“Pebrero 14–20. Genesis 18–23: ‘Aduna bay mga Butang nga Makuli sa Ginoo?’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Pebrero 14–20. Genesis 18–23,” Dali, Sunod Kanako—Alang sa mga Indibidwal ug mga Pamilya: 2022
Sarah and Isaac [Sara ug Isaac], ni Scott Snow
Pebrero 14–20
Genesis 18–23
“Aduna bay mga Butang nga Makuli sa Ginoo?”
Basaha ug pamalandonga ang Genesis 18–23, ug irekord ang imong mga impresyon. Ikaw makagamit sa mga ideya niini nga latid [outline] sa pagtabang kanimo sa pagtuon niini nga mga kapitulo, ug mahimo ka usab nga madasig sa pagsiksik alang sa ubang mga mensahe diha sa kasulatan nga ang Ginoo aduna sa piho alang kanimo.
Irekord ang Imong mga Impresyon
Ang kinabuhi ni Abraham, napuno sa mga hitabo nga makaguol ug makalipay, ebidensya sa usa ka kamatuoran nga nakat-unan ni Abraham diha sa usa ka panan-awon––nga kita ania sa yuta nga mapamatud-an, “aron pagsuta kon [kita] mobuhat ba sa tanan nga mga butang bisan unsa ang isugo sa Ginoo nga [atong] Dios”.(Abraham 3:25). Si Abraham ba sa iyang kaugalingon mapamatud-an nga matinud-anon? Mopadayon ba siya sa pagbaton og hugot nga pagtuo sa saad sa Dios kabahin sa usa ka dako nga kaliwatan, bisan kon siya ug si Sara sa gihapon walay anak sa ilang tigulang nga edad? Ug sa diha nga si Isaac natawo, ang hugot nga pagtuo ni Abraham molahutay ba sa dili katuohan––nga usa ka sugo sa pagsakripisyo sa anak gayud nga lalaki pinaagi kinsa ang Dios misaad sa pagtuman niana nga pakigsaad? Si Abraham napamatud-an sa pagkamatinud-anon. Misalig si Abraham sa Dios, ug misalig ang Dios ni Abraham. Diha sa Genesis 18–23, makaplagan nato ang mga istorya gikan sa mga kinabuhi ni Abraham ug sa uban nga makapaaghat kanato sa paghunahuna mahitungod sa atong kaugalingong abilidad sa pagtuo sa mga saad sa Dios, sa paglayas gikan sa pagkadautan ug sa dili gayud paglingi, ug sa pagsalig sa Dios walay pagsapayan sa sakripisyo.
Mga Ideya alang sa Personal nga Pagtuon sa Kasulatan
Ang Ginoo nagtuman sa Iyang mga saad sa Iyang kaugalingong panahon.
Naghimo ang Ginoo og mahimayaon nga mga saad ngadto sa matinud-anon, apan usahay ang mga sitwasyon sa atong mga kinabuhi makapatingala kanato kon sa unsa nga paagi kadto nga mga saad posible nga matuman. Si Abraham ug si Sara tingali mibati usahay niana nga paagi. Unsay imong nakat-unan gikan sa ilang mga kasinatian? Tingali mahimong makatabang ang pagsugod sa imong pagtuon pinaagi sa pagribyu unsa ang gisaad sa Ginoo ni Abraham diha sa Genesis 17:4, 15–22. Sa unsa nga paagi mitubag si Abraham ug Sara? (tan-awa usab sa Hubad ni Joseph Smith, Genesis 17:23). Giunsa pagtubag sa Ginoo aron sa pagtabang kanila sa pagbaton og mas dako nga hugot nga pagtuo diha sa Iyang mga saad? (tan-awa sa Genesis 18:14).
Unsa ang imong nakaplagan dinhi niini nga mga bersikulo nga nagtukod sa imong hugot nga pagtuo? Unsa ang ubang mga kasinatian––sa imong kinabuhi o sa laing tawo––ang nakapalig-on sa imong hugot nga pagtuo nga ang Ginoo motuman sa Iyang mga saad nganha kanimo sa Iyang kaugalingong panahon ug paagi?
Tan-awa usab sa Doktrina ug mga Pakigsaad 88:68.
Ang Ginoo nagmando kanato sa paglayas gikan sa pagkadautan.
Unsa nga mga leksyon ang imong nakat-unan mahitungod sa paglayas gikan sa pagkadautan samtang ikaw nagbasa mahitungod ni Lot ug sa iyang pamilya? Sama pananglit, unsa ang nakapadani kanimo mahitungod sa unsa ang gisulti ug gibuhat sa mga anghel sa pagtabang ni Lot ug sa iyang pamilya sa pag-eskapo sa kalaglagan? (tan-awa sa Genesis 19:12–17). Giunsa pagtabang sa Ginoo kanimo ug sa imong pamilya paglayas o pagpangita og proteksyon gikan sa dautan nga mga impluwensya sa kalibutan?
Alang sa dugang pa mahitungod sa mga sala sa Sodoma ug Gomorra, tan-awa sa Ezequiel 16:49–50 ug Judas 1:7–8.
Tan-awa usab sa Hubad ni Joseph Smith, Genesis 19:9–15 (sa Giya ngadto sa mga Kasulatan).
Fleeing Sodom and Gomorrah [Paglayas sa Sodoma ug Gomorra], ni Julius Schnorr von Carolsfeld
Unsa ang nabuhat nga sayop sa asawa ni Lot?
