Mga Hunahuna nga Hinumduman

Ang Pakigsaad

Sa tibuok Daang Tugon, kanunay nimong mabasa ang pulong nga pakigsaad. Karon kita kasagaran naghunahuna sa mga pakigsaad isip sagrado nga mga saad uban sa Dios, apan sa karaang kalibutan, ang mga pakigsaad importante usab nga bahin sa mga pakig-interaksyon sa mga tawo sa usag usa. Alang sa ilang kahilwasan ug pagkabuhi, ang mga tawo nagkinahanglan nga makasalig sa usag usa, ug ang mga pakigsaad mga paagi sa pagkuha niana nga pagsalig.

Busa sa dihang ang Dios misulti ngadto ni Noe, Abraham, o Moises mahitungod sa mga pakigsaad, Siya nagdapit kanila sa pagsulod ngadto sa usa ka relasyon sa pagsalig uban Kaniya. Usa sa labing nahibaloan nga ehemplo sa usa ka pakigsaad diha sa Daang Tugon mao ang usa nga gihimo sa Dios uban ni Abraham ug Sara––ug unya gibag-o ngadto sa ilang mga kaliwat nga Isaac ug Jacob (gitawag usab og Israel). Kasagaran gitawag kini og pakigsaad sama kang Abraham, bisan og sa Daang Tugon kini yanong nailhan isip “ang pakigsaad.” Imong mahibaloan nga ang Daang Tugon sa sinugdanan mao ang istorya sa mga katawhan kinsa nagtan-aw sa ilang mga kaugalingon isip ang mga manununod niini nga pakigsaad––ang mga katawhan sa pakigsaad.

Ang pakigsaad sama kang Abraham nagpadayon nga mahimong imortante karon, ilabi na ngadto sa mga Santos sa Ulahing mga Adlaw. Ngano? Tungod kay kita usab mao ang mga katawhan sa pakigsaad, tinuod o dili kita kadugo nga mga kaliwat ni Abraham, Isaac, ug Jacob (tan-awa sa Mga Taga-Galacia 3:27–29). Tungod niini nga rason, kini importante nga sabton unsa ang pakigsaad sama kang Abraham ug sa unsa nga paagi kini may kalabutan kanato karon.

Unsa ang pakigsaad sama kang Abraham?

Si Abraham gusto nga “mahimo nga usa ka labaw nga sumusunod sa pagkamatarung”(Abraham 1:2), busa ang Dios midapit kaniya ngadto sa usa ka pakigsaad nga relasyon. Si Abraham dili ang una nga nagbaton niini nga tinguha, ug dili siya ang una nga nakadawat og usa ka pakigsaad. Gitinguha niya “ang mga panalangin sa mga amahan” (Abraham 1:2)––mga panalangin nga gihatag pinaagi sa pakigsaad ngadto ni Adan ug ni Eva ug human niana ngadto niadtong kinsa naningkamot nga makugihon niini nga mga panalangin.

Ang pakigsaad sa Dios uban ni Abraham misaad og talagsaong mga panalangin: usa ka panulundon nga yuta, usa ka dakong kaliwatan, makagamit sa mga ordinansa sa pagkapari, ug usa ka ngalan nga pasidunggan sulod sa mga henerasyon nga umaabut. Apan ang gihatagan og gibug-aton niini nga pakigsaad dili lamang diha sa mga panalangin nga madawat ni Abraham ug sa iyang pamilya apan diha usab sa panalangin nga sila mahimo ngadto sa nahibilin sa mga anak sa Dios. “Mahimo ikaw nga usa ka panalangin,” mipadayag ang Dios, “ug diha kanimo pagapanalanginan ang tanang mga kabanayan sa yuta” (Genesis 12:2–3).

Kini ba nga pakigsaad naghatag ni Abraham, Sara, ug sa ilang mga kaliwat og usa ka pribilehiyo nga kahimtang taliwala sa mga anak sa Dios? Diha lamang sa katarungan nga kini usa ka pribilehiyo sa pagpanalangin sa uban. Ang pamilya ni Abraham “modala niini nga pagpangalagad ug Pagkapari ngadto sa tanan nga mga nasud,” makigbahin “sa mga panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon” (Abraham 2:9, 11).

Kini nga pakigsaad mao ang panalangin nga gihandum ni Abraham. Human kini madawat, miingon si Abraham diha sa iyang kasingkasing, “Ang imong sulugoon nangita kanimo sa dako nga tinguha; karon ako nakakaplag kanimo” (Abraham 2:12).

Kana mga liboan ka mga tuig ang milabay, apan kini nga pakigsaad gipahiuli sa atong panahon (tan-awa sa 1 Nephi 22:8–12). Ug kini sa karon natuman diha sa mga kinabuhi sa mga katawhan sa Dios. Sa tinuod, ang pagkatuman sa pakigsaad nakaangkon og gahum ug kalig-on sa ulahing mga adlaw samtang nag-uswag ang buhat sa Dios, nagpanalangin sa mga pamilya sa tibuok kalibutan. Ug bisan kinsa, sama ni Abraham, nga gusto nga mahimo nga usa ka labaw nga sumusunod sa pagkamatarung, bisan kinsa nga naningkamot sa dakong kakugi, mahimong kabahin niini.

