Maghigugmaay, ni Emma Donaldson Taylor

Enero 24–30

Moises 7

“Ang Ginoo Mitawag sa Iyang mga Katawhan og Zion”

Sugdi ang imong pagpangandam pinaagi sa pagbasa sa Moises 7. Ang Dali, Sunod Kanako—Alang sa mga Indibidwal ug mga Pamilya makatabang kanimo nga makasabut niini nga kapitulo, ug ang mga ideya diha sa ubos makahatag kanimo og mga ideya kon unsaon sa pagtudlo niini ngadto sa mga bata.

Irekord ang Imong mga Impresyon

Dapita ang Pagpaambit

Gahini og pipila ka minutos ang pagparibyu sa mga bata uban nimo sa kon unsay ilang nahibaloan mahitungod sa propeta nga si Enoch—lakip sa bisan unsay ilang nakat-unan diha sa miaging semana nga leksyon. Kon makatabang, pagpakita og usa ka litrato gikan sa outline karong semanaha diha sa Dali Sunod Kanako—Alang sa mga Indibidwal ug mga Pamilya.

Itudlo ang Doktrina: Mas Gagmay nga mga Bata

Moises 7:18

Gusto sa Dios nga maghigugmaay kita.

Kini nga mga bersikulo naghulagway sa kinaiya sa mga tawo sa Zion. Unsaon nimo sa pagtabang ang mga bata aron makasugod sa pagpalambo niini nga mga kinaiya?

Posible nga mga Kalihokan

• Ipaambit ang istorya bahin ni Enoch gikan sa “Enoch” (nga anaa sa Mga Istorya sa Daang Tugon), o ipasugilon sa mga bata ang istorya sa kaugalingon nilang mga pulong gamit ang litrato ni Enoch diha sa outline karong semanaha diha sa Dali, Sunod Kanako—Alang sa mga Indibidwal ug mga Pamilya. Pwede usab nimo nga kantahon uban sa mga bata ang ikaduhang bersikulo sa “Sunda ang Propeta” (Songbook sa mga Bata, 58-59) sa pagribyu sa istorya.

• Tabangi ang mga bata sa paghunahuna og mga aksyon nga may kalabutan sa mga pulong nga “usa sa kasingkasing ug usa sa hunahuna” (Moises 7:18). Ipasabut nga kini nga mga pulong nagpasabut nga ang katawhan ni Enoch nahigugma ug nagmabination sa usag usa. Dapita sila sa paggamit niini nga pahina sa kalihokan karong semanaha sa pagdrowing og usa ka paagi nga sila makapakita og gugma.

• Kantaha ang usa ka awit mahitungod sa paghigugma sa usag usa, sama sa “Gugma sa Panimalay” (Mga Himno nu. 184). Pagdala og mga litrato nga naghulagway sa mahinungdanong mga pulong nga anaa sa kanta aron matabangan ang mga bata sa pagkat-on sa mga pulong. Hangyoa ang mga bata sa pagpaambit og mga paagi nga sila makapakita og gugma sa usag usa diha sa Primary ug sa ilang mga panimalay. Dayon ipabuhat nila ang ilang mga ideya.

Maningkamot gayud kita nga mahimong “usa sa kasingkasing ug usa sa hunahuna” (Moises 7:18).

Moises 7:28–33

Ang Dios nagpakabana mahitungod sa Iyang mga anak.

Matabangan nimo ang mga bata sa pagkat-on nga ang Langitnong Amahan ug si Jesukristo nagpakabana gayud kanato ug sa atong mga lihok.

Posible nga mga Kalihokan

• Tabangi ang mga bata sa paghunahuna og mga butang nga makapalipay sa Langitnong Amahan. Basaha ang Moises 7:28 uban sa mga bata, ug ipasabut nga ang Langitnong Amahan nagsubo tungod kay ang katawhan hilabihan kadautan (tan-awa sa mga bersikulo 32–33).

