ai le faitalia. A o e valaaulia ia tamaiti e faatino mea o latou aoaoina, mafaufau i ni auala e faamamaluina ai la latou faitalia. Nai lo le tuuina atu o ni valaaulia patino, mafaufau e valaaulia i latou e mafaufau i ni a latou lava auala e faaaoga ai mea ua latou aoaoina.