Unsa ang Kahulugan sa Pakigsaad Sama Kang Abraham ngari Kanako?

Ikaw anak sa pakigsaad. Mihimo ikaw og pakigsaad uban sa Dios sa dihang ikaw gibunyagan. Ikaw nagbag-o niana nga pakigsaad sa matag panahon nga ikaw nag-ambit sa sakramento. Ug ikaw naghimo og sagrado nga mga pakigsaad diha sa templo. Nag-uban, kini nga mga pakigsaad naghimo kanimo nga apil diha sa pakigsaad sama kang Abraham, ang kahingpitan diin makaplagan diha sa mga ordinansa sa templo. Ingon nga gitudlo ni Presidente Russell M. Nelson, “Sa katapusan, diha sa balaang templo, kita mahimong mga manununod sa mga panalangin sa mahangturong pamilya, nga sa makausa gisaad ngadto ni Abraham, Isaac, Jacob, ug sa ilang kaliwatan.”¹

Pinaagi niini nga mga pakigsaad ug mga ordinansa, mahimo kita nga mga katawhan sa Dios (tan-awa sa Exodo 6:7; Deuteronomio 7:6; 26:18; Ezequiel 11:20). Mahimo kita nga lahi gikan sa kalibutan nga naglibut kanato. Ang atong mga pakigsaad naghimo niini nga posible alang kanato nga matinuoron, mapasaligon nga mga disipulo ni Jesukristo. “Ang atong mga pakigsaad,” mipasabut si Presidente Nelson, “mobugkos kanato ngadto Kaniya ug mohatag kanato og diosnong gahum.”² Ug kon ang Dios nagpanalangin sa Iyang mga katawhan uban sa Iyang gahum, kini uban sa pagdapit ug pagpaabut nga sila mopanalangin sa uban––nga sila “mahimo nga panalangin” ngadto sa “tanan nga mga banay sa yuta” (Abraham 2:9, 11).

Kini mao ang bililhong pagsabut nga gihatag ngari kanato tungod sa Pagpahiuli sa pakigsaad ni Abraham pinaagi ni Propeta Joseph Smith. Busa kon ikaw magbasa mahitungod sa mga pakigsaad diha sa Daang Tugon, ayaw paghunahuna lamang mahitungod sa relasyon sa Dios ngadto ni Abraham, Isaac, ug Jacob. Paghunahuna usab mahitungod sa Iyang relasyon diha kanimo. Kon ikaw magbasa mahitungod sa saad sa dili maihap nga kaliwatan (tan-awa sa Genesis 28:14), ayaw paghunahuna lamang mahitungod sa mga minilyon kinsa karon nagtawag ni Abraham nga ilang amahan. Paghunahuna usab mahitungod sa saad sa Dios nganha kanimo kabahin sa mahangturong mga pamilya ug mahangturong pagtubo (tan-awa sa Doktrina ug mga Pakigsaad 131:1–4; 132:20–24). Kon ikaw magbasa mahitungod sa saad nga usa ka yutang panulundon, ayaw lamang paghunahuna mahitungod sa yuta nga gisaad ngadto ni Abraham. Paghunahuna usab mahitungod sa celestial nga padulngan sa kalibutan mismo––usa ka panulundon nga gisaad ngadto sa “maaghop” kinsa “nagahulat sa Ginoo” (Mateo 5:5; Salmo 37:9, 11; tan-awa usab sa Doktrina ug mga Pakigsaad 88:17–20). Ug kon ikaw mobasa mahitungod sa saad nga ang mga katawhan sa pakigsaad sa Dios mopanalangin sa “tanan nga mga banay sa yuta” (Abraham 2:11), ayaw lamang paghunahuna mahitungod sa pagpangalagad ni Abraham o sa mga propeta kinsa nagagikan kaniya. Paghunahuna usab mahitungod sa unsay imong mabuhat––isip sumusunod sa pakigsaad ni Jesukristo––nga mahimong panalangin ngadto sa mga pamilya nga naglibut kanimo.

Mubo nga mga sulat

1. Russell M. Nelson, “Mga Pakigsaad,” Liahona, Nob. 2011, 89.

2. Russell M. Nelson, “Pagdawat sa Gahum ni Jesukristo diha sa Atong Kinabuhi,” Liahona, Mayo 2017, 41. Si Presidente Linda K. Burton miingon: “Ang paghimo ug pagtuman sa mga pakigsaad nagpasabut sa pagpili nga mahigot kita ngadto sa atong Amahan sa Langit ug ni Jesukristo. Kini mao ang pasalig nga mosunod sa Manluluwas” (“Ang Gahum, Kalipay, ug Gugma sa Pagtuman sa Pakigsaad,” Liahona, Nob. 2013, 111).