Sara ug Isaac, ni Scott Snow

Pebrero 14–20

Genesis 18–23

“Aduna bay mga Butang nga Makuli [Malisud] sa Ginoo?”

Samtang maningkamot ka aron makab-ot ang tanang panginahanglan sa mga bata nga imong gitudloan, ikonsiderar ang mga ideya sa mas dagko ug sa mas gagmay nga mga bata dinhi niini nga outline.

Irekord ang Imong mga Impresyon

Dapita ang Pagpaambit

Aron matabangan ang mga bata sa pagpaambit sa unsay ila nang nahibaloan mahitungod sa Genesis 18–23, pagpakita og mga litrato bahin sa usa o daghang hitabo gikan niini nga mga kapitulo, ug hangyoa ang mga bata sa pagpaambit og bisan unsa nga ilang nahinumduman mahitungod sa istorya.

Itudlo ang Doktrina: Mas Gagmay nga mga Bata

Genesis 18:9–14; 21:1–7

Makasalig ako sa Dios sa pagtuman sa Iyang mga saad.

Bisan og ang Dios misaad nga si Sara ug Abraham makabaton og usa ka anak nga lalaki, samtang nagkatigulang sila, daw walay kalagmitan nga matuman ang gisaad. Sa unsang paagi imong magamit kini nga istorya aron matabangan ang mga bata nga makabaton og pagtuo nga ang Dios kanunay nga motuman sa Iyang mga saad?

Posible nga mga Kalihokan

• I-summarize ang saad sa Dios ngadto kang Abraham ug Sara nga sila makabaton og anak ug ang katumanan niini nga saad (tan-awa sa Genesis 17:15–19; 18:9–14; 21:1–7). O pagdapit og usa ka magtiayon sa ward nga magsinina og parehas ni Abraham ug ni Sara ug mosugilon sa ilang istorya. Tabangi ang mga bata nga makasabut nga si Abraham ug si Sara tigulang na kaayo aron makapanganak. Ipangutana diha nila ang gikan sa Genesis 18:14, “Aduna bay mga butang nga makuli [malisud] sa Ginoo?” Ipamatuod nga ang Ginoo makatuman sa Iyang mga saad, bisan og daw kini imposible.

• Paghimo og saad sa mga bata nga imong tumanon dapit sa katapusan sa klase (sama pananglit, nga ikaw motugot nga magkolor sila og usa ka litrato). Sa tibuok klase, pahinumdumi sila sa imong saad, ug dayon tumana kini. Ipasabut nga ang Ginoo kanunay nga motuman sa Iyang mga saad.

• Hangyoa ang mga bata sa pagpaambit og usa ka panahon dihang naghulat sila og butang nga gusto kaayo nila. Kauban ang mga bata, kantaha ang usa ka awit nga nagpamatuod sa mga saad sa Dios, sama sa “Sunda ang Kasugoan” (Songbook sa mga Bata, 68–69). Tabangi ang mga bata sa pagpangita og mga butang nga gisaad sa Dios kanato kon kita magmatinud-anon.

• Pagpakita og usa ka litrato sa bunyag o sa sakramento (tan-awa sa Libro sa mga Hulagway sa Ebanghelyo, mga nu. 103, 104, 107, 108). Tabangi ang mga bata sa pagkat-on mahitungod sa mga saad nga atong himoon uban sa Dios, ug unsay gisaad sa Dios agi og balus, kon kita bunyagan ug moambit sa sakramento. (Tan-awa sa Matinud-anon sa Tinuhoan, 18–23.)

Genesis 22:1–14

Si Abraham mituman sa Ginoo.

Lisud kaayo kadto alang kang Abraham sa pagsunod sa sugo nga isakripisyo ang iyang anak nga lalaki. Pamalandungi unsaon nimo sa paggamit sa tukmang paagi kini nga istorya sa pag-awhag sa mga bata nga sundon ang Dios bisan lisud o wala gayud sila masayud sa mga rason sa Iyang mga sugo.

