Iesu o loo fetalai atu ia Peteru i le apitaogalu

Fafaga A‘u Mamoe, saunia e Kamille Corry

26 Iuni–2 Iulai

Mataio 28; Mareko 16; Luka 24; Ioane 20–21

“Ua Toetu o Ia”

Faitau ma le lototatalo le Mataio 28; Mareko 16; Luka 24; ma le Ioane 20–21, ma tomanatu i le ‘oli‘oli ua e maua ona o le Toetu o Keriso. O ai e ono faamanuiaina i le faalogo i lau molimau i lenei mea na tupu?

Tusifaamaumau Ou Lagona Uuna‘i

I le toatele o le au matau, o le maliu o Iesu le Nasareta atonu na foliga mai o se faai‘uga fa‘auigalua i se soifuaga ofoofogia. Pe le o le tagata ea lenei sa faatuina mai Lasalo mai le oti? Pe na te le i talitalia ea faamata’u e fasiotia mai le au Faresaio i lea taimi ma lea taimi? Sa Ia faaalia le mana e faamalolo ai tauaso, o lepela, ma le ma’i supa. Sa usitai matagi ma le sami ia te Ia. Ae o lea, ua tautau mai o Ia i se satauro, ma tautino atu, “Ua mae’a” (Ioane 19:30). atonu sa i ai sina faateia moni i upu faaamuamu “Na ia faaolaina isi tagata; e le mafaia e ia ona faaola ia te ia” (Mataio 27:42). Ae ua tatou iloa o le maliu o Iesu e le o le iuga lea ole tala. Ua tatou iloa o le gugu o le tuugamau sa na o sina taimi ma o le galuega faaola a Keriso ua faatoa amata. Ua le o maua o Ia “ie o oti” ae o e o ola (Luka 24:5). O Ana aoaoga o le a le gugu, aua o le a folafola atu e Ona soo lotonuu le talalelei i “nuu uma,” ma le faatuatua i Lana folafolaga o le a Ia “faatasi ma [i latou] e le aunoa, e oo lava i le iuga o le lalolagi” (Mataio 28:19–20).

aikona o suesuega faaletagata lava ia

Manatu mo Suesuega Faaletagata Lava Ia o Tusitusiga Paia

Mataio 28; Mareko 16; Luka 24; Ioane 20

Na toetu Iesu Keriso.

I nei fuaitau, o le a e faitau ai i se tasi o mea aupito taua na tutupu i le talafaasolopito o le tagata soifua: o le Toetu lea o Iesu Keriso. A o e faitauina, tuu oe lava e sui ai tagata o e sa molimauina mea na tutupu i le siomaga o le Toetu. O a ni mea ua e aoaoina mai i o laua aafiaga?

O a ni ou lagona a o e faitau e uiga i le Toetu o le Faaola? Mafaufau pe o faapefea ona aafia ai oe—lau vaaiga i le olaga, au sootaga, lou faatuatua ia Keriso, ma lou faatuatua i isi upumoni o le talalelei.

Tagai foi Bible Dictionary, “Resurrection”; Gospel Topics, “Resurrection,” topics.ChurchofJesusChrist.org.

Luka 24:13–35

E mafai ona tatou valaaulia le Faaola e “nofo ma [a’u].”

A o e faitau i le aafiaga o soo femalagaai e toalua o e na fetaiai ma le Faaola toetu, vaavaai mo ni mea e tutusa ai ma ou aafiaga o se soo o Keriso. E mafai faapefea ona oulua savavali ma Ia i le taimi nei ma valaaulia o Ia e “nofo” mai mo sina taimi? (Luka 24:29). E faapefea ona e iloa Lona mafuta mai i lou olaga? Na faapefea ona molimau mai le Agaga Paia ia te oe i le paia o Iesu Keriso?

Tagai foi i le “Iesu; Se’i E Faatasi Mai,” “Afio Mai!,” Viiga, nu. 92–93.“

Luka 24:36–43; Ioane 20

O le toetu o se toetuufaatasia tumau lea o le agaga ma le tino.

O tala o le Toetu o Iesu Keriso, e mafai ona fesoasoani e te malamalama ai i le uiga o le toetu. Mo se faataitaiga, o a upumoni e te maua i le Luka 24:36–43 ma le Ioane 20 e uiga i tino toetu? E mafai foi ona e vaavaai i isi mau e uiga i le toetu, e pei o le 1 Korinito 15:35–44; Filipi 3:20–21; 3 Nifae 11:13–15; Mataupu Faavae ma Feagaiga 88:27–31; 110:2–3; 130:1, 22.

Ioane 20:19–29

“Amuia i latou e lei vaai, ae talitonu mai pea.”

