7–13 Aokuso

Roma 1–6

“O Le Mana o le Atua mo le Olataga”

O a ni uunaiga e te mauaina a o e faitauina le Roma 1–6? E mafai ona fesoasoani nei uunaiga e te filifili ai mai nei manatu faafaiaoga pe tapena au oe lava manatu.

Valaaulia le Fefaasoaai

Valaaulia tamaiti e faasoa mai mea sa latou faia e tali atu ai i soo se valaaulia sa e tuu atu ia i latou i le lesona o le vaiaso ua te’a.

Aoao atu le Aoaoga Faavae: Tamaiti Laiti

Roma 1:16–17

E mafai ona ou faaalia lo’u faatuatua ia Iesu Keriso e ala i le mulimuli ia te Ia.

Na aoao atu e Paulo e faapea o le talalelei o loo i ai le mana e aumaia ai le olataga i tagata uma o e ola i le faatuatua ia Iesu Keriso. E faapefea ona e fesoasoani i tamaiti e faaalia lo latou faatuatua ia Iesu Keriso e ala i le mulimuli ia te Ia?

Gaoioiga e Mafai Ona Fai

• Faitau le Roma 1:17 i tamaiti, ma fesoasoani ia latou taulotoina le fasifuaitau “E ola le tagata amiotonu i le faatuatua.” E mafai ona e tofia i tamaiti taitoatasi se upu se tasi i le fasifuaitau ma fai atu ia i latou e ta’u mai le upu lena pe a e tusi i ai. Faamalamalama atu o le fasifuaitau lea o lona uiga e tatau ona tatou faatuatua ia Iesu Keriso. Fesili atu i tamaiti pe latou te iloa po o le a le faatuatua. Faaali atu se ata o Iesu Keriso ma faamalamalama atu tatou te talitonu e moni o Ia tusa lava pe tatou te lei vaai ia te Ia. O le faatuatua lena–o le talitonu i se mea tusa lava pe tatou te lei vaai i ai.

• Faamalamalama atu tatou te faaalia lo tatou faatuatua ia Iesu Keriso e ala i le usiusitai ia te Ia. Nana solo i le potu ata o tagata o faia mea na poloaiina ai e Iesu i tatou e fai. Tuu i tamaiti e feauauai i le sueina ma le faamatalaina o ata. O le a se mea e mafai ona tatou faia e mulimuli ai ia Iesu?

• Fai atu i se tasi o tamaiti e moeiini ona mata, ma ta’iala o ia i le potu agai i se ata o Iesu. Afai e lava le taimi, tuu atu se avanoa i isi tamaiti. Fesoasoani ia malamalama tamaiti e mafai ona latou mulimuli i aoaoga a Iesu e pei lava ona sa latou mulimuli ai i lau taitaiga.

Roma 6:1–11

O le papatisoina e pei o le avea o se tagata fou.

O tamaiti o loo e aoaoina o loo sauniuni mo le papatisoga. O le a se mea e mafai ona latou aoaoina e uiga i le papatisoga mai le Roma 6?

Gaoioiga e Mafai Ona Fai

• Valaaulia tamaiti e toe fai mai le fasifuaitau “Savavali i le ola toefuataiina” (Roma 6:4). Tau atu i tamaiti le uiga o lenei mea ia te oe. Mo se faataitaiga, e mafai ona e faasoa atu manatuaga e uiga i le aso na e papatiso ai ma talanoa pe na faapefea ona fesoasoani lou papatisoga ia te oe e avea atili ai e faapei o Iesu Keriso. Faaaoga le itulau mo gaoioiga o le vaiaso lenei e aoao atu ai tamaiti e faapea o le papatisoga e fesoasoani ai ia tatou avea ma se tagata fou.

• Afai na i ai nisi tamaiti na auai i se papatisoga, fai atu ia i latou e fetufaai mai ni mea na latou oo i ai. Pe faaali atu se ata o se tasi o loo papatisoina (tagai Tusi Ata o le Talalelei, nu. 35, 103–4). Fesoasoani i tamaiti ia malamalama o le papatisoga tatou te faia ai folafolaga ia avea faapei o Iesu. Valaaulia i latou e tusi ni ata o i latou lava o loo papatisoina ma faasoa mai i ni mea e mafai ona latou faia e sauniuni ai mo o latou papatisoga.

• Usu faatasi ma tamaiti se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53). O le a se mea ua tatou aoao ai e uiga i le papatisoga mai lenei pese?

O le papatisoga e faatusa i le amataga o se ola fou e avea o se soo o Keriso.

Aoao atu le Aoaoga Faavae: Tamaiti Matutua

Roma 1:16–17

E mafai ona ou faaalia lo’u faatuatua ia Iesu Keriso e ala i le mulimuli ia te Ia.

Na aoao mai Paulo e faapea o le talalelei o loo i ai le mana e aumaia ai le olataga i tagata uma o e ola i le faatuatua ia Iesu Keriso. O le faatuatua ia Iesu Keriso o le mataupu faavae muamua lea o le talalelei. Na te faaosofiaina i tatou e usiusitai i poloaiga. E mafai faapefea ona e fesoasoani i tamaiti ia malamalama atili i le faatuatua?

Gaoioiga e Mafai Ona Fai

• Fai i se tamaitiiti e sue Roma i se faafanua. Fesoasoani ia malamalama tamaiti i nai vaiaso o lumanai, o le a latou aoao ai mai tusi na tusia e Paulo i tagata o le Ekalesia i nofoaga eseese, e amata i lana tusi i tagata Roma.

