Faatonuga mo le Taimi o Pesepesega ma le Polokalama a Tamaiti i le Sauniga Faamanatuga

Susuga i Au Peresitene o Peraimeri ma Taitai Musika,

O pese a le Peraimeri o se meafaigaluega mamana lea e fesoasoani ai i tamaiti ia aoao e uiga i le fuafuaga o le fiafia a le Tama Faalelagi ma upumoni faaleaoaoga faavae o le talalelei a Iesu Keriso. Ao pepese tamaiti e uiga i mataupu faavae o le talalelei, o le a molimau atu le Agaga Paia e uiga i lo latou moni. O upu ma fati o le a tumau i mafaufau ma loto o tamaiti i o latou olaga atoa.

Saili le fesoasoani a le Agaga ao e sauni e aoao atu le talalelei e ala atu i musika. Faasoa atu lau molimau e uiga i upumoni o loo e pese ai. Fesoasoani atu i tamaiti ia iloa pe faapefea ona fesootai le musika i mea o loo latou aoaoina ma lagonaina i le fale ma i vasega a le Peraimeri. O le a faamanuiaina tamaiti ma o latou aiga i au taumafaiga tuuto e fesoasoani i tamaiti e usuina musika paia.

Matou te alolofa ia te outou ma tuuina atu lo matou agaga faafetai mo le auaunaga tuuto o loo outou faia e faamalolosia ma puipuia ai a tatou fanau faapelepele.

O Le Au Peresitene Aoao o le Peraimeri

Faatonuga mo le Taimi o Pesepesega

5 minute (au peresitene o le Peraimeri): Tatalo amata, mau po o se mataupu faavae o le faatuatua, ma se lauga e tasi

20 minute (taitai musika): Taimi o pesepesega

O le au peresitene ma le taitai musika o le Peraimeri e filifilia pese mo masina taitasi e toe faamalosia ai mataupu faavae o loo aoaoina e tamaiti i totonu o a latou vasega ma i le aiga. O se lisi o pese e toe faamalosia ai nei mataupu faavae o loo aofia atu i lenei taiala. O nei pese o loo fautuaina atu foi i otootoga o i le Sau, Mulimuli Mai ia te A’u—Mo le Peraimeri ma le Sau, Mulimuli Mai ia te Au—Mo Tagata Taitoatasi ma Aiga .

Ao e aoao atu pese i tamaiti, valaaulia i latou e faasoa mai mea ua uma ona latou aoaoina e uiga i tala ma mataupu faavae faaleaoaoga i pese o loo e aoaoina atu. Atonu e te manao e toe suesue i otootoga o le Sau, Mulimuli Mai ia te A’u—Mo le Peraimeri lea o loo aoaoina e tamaiti i totonu o a latou vasega. O le a fesoasoani lenei mea ia te oe e te malamalama ai i tala ma mataupu faavae o loo latou aoaoina ina ia mafai ai ona e mafaufau i auala e lagolago ai a latou aoaoga i musika.

I le taimi o pesepesega, e mafai foi ona outou toefaamanatu pese na aoaoina muamua e tamaiti ma pese latou te fiafia e pepese ai. Ao outou toefaamanatuina, valaaulia ia tamaiti e faasoa mai o latou manatu ma lagona e uiga i upumoni o loo maua i pese.

O le Tusipese a Tamaiti o le punaoa autu lea mo musika i le Peraimeri. O viiga mai le tusipese ma pese mai le Uo po o le Liahona e talafeagai foi. O nisi taimi e mafai e tamaiti ona usuina pese faaleatunuu po o pese o aso malolo ia e fetaui mo le Aso Sa ma mo le matutua o tamaiti. O le faaaogaina o nisi lava musika i le Peraimeri e tatau ona faamaonia e le au epikopo (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 12.3.4, ChurchofJesusChrist.org).

Vaaiga Aoao o le Peraimeri

O vaiaso taitasi, o le Peraimeri e aofia:

Taimi o pesepesega:25 minute

Fesuiaiga:5 minute

Vasega:20 minute

E mafai e taitai i Peraimeri toatele ona vaevae tamaiti i ni vaega se lua ma tuu le tasi vaega i vasega Peraimeri ao le isi i le taimi o pesepesega. Ona fesuiai lea o vaega e lua. I ia tulaga, atonu e manaomia e taitai o le Peraimeri le fetuunai o taimi o loo faaali atu i luga e fetaui ma o latou tulaga.

