Paghulagway kang Abraham ug Sara, ni Dilleen Marsh

Pebrero 7–13

Genesis 12–17; Abraham 1–2

“Mahimo nga Usa ka Labaw nga Sumusunod sa Pagkamatarung”

Hinumdumi nga wala kinahanglana—o gani posible—ang paghisgot sa tanang butang niini nga outline. Tuguti ang Espiritu nga mogiya kanimo ngadto sa mga baruganan nga makahuluganon kaayo para sa mga bata nga imong gitudloan.

Irekord ang Imong mga Impresyon

Dapita ang Pagpaambit

Ang mga pamilya sa mga bata nga imong gitudloan gidapit sa pagkat-on mahitungod ni Abraham ug ni Sara niining milabay nga semana. Hatagi ang mga bata og oportunidad sa pagpaambit og butang nga ilang nahibaloan mahitungod kang Abraham o ni Sara.

Itudlo ang Doktrina: Mas Gagmay nga mga Bata

Abraham 1:18; 2:8

Si Jesukristo makagiya kanako pinaagi sa kamot.

Si Abraham gusto nga magmatarung bisan og ang mga sakop sa iyang pamilya mga dautan. Ang Ginoo misulti kaniya, “Ako mogiya kanimo pinaagi sa akong kamot” (Abraham 1:18). Sama nga ang Dios misaad nga motabang kang Abraham, makagiya Siya sa mga bata nga imong gitudloan kon magtinguha sila sa pagpili sa husto.

Posible nga mga Kalihokan

• Basaha ngadto sa mga bata ang Abraham 1:18 ug 2:8, ug dapita ang mga bata sa pagpaminaw sa malitok nga parte sa lawas diha sa mga bersikulo. Unsa kahay bation nga si Jesukristo ang magtultol kanato pinaagi sa kamot o anaa ang Iyang kamot nga nanalipod kanato? Ipamatuod nga si Jesus nagtultol kanato pinaagi sa paggiya kanato pinaagi sa Iyang Espiritu.

• Gamita ang “Abraham” (diha sa Mga Istorya sa Daang Tugon) sa pagtabang nga masabtan sa mga bata nga ang katawhan sa palibut ni Abraham nanaghimo og ngil-ad nga mga butang, apan si Abraham gustong mohimo unsay husto ug ang Ginoo mitabang kaniya. Sa unsang paagi ang Langitnong Amahan ug si Jesukristo motabang kanato kon maningkamot kita sa pagpili sa husto? Kantaha ang usa ka awit nga may kalabutan niini nga baruganan, sama sa “Tudloi Ko Paglakaw sa Kahayag” (Songbook sa mga Bata, 70-71).

• Pagpakita og ubay-ubay nga mga litrato sa Manluluwas (tan-awa sa Libro sa mga Hulagway sa Ebanghelyo, mga nu. 38, 39, 40, ug 41), ug tabangi ang mga bata nga makita ang mga butang nga Iyang gihimo pinaagi sa Iyang mga kamot. Unsay atong mabuhat pinaagi sa atong mga kamot sa pagtabang sa uban?

Genesis 13:5–12

Mamahimo ako nga tigpasiugda og kalinaw.

Dihang mga magbalantay sa kahayupan ni Abraham ug Lot wala magkasinabut bahin sa yuta nga sibsibanan, si Abraham misugyot og usa ka sulbad nga nagdala og kalinaw. Pwede nimong gamiton kini nga ehemplo aron pagdasig sa mga bata nga mamahimong tigpasiugda og kalinaw.

Posible nga mga Kalihokan

• Ipaambit sa mga bata ang istorya gikan sa Genesis 13:5–12, ug dapita sila sa pagdrama-drama niini. Papuli-puliha ang mga bata nga magpakaaron-ingnon nga mao si Abraham, iyang pag-umangkon nga si Lot, ug mga magbalantay sa kahayupan. Pagsugyot og mga paagi nga masunod nila ang ehemplo ni Abraham isip usa ka tigpasiugda og kalinaw, sama sa pagpuli-puli sa usa ka dulaan kon makigdula sa usa ka higala. Dapita sila sa pagdrama-drama niini nga mga ehemplo.

