“Enero 24–30. Moises 7: ‘Ang Ginoo Mitawag sa Iyang mga Katawhan og Zion,’” Dali, Sunod Kanako—Alang sa mga Indibidwal ug mga Pamilya: Daang Tugon 2022 (2021)
“Enero 24–30. Moises 7,” Dali, Sunod Kanako—Alang sa mga Indibidwal ug mga Pamilya: 2022
Love One Another [Maghigugmaay sa Usag usa], ni Emma Donaldson Taylor
Enero 24–30
Moises 7
“Ang Ginoo Mitawag sa Iyang mga Katawhan og Zion”
Samtang ikaw nagbasa ug namalandong sa Moises 7, irekord ang imong espiritwal nga mga impresyon. Pinaagi sa pagbuhat niini, ikaw makapakita nga imong gihatagan og bili ang giya gikan sa Ginoo ug nga ikaw gusto nga modawat og daghan pa sa Iyang giya.
Irekord ang Imong mga Impresyon
Sa tibuok kasaysayan, ang mga katawhan nagsulay sa pagkab-ot unsa ang natuman ni Enoch ug sa iyang mga katawhan: nagtukod og sulundon nga katilingban diin walay timawa o kapintas. Isip mga katawhan sa Dios, nakigbahin kita niini nga tinguha. Nagtawag kita niini og pagtukod sa Zion, ug kini naglakip––agi og dugang sa pag-amuma sa kabus ug sa pagpalambo sa kalinaw––paghimo og mga pakigsaad, pag-uban og puyo diha sa pagkamatarung, ug pakighiusa sa usag usa ug ngadto ni Jesukristo, “ang Hari sa Zion” (Moises 7:53). Tungod kay ang buhat sa pagtukod sa Zion nagpadayon sa atong panahon, kini makatabang sa pagpangutana, Giunsa ni Enoch ug sa iyang mga katawhan sa pagbuhat niini? Giunsa nila paghimo ang “usa sa kasingkasing ug usa sa hunahuna” (Moises 7:18) bisan sa pagkadautan nga naglibut kanila? Taliwala sa daghang mga detalye ang Moises 7 naghatag kanato mahitungod sa Zion, usa ka ilabi ka bililhon alang sa mga Santos sa Ulahing mga Adlaw nga tingali mao kini: ang Zion dili lamang usa ka siyudad––kini usa ka kahimtang sa kasingkasing ug sa espiritu. Ang Zion, ingon nga gitudlo sa Ginoo, mao “ang putli og kasingkasing” (Doktrina ug mga Pakigsaad 97:21). Busa tingali ang labing maayo nga paagi sa pagtukod sa Zion mao ang pagsugod diha sa atong mga kasingkasing ug mga panimalay.
Mga Ideya alang sa Personal nga Pagtuon sa Kasulatan
Ang mga paningkamot ni Enoch mga sumbanan alang sa pagtukod sa Zion diha sa atong mga kinabuhi.
Tungod kay ang Moises 7 usa ka rekord kon giunsa sa mga sumusunod sa Dios pagtukod nga malampuson ang Zion, kini makatudlo ug makadasig kanato karon samtang kita maninguha sa pagbuhat og sama. Hunahunaa ang paggamit og usa ka talaan sama niini sa pagrekord sa unsay imong nakat-unan mahitungod sa Zion gikan sa Moises 7:16–21, 27, 53, 62–69.