Musika Fautuaina mo le Taimi o Pesepesega

Ianuari

• “Mulimuli Mai ia te Au,” Viiga, nu. 62.

• “O Le Tatalo a le Tamaitiiti,” Tusipese a Tamaiti, 6–7

• “Sa Tamaitiiti o Iesu,” Tusipese a Tamaiti, 34

Fepuari

• “Papatisoga,” Tusipese a Tamaiti, 54–55

• “O Le a Ou Mulimuli i le Fuafuaga a le Atua,” Tusipese a Tamaiti, 86–87

• “Na Ia Auina Mai Lona Alo,” Tusipese a Tamaiti, 20–21

Mati

• “O Loo Ou Taumafai e Avea e Pei o Iesu,” Tusipese a Tamaiti, 40–41

• “Pe na Faia Sau Tatalo,” Viiga, nu. 75

• “Tau Mai Tala ia Iesu,” Tusipese a Tamaiti, 36

Aperila

• “Faatuatua,” Tusipese a Tamaiti, 50–51

• “Le Alofa o Lo’u Faaola,” Tusipese a Tamaiti, 42–43

• “Ua Toetu Iesu,” Tusipese a Tamaiti, 44

Me

• “Tausi Poloaiga,” Tusipese a Tamaiti, 68–69

• “E Mafai Ona Faavavau Aiga,” Tusipese a Tamaiti, 98

• “O Au o se Atalii o le Atua,” Tusipese a Tamaiti, 2–3

Iuni

• “Ia Fealofani,” Tusipese a Tamaiti, 74

• “E! Ua Maliu le Faaola,” Viiga, nu. 99

• “Pe Na Toe Soifua Moni Mai ea Iesu?,” Tusipese a Tamaiti, 45

Iulai

• “Tu Mo Le Mea Tonu,” Tusipese a Tamaiti, 81

• “Ou Te Savali ma Oe,” Tusipese a Tamaiti, 78–79

• “Ua Ou Iloa o Soifua Lo’u Tama,” Tusipese a Tamaiti, 8.

Aokuso

• “Pe A Ou Papatiso,” Tusipese a Tamaiti, 53

• “O Le Agaga Paia,” Tusipese a Tamaiti, 56

• “Ua Tuu Mai e le Alii se Malumalu,” Tusipese a Tamaiti, 73

Setema

• “Pe a Tatou Fesoasoani,” Tusipese a Tamaiti, 108

• “O Le Tatalo a le Tamaitiiti,” Tusipese a Tamaiti, 6–7

• “Ua Ou Iloa Lo’u Faaola,” Viiga, nu. 73

Oketopa

• “Pe A Ia Toe Afio Mai,” Tusipese a Tamaiti, 46–47

• “O Le Ekalesia a Iesu Keriso,” Tusipese a Tamaiti, 48

• “Ou Te Fia Vaai i le Malumalu,” Tusipese a Tamaiti, 99.

Novema

• “Saili, Mafaufau Loloto, ma Tatalo,” Tusipese a Tamaiti, 66

• “Ta’u Mai ia te A’u Le Alii E,” Tusipese a Tamaiti, 75

• “O Le Agalelei e Amata ia te A’u,” Tusipese a Tamaiti, 83

Tesema

• “E Alofa Lo’u Tama Faalelagi ia te A’u,” Tusipese a Tamaiti, 16–17

• “Filifili le Ala Sa’o,” Tusipese a Tamaiti, 82

• “Pe A Ou Papatiso,” Tusipese a Tamaiti, 53

Faaaogaina o Musika e Aoao Atu ai Aoaoga Faavae

O le taimi o pesepesega e fuafuaina e fesoasoani ai i tamaiti ia latou lagonaina le aafiaga a le Agaga Paia a o latou aʻoaʻoina upumoni o le talalelei. E mafai ona fesoasoani manatu nei.

Faatumu le avanoa. Tusi se fuaiupu o le pese i luga o le laupapa ma ni nai upu autu o loo misi. Ona fai lea i tamaiti e usu le pese, faalogologo mo upu ia e faatumu ai ia avanoa. Ao latou faatumuina ia avanoa taitasi, talanoa po o a ni mataupu faavae o le talalelei latou te aoaoina mai upu na misi.

Faaaoga Upusii mai taitai o le Ekalesia. Valaaulia tamaiti e faalogologo i se upusii mai se taitai o le Ekalesia lea e aoao mai ai se mataupu faavae lava e tasi e pei o le pese o le Peraimeri. Fai atu ia i latou e sii o latou lima pe a latou faalogo i se mea e fesoasoani ia i latou ia malamalama ai i le upumoni o loo latou pepese ai. Fai i ai e faasoa mai mea na latou faalogologo i ai.