Si Elder Jeffrey R. Holland mitudlo:
“Sa klaro, unsa ang sayop sa asawa ni Lot mao nga wala lamang siya milingi; diha sa iyang kasingkasing siya gusto nga mobalik. Kini makita nga bisan sa wala pa siya milapas sa mga utlanan sa siyudad, siya gimingaw na sa unsa ang nahatag sa Sodoma ug Gomorra kaniya. … Siya walay hugot nga pagtuo. Siya nagduha-duha sa abilidad sa Ginoo sa paghatag kaniya og usa ka butang nga mas maayo kay sa anaa na kaniya. …
“Ngadto sa tanang [katawhan] sa matag henerasyon, ako nagtawag, ‘Hinumdumi ang asawa ni Lot’ [Lucas 17:32]. Ang hugot nga pagtuo alang sa umaabut. Ang hugot nga pagtuo natukod diha sa nangagi apan wala magtinguha nga magpabilin dinha. Ang hugot nga pagtuo nagsalig nga ang Dios adunay dagkong mga butang nga gitagana alang sa matag usa kanato ug nga si Kristo sa tinuod mao ang ‘halangdong pari [labawng sacerdote] sa maayong butang nga managpangabut’ (Mga Hebreohanon 9:11)” (“The Best Is Yet to Be,” Ensign, Ene. 2010, 24, 27).
Ang pagkaandam ni Abraham sa pagsakripisyo ni Isaac usa ka simbolo sa Dios ug sa Iyang Anak.
Wala kita mahibalo sa tanan nga mga rason sa pagsugo sa Dios ni Abraham sa paghalad ni Isaac isip usa ka sakripisyo; kita nahibalo nga kadto usa ka pagsulay sa iyang hugot nga pagtuo sa Dios (tan-awa sa Genesis 22:12–19). Samtang ikaw nagbasa sa Genesis 22:1–19, unsa ang imong nakat-unan gikan sa kasinatian ni Abraham?
Ang pagkaandam ni Abraham sa pagsakripisyo sa iyang anak nga lalaki mao ang “simbolo sa Dios ug sa iyang Bugtong Anak” (Jacob 4:5). Samtang ikaw namalandong sa mga pagkasusama tali sa pagsulay ni Abraham ug sa paghalad sa Dios Amahan sa Iyang Anak isip usa ka sakripisyo alang kanato, unsa ang imong gibati alang sa imong Langitnong Amahan?
Adunay pagkasusama usab tali ni Isaac ug sa Manluluwas. Hunahunaa ang pagbasa sa Genesis 22:1–19 pag-usab, mangita niini nga mga pagkasusama.
Mga Ideya alang sa Pamilya nga Pagtuon sa Kasulatan ug Family Home Evening
-
Genesis 18:14.Aduna bay mga istorya gikan sa mga kasulatan, gikan sa kasaysayan sa imong pamilya, o gikan sa imong kaugalingong kinabuhi nga imong ikapakigbahin nga nakatudlo kanimo nga walay malisud kaayo alang sa Ginoo?
-
Genesis 18:16–33.Unsa ang atong nakat-unan mahitungod sa kinaiya ni Abraham gikan niini nga mga bersikulo? Unsaon nato sa pagsunod ang iyang ehemplo? (Tan-awa usab sa Alma 10:22–23.)
-
Genesis 19:15–17.Kini nga mga bersikulo makatabang sa sakop sa imong pamilya sa pag-andam alang sa mga panahon kon sila nanginahanglang molayas gikan sa pagkadautan. Unsa kaha ang pipila sa mga sitwasyon niini? Sama pananglit, ikaw mahimong adunay panaghisgot mahitungod sa dili maayo nga media o ang tintasyon sa paglibak. Unsaon nato paglayas gikan sa mao nga mga sitwasyon?
-
Genesis 21:9–20.Unsa ang nakapadani sa imong pamilya mahitungod sa paagi nga mitagad ang Dios ni Agar ug Ismael human si Sara ug Abraham mipapahawa kanila?
-
Genesis 22:1–14.Unsaon nimo pagtabang ang imong pamilya sa pagkakita sa koneksyon tali sa istorya sa Dios nga nagsugo ni Abraham sa paghalad ni Isaac ug sa maulaong sakripisyo sa Manluluwas? Mahimo ka nga mopakita sa mga hulagway ni Abraham ug Isaac ug sa Paglansang diha sa Krus (tan-awa sa “Abraham ug ang Paghalad ni Isaac,”diha sa Mga Istorya sa Daang Tugon) samtang ang mga sakop sa pamilya naghisgot sa mga simbolo nga ilang nakita niini nga mga hitabo. Mahimo usab kamo nga manganta og usa ka awit mahitungod sa Manluluwas, sama sa “Mipadala sa Bugtong Anak” (Songbook sa mga Bata, 20), ug pangita og mga hugpong sa mga pulong nga naghulagway sa sakripisyo sa Manluluwas.
Unsa ang gipangayo kanato nga isakripisyo isip usa ka pamilya? Giunsa niini nga sakripisyo pagdala kanato nga mas maduol ngadto sa Dios?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Kita sa Dios Gihigugma, Anak Niya Gipadala,” Mga Himno, nu. 109.
Pagpalambo sa Personal nga Pagtuon
Paminaw sa Espiritu. Samtang ikaw nagtuon, hatagi og pagtagad ang imong mga hunahuna ug mga pagbati, bisan og kini ingon og dili kalabut ngadto sa unsay imong gibasa. Kadto nga mga impresyon tingali mao gayud ang mga butang nga gusto sa Dios nga ikaw makahibalo.
Paghulagway ni Abraham ug Isaac, ni Jeff Ward