• Tusi le anotusi mai le Roma 1:16 i le laupapa, ae sui ni nai upu i ni avanoa. Fai i tamaiti e sue ia mau ma faatutumu avanoa. Valaaulia tamaiti e faasoa mai po o le a le uiga o le “Ou te le ma i le talalelei a Keriso” ia i latou.

• Valaaulia se tamaitiiti e faitau leotele le Roma 1:17, ma fai i isi tamaiti e faalogologo mo se upu e ta’u faafia. O le a le uiga o le “ola e ala i le faatuatua”? Fesoasoani i tamaiti e sue se faauigaga o le faatuatua i se punaoa e pei o le Taiala i Tusitusiga Paia, “Faatuatua” (scriptures.ChurchofJesusChrist.org). Mata e ese faapefea o tatou olaga pe ana faapea e leai so tatou faatuatua ia Iesu Keriso?

• Faaali atu i tamaiti se laau ma se fatu, ma fesili pe tatou te fesoasoani faapefea i se fatu ia avea ma laau? Faamalamalama atu a tatou totoina ma fui se fatu, ua tatou ta’u atu ai ua i ai lo tatou faatuatua o le a ola. E faapefea ona faaalia lo tatou faatuatua ia Iesu Keriso? Mafaufau e usu se pese e uiga i le faatuatua, e pei o le “Faatuatua” (Tusipese a Tamaiti, 50), o se vaega o lenei gaoioiga.

Roma 3:23–24

Tatou te manaomia uma lava Iesu Keriso ina ia mafai ai ona faamagaloina a tatou agasala.

Sa manao Paulo i tagata Roma ia malamalama o le faaolataga e na o Iesu Keriso ma Lona alofa tunoa e auala mai ai. Mafaufau pe mafai faapefea ona e aoao atu lenei upumoni i tamaiti.

Gaoioiga e Mafai Ona Fai

• Tuu atu i tamaiti taitoatasi se fasifuaitau mai le Roma 3:23–24, e tusia i se fasipepa. Valaaulia tamaiti e tuu fasifuaitau i le faasologa saʻo ma faitau faatasi ia fuaiupu. Fesili i tamaiti po o a mea na latou aoaoina mai nei fuaiupu. Faamalamalama atu o le “alofa tunoa” i le fuaiupu 24 o lona uiga o le meaalofa a le Faaola o le alofa ma le alofa mutimutivale, lea ua mafai ai e i tatou ona maua le faamagaloga mo a tatou agasala ma avea ma tagata sili atu.

• Faatautau se ata faamaualuga i se puipui po o se isi nofoaga e le mafai ona au i ai tamaiti pe afai e na’o latou. Tuu atu latou te taumafai ia au i ai, ma faatusatusa lea mea i mea o loo aoao mai e Paulo i le Roma 3:23. Ona fesoasoani lea ia latou au i le ata. O le a se mea na faia e le Faaola mo i tatou e le mafai ona tatou faia mo i tatou lava? Valaaulia ia tamaiti e faasoa mai pe o a ni o latou lagona e uiga i le Faaola pe a latou mafaufau i le mea sa ma e mafai ona Ia faia e fesoasoani ai ia i latou.

Roma 6:1–11

O le papatisoina e pei o le avea o se tagata fou.

Na aoao mai e Paulo e faapea o le papatisoga e faatusa i le maliu ma le Toetu mai o Keriso. E faatusa foi i le faatuina a’e ia “savavali i le ola toefuataiina” (Roma 6:4). Tatou te toefaafouina a tatou tautinoga e savavali i le ola toefuataiina i taimi uma tatou te aai ai ma feinu i le faamanatuga.

Gaoioiga e Mafai Ona Fai

• Valaaulia se tamaitiiti e faitau le Roma 6:3–6. O le a le tala a Paulo i le mea “ua faatusa i ai” le papatisoga?

• Talanoa pe faapefea ona faatusa le papatisoga i le oti ma le toetu. E mafai ona fesoasoani le faaali atu o se ata o se papatisoga pe faaali se vitio e pei o le “The Baptism of Jesus” (ChurchofJesusChrist.org). Aisea ua avea ai le oti ma le toetu ma faatusa lelei o mea e tutupu pe a tatou papatiso?

• Faitau faatasi ia tatalo o le faamanatuga (tagai Mataupu Faavae ma Feagaiga 20:77, 79). Faamanatu i tamaiti pe a tatou tagofia [aai ma feinu] i le faamanatuga, tatou te faafouina le tautinoga e mulimuli ia Iesu Keriso lea na tatou faia ina ua tatou papatiso. E fesoasoani faapefea le faamanatuga tatou te “savavali [ai] i le ola toefuataiina”?

• Valaaulia ia tamaiti e tusi ni ata e faaalia ai le latou faauigaina o le “savavali i le ola toefuataiina.” E mafai e tamaiti ona faatautau nei ata i o latou potu e fesoasoani ai ia latou manatua e faia ia filifiliga lelei.

Uunaia le Aoaoina i le Aiga

Fautua atu i tamaiti e fai i tagata o o latou aiga e ta’u atu ia i latou pe a vaai ua latou faia se mea e faaalia ai le faatuatua.

Faaleleia o Lo Tatou Aoao Atu

Ia atinae le talitonuga mautinoa o tamaiti. Viia tamaiti pe a latou auai i le vasega. O se tasi lea o auala e fausia ai lo latou talitonuga mautinoa e mafai ona latou aoaoina le talalelei.