• Basaha ang Mateo 5:9, ug ipasabut nga si Jesus gusto nga mamahimo kitang mga tigpasiugda og kalinaw. Tabangi ang mga bata sa paghunahuna unsay ilang mahimo aron mamahimong mga tigpasiugda og kalinaw diha sa panimalay o uban sa mga higala. Dapita sila sa pagdrowing og usa ka litrato sa ilang kaugalingon isip usa ka tigpasiugda og kalinaw. Hangyoa ang mga bata sa pagpaambit unsay ilang gibati dihang nahimo silang mga tigpasiugda og kalinaw sama ni Jesukristo.

Genesis 15:1–6; 17:1–8; Abraham 2:9–11

Importante ang pagtuman sa akong mga saad.

Ang pagkat-on mahitungod sa pakigsaad nga gihimo sa Dios kang Abraham ug Sara makatabang sa mga bata sa pagsabut unsay ipasabut sa pagtuman sa mga saad. Makatabang usab kini kanila nga maandam sa paghimo ug pagtuman og mga pakigsaad.

Posible nga mga Kalihokan

• Pangutan-a ang mga bata kon sila nakahibalo ba unsa ang usa ka saad o pakigsaad. Dapita sila sa pagpaambit og mga kasinatian sa dihang mihimo sila og usa ka saad o dunay tawo nga mihimo kanila og usa ka saad. Kon makatabang, pagpaambit og pipila ka mga ehemplo nga imong kaugalingon. Tabangi ang mga bata nga makasabut nga si Abraham ug Sara misaad nga magmasulundon sa Dios. Pagpili og pipila ka mga pulong gikan sa Genesis 15:1–6; 17:1–8; Abraham 2:9–11 alang aron sa pagpaambit og pipila ka mga panalangin nga gisaad sa Dios kanila. Posibling maglakip kini sa “Ayaw kahadlok, Abram: Ako ang imong kalasag [panagang],” “Mahimo ikaw nga amahan sa daghan nga mga nasud,” o “Ang tanan nga mga banay sa yuta pagapanalanginan.”

• Unsa ang pipila ka yanong mga saad nga pweding himoon ug buhaton sa mga bata atol sa klase? Sama pananglit, hangyoa sila sa pagsaad nga magpabilin sa ilang gilingkuran sulod sa pipila ka minutos o sa paghipos sa ilang mga lingkuranan pagkahuman sa klase. Pagpaambit ngadto kanila og usa ka panahon dihang mihimo ka og usa ka saad ug mituman niini, ug dapita sila sa pagpaambit sa ilang bisan unsa mga kasinatian. Tabangi sila nga makasabut nga mohimo sila og mga saad sa Langitnong Amahan kon sila bunyagan ug kon sila moadto sa templo.

Itudlo ang Doktrina: Mas Dagko nga mga Bata

Abraham 1:12–17

Ang Langitnong Amahan maminaw ug motubag sa akong mga pag-ampo.

Dihang namiligro ang kinabuhi ni Abraham, mitawag siya sa Dios ug giluwas. Ang mga bata nga imong gitudloan tingali adunay kaugalingon nilang mga kasinatian bahin sa pag-ampo nga ilang ikapaambit.

Posible nga mga Kalihokan

• Ipakita ang litrato nga Usa ka Anghel Miluwas ni Abraham (ChurchofJesusChrist.org), ug dapita ang mga bata sa pagpaambit unsay ilang nahibaloan mahitungod sa unsay gihulagway sa istorya, diha sa Abraham 1:12, 15–17. Hangyoa ang mga bata sa pagbasa niini nga mga bersikulo ug pagpaambit sa mga butang nga ilang nakat-unan mahitungod sa pag-ampo.

• Dapita ang mga bata sa pagpaambit sa ilang mga kasinatian sa dihang ang Langitnong Amahan mitubag sa ilang mga pag-ampo, ug sa pagpaambit og usa nga imong kaugalingong mga kasinatian.

Genesis 13:5–12

Mamahimo ako nga tigpasiugda og kalinaw.

