Hulagway ni Noe nga mibiya sa arka, ni Sam Lawlor

Enero 31–Pebrero 6

Genesis 6–11; Moises 8

“Si Noe Nakakaplag ug Kahimuot sa mga Mata sa Ginoo”

Ang mga istorya diha sa mga kasulatan usahay makatudlo kanato og daghang espiritwal nga mga leksyon. Samtang ikaw nagbasa mahitungod sa Dakong Lunop ug sa Torre sa Babel, paninguha og pagdasig mahitungod kon sa unsa nga paagi kini nga asoy may kalabutan nganha kanimo.

Irekord ang Imong mga Impresyon

Mga henerasyon sa mga mambabasa sa Biblia nadasig pinaagi sa istorya ni Noe ug sa Lunop. Apan kita kinsa nagpuyo sa ulahing mga adlaw adunay linain nga rason sa pagpaminaw ngadto niini. Sa dihang gitudlo ni Jesukristo kon sa unsa nga paagi kita kinahanglan nga magbantay alang sa Iyang Ikaduhang Pag-anhi, Siya miingon nga ingon sa mga adlaw ni Noe, mao usab ang pag-anhi sa Anak sa Tawo” (tan-awa sa Joseph Smith––Mateo 1:41). Agi og dugang, ang mga hugpong sa mga pulong nga naghulagway sa adlaw ni Noe, sama sa “nadunot” ug “napuno sa mga paglugos,” ingon lamang og sayon nga naghulagway sa atong panahon (Genesis 6:12–13; Moises 8:28). Ang istorya sa Torre ni Babel ingon og magamit usab sa atong panahon, uban sa paghulagway niini sa garbo nga gisundan sa kaguliyang ug pagkabahin taliwala sa mga anak sa Dios.

Kining karaan nga asoy mga bililhon dili lamang tungod kay kini nagpakita kanato nga ang kadautan magbalik-balik sa tibuok kasaysayan. Labaw ka importante, kini nagtudlo kanato unsa ang buhaton mahitungod niini. Si Noe“nakaangkon og pagsalig sa mga mata sa Ginoo” (Moises 8:27) bisan pa sa kadautan nga naglibut kaniya. Ug ang mga pamilya ni Jared ug sa iyang igsoon nga lalaki nangayo og paggiya sa Ginoo ug gidala palayo gikan sa kadautan sa Babel (tan-awa sa Ether 1:33–43). Kon kita maghunahuna kon unsaon sa paghupot sa atong mga kaugalingon ug sa atong mga pamilya nga luwas atol sa atong kaugalingong panahon sa kadunot ug kapintas, ang pamilyar nga mga istorya niini nga mga kapitulo adunay daghang ikatudlo kanato.

Mga Ideya alang sa Personal nga Pagtuon sa Kasulatan

Genesis 6; Moises 8

Adunay espiritwal nga kahilwasan sa pagsunod sa propeta sa Ginoo.

Salamat sa gipahiuli nga ebanghelyo, kita nahibalo og daghan pa mahitungod ni Noe kay sa unsay makaplagan diha sa Daang Tugon. Ang dinasig nga hubad ni Joseph Smith sa Genesis 6, nga makaplagan sa Moises 8, nagpadayag nga si Noe usa sa halangdong mga propeta sa Dios. Siya gi-orden ug gipadala ngadto sa pagsangyaw sa ebanghelyo ni Jesukristo, siya milakaw ug nakigsulti sa Dios, ug siya napili sa pagpahiuli sa mga anak sa Dios ibabaw sa yuta human sa Lunop (tan-awa usab sa Mga Pagtulun-an sa mga Presidente sa Simbahan: Joseph Smith [2007], 122, 239). Unsa ang imong nakat-unan mahitungod sa mga propeta gikan sa mga kasinatian ni Noe?

Samtang ikaw nagbasa mahitungod sa adlaw ni Noe tingali ikaw makamatikod og pagkasusama nganhi sa atong panahon. Sama pananglit:

• Moises 8:18, 20–21, 23–24 (pagsalikway sa mga sulugoon sa Dios)

• Moises 8:21 (kataspukan ug kalibutanon)

• Moises 8:22 (dautang mga handurawan ug mga hunahuna)

• Moises 8:28 (kadautan ug kasamok)

Unsa ang gitudlo sa mga propeta karon mahitungod sa ebanghelyo ni Jesukristo nga makatabang kanimo nga kanunayng luwas sa kalibutan karon? Samtang ikaw nagbasa sa kasinatian ni Noe, unsa ang nagdasig kanimo sa pagsunod sa mga propeta sa Ginoo karon?

Tan-awa usab sa Mosiah 13:33; Doktrina ug mga Pakigsaad 21:4–7.

Genesis 9:8–17

Ang mga timaan ug mga simbolo makatabang kanato sa paghinumdom sa atong mga pakigsaad sa Ginoo.

Ang mga pakigsaad sa ebanghelyo mahimo nga marepresentar pinaagi sa timailhan, simbolo, o “timaan” (Genesis 9:12). Sama pananglit, paghunahuna mahitungod kon giunsa sa pan ug sa tubig sa sakramento o sa mga tubig sa bunyag pagpahinumdom sa sagradong mga kamatuoran kalabut ngadto sa imong mga pakigsaad. Sumala sa Genesis 9:8–17, unsa ang makapahinumdom kanimo sa bangaw? Unsa ang gidugang sa Hubad ni Joseph Smith, Genesis 9:21–25 (diha sa Giya ngadto sa mga Kasulatan) ngadto sa imong pagsabut? Ngano ang Ginoo gusto kanimo nga mohinumdom Kaniya ug sa mga pakigsaad nga imong gihimo?

