Korinito, Eleni i Saute, o le Malaefono ma le Laumua Faalepulega, ata vali na saunia e Balage Balogh Balogh/www.ArchaeologyIllustrated.com

21–27 Aokuso

1 Korinito 1–7

“A Ia Maopoopo Lava”

O le a fesoasoani le Agaga Paia ia te oe ia iloa ai pe o a mataupu faavae o i le 1 Korinito 1–7 o le a fesoasoani i tamaiti o loo e aoaoina. Ao e faitau ma le agaga tatalo i nei mataupu, tusifaamaumau ia mafaufauga ma lagona e oo atu ia te oe mai le Agaga.

Valaaulia le Fefaasoaai

Fesili i tamaiti pe na latou faasoa atu i o latou aiga se mea sa latou aoaoina i le Peraimeri i le vaiaso ua te’a. (Atonu e te manaomia le toe faia o se faamanatu puupuu o le lesona o le vaiaso na te’a nei.) Afai na fai, o le a se mea na latou faasoaina?

Aoao atu le Aoaoga Faavae: Tamaiti Laiti

1 Korinito 2:11–14

E aoao mai e le Agaga Paia ia te au upumoni o le talalelei.

O se tasi o matafaioi a le Agaga Paia o le aoao mai ia i tatou o upumoni. O a aafiaga e mafai ona e faasoa atu i tamaiti e fesoasoani ai ia latou malamalama i lenei mea?

O Gaoioiga e Mafai Ona Fai

• Faaali atu ni mea faitino po o ni ata e faatusa i auala tatou te aoao ai e uiga i le lalolagi (pei o se a’oga, api, po o se telefoni feaveai). O le a se mea e mafai ona tatou aoaoina pe a tatou faaaogaina nei mea? Faamalamalama atu o le 1 Korinito 2:11,14, o loo aoao mai ai e Paulo e mafai ona tatou aoao e uiga i le Atua e ala mai i le na o le Agaga o le Atua, o le Agaga Paia lea. O a ni mea e mafai ona tatou faia e aoao ai “i mea a le Atua”?

• Pati ou lima a o e ta’uina silapela taitasi i le fuaiupu “E aoao mai e le Agaga Paia ia i tatou upumoni.” Fai i tamaiti e pati o latou lima ma toe fai mai le fasifuaitau. Faasoa atu i tamaiti se aafiaga i se taimi na fesoasoani ai le Agaga Paia ia te oe ia iloa e moni se mea.

• Usu faatasi se pese e uiga i le Agaga Paia, e pei o le “O Le Agaga Paia” (Tusipese a Tamaiti, 56). Fesoasoani i tamaiti e sue upu ma fasifuaitau i le pese o loo aoao mai ai le ala e talanoa mai ai le Agaga Paia ia i tatou ma pe o a foi mea Na te aoao mai ia i tatou.

1 Korinito 3:10–11

O Iesu Keriso o lo’u faavae.

O loo faataatitia e tamaiti se faavae mo a latou molimau, ma e mafai ona e fesoasoani ia i latou e fausia se faavae mautu i luga o Iesu Keriso.

O Gaoioiga e Mafai Ona Fai

• Faitau le 1 Korinito 3:11 i tamaiti, ma faamalamalama atu o Iesu Keriso o lo tatou faavae. Faaali i tamaiti ni ata o mea e mafai ona i ai a tatou molimau, e aofia ai se ata o Iesu Keriso. Fesoasoani ia i latou e faatulaga ia ata ina ia pito i lalo le ata o Iesu, e pei o se faavae, ma o isi ata e “fausia” i luga o se molimau ia te Ia.

• Fatufatu ni taga mo le pese “Tagata Poto ma le Tagata Valea” (Tusipese a Tamaiti, 132), ma usu faatasi ma tamaiti le pese. Tuu atu ia tofu le tamaitiiti ma se maa o tusi ai luga le “O Iesu Keriso o lo’u faavae.” Tuu i tamaiti e o ma ave a latou maa i le fale e faamanatu ai ia i latou mea sa latou aoaoina.

• Faasoa atu ata o loo faamatalaina ai nisi o tala e te fiafia i ai mai le soifuaga o le Faaola, ma fai i tamaiti e faamatala atu ia te oe mea o loo tutupu i ata. Tuu atu latou te faasoa mai tala latou te fiafia i ai e uiga ia Iesu. Tuu atu lau molimau o Iesu Keriso o le faavae o lou faatuatua.

1 Korinito 6:19

O lo’u tino e faapei o se malumalu.

E mafai faapefea ona e fesoasoani i tamaiti ia talisapaia o latou tino o ni meaalofa mai le Atua ma i ai se manao sili atu e tausia lelei?

O Gaoioiga e Mafai Ona Fai

• Faaali i tamaiti ni ata o malumalu (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga), ma faitau upu nei mai le 1 Korinito 6:19: “O lo outou tino o le malumalu lea o le Agaga Paia.” Fesoasoani ia malamalama tamaiti e finagalo le Tama Faalelagi ia tatou tausia o tatou tino ia mama ma paia, e faapei o se malumalu.

• Faaali se ata o se tamaitiiti, ma tuu faataamilo ai ata o mea e lelei mo o tatou tino ma mea foi e leaga. Valaaulia tamaiti e feauaua’i i le faailoa mai o mea lelei ma aveese ia mea leaga.

• Usu faatasi se pese e uiga i tino, e pei o le “Ulu, Tauau, Tuli ma Tamaivae” (Tusipese a Tamaiti, 129), ma fesili i tamaiti pe aisea latou te faafetai ai mo o latou tino.