Tanan kita mag-atubang og mga sitwasyon nga magtintal kanato aron masagmuyo kita ug mabingkilon. Hunahunaa kon sa unsang paagi ang istorya mahitungod ni Abraham ug ni Lot makatabang sa mga bata aron mahimong mga tigpasiugda og kalinaw sa ingon niana nga mga sitwasyon.

Posible nga mga Kalihokan

• Isulat sa pisara ang Mga Bida, Sitwasyon, Problema, ug Sulbad. Dapita ang mga bata sa pagbasa sa Genesis 13:5–12 ug sa pagpangita sa mga bahin sa istorya nga gilista diha sa pisara. Tabangi ang mga bata sa paghunahuna og mga sitwasyon dihang pwede silang mahimo nga mga tigpasiugda og kalinaw, sama sa panahon nga dunay naglantugi o misulay sa pagpakig-away. Dayon dapita sila sa pagdrama-drama kon unsaon nga mamahimo silang mga tigpasiugda og kalinaw niana nga mga sitwasyon.

• Tabangi ang mga bata sa pagpangita og mga hilisgutan nga“Kalinaw” ug “Tigpasiugda og Kalinaw” diha sa Ang Giya sa mga Kasulatan (scriptures.ChurchofJesusChrist.org). Dapita ang mga bata sa pagpili og usa ka litrato mahitungod sa kalinaw ug sa pagpaambit diha sa klase kon unsay iyang nakat-unan. Tabangi sila sa paghunahuna og pipila ka mga ehemplo sa Manluluwas isip usa ka tigpasiugda og kalinaw, sama anaa sa Lucas 22:50–51. Unsaon nato pagsunod sa Iyang ehemplo?

  

  Ang Pagpili ni Lot, © Providence Collection/licensed gikan sa goodsalt.com

Genesis 17:1–8; Abraham 2:8–11

Makatuman ako sa mga pakigsaad nga akong gihimo ngadto sa Langitnong Amahan.

Ang pagtudlo sa mga bata mahitungod sa pakigsaad nga gihimo sa Dios kang Abraham ug Sara makatabang kanila sa paghunahuna mahitungod sa kaugalingon nila nga mga pakigsaad.

Posible nga mga Kalihokan

• Dapita ang mga bata sa pagbasa sa Genesis 17:1–8 ug sa Abraham 2:8–11 ug paghimo og duha ka lista sa: unsa ang gipabuhat kang Abraham ug unsa ang gisaad sa Ginoo kaniya agi og balus. Unsay atong nakat-unan mahitungod sa Ginoo gikan niini nga mga bersikulo?

• Pagpakita og litrato sa usa ka tawo nga gibunyagan (tan-awa sa Libro sa mga Hulagway sa Ebanghelyo, mga nu. 103, 104). Hangyoa ang mga bata nga ilista ang mga saad nga himoon sa usa ka tawo atol sa bunyag ug ang mga saad nga himoon sa Dios agi og balus. Isugyot nga ang mga bata motan-aw sa Mosiah 18:10; Doktrina ug mga Pakigsaad 20:37, 77, 79 alang sa tabang. Unsay atong mabuhat aron makatuman sa mga pakigsaad nga atong gihimo atol sa bunyag?

Awhaga ang Pagkat-on diha sa Panimalay

Pagpadala sa mga bata og mubo nga sulat ngadto sa ilang panimalay nga mag-awhag sa mga sakop sa ilang pamilya sa pagmatikod sa mga higayon dihang ang mga bata nahimong mga tigpasiugda og kalinaw, nagtuman sa mga pakigsaad, o naghimo sa uban pa nga gihisgutan diha sa klase.

Pagpalambo sa Atong Pagtudlo

Ang mga bata aktibo. Dunay mga higayon nga daw ang nanubrang kalagsik sa mga bata mobalda sa pagkat-on, apan magamit nimo ang ilang sobrang kalagsik isip kabahin sa ilang pagkat-on. Dapita sila sa pag-aksyon sa usa ka istorya o paghimo og aksyon nga mohaum sa mga pulong sa kanta o sa kasulatan. (Tan-awa sa Pagtudlo sumala sa Pamaagi sa Manluluwas, 25–26.)