Tan-awa usab sa Gerrit W. Gong, “Kanunay nga Mohinumdom Kaniya,” Liahona, Mayo 2016, 108–11.

Genesis 11:1–9

Ang mao lamang nga paagi sa pagkab-ut sa langit mao ang pagsunod ni Jesukristo.

Ang karaang Babel, o Babelon, dugay na kaayong gigamit isip usa ka simbolo alang sa pagkadautan ug pagkakalibutananon (tan-awa sa Pinadayag 18:1–10; Doktrina ug mga Pakigsaad 133:14). Samtang ikaw nagtuon sa Genesis 11:1–9, pamalandonga ang mga panabut nga gihatag ni propeta Mormon, kinsa misulat nga si Satanas mao “kinsa misugyot niini ngadto sa mga kasingkasing sa mga katawhan sa pagtukod og usa ka tore nga may igo nga gitas-on nga sila unta makaadto sa langit” (Helaman 6:28; tan-awa usab sa mga bersikulo 26–27). Unsay mga pasidaan sa istorya kabahin sa Torre sa Babel nga aduna alang kanimo?

Tan-awa usab sa Salmo 127:1.

Paghulagway sa Torre sa Babel, ni David Green

Mga Ideya alang sa Pamilya nga Pagtuon sa Kasulatan ug Family Home Evening

Genesis 6–8.Unsaon kaha nimo paggamit ang istorya kabahin sa arka ni Noe sa pagtudlo sa imong pamilya kon sa unsa nga paagi ang pagsunod sa propeta makahupot kanato nga luwas sa espiritwal nga paagi? (tan-awa sa “Noah,” sa Mga Istorya sa Daang Tugon). Tingali ang imong pamilya magtinabangay sa paghimo og yanong dulaan nga sakayan gikan sa papel o mga bloke. Samtang ikaw nagbasa sa Genesis 6–7, ikaw makatandi sa kahilwasan nga gihatag pinaagi sa sakayan ngadto sa kahilwasan nga atong makaplagan sa pagsunod sa propeta. Mahimo kang makighisgot sa bag-ohay nga tambag gikan sa propeta ug isulat ang iyang mga pulong nga tambag diha sa imong sakayan.

Unsa pa ang gihatag sa Dios kanato nga mahimong ikatandi ngadto sa arka nga miluwas sa pamilya ni Noe? Kini nga mga kapanguhaan nagsugyot og pipila ka mga tubag, bisan og adunay daghan pang lain: 2 Nephi 9:7–13; Doktrina ug mga Pakigsaad 115:5–6; ug ang mensahe ni Presidente Russell M. Nelson “Ang Mahimong Labing Dalaygon nga mga Santos sa Ulahing mga Adlaw” (Liahona, Nob. 2018, 113–14).

Moises 8:17.Unsa ang kahulugan sa aron ang Espiritu sa Ginoo “mopabilin” uban kanato? (tan-awa sa 1 Nephi 7:14; Doktrina ug mga Pakigsaad 1:33). Kanus-a kita nakasinati sa Espiritu nga nagpabilin uban kanato?

Genesis 9:8–17.Ang gagmay nga mga bata tingali malingaw sa pagdrowing o pagkolor og usa ka bangaw samtang ikaw nagsulti mahitungod sa unsa ang girepresentar niini (tan-awa usab sa Hubad ni Joseph Smith, Genesis 9:21–25 [diha sa Giya ngadto sa mga Kasulatan]). Ikaw mahimo usab nga maghisgot og mga butang nga nagtabang kanato sa paghinumdom sa atong mga pakigsaad, sama sa sakramento, nga nagtabang kanato sa paghinumdom sa atong pakigsaad sa bunyag nga mosunod ni Jesukristo (tan-awa sa Doktrina ug mga Pakigsaad 20:75–79).

Genesis 11:1–9.Kini mahimong makatabang nga basahon ang Ether 1:33–43 samtang ang imong pamilya nagtuon sa Genesis 11 ug nagkat-on mahitungod sa Torre sa Babel. Unsa ang atong nakat-unan gikan sa mga pamilya ni Jared ug sa iyang igsoong lalaki nga makatabang sa atong pamilya sa pagkaplag og kahilwasan bisan pa sa pagkadautan sa kalibutan? Unsang dugang nga mga leksyon ang atong nakat-unan gikan ni Noe ug sa iyang pamilya samtang sila nag-atubang og susamang mga hagit? (tan-awa sa Moises 8:13, 16–30).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Sunda ang Propeta,” Songbook sa mga Bata, 58–59 (bersikulo 3).

Pagpalambo sa Personal nga Pagtuon

Ipakigbahin ang inyong mga panabut. Kon ikaw makigbahin unsay imong nakat-unan gikan sa mga kasulatan, ikaw wala lamang nagpanalangin sa uban apan naglig-on usab sa imong kaugalingon nga pagsabut. Sa imong paminaw unsay nadasig ka nga ipagpakigbahin gikan sa mga kasulatan ngadto sa imong pamilya, mga higala, o miyembro sa ward?

Paghulagway sa arka ni Noe, ni Adam Klint Day