|
Bersikulo |
Unsay imong nakat-unan mahitungod sa Zion? |
Unsa ang gisugyot niini mahitungod sa imong mga paningkamot sa pagtukod og Zion? |
|---|---|---|
Bersikulo | Unsay imong nakat-unan mahitungod sa Zion? Ang mga katawhan sa Zion “usa sa kasingkasing ug usa sa hunahuna.” | Unsa ang gisugyot niini mahitungod sa imong mga paningkamot sa pagtukod og Zion? Gikinahanglan nato nga maghiusa isip mga pamilya ug isip usa ka Simbahan. |
Bersikulo | Unsay imong nakat-unan mahitungod sa Zion? “Sa pagpadayon sa panahon, ang [Zion] gidala ngadto sa langit.” | Unsa ang gisugyot niini mahitungod sa imong mga paningkamot sa pagtukod og Zion? Ang pagtukod sa Zion usa ka inanay nga proseso. |
Bersikulo | Unsay imong nakat-unan mahitungod sa Zion? | Unsa ang gisugyot niini mahitungod sa imong mga paningkamot sa pagtukod og Zion? |
Bersikulo | Unsay imong nakat-unan mahitungod sa Zion? | Unsa ang gisugyot niini mahitungod sa imong mga paningkamot sa pagtukod og Zion? |
Ang mga katawhan sa Dios kinahanglan nga maninguha nga mahimong “usa sa kasingkasing ug usa sa hunahuna.”
Moises 7:18–19 naglista sa importanting mga kinaiya sa mga katawhan kinsa gitawag sa Ginoo og Zion. Ngano kahang kini nga mga kinaiya gikinahanglan sa pagtukod sa Zion? Sa unsa nga paagi ang Zion, ingon nga gihulagway dinhi niini nga kapitulo, lahi gikan sa uban nga nagkahiusang mga grupo o mga organisasyon sa kalibutan? Samtang ikaw namalandong niini nga pangutana, mahimo nimong hunahunaon kining mga pulong ni Jesukristo sa bersikulo 53: “Ako mao ang Mesiyas, ang Hari sa Zion.” Unsa ang gipasabut nga magbaton ni Jesukristo isip atong Hari? Sa unsa nga paagi Siya nagtabang kanato sa pagpalambo sa mga kinaiya sa Zion?
Tan-awa usab sa Mga Taga-Filipos 2:1–5; 4 Nephi 1:15–18; Doktrina ug mga Pakigsaad 97:21; 105:5.
Kinahanglan kitang maninguha nga mahimong “usa sa kasingkasing ug usa sa hunahuna” (Moises 7:18).
Unsa ang nahitabo sa siyudad ni Enoch?
Ang mga hugpong sa mga pulong “gidala ngadto” (Moises 7:21, 23), “gibayaw” (Moises 7:24), “gidala” (Moises 7:27), ug “nawala” (Moises 7:69) nagpasabut ngadto sa Zion ug sa mga katawhan ni Enoch nga nabalhin sa pagkahimaya ug gidala ngadto sa langit. Ang mga tawo kinsa nabalhin sa pagkahimaya “giusab aron dili makasinati og sakit o kamatayon” sama sa mga mortal (Giya ngadto sa mga Kasulatan, “Nabalhin sa Pagkahimaya nga mga Binuhat,” “Zion,” scriptures.ChurchofJesusChrist.org; tan-awa usab sa 3 Nephi 28:4–9, 15–18, 39–40).
Naghilak ang Dios tungod sa Iyang mga anak.
Ang ubang mga katawhan nagtan-aw sa Dios isip usa ka layo nga binuhat kinsa dili mobati sa unsay mahitabo kanato. Apan nakakita si Enoch og usa ka panan-awon diin ang Dios mihilak tungod sa Iyang mga anak. Samtang ikaw nagbasa sa Moises 7:28–40, pangitaa ang mga rason nga mihilak ang Dios. Sa nahibilin sa panan-awon ni Enoch, nga gihulagway sa Moises 7:41–69, unsa nga ebidensya ang imong makaplagan nga ang Dios “maloloy-on ug mabination hangtud sa hangtud”? (Moises 7:30; tan-awa sa mga bersikulo 43, 47, ug 62 alang sa mga ehemplo).
Sa katapusan nga mga adlaw ang Dios mopundok sa Iyang pinili.
