Si Adan ug si Eva, ni Douglas M. Fryer

Enero 10–16

Genesis 3–4; Moises 4–5

Ang Pagkapukan ni Adan ug ni Eva

Hunahunaa ang mahitungod sa mga bata nga imong gitudloan samtang magtuon ka sa Genesis 3–4 ug Moises 4–5. Bantayi ang mga pag-aghat ug mga impresyon nga imong nadawat; posible kining makahatag og bag-ong mga ideya sa pagtudlo.

Irekord ang Imong mga Impresyon

Dapita ang Pagpaambit

Pagpakita og litrato ni Adan ug ni Eva (tan-awa ang outline karong semanaha diha sa Dali Sunod Kanako—Alang sa mga Indibidwal ug mga Pamilya), ug hangyoa ang mga bata sa pagbarug ug pagpaambit og butang nga ilang nakita diha sa litrato o nahinumduman mahitungod sa istorya.

Itudlo ang Doktrina: Mas Gagmay nga mga Bata

Genesis 3; Moises 4

Si Adan ug si Eva misunod sa plano sa Langitnong Amahan.

Tabangi ang mga bata nga makasabut unsay nahitabo sa Tanaman sa Eden ug kon sa unsang paagi kini nakatabang nga matuman ang plano sa kaluwasan. Unsang mga panalangin ang ania kanato tungod sa mga pagpili nga gihimo ni Adan ug ni Eva?

Posible nga mga Kalihokan

• Sa pag-summarize sa istorya mahitungod sa Pagkapukan ni Adan ug ni Eva, gamita ang “Adan ug si Eva” (nga anaa sa Mga Istorya sa Daang Tugon). Tabangi ang mga bata nga makasabut nga ang pagpili ni Adan ug ni Eva sa pagkaon sa bunga usa ka bahin sa plano sa Langitnong Amahan.

• Hatagi ang matag bata og litrato nga nagrepresentar og butang gikan sa istorya ni Adan ug ni Eva (sama sa usa ka kahoy, bitin, tanaman, o Jesukristo). Hangyoa sila sa pag-isa pataas sa litrato sa eksaktong panahon samtang isugilon nimo ang istorya ug mobasa og mga pulong gikan sa Moises 4. Kini nga pahina sa kalihokan karong semanaha tingali makatabang.

  

  Mibiya sa Eden, ni Annie Henrie Nader

Moises 4:1–4

Makapili ako sa husto.

Sa Moises 4:3, atong makat-unan nga si Satanas “nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya.” Unsaon nimo pagtabang ang mga bata aron makapasalamat sa katakus sa pagpili tali sa husto ug sa sayop?

Posible nga mga Kalihokan

• Istoryahi ang mga bata mahitungod sa pipila ka mga pagpili nga imong gihimo karon, ug tabangi sila sa paghunahuna mahitungod sa mga pagpili nga ilang gihimo. Basaha ngadto kanila gikan sa Moises 4:3: “Sa kabubut-on sa tawo, diin Ako, ang Ginoong Dios, mihatag ngadto kaniya.” Ipasabut nga kini nga mga bersikulo nagtudlo kanato nga ang Dios mihatag kanato og katakus sa paghimo og mga pagpili. Ipahayag ang imong pasalamat nga ikaw makapili sa husto, ug ipamatuod nga ang mga bata usab makapili sa paghimo unsay husto.

• Pagpaambit og pipila ka sayon nga mga ehemplo sa usa ka bata nga naghimo og husto nga pagpili o sayop nga pagpili, ug hangyoa ang mga bata sa pagpakita kon ang pagpili husto ba o sayop (pwede silang mobarug, moisa pataas sa mga timailhan, o moisa sa ilang mga kamot). Ihatag ang imong pagpamatuod nga ang Langitnong Amahan motabang kanato sa pagpili sa husto, ug dapita ang mga bata sa pagpaambit usab sa ilang mga pagbati.