Aoao atu le Aoaoga Faavae: Tamaiti Matutua

1 Korinito 1:23–25

O le atamai o lona uiga o le faalagolago lea i le poto o le Atua.

O le a iloa e tamaiti o loo e aoaoina—pe afai latou te le’i iloaina—o nisi o tagata latou te aoao atu mea e feteena’i ma le poto o le Atua. O le suesueina o le 1 Korinito 1:23–25 e mafai ona fesoasoani i tamaiti ia malamalama ai e mafai ona tatou faatuatuaina le poto o le Atua aua e sili atu nai lo lo tatou poto.

O Gaoioiga e Mafai Ona Fai

• Fai i tamaiti e faitau le 1 Korinito 1:23–25 ma sue upu poto ma le valea. Faamalamalama atu e toatele tagata na manatu e valea aoaoga a Paulo, ae sa faamalamalama atu e Paulo e faapea o le talitonu i le talalelei a Keriso o le poto moni ia. Aisea e poto ai le talitonu i mea ua aoao mai e le Atua?

• Fesoasoani i tamaiti e faatino mai taga o le auala e mafai ona latou tali atu ai i tagata o e mafaufau e “valea” ia tulafono a le Atua—tulafono e pei o le faatuatua i le Faaola, tausia o le Upu o le Poto, po o le usitai i le tulafono o le sefuluai. Mo se faataitaiga, e mafai ona latou molimau atu i faamanuiaga e maua mai le ola ai i nei aoaoga.

• Faasoa atu se aafiaga i se taimi na manatu ai isi e valea ou talitonuga, pe faasoa atu se faataitaiga mai tusitusiga paia. Tuu atu i tamaiti e faasoa mai ni aafiaga tai faapena. E mafai faapefea e le 1 Korinito 1:25 ona fesoasoani ia tumau lo tatou faamaoni pe a ta’uvaleaina e isi o tatou talitonuga?

1 Korinito 2:11–14

E aoao mai e le Agaga Paia ia te a’u upumoni o le talalelei.

E mafai faapefea ona e fesoasoani i tamaiti ia iloa latou te manaomia le Agaga Paia ia malamalama ai “i mea a le Atua”?

O Gaoioiga e Mafai Ona Fai

• Fai atu i tamaiti e fai se lisi o auala tatou te aoao ai e uiga i le lalolagi—mo se faataitaiga, tusi, a’oga, ma le initoneti. Ona faitau faatasi lea o le 1 Korinito 2:11–14. O a mea o aoao mai e nei fuaiupu e uiga i le ala tatou te aoao ai “i mea a le Atua”?

• Faamatala atu e uiga i se taimi na e aoaoina ai se mea e ala i le Agaga o le Atua. Fesoasoani i tamaiti e faailoa mai taimi na latou lagonaina ai le Agaga. O a “mea a le Atua” (1 Korinito 2:11) ua fesoasoani le Agaga tatou te malamalama ai?

• Valaaulia tamaiti taitasi e faitau se tasi o nei mau: 1 Korinito 2:11–14; 1 Nifae 10:17; Moronae 10:3–5; ma le Mataupu Faavae ma Feagaiga 8:2–3. Fai i tamaiti e faasoa mai mea sa latou aoaoina mai nei mau e uiga i le ala e aoao mai ai i tatou e le Agaga Paia. Aisea tatou te faafetai ai mo le meaalofa o le Agaga Paia?

1 Korinito 6:19–20

E tatau ona ou faia lo’u tino ma le faaaloalo ma tausia ia paia.

O le malamalama o o tatou tino o meaalofa mai le Tama Faalelagi o le a fesoasoani i tamaiti e tausia le paia o o latou tino, e oo lava pe a faaosoosoina i latou.

O Gaoioiga e Mafai Ona Fai

• Aumai se koneteina o i ai i totonu ata o se tamaitiiti ma se malumalu. Valaaulia ia tamaiti e faitau le 1 Korinito 6:19–20 ma mate mai po o a mea o i le koneteina. Tuu atu latou te tatalaina le koneteina ma talanoaina pe faapefea ona pei o tatou tino o malumalu.

• Talanoa ma tamaiti e uiga i le ala e tatau ona latou taulima ai se malumalu. Afai o o tatou tino ua pei o malumalu, e faapefea ona tatou taulimaina o tatou tino? O le usuina po o le faitauina o upu i se pese e uiga i malumalu, e pei o le “Ia Tuu Mai E Le Alii Se Malumalu” (Tusipese a Tamaiti, 73), e mafai ona fesoaosani e tali ai le fesili lea. Pe a tatou faia ni mea sese, e mafai faapefea ona tatou toe faamamaina o tatou “malumalu”?

• Faitau faatasi le “E Paia Lou Tino” (i le Mo le Malosi o le Autalavou [taiala, 2022], 22–29). Valaaulia ia tamaiti e lisi i le laupapa ia fautuaga latou te maua e uiga i le auala e tausia ai o tatou tino.

Uunaia le Aoaoina i le Aiga

Valaaulia ia tamaiti e fasoa atu i o latou aiga se pese sa latou usuina i le vasega ma mea sa latou aoaoina mai ai.

Faaleleia o Lo Tatou Aoao Atu

Molimau atu e uiga ia Iesu Keriso. O se tasi o mea e sili ona taua e mafai ona e faia o se faiaoga o le molimau atu lea e uiga ia Iesu Keriso. O le a fesoasoani lea i tamaiti e faamalolosia ai a latou molimau ma lagonaina ai le alofa o le Faaola mo i latou.