Aso o le Penetekoso, saunia e Sidney King

3–9 Iulai

Galuega 1–5

“E Fai Foi Outou ma Molimau ia te Au”

Amata lau tapenapenaga i le faitauina o le Galuega 1–5. Saili ma le agaga tatalo ia malamalama i manaoga o tamaiti o e aoaoina. O leSau, Mulimuli Mai ia te Au–Mo Tagata Taitoatasi ma Aiga ma lenei otootoga e mafai foi ona fesoasoani ia te oe.

Valaaulia le Fefaasoaai

Tusi le O ai Au? i le laupapa. Saunia ni faaupuga e uiga ia Peteru ma fesili i tamaiti pe o ai e faatatau i ai ia faaupuga. O a nisi mea latou te iloa e uiga ia Peteru?

Aoao atu le Aoaoga Faavae: Tamaiti Laiti

Galuega 1:1–11

O loo taitaia e Iesu Keriso Lana Ekalesia e ala i perofeta ma aposetolo.

O le aoao e uiga i le ala sa taitaia ai e le Faaola Lana Ekalesia anamua e ala i aposetolo e mafai ona fesoasoani i tamaiti e maua ai molimau e uiga i perofeta ma aposetolo i o tatou taimi.

Gaoioiga e Mafai Ona Fai

• Faaali atu le itulau atoa o le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Fesili i tamaiti pe aisea latou te manatu ai o loo tilotilo atu tagata i le lagi. Aotele le tala mai le Galuega 1:1–11. (Tagai foi “Mataupu 55: Ua Taitai e Aposetolo le Ekalesia,” i le Tala o le Feagaiga Fou, 145–47, po o le vitio talafeagai o loo i luga o le ChurchofJesusChrist.org.) Valaaulia se tamaitiiti e uu i luga se ata o Aposetolo o i ai nei. O ai e fesoasoani ia Iesu Keriso e taitaia le Ekalesia pe a le i ai o Ia i le lalolagi?

• Fai se taaloga faafetaui i seti e lua o ata o le Au Peresitene Sili ma Aposetolo e Toasefululua o loo soifua. A maua se fetaui, ta’u le igoa o le Aposetolo po o le Peresitene ma se mea e uiga ia te ia.

• I tua o se ata o le Peresitene o le Ekalesia, faapipii ni ata laiti o mea na te aoao atu, e pei o le Faaola, papatisoga, po o se malumalu. Ia tofu le tamaitiiti ma le avanoa e tilotilo ai i se tasi o ata ma ta’u atu i le vasega atoa, “Ua aoao mai le perofeta ia i tatou e uiga i le [autu o le ata].” Molimau atu o perofeta ma aposetolo e aoaoina i tatou i mea e finagalo Iesu tatou te iloa ma faia.

Galuega 3:1–10

E mafai e le Tama Faalelagi ona faamanuiaina isi e ala ia te au.

O le a se mea e mafai ona e faia e fesoasoani ai i tamaiti ia iloa ala e mafai ona latou faamanuiaina ai e o loo siomia i latou? Fesoasoani ia latou aoao mai le faataitaiga a Peteru ma Ioane o loo faamaloloina le tamaloa pipili.

Gaoioiga e Mafai Ona Fai

• Valaaulia tamaiti e fai taga e o faatasi ma le tala o i le Galuega 3:1–10, e pei o le faalālā o o latou lima mo se tupe ma osooso i le olioli. Na faapefea ona faamanuia e le Tama Faalelagi le tamaloa sa le mafai ona savali?

• Aumai se ato o i ai ni ata e faatusa i ala e mafai ona tatou faamanuiaina ma auauna atu ai i isi. Ia feauauai tamaiti e filifili ni ata mai le taga ma faasoa mai pe mafai faapefea ona latou faamanuiaina isi i lena ala.

• Fai i tamaiti e faasoa mai se taimi na latou fesoasoani ai i se tasi.

Galuega 5:1–11

E mafai ona ou faamaoni.

Sa faasoa mai e tagata Kerisiano anamua mea sa ia i latou e fesoasoani ai e tausi e le tasi le isi. O i latou na i ai fanua sa latou faatauina atu ae avatu tupe i Aposetolo ona tuuina atu lea i le Au Paia e tusa ai ma o latou manaoga. Sa lei faamaoni ia Anania ma Safaira i la la’ua saofaga, sa manatu e mafai ona la faaseseina ia auauna a le Alii.

Gaoioiga e Mafai Ona Fai

• Fesoasoani i tamaiti e faatino le tala ia Anania ma Safaira. Faamalamalama atu e ui ina tatou le feoti pe a tatou talapepelo, ae o loo faaalia i lenei tala le taua o le faamaoni i le Tama Faalelagi.

• Usu faatasi se pese e uiga i le faamaoni, e pei o le “I Believe in Being Honest” (Children’s Songbook, 149). Fesoasoani i tamaiti ia malamalama o se vaega o le faamaoni o lona uiga ia tautala sa’o i taimi uma ma aua nei aveina mea a se isi tagata.

• Faaaoga ia tagapepa papeti e faatino ai ni tulaga faigofie lea e faamaoni ai pe le faamaoni ai foi se tagata. Fai i tamaiti e tutu i luga pe afai sa faamaoni le tagata pe nonofo i lalo pe afai sa le’i faamaoni le tagata. Fesoasoani i tamaiti ia malamalama i le taua o le faamaoni.

