31 Iulai–6 Aokuso

Galuega 22–28

“O Se Auauna ma se Molimau”

A o e faitauina tala mai le auaunaga a Paulo le Aposetolo i le Galuega 22–28, vaavaai mo mataupu faavae o le a tele se aoga i tamaiti o loo e aoaoina.

Valaaulia le Fefaasoaai

Faaali atu ata e ono faamanatu ai i tamaiti ia tala mai le Galuega 22–28, e pei o se sela o le falepuipui, se vaa, ma se gata. Valaaulia ia tamaiti e faasoa mai ni tala latou te iloaina e uiga ia Paulo e tusa ai ma ata nei.

Aoao atu le Aoaoga Faavae: Tamaiti Laiti

Galuega 23:10–11

E manatu mai le Tama Faalelagi ma Iesu ia te au ma o le a fesoasoani ia te au i taimi faigata.

O le aoao e uiga i le ala na fesoasoani ai le Faaola ia Paulo e mafai ona fausia ai le faatuatua o tamaiti ia iloa e alofa le Tama Faalelagi ma Iesu ia i latou.

Gaoioiga e Mafai Ona Fai

• Faasoa atu le tala o i le Galuega 23:10–11 e uiga i le Faaola a o asiasi atu ia Paulo i le falepuipui. Pe faaali foi le vitio “Be of Good Cheer” (ChurchofJesusChrist.org), lea e faamatala mai ai lenei tala. Faasoa atu se taimi na e feagai ai ma se tofotofoga ma e mauaina se taitaiga ma le faamafanafanaga mai le Atua. Fai i tamaiti e faamatala mai taimi na latou lagona ai le faamafanafanaina e le Atua.

• Fesoasoani i tamaiti e tauloto mea na fai atu ai Iesu ia Paulo: “Ina faalototele ia oe.” Fai i tamaiti e mafaufau i se tasi e mafai ona latou valaaulia ia faalototele–atonu o se tasi o faanoanoa pe popole.

• Usu faatasi ma tamaiti se pese e uiga i le fiafia, e pei o le “Ataata” (Tusipese a Tamaiti, 128).

E pei o Paulo, e mafai ona tatou filifili e tuuina atu a tatou molimau e uiga i le Faaola.

Galuega 26:1–29

E mafai ona ou faasoa atu la’u molimau i isi.

O le toe faamanatuina o le molimau a Paulo i luma o le Tupu o Akeripa, e mafai ona fesoasoani i tamaiti e aoao ai i auala e faasoa atu ai mea ua latou iloa e moni.

Gaoioiga e Mafai Ona Fai

• Aumai se palealii pepa i le vasega ma tuu atu i se tamaitiiti na te paleina ma faafoliga faapea o ia o le Tupu o Akeripa. Valaaulia se isi tamaitiiti e tu i luma o le tupu e suitulaga ia Paulo a o e aoteleina le molimau a Paulo ma le tali atu a le Tupu o Akeripa, o loo maua i le Galuega 26:1–29 (tagai “Mataupu 63: Ua Faamaea e Paulo Lana Misiona,” i le Tala o le Feagaiga Fou, 162–66, po o le vitio talafeagai o loo i luga o le ChurchofJesusChrist.org). Faamalamalama atu e mafai ona tatou faasoa atu a tatou molimau i isi, e pei ona sa faia e Paulo.

• Fai i tamaiti e faalogologo a o e usuina pe faitau se pese e uiga i le molimau, e pei o le “Ua Ou Iloa o Soifua Lo‘u Tama” (Tusipese a Tamaiti, 8). Valaaulia tamaiti e sii o latou lima pe a latou faalogo i se mea latou te iloa e moni. Atonu e te manao e usu faafia le pese; valaaulia ia tamaiti e usu faatasi ma oe i le taimi lava ua latou masani ai ma upu. Fesoasoani ia i latou e faataitai le faasoa atu o a latou molimau i mea latou te iloa e moni.

• Faaaoga le itulau o gaoioiga o lenei vaiaso e fesoasoani ai i tamaiti e mafaufau e uiga i se mea e mafai ona latou fai atu ai pe a faasoa mai a latou molimau (tagai i Mataupu Faavae o le Faatuatua mo nisi manatu). Valaaulia i latou e faasoa atu a latou molimau i se tasi i o latou aiga.

Galuega 27

E lapataia au e perofeta i mea matautia.

Mafaufau pe mafai faapefea e le tala i le afatia o le folauga a Paulo ona aoao ai tamaiti e faapea, e iloa e perofeta tulaga matautia faaletino ma le faaleagaga e le mafai ona tatou iloa atu.

Gaoioiga e Mafai Ona Fai

• Valaaulia tamaiti e faafoliga faapea o la e i luga o se vaa ua afatia i se matagi malosi. Faitau le lapataiga a Paulo i tagata, o loo maua i le Galuega 27:9--10, ma faasoa atu le tala i le afatia o le vaa ona sa latou lei faalogo i lana lapataiga (tagai Galuega 27:11, 39–44). Faaali atu se ata o le Peresitene o le Ekalesia, ma tuu atu lau molimau e mafai ona ia lapataia i tatou e uiga i mea matautia faaleagaga.

• Tuu ni nai ata po o ni mea faitino i totonu o le potu e fai ma sui o mea na aoao mai e perofeta tatou te faia ia avea atili ai e pei o Iesu, e pei o le alofa i isi po o le papatisoina. Savavali faataamilo i le potu, o se vasega, ma tutu i ata po o meafaitino taitasi ma talanoa pe faapefea e le mulimuli i aoaoga a perofeta ona fesoasoani e faasaogalemu i tatou.

