O le Aso o le Penetekoso, saunia e Sidney King

3–9 Iulai

Galuega 1–5

“E Fai Foi Outou Ma Molimau ia te A’u”

A o e su‘esu‘e i le Galuega 1–5, e mafai ona musuia oe e le Agaga Paia ia maua upumoni e talafeagai mo lou olaga. Ia maitau fuaiupu e faagaeetia ai oe, ma vaavaai mo avanoa e faasoa atu ai mea ua e a‘oa‘oina.

Tusifaamaumau Ou Lagona Uuna‘i

Pe na e mafaufau faapea po o a ni manatu ma ni lagona o Peteru ina ua ia, faatasi ai ma isi Aposetolo, “tulimata‘i a‘e i le lagi” a o afio a‘e Iesu i Lona Tama? (Galuega 1:10). O le Ekalesia sa faavaeina e le Alo o le Atua na i ai nei i le vaavaaiga a Peteru. O le galuega o le ta‘ita‘ia o le taumafaiga e “[a‘oa‘o] nuu uma” ua taatia nei i ona luga (Mataio 28:19). Ae afai sa ia lagona le le atoatoa po o le fefe, tatou te le maua se faamaoniga o lena mea i le tusi o Galuega. O mea tatou te maua i ai o faataitaiga o le molimau le fefe ma le liuaina, faamalologa faavavega, faaaliga faaleagaga, ma le tuputupu ae tele mo le Ekalesia. O le Ekalesia lava lenei a le Faaola, o loo taitaiina pea e Ia. O le mea moni, o le tusi o Galuega a Aposetolo e mafai foi ona ta’ua o Galuega a Iesu Keriso e ala mai i Ana Aposetolo. O le taialaina ai e se liligi tele mai o le Agaga, na le toe avea ai Peteru ma faifaiva e lei aoaoina lea na maua e Iesu i luga o matafaga o le Sami o Kalilaia. Po o ia foi o le tagata mafatia o le sa nao ni vaiaso na muamua atu lea sa ia tagitui ai ma le tiga ona sa ia faafitia lona iloa o Iesu le Nasareta.

I le tusi o Galuega, o le a e faitau ai i tautinoga mamana e uiga ia Iesu Keriso ma Lana talalelei. O le a e iloa ai le ala na suia ai e lena talalelei ia tagata—e aofia ai ma oe—e avea ma soo totoa ua silafia e le Atua e mafai ona avea ai i latou.

Manatu mo Suesuega Faaletagata Lava Ia o Tusitusiga Paia

Galuega 1:1–8, 15–26; 2:1–42; 4:1–13, 31–33

E taitai e Iesu Keriso Lana Ekalesia e ala i le Agaga Paia.

O le tusi o Galuega ua tusifaamaumau ai taumafaiga a Aposetolo e faatuina le Ekalesia a Iesu Keriso ina ua mavae le Afio Ae o le Faaola. E ui ina sa le toe i ai Iesu Keriso i le lalolagi, sa ia taitaia le Ekalesia e ala i faaaliga e ala mai i le Agaga Paia. Mafaufau pe faapefea ona taiala e le Agaga Paia ia taitai fou o le Ekalesia a Keriso ao e toe faamanatuina fuaitau nei: Galuega 1:1–8, 15–26; 2:1–42; 4:1–13, 31–33.

I le avea ai ma tagata o le Ekalesia a Keriso i aso nei, ua tofu i tatou ma se tiutetauave e auai i le galueg o le faaolataga ma le faaeaga—ia ola i le talalelei a Iesu Keriso, tausia i latou e manaomia le fesoasoani, valaaulia isi ia o mai ia Keriso, ma tuufaatasia aiga mo le faavavau (tagai Tusitaulima Aoao, 1.2). O a ni mea ua e aoao mai i nei uluai Aposetolo e uiga i le auala e mafai ona e faalagolago ai i le Agaga Paia e taiala au taumafaiga?

Tagai foi i le Bible Dictionary, “Holy Ghost.”

Galuega 2:36–47; 3:12–11

O mataupu faavae ma sauniga o le talalelei e fesoasoani ou te sau ai ia Keriso.

Pe na i ai se taimi na e lagonaina ai le “tuia o [lou] loto,” e pei o tagata Iutaia i le aso o Penetekoso? (Galuega 2:37). Atonu sa e faia se mea sa e salamo ai, pe atonu foi sa e manao lava e sui lou olaga. O le a le mea e tatau ona e faia pe a i ai ia lagona ia te oe? O le fautuaga a Peteru i tagata Iutaia o loo maua i le Galuega 2:38. Ia maitau pe na faapefea ona aafia nei tagata liliu mai i uluai mataupu faavae ma sauniga o le talalelei (e aofia ai le faatuatua, salamo, papatisoga, ma le meaalofa o le Agaga Paia—po o le mea lea e taua i nisi o taimi o le aoaoga faavae a Keriso) e pei ona tusia i le Galuega 2:37–47.