• Padrowinga ang mga bata og usa ka malipayong panagway diha sa usa ka kilid sa papel ug usa ka magul-anong panagway sa pikas kilid. Pagngalan og pipila ka maayong mga lihok, sama sa paglitok og usa ka pag-ampo, ug pipila ka negatibong mga ideya, sama sa pagpamakak, ug hangyoa ang mga bata sa pag-isa pataas sa malipayong panagway o magul-anong panagway aron sa pagpakita unsay bation sa Langitnong Amahan ug ni Jesukristo mahitungod sa matag pagpili.

• Dapita ang mga bata nga magdula og usa ka dula diin moaksyon sila og mga butang nga ilang mabuhat nga makalipay sa Langitnong Amahan. Hangyoa ang ubang mga bata sa pagtag-an unsay ilang gibuhat. Pagpaambit ngadto sa matag bata og mga butang nga nakita nimo ang ilang nabuhat nga makalipay sa Langitnong Amahan.

Moises 7:59–67

Si Jesus mobalik sa yuta.

Sa iyang panan-awon, nakita ni Enos ang ulahing mga adlaw, lakip ang Ikaduhang Pag-anhi sa Manluluwas. Unsaon nimo sa pagtabang ang mga bata aron madasig sa Ikaduhang Pag-anhi?

Posible nga mga Kalihokan

• Sultihi ang mga bata sa paghunahuna nga usa ka espesyal nga bisita paingon na nga mobisita kanila. Unsay ilang buhaton aron makaandam sa mao nga pagbisita? Ipaambit ang mga pulong sa Ginoo ngadto kang Enoch diha sa Moises 7:60: “Ako moabut sa katapusan nga mga adlaw.” Unsa ang ubang mga paagi nga kita makaandam alang sa pagbalik ni Jesus?

• Pagpakita og mga litrato sa mga panahon dihang ang Manluluwas mipakita sa katawhan (tan-awa sa Libro sa mga Hulagway sa Ebanghelyo, mga nu. 60, 82, 83, ug 84). Diha sa mga litrato unsay gibuhat sa mga tawo? Unsa kaha ang gibati sa mga tawo dihang nahimamat nila si Jesus? Tuguti ang mga bata sa pagpaambit unsa kahay ilang bation nga makakita ni Jesus kon Siya mobalik.

• Kantaha ang usa ka awit mahitungod sa Ikaduhang Pag-anhi sa Manluluwas, sama sa “Kon Siya Moanhi Pag-usab” (Songbook sa mga Bata, 46–47), ug pangutan-a ang mga bata unsa kaha ang mahitabo kon si Jesus mobalik.

Itudlo ang Doktrina: Mas Dagko nga mga Bata

Moises 7:18–21, 62–63, 68–69

Mahiusa kita sama sa katawhan sa Zion.

Samtang magbasa ka mahitungod sa Zion, pamalandungi ang mga ehemplo bahin sa panaghiusa nga imong nakita. Unsaon nimo sa pagtabang ang mga bata nga makakat-on aron mahiusa sama sa katawhan ni Enoch?

Posible nga mga Kalihokan

• Hangyoa ang mga bata sa pagpangita og mga pulong nga naghulagway sa katawhan ni Enoch, nga nahibaloan usab isip Zion, samtang magbasa sila sa Moises 7:18. Isulat kini nga mga pulong diha ibabaw sa pisara isip mga ulohan, ug dapita ang mga bata sa pagsulat, ubos sa matag ulohan, sa mga butang nga ilang mahimo aron mas mahisama sa katawhan ni Enoch. Human sila makapaambit, pangutan-a ang mga bata unsaon nila sa paghimo ang ilang mga panimalay nga mas parehas sa Zion. Tingali makakita sila og pipila ka mga ideya diha sa 4 Nephi 1:15–18.

• Hangyoa ang mga bata sa pag-ihap kon kapila ang pulong nga “Zion” makita diha sa Moises 7:18–21, 62–63, 68–69. Sa matag higayon nga motumaw ang maong pulong, tabangi ang mga bata sa pagpangita unsay gisulti sa bersikulo mahitungod sa Zion (tan-awa usab sa Ang Giya ngadto sa mga Kasulatan, “Zion,” scriptures.ChurchofJesusChrist.org). Sa unsang paagi kita mas mahisama sa katawhan nga gihulagway niini nga mga bersikulo?