Bersikulo 62 naghulagway sa mga hitabo sa katapusang mga adlaw. Hunahunaa unsa nga mga hugpong sa mga pulong sama niini mahimong nangahulugan og: “pagkamatarung Ako mopakanaog gikan sa langit,” “kamatuoran ako mopadala gikan sa yuta,” “pagkamatarung ug kamatuoran Ako mosugo nga mosilhig sa yuta ingon sa usa ka lunop.” Unsa ang gitudlo niining mga hugpong sa mga pulong mahitungod sa buhat sa Dios sa ulahing mga adlaw?
Mga Ideya alang sa Pamilya nga Pagtuon sa Kasulatan ug Family Home Evening
-
Moises 7:18–19.Aron sa pagtabang sa mga sakop sa pamilya sa paghanduraw unsa ang kahulugan sa mahimong “usa sa kasingkasing,” tingali makahimo ka og kasingkasing nga papel ug guntinga kini ngadto sa mga piraso sa puzzle, igo sa matag sakop sa pamilya sa pag-angkon og usa ka piraso. Ang mga sakop sa pamilya makasulat sa ilang ngalan diha sa ilang piraso dayon magdungan sa pagbutang og tingub sa kasingkasing. Samtang nagkompleto sa puzzle mahimo kang mosulti mahitungod sa mga butang nga imong nagustuhan mahitungod sa matag usa nga sakop sa pamilya.
-
Moises 7:28–31, 35.Unsa ang atong makat-unan mahitungod sa Dios gikan niini nga mga bersikulo?
-
Moises 7:32.Ngano nga ang Dios mihatag kanato og kabubut-on? Unsa kaha ang atong isulti ngadto sa usa ka tawo kinsa mibati nga ang mga sugo sa Dios nagpugong sa atong kabubut-on? Ang pagbasa sa 2 Nephi 2:25–27 mahimong modugang ngadto niini nga panaghisgot.
-
Moises 7:59–67.Samtang ang imong pamilya nagbasa sa Moises 7:59–67, sulayi ang pagmarka o pagsulat sa mga butang nga gisulti sa Ginoo ni Enoch mahitungod sa katapusang mga adlaw––sama pananglit, nga ang Dios “mopundok sa [Iyang] pinili” (bersikulo 62) ug nga adunay “dako nga mga kalisdanan taliwala sa mga dautan” (verse 66). Unsaon nato pagbaton og hugot nga pagtuo ug paglaum bisan pa sa kadautan sa katapusang mga adlaw? Isip kabahin niini nga panaghisgot, hunahunaa ang pagbasa niini nga mga pulong gikan ni Elder Ronald A. Rasband: “Ayaw pagkawala og paglaum, mga kaigsoonan. Oo, nagpuyo kita sa malisud nga panahon, apan kon kita magpabilin sa dalan sa pakigsaad, dili kita kinahanglan nga mabalaka. Mopanalangin ako kaninyo nga samtang inyo kining buhaton, dili kamo mabalaka sa mga panahon diin kita nagpuyo o sa mga kabalaka nga moabut sa inyong dalan. Mopanalangin ako kaninyo nga mopili nga mobarug sa balaan nga mga dapit ug dili matarug. Mopanalangin ako kaninyo nga motuo sa mga saad ni Jesukristo, nga Siya buhi, ug nga Siya nagtan-aw kanato, nag-atiman kanato ug nagbarug tupad kanato” (“Ayaw Kabalaka,” Liahona, Nob. 2018, 21).
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Gisugyot nga awit: “Gugma sa Panimalay,” Mga Himno, nu. 184.
Pagpalambo sa Atong Pagtudlo
Pagmapaniiron. Samtang ikaw naghatag og pagtagad ngadto sa unsay nahitabo sa mga kinabuhi sa imong mga anak, makakaplag ka og labing maayo nga mga oportunidad sa pagtudlo. Ang mga komentaryo ug mga pangutana sa imong mga anak sa tibuok adlaw makasignal usab og posible nga mga kahigayunan sa pagtudlo. (Tan-awa sa Pagtudlo sumala sa Pamaagi sa Manluluwas, 16.)
City of Zion Translated [Dakbayan sa Zion Nabalhin sa Pagkahimaya], ni Del Parson