Atonu ua uma ona papatisoina oe ma maua le meaalofa o le Agaga Paia, e faapefea la ona faaauau ona e faaaogaina le aoaoga faavae a Keriso? Mafaufau i upu nei mai ia Elder Dale G. Renlund: “E mafai ona faaatoatoaina i tatou e ala i le faateleina o le faalagolago atoa e le aunoa … faatinoina o le faatuatua ia Keriso, salamo, taumamafa ma feinu i le faamanatuga e faafou ai feagaiga ma faamanuiaga o le papatisoga, ma le mauaina o le Agaga Paia e fai ma soa tumau i se tulaga maualuga atu. A tatou faia lea mea, e avea atili i tatou e faapei o Keriso ma mafai ona tumau e oo i le iuga, ma mea uma e aofia ai” (“Le Au Paia o Aso e Gata Ai, Taumafai Pea,” Liahona, Me 2015, 56).

Galuega 3:19–21

O a “tausaga e filemu ai” ma “tausaga e toe fuatai ai mea uma lava”?

“O taimi e filemu ai” e faasino i le Meleniuma, i le taimi o le a toe afio mai ai Iesu Keriso i le lalolagi. “O le fuaitau taimi e toefuatai ai mea uma lava” e faatatau i le Toefuataiga o le talalelei, lea e saunia ai le lalolagi mo le Meleniuma.

Galuega 3; 4:1–31; 5:12–42

Ua tuuina atu i soo o Iesu Keriso le mana e fai ai vavega i Lona suafa.

Sa faamoemoe le tagata pipili e maua ni tupe mai ia i latou o e sa o mai i le malumalu. Ae sa ofo atu ia te ia e auauna a le Atua se mea e sili mamao atu. A o e faitau i le Galuega 3; 4:1–31 ma le 5:12–42, mafaufau pe na faapefea ona aafia nei tagata i le vavega na sosoo mai ai:

• O le tagata pipili

• Peteru ma Ioane

• O molimau i le malumalu

• O faitaulaga sili ma pule

• Isi Au Paia

A o Le Mea ua ia te A’u, Ou Te Avatu Lea ia te Oe, saunia e Walter Rane

Manatu mo Suesuega Faaleaiga o Tusitusiga Paia ma Afiafi Faaleaiga

Galuega 1:21–26.O le faitau o le Galuega 1:21–26 e mafai ona fesoasoani i lou aiga e talanoa i faamanuiaga e oo mai i le i ai o Aposetolo i le lalolagi i aso nei. E mafai e tagata o le aiga ona faasoa mai i auala na latou maua ai se molimau o aposetolo ma perofeta i aso nei ua valaauina e le Atua. Aisea e taua ai le i ai o lenei molimau?

Galuega 2:37.O le a le uiga o le fuaitau “tuia lea o latou loto”? O le a se taimi na tatou lagonaina ai se mea faapena? Aisea e taua ai le fai atu “O le a se mea e tatau ona tatou faia?” pe a tatou maua na lagona?

Galuega 3:1–10.E ono fiafia lou aiga e toefaatino le tala o loo i nei fuaiupu. Pe e mafai foi ona tou matamata i le vitio “Peter and John Heal a Man Crippled Since Birth” (ChurchofJesusChrist.org). Sa faapefea ona ese le faamanuiaina o le tagata i le malumalu nai lo le mea sa ia faamoemoeina? O faapefea ona tatou vaaia le oo mai o faamanuiaga a le Tama Faalelagi ia i tatou i auala e lei faamoemoeina?

Galuega 3:12–26; 4:1–21; 5:12–42.O le a se mea e faagaeetia ai oe e uiga i le faatuatua o Peteru ma Ioane (tagai foi i le vitio “Peter Preaches and Is Arrested” i le ChurchofJesusChrist.org). E mafai faapefea ona tatou totoa i a tatou molimau ia Iesu Keriso? Mafaufau e fesoasoani i tamaiti laiti e faataitai le faasoa atu o a latou molimau.

Galuega 4:31–5:4.E mafai faapefea ona tatou fesoasoani i tagata o le tatou aiga, uarota, po o le nuu ia avea atili e pei o le tulaga o loo faamatalaina i le Galuega 4:31–37? O le a le uiga o le “tasi o le loto ma le mafaufau”? O a ni auala tatou te, i ni isi o taimi “tuu faanana nisi mea” o la tatou saofaga” Aisea ua pei ai le faia o lena o le “[pepelo] i le Atua”? (Galuega 5:2, 4). E faapefea e le le faamaoni ona tatou aafia ai faaleagaga?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Viiga fautuaina: “Agaga e Taitai Mai,” Viiga, nu. 78.

Faaleleia o Lo Tatou Aoao Atu

Filifili se autu. Tuu atu i tagata o le aiga e feauaua’i e filifili se autu mai le Galuega 1–5 e suesue faatasi.

O Le Afio A’e, saunia e Harry Anderson