Aoao atu le Aoaoga Faavae: Tamaiti Matutua

Galuega 23:10–11; 27:18–25; 28:1–6

Pe a ou fetaiai ma puapuaga, e le tuulafoaiina au e le Atua.

I tofotofoga uma na feagai ma Paulo, sa faatasi le Alii ma ia. E mafai faapefea ona e fesoasoani i tamaiti e faatatau ia aafiaga o Paulo i o latou lava olaga?

Gaoioiga e Mafai Ona Fai

• I le faaaogaina o le Galuega 23:10, faamalamalama atu faapea na tuuina ia Paulo i le falepuipui ona sa ia aoao atu tagata e uiga ia Iesu. Ona faitau lea o le Galuega 23:11 faatasi ma tamaiti. Pe faaali foi le vitio “Be of Good Cheer” (ChurchofJesusChrist.org), lea e faamatala mai ai lenei tala. Aisea na mafai ai e Paulo ona “faalototeleina” e ui ina sa i ai o ia i le falepuipui?

• Tusi i le laupapa le Galuega 23:10–11; Galuega 27:18–25; ma le Galuega 28:1–6. Faaali atu ata o se falepuipui, o se vaa, ma se gata, ma valaaulia tamaiti e toe faamanatu fuaiupu nei ma faafetaui ma ata. I nei tala taitasi, na faapefea ona faaali atu e le Alii ia Paulo sa i ai o Ia faatasi ma ia? Faasoa atu se aafiaga i se taimi na faatasi ai le Alii ma oe i se taimi faigata ma le auala na faamalosia ai lau molimau ia te Ia. Uunaia tamaiti e faasoa mai foi ni aafiaga.

Galuega 26

E mafai ona ou faasoa atu ma le lototoa la’u molimau ia Iesu Keriso.

O le lototele o Paulo i le faasoa atu o lana molimau e mafai ona fesoasoani i tamaiti ia lototoa pe a faasoa atu a latou molimau.

Gaoioiga e Mafai Ona Fai

• Filifili fuaiupu mai le Galuega 26 e faitau faatasi ma tamaiti e fesoasoani ai ia i latou ia malamalama i le mea na ta‘u atu e Paulo i le Tupu o Akeripa e uiga i ona aafiaga (e pei o fuaiupu 9–16) ma mea sa ia aoao mai e uiga ia Iesu Keriso (e pei o fuaiupu 18, 23). E mafai foi ona e faaali atu se vaega o le vitio “Paul: A Chosen Vessel” (ChurchofJesusChrist.org). Aisea na ono taufaafefe ai mo Paulo le faasoa atu o nei mea i luma o le tupu? Valaaulia ia tamaiti e lisi ni nai mataupu faavae latou te iloa e moni. Fai i ai e mafaufau i se tasi latou te iloa e manaomia ona faalogo ia latou molimau o nei upumoni.

• Valaaulia tamaiti e faaaoga le itulau o gaoioiga o lenei vaiaso e tusi ai se mea latou te ono fai atu ai pe a faasoa atu a latou molimau.

Galuega 27

E lapataia au e perofeta i tulaga lamatia.

E mafai e tamaiti ona faalogologo i savali a perofeta soifua ma iloa a latou lapataiga. E mafai faapefea ona e fesoasoani i tamaiti e aoao pe faapefea ona uai atu i na lapataiga?

Gaoioiga e Mafai Ona Fai

• Ooti se fasipepa e faafoliga i se vaa i ni fasi paso. Valaaulia tamaiti e tusi lapataiga a Paulo o i le Galuega 27:9--11 i fasipepa ma tuufaatasi le paso. Aisea na le faalogo ai tagata ia Paulo? (tagai fuaiupu 11). Valaaulia tamaiti e faitau fuaiupu 18–20 ma le 40–44 e iloa ai le mea na tupu o se taunuuga. (Faamalamalama atu ona sa mulimuli tagata i le fautuaga mulimuli ane a Paulo e nonofo i luga o le vaa, o lea na leai ai se tasi e oti i le afatia ai o le folauga; tagai fuaiupu 30--32.) O le a se mea ua tatou aoao mai i lenei aafiaga e uiga i le mulimuli i le perofeta?

• Aumai se savali o se konafesi talu ai nei a le Perofeta o le Ekalesia ma faasoa atu i tamaiti soo se lapataiga po o se fautuaga na ia tuuina mai. Valaaulia tamaiti e mafaufau i ni auala e mafai ona latou mulimuli ai i le perofeta.

• Faaali le vitio “Blessed and Happy Are Those Who Keep the Commandments of God” (ChurchofJesusChrist.org). E faapefea ona faatusa perofeta i le tamaloa o loo i ai se meavaai?

Uunaia le Aoaoina i le Aiga

Fai i tamaiti e faaaoga mea sa latou aoaoina e uiga ia Paulo e faamalosiau ai o latou aiga e suesue i le savali aupito lata mai a le perofeta ma talanoa pe mafai faapefea ona latou mulimuli i lana fautuaga.

Faaleleia o Lo Tatou Aoao Atu

Faaaofia ai sane. “O le toatele o tamaiti (ma tagata matutua) e sili atu ona aoaoina pe a faaaofia ai sane eseese. Sue ni auala e fesoasoani i tamaiti e faaaoga ai o latou sane o le vaai, faalogo, ma le tago a o latou aoao. I nisi o tulaga, e te ono mafai foi ona sue ni auala e faaaofia ai o latou sane o le sogisogi ma le tofo!” (Aoao Atu i le Ala a le Faaola,20).