Molimau atu. Molimau puupuu atu i tamaiti e uiga i upumoni o le talalelei o loo maua i pese o le Peraimeri. Fesoasoani i tamaiti ina ia malamalama o le usuina o pese o se tasi lea o auala e mafai ai ona latou tuuina atu se molimau ma lagonaina ai le Agaga.

Faaaoga ata. Fai atu i tamaiti e fesoasoani ia te oe e sue pe fai ni ata e o faatasi ma upu taua po o fuaitau o i le pese. Valaaulia i latou e faasoa mai pe faapefea ona fesootai le ata i le pese ma le mea o loo aoao mai e le pese. Mo se faataitaiga, afai o loo e aoao atua le pese “O Le a Ou Mulimuli i le Fuafuaga a le Atua,” (Tusipese a Tamaiti, 86–87), e mafai ona e tuuina ni ata i totonu o le potu e faaalia ai upu taua mai le pese (e pei o le meaalofa, lagi, aiga, lalolagi, ma le fanau mai). Fai atu i tamaiti e ao mai ata ma uu i luga i le faasologa sao ao tou usuina faatasi le pese.

Faasoa se mea faitino. E mafai ona e faaaogaina se mea faitino e fesootai i se pese. Mo se faataitaiga, o le pese “Faatuatua” (Tusipese a Tamaiti, 50–51), e ta’ua ai se tama’i fatu. E mafai ona e faaali atu i tamaiti se fatu e fesoasoani ia i latou ia malamalama o se vaega itiiti o le faatuatua ia Iesu Keriso e mafai ona tuputupu ae i le aluga o taimi.

Faafesootai le pese ma aafiaga patino. Fesoasoani atu i tamaiti e fesootai mataupu faavae na aoaoina i le pese ma aafiaga sa latou mauaina i na mataupu faavae. Mo se faataitaiga, ao lei usuina le pese “Ou Te Fia Vaai i le Malumalu” (Tusipese a Tamaiti, 99), e mafai ona e fai atu i tamaiti e sii i luga o latou lima pe afai na latou vaai i se malumalu. Valaaulia i latou e mafaufau ao latou pepese pe faapefea ni o latou lagona pe a latou vaai i se malumalu.

Fai fesili. E tele naua fesili e mafai ona e tuuina atu a o outou usuina ni pese. Mo se faataitaiga, e mafai ona e fesili i tamaiti po o le a se mea sa latou aoaoina mai fuaiupu taitasi o le pese. E mafai foi ona e fai atu ia i latou e mafaufau i ni fesili o loo taliina e le pese.

Faalogo mo tali. Fai atu i tamaiti e faalogologo mo ni tali i fesili e pei o le “o ai?” “o le a?” “o fea?” “o ana fea?” po o le “pe aisea?” Mo se faataitaiga, i le pese “Papatisoga” (Tusipese a Tamaiti, 54–55), e mafai ona latou faalogologo po o ai na papatisoina Iesu ma po o i fea, o ana fea, na faapefea, ma pe aisea na Ia papatiso ai. E mafai foi ona e fai atu i tamaiti e faalogologo mo upu autu pe faitau i o latou tamatamailima le aofai o taimi latou te usuina ai se upu faapitoa.

Fesoasoani i Tamaiti e Aoao ma Manatua Pese o le Peraimeri ma Viiga

E aoao e tamaiti se pese e ala i le faalogo ma le pepese faafia ai. Ia usu i taimi uma i tamaiti upu o se pese fou—ae aua le na o le faitau atu pe na o le taulotoina foi. E fesoasoani lenei faiga i tamaiti e faafesootai ai le fati i upu. A uma ona aoaoina se pese, toe faamanatui ni auala eseese ma malie i le faagasologa o le tausaga. O nisi nei o manatu e fesoasoani i tamaiti e aoao ma toe faamanatu ai pese.

Faia ni pepa lautele o i ai ni savali. Faaali atu ni pepa lautele o i ai ni upu mai fuaiupu taitasi po o ata lea e sui tulaga i upu. Ao pepese tamaiti, kava ni upu po o ni ata sei iloga ua mafai ona latou usuina le fuaiupu atoa e aunoa ma le pepa o loo i ai upu. E mafai foi ona e valaaulia tamaiti e fesoasoani e fai ni pepa lautele o i ai ni savali.

