O Paulo o loo aoao atu i luga o le mauga

24–30 Iulai

Galuega 16–21

“Ua Tofia i Matou e le Atua e Folafola Atu le Talalelei”

A uma ona faitau le Galuega 16–21, mulimuli i uunaiga a le Agaga ma mafaufau i manatu o i lenei otootoga a o e sauni e aoao atu. Feutagai ma “Manaoga o Tamaiti Laiti Ifo” i le tusi lesona lenei mo se fesoasoani faaopoopo.

aikona o le fefaasoaai

Valaaulia le Fefaasoaai

Valaaulia tamaiti e tau atu ia te oe mea latou te iloa e uiga i aafiaga o Paulo i le faasoaina atu o le talalelei. E mafai foi ona latou talanoa e uiga i isi faifeautalai latou te iloa pe e uiga i o latou lava aafiaga i le faasoaina atu o le talalelei i se isi tagata.

aikona o le aoao atu

Aoao atu le Aoaoga Faavae: Tamaiti Laiti

Galuega 16:25–34

E aoao atu e faifeautalai ia tagata e uiga ia Iesu.

Pe o iloa e tamaiti o loo e aoao atu mea e fai e faifeautalai? E mafai faapefea ona e fesoasoani i tamaiti ia malamalama e mafai ona latou faasoa atu le talalelei i isi?

Gaoioiga e Mafai Ona Fai

• Fesoasoani i tamaiti e faatino mai le Galuega 16:25–34 ao e aoteleina le tala ia Paulo ma Sila o loo faasoa atu le talalelei i le falepuipui (tagai foi “Mataupu 61: O Paulo ma Sila i le Falepuipui,” i le Tala o le Feagaiga Fou,158–60, po o le vitio talafeagai o loo i luga o le ChurchofJesusChrist.org). Faamalamalama atu o faifeautalai i aso nei latou te aoao atu foi tagata e uiga ia Iesu ma fesoasoani e saunia i latou e papatiso.

• Fai ni pine o igoa faifeautalai mo tamaiti e fai, ma fesoasoani ia i latou e tusi o latou igoa i luga o pine. Aoao i tamaiti ni faaupuga faigofie o le aoaoga faavae e mafai ona latou faasoa atu i isi, e pei o le “O au o se atalii o le Atua,” “E fetalai mai le Atua e ala i se perofeta soifua,” po o le “O Iesu Keriso o lo tatou Faaola.” Faamanatu i tamaiti e le manaomia ona i ai sa tatou pine faafaifeautalai e faasoa atu ai le talalelei i isi.

Galuega 17:10--12

Ua molimau mai tusitusiga paia e uiga i le Tama Faalelagi ma Iesu Keriso.

E ui o nisi o tamaiti o loo e aoaoina atonu e lei mafai ona faitau, ae e mafai ona e fesoasoani ia i latou e atiae se fiafia mo tusitusiga paia ma vaai pe faapefea ona latou molimau atu i le Faaola.

Gaoioiga e Mafai Ona Fai

• Fesoasoani i se tasi o tamaiti e faitau le fasifuaitau “latou … saili i Tusi i lea aso ma lea aso” (Galuega 17:11). Valaaulia tamaiti e tusi i aso taitasi o le vaiaso i luga o se kalena a o latou toe fai faatasi ma oe le fasifuaitau lenei. Usu faatasi se pese o loo aoao mai ai e uiga i faamanuiaga o le faitauina o tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti, 70).

• Ina ia aoao tamaiti e faapea ua molimau mai tusitusiga paia e uiga i le Tama Faalelagi ma Iesu Keriso, fesoasoani ia i latou e sue i se mataupu i tusitusiga paia, e pei o le Galuega 17 po o le18, ma sue upu e pei o le Atua, Alii, po o Iesu. (Atonu e te manao e maka upu nei ina ia mafai ai e tamaiti ona maua gofie.) O taimi taitasi e maua ai e tamaiti se tasi o nei upu, valaaulia i latou e faasoa mai se mea latou te iloa e uiga i le Tama Faalelagi ma Iesu Keriso.

Galuega 17:22–31

O a’u o se atalii o le Atua.

I luga o le Mauga o Areopako, na aoao atu ai e Paulo ia upumoni faavae e uiga i le natura o le Atua, e aofia ai upumoni faapea o i tatou o Ana fanau ma “e le mamao o ia ma i tatou taitoatasi” (Galuega 17:27). E mafai faapefea ona e fesoasoani i tamaiti ia lagona le latalata atu i lo latou Tama Faalelagi?

Gaoioiga e Mafai Ona Fai

• Valaaulia ia tamaiti e toe fai le fasifuaitau “O le fanau a le Atua i tatou” (Galuega 17:29), ma faamalamalama atu o fanau o lona uiga o se atalii/afafine. Tuu atu lau molimau i tamaiti taitasi, auaua’i, o ia o se atalii/afafine o le Atua. Valaaulia i latou e faasoa atu pe o a o latou lagona i lo latou Tama Faalelagi.

• Faaali atu ata o tamaiti ma o latou aiga (pe a mafai, faaaoga ia ata o tamaiti i lau vasega). Fai atu i tamaiti e faasino i matua i ata. Faamalamalama atu o i tatou o fanau a o tatou tina ma tama, ma o i tatou uma foi o fanau agaga a o tatou matua faalelagi.

• Usu se pese e uiga i le Tama Faalelagi, e pei o le “Ua Ou Iloa o Soifua Lo‘u Tama” (Tusipese a Tamaiti, 8). Faatasi ai ma le fesoasoani mai tamaiti, tusi upu pe tusi ni ata i luga o le laupapa e faatusa i mea ua tatou aoaoina e uiga i le Tama Faalelagi, mai le pese.

