17–23 Iulai

Galuega 10–15

“Ua Tupu le Afioga a le Atua ma Ua Faateleina”

Faitau ma le totoa le Galuega 10–15 tuu se taimi mo le Agaga e musuia oe i ni manatu ma lagona. O le a se mea o iina e te aoaoina i nei mataupu?

Tusifaamaumau Ou Lagona Uuna‘i

I le taimi o Lana auaunaga i le olaga nei, sa masani ona lu’iina ai e Iesu Keriso ia agaifanua ma talitonuga a tagata ua leva ona taofiofimamau i ai. Sa le i taofia lenei mea ina ua mavae Lona afio a‘e i le lagi, a o faaauau ona Ia ta‘ita‘ia Lana Ekalesia e ala i faaaliga. Mo se faataitaiga, i le soifuaga o Iesu sa tala‘i atu ai e Ona soo le talalelei i o latou uso a tagata Iutaia. Ae e le i leva lava ona mavae le maliu o le Faaola, ma avea Peteru ma perofeta o le Ekalesia i le fogaeleele, sa faaali atu e Iesu Keriso ia Peteru e faapea, ua oo i le taimi e talai atu ai le talalelei i tagata e le o ni Iutaia. E le o se mea e faate‘ia ai i aso nei le manatu lea o le faasoa atu o le talalelei i tagata o Nu‘u‘ese, o le a la le lesona o loo i lenei tala mo i tatou? E masalo o se tasi o lesona o le, i le Ekalesia anamua ma aso nei, o loo taiala e se Faaola agalelei ia Ana taitai filifilia (tagai Amosa 3:7; Mataupu Faavae ma Feagaiga 1:38). O faaaliga faifaipea o se faailoga taua lea o le Ekalesia moni ma le ola a Iesu Keriso. E pei o Peteru, e ao ona tatou naunau e talia faaaliga faifaipea ma ola i “afioga uma a le Atua” (Luka 4:4), e aofia ai “mea uma na faaali mai e [Ia], mea uma ua Ia faaali mai nei” ma le “tele o mea silisili ma le tāua” o le a Ia faaalia mai “tau i le Malo o le Atua” (Mataupu Faavae o le Faatuatua 1:9).

Manatu mo Suesuega Faaletagata Lava Ia o Tusitusiga Paia

Galuega 10

“E le faailoga tagata le Atua.”

Mo le tele o augatupulaga, sa talitonu ai tagata Iutaia e faapea, o le avea ma “fanau a Aperaamo,” po o se e tupuga moni mai ia Aperaamo, o lona uiga o lea tagata ua taliaina ma filifilia e le Atua (tagai Luka 3:8). Sa latou manatu o soo se isi lava tagata o se tagata Nuuese “le mama” o le sa le taliaina e le Atua. I le Galuega 10, o le a le mea na aoao atu e le Alii ia Peteru i le po o ai “ua talia latou e ia”? (Galuega 10:35). O le a se faamaoniga ua e maua i lenei mataupu e faapea o le olaga o Konelio sa taliaina e le Alii? Mafaufau loloto i le uiga o le faamatalaga “E le faailoga tagata le Atua” (fuaiupu 34; tagai foi 1 Nifae 17:35). Aisea e taua ai ia te oe le iloa o lenei upumoni?

E pei o tagata Iutaia o e sa vaai maualalo ia i latou o e sa le o ni fanau a Aperaamo, pe na e maua ea oe lava o e faia ni faamatalaga faalealofa pe le fetaui e uiga i se tasi e ese mai ia te oe? E mafai faapefea ona e faatoilaloina lenei faiga? Atonu e manaia le fai o se gaoioiga faigofie mo nai aso e sosoo ai: Soo se taimi lava lua te fesootai ai ma se tasi, taumafai e mafaufau ia te oe lava, “O le tagata lenei o se atalii/afafine o le Atua.” Ao e faia lenei mea, o a ni suiga e te matauina i le ala e te mafaufau ai ma fesootai ai ma isi?

Tagai foi 1 Samuelu 16:7; 2 Nifae 26:13, 33; Russell M. Nelson, “Ia Faamuamua le Atua,” Liahona, Nov. 2020, 92–95; “Peter’s Revelation to Take the Gospel to the Gentiles” (vitio), ChurchofJesusChrist.org.

Galuega 10; 11:1–18;15

E aoao mai a’u e le Tama Faalelagi i lea mataupu ma lea mataupu e ala mai i faaaliga.

Ina ua vaai Peteru i le faaaliga vaaia ua faamatalaina i le Galuega 10, sa faafaigata ia te ia i le taimi muamua ona malamalama i ai ma “masalosalo i lona lava loto pe se a lea [mea]” (fuaiupu 17). Ae sa tuu atu e le Alii ia Peteru le malamalama sili atu ina o saili i ai Peteru. A o e faitau i le Galuega 10, 11, ma le 15, ia maitau pe na faapefea ona faalolotoina le malamalama o Peteru e uiga i lana faaaliga i le aluga o taimi. Na faapefea ona e sailia ma maua le malamalama faateleina mai le Atua i taimi sa i ai ni au fesili?