Posible nga mga Kalihokan

• Pagpakita og usa ka litrato ni Abraham ug ni Isaac (tan-awa sa outline karong semana diha sa Dali Sunod Kanako—Alang sa mga Indibidwal ug mga Pamilya), ug gamita kini sa pagsugilon sa istorya bahin ni Abraham ug Isaac (tan-awa usab sa “Abraham ug Isaac,” diha sa Mga Istorya sa Daang Tugon). Pagpakita og usa ka litrato ni Jesukristo, ug istoryahi ang mga bata mahitungod kon sa unsang paagi ang istorya bahin ni Abraham ug ni Isaac makapahinumdom kanato sa sakripisyo nga gihimo sa Langitnong Amahan ug ni Jesukristo kanato.

• Pagpadula og usa ka sayon nga dula nga nagkinahanglan sa mga bata nga magsunod sa mga direksyon. Sama pananglit, ang mga direksyon modala ngadto sa usa ka litrato sa Manluluwas nga gitago diha sa lawak klasehanan. Unsa ang pipila ka butang nga gipabuhat kanato sa Langitnong Amahan? Tabangi ang mga bata nga makasabut nga ang pagtuman sa Iyang mga sugo makatabang kanato sa pagbalik og puyo uban Kaniya ug ni Jesukristo.

Itudlo ang Doktrina: Mas Dagko nga mga Bata

Genesis 18:9–14; 21:1–7

Ang Ginoo motuman sa Iyang mga saad, bisan og daw kini imposible.

Si Abraham ug si Sara gisultihan nga makapanganak sila og usa ka lalaki, apan daw imposible kadto—Si Abraham 100 anyos na, ug si Sara 90 na (tan-awa sa Genesis 17:17). Ang Dios mituman sa Iyang saad, ug kini nga istorya makatabang sa mga bata nga imong gitudloan sa paglig-on sa ilang pagtuo sa mga saad sa Dios kanila.

Posible nga mga Kalihokan

• Isulat ang matag pulong gikan sa unang kapahayag [sentence] sa Genesis 18:14 sa lahi nga papel, ug hatagi og tagsa ang matag bata. Dayon hangyoa ang klase sa pagbutang sa mga pulong sa eksaktong pagkasunod-sunod. Basaha ang Genesis 18:9–14; 21:1–7 dungan sa mga bata sa pagpangita og usa ka ehemplo gikan sa kinabuhi ni Sara ug ni Abraham sa dihang ang Ginoo mihimo og butang nga daw imposible. Unsay atong makat-unan gikan sa kasinatian ni Sara ug ni Abraham nga makadasig kanato sa pagsalig sa mga saad sa Dios?

• Pagpakita og mga litrato bahin sa mga istorya sa kasulatan diin ang Dios mihimo og butang nga daw imposible o lisud (pananglitan, tan-awa sa Libro sa mga Hulagway sa Ebanghelyo, mga nu. 7, 8, 25, 26). Hangyoa ang mga bata sa pagpaambit unsay ilang nahibaloan mahitungod sa mga panghitabo nga naghulagway niini nga mga litrato, ug tabangi nga makita nila giunsa sa Ginoo sa pagtuman ang Iyang mga saad diha sa matag hitabo. Ipaambit giunsa sa Ginoo sa pagtuman ang Iyang mga saad diha sa imong kinabuhi o sa kinabuhi sa mga tawo nga imong nailhan (alang sa ubang ehemplo sa mga saad sa Ginoo, tan-awa sa Malaquias 3:10; Juan 14:26–27; Doktrina ug mga Pakigsaad 89:18–21). Tuguti ang mga bata sa pagpaambit og susamang mga ehemplo nga ilang nahibaloan.

Genesis 19:15–26

Makapalayo ako sa kadautan.

Ang asoy mahitungod ni Lot ug sa iyang pamilya nga milayas gikan sa dautang siyudad makadasig sa mga bata nga imong gitudloan sa pagpalayo sa dautang mga impluwensya sa ilang kinabuhi.