Faataitai i leo maualuga ma le maualalo. Ina ia fesoasoani i tamaiti e aoao le fati o le pese, taofi lou lima i se tulaga faalava, ma ao e usuina upu, sii i luga lou lima e faailoa atu ai ia leo maualuga ma tuutuu i lalo e faailoa atu ai ia leo maualalo.

Siuleo. Valaaulia tamaiti e avea ma ou siuleo i le toe usuina o upu na e usuina. Usu i tamaiti se fuaiupu po o se laina puupuu, ona fai atu lea ia i latou e toe usu mai ia te oe.

Faaaoga fesuiaiga. Usu pese i ni auala eseese, e pei o le musumusu, hamu, patipati i le pao, fesuiai le pao, pe pepese ao saofafai pe tutu.

Pese i vaega. Tuu atu ia tofu le vasega po o tagata taitoatasi ma se fuaiupu e tasi e usuina ao tutu, ona fai atu lea e fesuiai a latou fuaiupu seia tofu uma vasega po o tagata taitoatasi ma le avanoa e usuina ai fuaiupu taitasi.

Faaaoga taga o lima. Valaaulia tamaiti e mafaufau i ni taga faigofie o lima ma fesoasoani atu ia i latou ina ia manatua upu ma savali o se pese. Mo se faataitaiga, pe a outou usuina le “Ia Migao Filemu” (Tusipese a Tamaiti, 11), e mafai ona e valaaulia tamaiti e piilima, punonou o latou ulu, ma paʻi i o latou fatu pe a latou usuina laina talafeagai i le pese.

Pepese teineiti, pepese tamaiti. Tusi se ata o se tama ma se ata o se teine, ma faakelu pe faapipii ata i luga o ni fasilaau eseese. Ao toefaamanatuina se pese, uu i luga se tasi o ata e faailoa atu ai po o ai e tatau ona usuina lena vaega o le pese.

Faafetaui se ata i se fuaitau. Tusi ia laina taitasi o se pese i luga o se isi fasipepa, ma sue se ata e suitulaga i laina taitasi. Tuu ata i se itu e tasi o le potu ma pepa i le isi itu. Usu le pese, ma fai atu i tamaiti e faafetaui ata i upu.

Taiala mo le Polokalama a Tamaiti mo le Sauniga Faamanatuga

I lalo o le taitaiga a le epikopo, o le polokalama a tamaiti i le sauniga faamanatuga e masani lava ona faia i le kuata lona fa o le tausaga. I le avea ai ma au peresitene ma taitai musika o le Peraimeri, ia fuafua e fono i le amataga o le tausaga ma le fesoasoani o le au epikopo o loo vaaia le Peraimeri e amata talanoaina ai fuafuaga mo le polokalama. A maea ona e faia fuafuaga, ia tapa lana faamaoniga mo i latou.

E tatau ona faataga e le polokalama ia tamaiti e tuuina atu mea sa latou aoaoina ma o latou aiga mai le Feagaiga Fou i le fale ma i le Peraimeri, e aofia ai pese o le Peraimeri sa latou usuina i le faagasologa o le tausaga. Ia mafaufau ma le agaga tatalo po o fea o mataupu faavae o le talalelei ma pese e lagolagoina ai mea sa latou aoaoina. A o faagasolo le tausaga, ia teu ni faamatalaga o tautalaga ma aafiaga patino a tamaiti e ono mafai ona faaaoga i le polokalama. Ia valaaulia tamaiti e faasoa mai ni mau, tala, ma a latou molimau i le polokalama. A o e fuafuaina le polokalama, mafaufau i ni auala e mafai ai ona fesoasoani i le aulotu e taulai atu i le Tama Faalelagi ma le Faaola ma a Laʻua aoaoga.

O Iunite e toalaiti le aofai o tamaiti atonu e mafai ona mafaufau i ni auala e mafai ai ona auai tagata o le aiga faatasi ma a latou fanau. O se tasi o le au epikopo e mafai ona faaiuina le sauniga i se saunoaga puupuu.

A o e saunia le polokalama, ia manatua taiala nei:

• O faataitaiga e le tatau ona alu ai se taimi le talafeagai mai vasega o le Peraimeri po o aiga.

• O mea faitino, teuga, ma aoaoga e faia i ala o faasalalauga e le talafeagai mo le sauniga faamanatuga.

Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 12.2.1.2, ChurchofJesusChrist.org.