• Gamita kini nga pahina sa kalihokan karong semanaha aron sa pagtabang sa mga bata nga makahunahuna og mga paagi nga sila mamahimong “usa sa kasingkasing ug usa sa hunahuna” (tan-awa sa Moises 7:18).

Moises 7:28–37

Ang Dios mibakho alang sa Iyang mga anak.

Unsaon nimo sa pagtabang ang mga bata sa pagdiskobre nga ang Dios nagpakabana kanato ug sa atong mga buhat?

Posible nga mga Kalihokan

• Pangutan-a ang mga bata unsa kaha ang hinungdan sa pagbakho sa Dios (tan-awa sa Moises 7:28–31). Dapita ang mga bata sa pagsiksik sa Moises 7:32–33, 37 alang sa mga tubag. Unsay gitudlo niini nga mga bersikulo mahitungod sa unsay mga pagbati sa Dios mahitungod sa iyang mga anak? Unsaon nato sa pagkahibalo nga ang Dios nahigugma kanato? Ipaambit ang imong pagpamatuod bahin sa gugma sa Dios kanato.

• Pag-itsa og bag nga dunay sulod nga mga lisong dulaan [bean bag] o bola ngadto sa usa ka bata. Hangyoa siya sa pagtiwas sa mga pulong nga “Makahimo ako sa paglipay sa Dios pinaagi sa …” ug dayon iitsa ang butang ngadto sa laing bata. Sublia hangtud malukop ang tanang bata.

Moises 7:60–67

Si Jesukristo moanhi pag-usab sa katapusang mga adlaw.

Samtang magbasa ka mahitungod sa Ikaduhang Pag-anhi diha sa Moises 7:60–67, hunahunaa unsaon sa pagtudlo ang mga bata mahitungod niini sa usa ka sadya nga paagi.

Posible nga mga Kalihokan

• Magdungan sa pagbasa sa Moises 7:60–67, ug tabangi ang mga bata sa pagpangita og mga butang nga gisulti sa Ginoo nga mahitabo sa katapusang mga adlaw. Pangutan-a sila kon asa niining mga hitaboa ang ilang gilantaw sa umaabut ug ngano.

• Dapita ang mga bata sa paghisgot mahitungod sa usa ka panahon sa dihang naghulat sila sa tawo nga mobisita o mouli sa panimalay. Unsay gibati sa mga bata? Unsay ilang gihimo aron maandam? Sa unsang paagi kita makaandam sa pagkakita ni Jesus pag-usab?

• Pagpakita og usa ka litrato sa Ikaduhang Pag-anhi sa Manluluwas (sama pananglit, tan-awa sa Libro sa mga Hulagway sa Ebanghelyo, nu. 66). Padrowinga ang mga bata og ilang kaugalingon bahin sa Ikaduhang Pag-anhi, base sa unsay ilang gibasa diha sa Moises 7:60–67.

Awhaga ang Pagkat-on diha sa Panimalay

Unsaon nimo sa pag-awhag ang mga bata ug ang ilang mga pamilya aron magpadayon sa pagkat-on gikan sa Daang Tugon diha sa panimalay? Sama pananglit, ang mga bata pwede nga mopaambit og butang nga ilang gidrowing o gikoloran diha sa Primary isip kabahin sa usa ka leksyon sa gabii sa panimalay [home evening].

Pagpalambo sa Atong Pagtudlo

Tabangi ang mga bata nga mahimong aktibo. “Samtang ikaw magtudlo sa mga bata, tuguti sila sa paghimo, pagdrowing, pagkolor, pagsulat, ug pagmugna. Kini nga mga butang dili lang makalingaw nga mga kalihokan—mahinungdanon kini sa pagkat-on” (Pagtudlo sumala sa Pamaagi sa Manluluwas, 25).