Aoao atu le Aoaoga Faavae: Tamaiti Matutua

Galuega 1:8, 22–26

O loo taitai e Iesu Keriso Lana Ekalesia e ala i perofeta ma aposetolo.

E faapefea ona e fesoasoani i tamaiti ia malamalama o le Ekalesia a le Faaola i aso nei o loʻo taitaia e perofeta ma aposetolo, pei lava ona i ai i aso anamua?

Gaoioiga e Mafai Ona Fai

• Tusi i le laupapa E faapefea ona taitai e Iesu Keriso le Ekalesia pe a le o i ai o Ia i le lalolagi? Valaaulia tamaiti e vaavaai mo tali i le fesili a o e faitauina upu a le Faaola i le au Aposetolo i le Galuega 1:8. Fesoasoani i tamaiti ia malamalama ua filifilia e Iesu perofeta ma aposetolo e taitaia le Ekalesia i aso nei, e pei lava ona sa Ia faia anamua.

• Faitau faatasi le Galuega 1:22--26. Faailoa mai o se vasega, pe na faapefea ona tofia e Aposetolo se Aposetolo fou.

• A o lumanai le vasega, fai atu i se tamaitiiti ma ona matua e aoao e uiga i se Aposetolo na valaauina talu ai nei (e mafai ona latou maua faamatalaga e uiga i Aposetolo i le“Korama a Aposetolo e Toasefululua,” ChurchofJesusChrist.org). Valaaulia se tamaitiiti e faasoa mai mea sa ia aoaoina i le vasega, ma afai e mafai, ta’u mai se tala a le Aposetolo e uiga i lona valaauga ma lana uluai savali i le konafesi aoao.

Na taitai e Aposetolo le Ekalesia ina ua mavae le afio a’e o Iesu i le lagi.

Galuega 2:36–47

E molimau mai e le Agaga Paia i lo’u loto upumoni o le talalelei.

A oo ina iloa e tamaiti le ala e fetalai atu ai le Agaga Paia ia i latou, o le a musuia i latou e faalogologo ma faatino i luga o musumusuga latou te mauaina.

Gaoioiga e Mafai Ona Fai

• Faitau faatasi le Galuega 2:36–37. E faape’i pe a ta’u mai e le Agaga Paia ia i tatou se mea i o tatou loto?

• Fai faatasi o se vasega, se pepa e tusi ai upu O le a se mea e tatau ona tatou fai? i le pito i luga. Faaali le pepa lautele lea i vaiaso taitasi, ma faaopoopo i ai auala e mafai e tamaiti ona faatino ai mea latou te aoaoina i lesona o vaiaso taitasi.

• Valaaulia tamaiti e faitau le Galuega 2:41–47 ma sue mea lelei na faia e tagata ina ua uma ona papatisoina i latou. O a ni mea lelei e mafai ona tatou faia e faaalia ai lo tatou faafetai mo le meaalofa a le Agaga Paia sa tatou mauaina ina ua tatou papatiso?

Galuega 3:1–10

E mafai e le Tama Faalelagi ona faamanuiaina isi e ala ia te au.

E mafai faapefea ona e aoao atu i tamaiti faapea e mafai ona latou faamanuiaina isi, tusa lava pe leai ni a latou “ario ma ni auro”? (Galuega 3:6). Pe mafai faapefea ona e fesoasoani ia latou iloa avanoa e auauna atu ai i le Atua e ala i le auauna atu i isi? (Tagai Mosaea 2:17).

Gaoioiga e Mafai Ona Fai

• Fai i se tamaitiiti e faitau le Galuega 3:1–10 a o fai e isi tamaiti ia taga o le tala. (Mo se fesoasoani, tagai foi “Mataupu 56: Ua Faamalolo e Peteru se Tamaloa,” i le Tala o le Feagaiga Fou,105–6, po o le vitio talafeagai o loo i luga o le ChurchofJesusChrist.org.) E mafai foi ona e faaalia le vitio “Peter and John Heal a Man Crippled Since Birth” (ChurchofJesusChrist.org). Na faapefea ona sili atu le faamanuiaga na maua e lenei tamaloa nai lo le tupe na ia talosagaina?

• Pasi faasolosolo se taga o ni tupe siliva. A o uu e tamaiti le taga, fesili i ai pe o le a se mea e mafai ona latou faatauina i tupe. Fesili atu i tamaiti po o le a le mea e tatau ona tatou tuuina atu i isi e le alu ai se tupe. Valaaulia i latou e faasoa mai pe mafai faapefea ona latou fesoasoani i isi ia latalata atili atu i le Faaola—o se meaalofa e le manaomia ai se tupe (Galuega 3:6).

Uunaia le Aoaoina i le Aiga

Fautuaina tamaiti e fuafua se ala se tasi e mafai ona latou auauna atu ai i le Tama Faalelagi e ala i le fesoasoani i se tagata o o latou aiga i lenei vaiaso.

Faaleleia o Lo Tatou Aoao Atu

Tauloto se mau. Filifili se mau e te manatu e mafai ona fesoasoani i tamaiti i lau vasega, e pei o le Galuega 2:38 po o le Galuega 3:19, ma fesoasoani ia latou taulotoina se fasifuaitau mai le mau. O fesoasoani vaaia po o gaoioiga e mafai ona fesoasoani i tamaiti e manatua ai ia mau.