Galuega 10, 11, ma le 15 o loo faamatala mai ai ni taimi sa taitaia ai e le Alii Ana auaunaga e ala mai i faaaliga. Atonu e aoga le tusifaamaumau o mea e te aoaoina e faatatau i faaaliga ao e faitau i nei mataupu. O a ni auala e talanoa mai ai le Agaga ia te oe?

Tagai foi Gospel Topics, “Revelation,” topics.ChurchofJesusChrist.org; Quentin L. Cook, “O Le Faamanuiaga o Faaaliga Faifai Pea i Perofeta ma Faaaliga Faaletagata Lava Ia e Taiala ai o Tatou Olaga,” Liahona, Me 2020, 96–100; “The Jerusalem Conference” (vitio), ChurchofJesusChrist.org.

Galuega 11:26

O au o se Kerisiano aua ou te talitonu ma mulimuli ia Iesu Keriso.

O le a le mea taua e uiga i se tagata e ta’ua o se Kerisiano? (tagai Galuega 11:26). O le a le uiga ia te oe o le ta’ua o se tagata Kerisiano? Mafaufau i le taua o igoa. Mo se faataitaiga, o le a le uiga o lou faaiu ia te oe? Aisea e taua ia te oe le igoa o le Ekalesia (tagai i le Mataupu Faavae ma Feagaiga 115:4). O le a le uiga ia te oe o le tauave i ou lava luga o le suafa o Keriso e ala i le feagaiga? (tagai Mataupu Faavae ma Feagaiga 20:77).

Tagai foi Mosaea 5:7–15; Alema 46:13–15; 3 Nifaei 27:3–8; Russell M. Nelson, “O Le Igoa Sa’o o le Ekalesia,” Liahona, Nov. 2018, 87–90.

Manatu mo Suesuega Faaleaiga o Tusitusiga Paia ma Afiafi Faaleaiga

Galuega 10:17, 20.Na i ai se taimi sa e maua ai ni aafiaga faaleagaga ae mulimuli ane e masalosalo i mea na tatou lagonaina pe aoaoina? O le a se fautuaga e mafai ona tatou tuu atu i le tasi ma le isi e mafai ona fesoasoani e faatoilalo ai o tatou masalosaloga? (Tagai Neil L. Andersen, “O Manatuaga Musuia Faaleagaga,” Liahona, Me 2020, 18–22.)

Galuega 10:34–35.E mafai faapefea ona e aoao atu i lou aiga “E le faailogaina tagata le Atua”? (Galuega 10:34). Atonu e mafai ona e faaali atu ni ata o tagata mai talaaga ma aganuu eseese ao faitau e lou aiga ia fuaiupu nei. E tatau faapefea e upumoni o loo i nei fuaiupu ona faatosina ai au faatinoga? (tagai, mo sefaataitaiga, “Ou te Savali ma Oe,” [Tusipese a Tamaiti, 78]).

Galuega 12:1–17.E mafai e lou aiga ona faatino le tala i le lafoina o Peteru i le falepuipui ma le faapotopoto faatasi o tagata o le Ekalesia e tatalo mo ia. O le a se taimi na faamanuiaina ai i tatou e le tatalo? O i ai se tagata ua musuia i tatou e tatalo mo ia, e pei o se taitai o le Ekalesia po o se e pele [ia i tatou]? O le a le uiga o le tatalo “faatauanau”? (Galuega 12:5; tagai foi i le Alema 34:27).

Ua Laveaiina Peteru mai le Falepuipui, saunia e A. L. Noakes

Galuega 14.A o outou faitau faatasi i le mataupu lenei, e mafai e nisi o le aiga ona faailoga faamanuiaga na oo mai i soo ma le Ekalesia. O isi tagata o le aiga e mafai ona faailoga mea faafeagai po o tofotofoga sa oo i le au soo. Aisea e faataga ai e le Atua mea faigata ia tutupu i tagata amiotonu?

Galuega 15:1–21.O fuaiupu nei o loo faamatala ai se feeseeseaiga i le Ekalesia e uiga i le pe tatau i tagata liliu mai ona tausia le tulafono a Mose, e aofia ai le peritomeina. O le a le mea na fai e le au Aposetolo e uiga i lenei feeseeseaiga? O le a se mea e mafai ona tatou aoao mai i lenei faataitaiga e uiga i le auala e taitai ai e taitai o le Ekalesia le galuega a le Ekalesia?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina” “Ou Te Savali ma Oe,” Tusipese a Tamaiti, 78–79.

Faaleleia o Lo Tatou Aoao Atu

Tusi se ata. O ata e mafai ona fesoasoani i tagata o le aiga e vaai faalemafaufau ai i aoaoga ma tala faaletusi paia. E mafai ona e valaaulia tagata o le aiga e tusi ni ata o mea na tou faitauina, e pei o le faaaliga vaaia a Peteru o loo i le Galuega10.

O le aafiaga a Peteru ma Konelio ua faaalia ai “E le faailogaina tagata e le Atua” (Galuega 10:34).