Pagpalayo sa Sodom ug Gomorrah, ni Julius Schnorr von Carolsfeld

Posible nga mga Kalihokan

• I-summarize ang Genesis 19:15–26 pinaagi sa pagpasabut nga ang pamilya ni Lot nagpuyo sa usa ka dautan kaayo nga siyudad, ug ang mga anghel mipasidaan kanila sa pagbiya. Magdungan sa pagbasa sa mga bersikulo 15–17, 26, ug tabangi ang mga bata kon unsa kaha ang ipasabut niini alang kanila niining panahona sa “kumaligaw [eskapo o ikyas]” sa dautan ug “[ayaw] paglingi-lingi” (bersikulo 17).

• Ipakita ang litrato sa Manluluwas, ug hangyoa ang mga bata sa paglakang padung sa atubang niini samtang magpaambit sila og usa ka butang nga ilang mahimo sa pagpalayo sa kadautan ug pagpaduol kang Kristo.

• Hisguti ang mga sitwasyon diin ang usa ka higala tingali modapit sa mga bata sa paghimo og butang nga nahibaloan nilang dili husto. Unsaon nato sa “pagpalayo” niini nga mga sitwasyon? Unsay pwede natong isulti ngadto sa atong higala?

Genesis 22:1–14

Ang Langitnong Amahan mipadala sa Iyang Anak, kinsa misakripisyo sa Iyang kaugalingon alang kanato.

Samtang magtudlo ka mahitungod sa kaandam ni Abraham sa pagsakripisyo kang Isaac, hunahunaa pag-ayo ang mga pagbati sa mga bata. Gamita kini nga istorya sa pagtabang sa mga bata nga malig-on ang ilang gugma ug pagpasalamat sa sakripisyo sa Manluluwas.

Posible nga mga Kalihokan

• Sa pagtabang sa mga bata nga makakat-on sa istorya diha sa Genesis 22:1–14, basaha ang mga bersikulo ngadto kanila, ug dapita sila sa pagdrowing og mga litrato sa unsay inyong gibasa. Ngano nga ang sugo sa Ginoo nga isakripisyo si Isaac lisud man tumanon alang kang Abraham? Unsay atong nakat-unan mahitungod ni Abraham gikan niini nga istorya?

• Paggamit og mga litrato ni Abraham ug ni Isaac ug sa Paglansang (tan-awa sa Libro sa mga Hulagway sa Ebanghelyo, mga nu. 9, 57) sa pagkumpara sa istorya diha sa Genesis 22 ngadto sa sakripisyo sa Manluluwas (tan-awa sa Mateo 27:26–37). Unsa ang atong makat-unan mahitungod sa Langitnong Amahan ug ni Jesukristo gikan sa mga istorya bahin ni Abraham ug ni Isaac ug bahin sa Paglansang?

• Kantaha og dungan ang awit mahitungod sa sakripisyo sa Manluluwas, sama sa “Mipadala sa Bugtong Anak” (Songbook sa mga Bata, 20–21). Dapita ang mga bata sa paghisgot mahitungod kon sa unsang paagi ang sakripisyo ni Jesus nagpakita sa gugma sa Langitnong Amahan kanato.

Awhaga ang Pagkat-on diha sa Panimalay

Dapita ang mga bata nga ipaambit ngadto sa ilang mga pamilya ang mahitungod sa usa ka panahon sa dihang ang Dios mipanalangin kanila sa dihang gituman nila ang usa sa Iyang mga sugo.

Pagpalambo sa Atong Pagtudlo

I-awhag ang balaang pagtahud. Kon gikinahanglan atol sa klase, pwede nimong pahinumduman ang mga bata sa paghatag og balaang pagtahud. Mahimo nimo kini pinaagi sa pagkanta sa hilum nga paagi o pagkanta nga nagkium [humming] sa usa ka kanta o pagpakita og usa ka litrato ni Jesus.