• Faitau i tamaiti upu nei mai le Galuega 17:27: “E le mamao o Ia ma i tatou taitoatasi.” Talanoa e uiga i taimi na e lagona ai le latalata i le Tama Faalelagi, ma valaaulia ia tamaiti e faia foi faapena.

o le tamaloa o loo si’iina se teineitiiti

O tagata uma o se atalii po o se afafine o le Atua.

aikona o le aoao atu

Aoao atu le Aoaoga Faavae: Tamaiti Matutua

Galuega 16:14–15, 25–34; 18:7–8, 24–28

E mafai ona avea au ma faifeautalai i le taimi nei.

E mafai faapefea ona e fesoasoani i tamaiti ia faapei o Paulo ma faasoa atu i isi mea o loo latou aoaoina e uiga i le talalelei?

Gaoioiga e Mafai Ona Fai

• Valaaulia tamaiti e faitau le Galuega 16:14–15, 25–34; 18:7–8, 24–28 ma fai se lisi o tagata na faasoa atu i ai e Paulo ma Apolo le talalelei. Ona valaaulia lea o i latou e fai se lisi o tagata e mafai ona latou faasoa atu i ai le talalelei. Tuu i tamaiti e faatino mai taga pe faapefea ona latou ta’u atu i nei tagata e uiga ia Iesu Keriso pe valaaulia i latou i le lotu. E mafai foi ona e valaaulia tamaiti e tusi ni faaupuga e molimau atu ai i se upumoni o le talalelei i nei tagata.

• Valaaulia ia faifeautalai faamisiona o i ai nei, ni faifeautalai ua foi mai misiona, po o faifeautalai o le uarota e asiasi ane i le vasega ma faamatala atu e uiga i o latou aafiaga i le faasoaina atu o le talalelei. Fautuaina tamaiti e fai atu ni fesili i le auala e mafai ona latou faasoa atu ai le talalelei i isi.

Galuega 17:2–4, 10–12; 18:28

Ua molimau mai tusitusiga paia e uiga ia Iesu Keriso.

E molimau perofeta uma ia Iesu Keriso. E mafai faapefea ona e aoao atu i tamaiti e sue o Ia i tusitusiga paia, tusa lava pe le o ta’ua o Ia i Lona suafa?

Gaoioiga e Mafai Ona Fai

• Ia fesoasoani i tamaiti e faitau le Galuega 17:2–4, 10–12; 18:28, ma valaaulia i latou e vaavaai mo mea e tutusa ai nei fuaitau. E tusa ai ma nei fuaiupu, o le a se mea na fesoasoani i tagata e talitonu ai i le talalelei a Iesu Keriso? Valaaulia tamaiti e faasoa mai tala e fiafia i ai e uiga ia Iesu na latou aoaoina mai tusitusiga paia.

• I luga o ni fasipepa, tusi ai mau o loo aoao mai e uiga i le Faaola (e mafai ona e maua nisi i le Taiala i Tusitusiga Paia, “Iesu Keriso,” scriptures.ChurchofJesusChrist.org). Nana pepa faataamilo i le potu ma valaaulia tamaiti e sue . Fesoasoani i tamaiti e sue ia mau latou te mauaina, ma fai i ai e faasoa atu e le tasi i le isi mea o loo aoao mai e mau taitasi e uiga ia Iesu.

Galuega 17:22–31

O a’u o se atalii o le Atua.

E mafai faapefea ona e fesoasoani i tamaiti ia manatua o i latou o fanau a le Atua?

Gaoioiga e Mafai Ona Fai

• Faaali atu i tamaiti se maa, ma faamalamalama atu i ona po o Paulo, sa tapuai ia tagata i atua sa latou gaosia mai maa ma isi mea. Valaaulia tamaiti e faitau le Galuega 17:27–29. O le a se mea ua tatou aoao e uiga i le Atua mai i nei fuaiupu? Faamalamalama atu o fanau o lona uiga o tamaiti. Fesili i tamaiti pe o a ni o latou lagona i le iloa ai o i latou o fanau a le Atua.

• Fai i tamaiti e faitau le Galuega 17:27. Fai i tamaiti e tusi pe tusi ni ata o ni auala e mafai ona latou “lagonaina ai” pe latalata atili ai i le Atua. O anafea na latou lagonaina ai e le o “mamao o Ia mai ia i [latou]”?

aikona o le aoaoina

Uunaia le Aoaoina i le Aiga

Fautuaina ia tamaiti e vaavaai mo se mau i lenei vaiaso o loo aoao mai ai e uiga ia Iesu Keriso (e mafai ona faia lea mea i le taimi o a latou suesuega faaletagata lava ia pe faaleaiga foi o tusitusiga paia). I le vaiaso a sau, valaaulia i latou e faasoa mai mea na latou maua.

Faaleleia o Lo Tatou Aoao Atu

Fesoasoani i tamaiti ia avea ma tamaiti aoao sili atu. O lou faamoemoega i le aoao atu o tamaiti e le na o le avatu o le upumoni ia i latou. E ao foi ona e fesoasoani ia i latou e atinae i latou lava ia tutoatasi i le sailia o le upumoni. Mo se faataitaiga, nai lo le na ona ta’u atu i tamaiti o le tala ia Paulo o loo talai atu i le Maua o Areopako, e mafai ona e fuafuaina ni gaoioiga, e faapei o na o loo fautuaina atu i le otootoga lenei, lea e fesoasoani ia i latou ia iloa upumoni i le tala mo i latou lava.

itulau o gaoioiga: O a’u o se atalii o le Atua