O ni isi tagata e i ai lagona faapei o Toma, o le na fai mai, “Afai ou te le vaai … , ou te le talia lava” (Ioane 20:25). I lou manatu, aisea e mafai ai ona avea le talitonu e aunoa ma le vaai o se faamanuiaga? (tagai Ioane 20:29). Mafaufau loloto pe na faapefea ona faamanuiaina oe mo le talitonu i mea e le mafai ona e vaaia. O le a le mea ua fesoasoani e te faatuatua ai i le Faaola tusa lava pe le o mafai ona e vaai ia te Ia? E mafai faapefea ona e faaauau e faamalosia lou faatuatua i “mea e le o vaaia, ae moni”? (tagai Alema 32:16–21; Eteru 12:6). Fuafua e tusifaamaumau i se tusi talaaga aafiaga na fesoasoani e te talitonu ai ia Iesu Keriso, pe faasoa atu foi ia i latou po o se tasi e te iloa.

Ioane 21:1–17

Ua valaaulia au e le Faaola e fafaga i Ana mamoe.

Atonu foi e manaia pe a faatusatusa ia fegalegaleaiga a le Faaola ma Ana Aposetolo i le Ioane 21 ma le uluai taimi na Ia poloaiina ai i latou e tuu ifo i lalo a latou upega, o loo tusia i le Luka 5:1–11. O a ni mea e tutusa ai ma ni eseesega ua e maua? O a ni malamalamaaga ua e maua e uiga i le avea ma soo?

Mafaufau pe faapefea ona faatatau ia te oe ia upu a le Faaola ia Peteru o i le Ioane 21:15–17 Pe o i ai se mea o taofiofia oe mai le auauna atu i mamoe a le Alii? Mata o le a lau tali pe afai e fesili atu le Alii, “Pe ete alofa mai ea ia te au?” Manatunatu loloto pe mafai faapefea ona e faaalia lou alofa mo le Alii.

Tagai foi 1 Peteru 5:2–4, 8; Jeffrey R. Holland, “O Le Poloaiga Muamua ma le Sili,” Liahona, Nov. 2012, 83-85.

aikona o suesuega faaleaiga

Manatu mo Suesuega Faaleaiga o Tusitusiga Paia ma Afiafi Faaleaiga

Luka 24:5–6.Na saunoa mai Peresitene Thomas S. Monson e uiga i le Luka 24:5–6, “E leai ni upu i le faaKerisiano e sili atu ona taua ia te au” (“Ua Toetu o Ia!,” Liahona, Me 2010, 89). O le a le uiga o nei upu ia te oe ma lou aiga?

Mataio 28; Mareko 16; Luka 24; Ioane 20–21.A o faitau e lou aiga nei mataupu, mataitu tagata o e na fegalegaleai ma Iesu i tala taitasi. Mo se faataitaiga, o le a se mea e faagaeetia ai oe e uiga i tagata o e sa asiasi atu i le tuugamau o le Faaola? O le a se mea ua e aoao mai i upu po o faatinoga a le au Aposetolo pe mai i soo i le auala i Emau?

Mafaufau e pepese faatasi i le “Pe Na Toe Soifua Moni Mai ea Iesu?” (Tusipese a Tamaiti, 45). Talanoa e uiga i se tasi e iloa e lou aiga ua maliu, ma talanoa i auala e aumaia ai e upumoni i lenei pese le mafanafana.

Iesu o loo savavali ma alii e toalua i le auala

Auala i Emau, saunia e Wendy Keller

Mataio 28:16–20; Mareko 16:14–20; Luka 24:44–53.I nei fuaiupu, o le a le mea na poloai mai le Iesu i Ana Aposetolo e fai? E mafai faapefea ona tatou faataunuuina lenei galuega? E mafai e tagata o le aiga ona faasoa ni aafiaga i se taimi na latou lagona ai “ua galue faatasi le Alii ma i latou” ia ausia Ana faamoemoega (Mareko 16:20).

Ioane 21:15–17.Fuafua e faitau fuaiupu nei a o aai faatasi. E mafai i lea mea ona faaopoopo se uiga i upu a le Faaola “fafaga a’u mamoe.” E faavae i mea na aoao mai e Iesu e uiga i mamoe i le Feagaiga Fou (tagai, mo se faataitaiga, Mataio 9:35–36; 10:5–6; 25:31–46; Luka 15:4–7; Ioane 10:1–16), aisea ua avea ai le fafagaina o mamoe o se auala lelei e faamatala ai le tautuaina o fanau a le Atua? O le a se mea o aoao mai e lenei faatusatusaga e uiga i lagona o le Tama Faalelagi ma Iesu mo i tatou?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Pe Na Toe Soifua Moni Mai ea Iesu?,” Tusipese a Tamaiti, 45.

Faaleleia Suesuega Faaletagata Lava Ia

Faaaoga musika e valaaulia ai le Agaga ma aoao ai aoaoga faavae. Faalogologo i pe usuusu viiga e pei o le “Ua Toetu Mai o Ia!” (Viiga, nu. 111) e mafai ona valaaulia ai le Agaga ma fesoasoani e te aoao ai e uiga i le Toetu o le Faaola.

Tamaitai ua vaai i le Keriso toetu i talane o le tuugamau

O Le Keriso Toetu, saunia e Walter Rane