• Tabangi ang mga bata sa paghunahuna sa maayong mga pagpili nga pwede nilang buhaton sa pagsunod kang Jesukristo. Kantaha og dungan ang awit mahitungod sa paghimo og maayong mga pagpili, sama sa “Pilia ang Matarung nga Paagi” (Songbook sa mga Bata, 82–83). Sultihi ang mga bata mahitungod sa usa ka panahon sa dihang mihimo ka og maayong pagpili, ug hisguti unsay imong gibati tungod sa imong pagpili.

Moises 5:4, 8

Makaampo ako sa Langitnong Amahan.

Unsay angay mahibaloan sa mga bata nga imong gitudloan mahitungod sa pag-ampo? Unsay imong nakita dinhi niini nga mga bersikulo nga makatabang kanila?

Posible nga mga Kalihokan

• Basaha ang Moises 5:4 ngadto sa mga bata. Tabangi sila nga makasabut nga sa dihang si Adan ug si Eva mibiya sa Tanaman sa Eden, dili na nila makauban ang Langitnong Amahan, apan makaampo sila Kaniya. Ipasabut nga kita makaampo sa Langitnong Amahan pinaagi sa ngalan sa Iyang Anak, si Jesukristo (tan-awa sa Moises 5:8). Unsa ang pipila ka mga butang nga atong masulti ngadto Langitnong Amahan diha sa atong mga pag-ampo?

• Hangyoa ang mga bata sa pagpakita og mga aksyon diha kanimo nga ilang buhaton kon sila mag-ampo. Pwede usab nga mopakita ka og litrato sa usa ka tawo nga nag-ampo (tan-awa sa Libro sa mga Hulagway sa Ebanghelyo, mga nu. 111–12) sa pagtudlo sa mga bata nga ang pagduko sa atong mga ulo, pagkiyugpos sa atong mga kamot, ug pagpiyong sa atong mga mata makatabang kanato sa pagpakita og balaang pagtahud kon kita mag-ampo.

• Pagpaambit og personal nga kasinatian bahin sa pag-ampo o sa imong pagpamatuod bahin sa pag-ampo. Kantaha uban sa mga bata ang awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6-7).

Itudlo ang Doktrina: Mas Dagko nga mga Bata

Genesis 3; Moises 4; 5:10–11

Ang Pagkapukan ni Adan ug ni Eva usa ka bahin sa plano sa Dios.

Kon si Adan ug si Eva nagpabilin pa sa Tanaman sa Eden, wala unta silay mga anak ug wala unta molambo aron mahimong sama sa Langitnong Amahan. Mapasalamaton kita sa ilang pagpili nga mokaon sa bunga tungod kay kini nga pagpili naghimong posible sa atong mortal nga kinabuhi ug sa atong oportunidad alang sa kinabuhing dayon.

Posible nga mga Kalihokan

• Dapita ang mga bata nga magtinabangay sa pagsugilon sa istorya mahitungod sa Pagkapukan ni Adan ug ni Eva sa kaugalingon nilang mga pulong. Ipaambit ang mga bersikulo gikan sa Genesis 3 sa pagtabang kanila.

• Tabangi ang mga bata sa pagpangita diha sa Moises 4:22–25, 29; 5:10–11 sa mga sangputanan sa pagkaon ni Adan ug ni Eva sa bunga (tan-awa usab sa 2 Nephi 2:19–25). Nganong ang ilang pagpili usa ka panalangin kanato? Sa unsang paagi nga ang Manluluwas mitabang kanato sa pagbuntog sa sala ug kamatayon?

Moises 4:1–4

Aduna akoy gahum sa pagpili.

Ang mga bata ba nga imong gitudloan nakamatikod kon unsa ka dakong gasa ang makahimo sa pagpili tali sa husto ug sayop? Sa unsang paagi ang istorya bahin ni Adan ug ni Eva nakatabang kanila sa pagpasalamat niini nga gasa?

Posible nga mga Kalihokan

• Paghunahuna og usa ka sayon nga leksyon nga maggamit o magpakita og butang [object lesson] sama sa mosunod aron sa paghulagway sa kaimportante sa paghimo og kaugalingon natong mga pagpili: Dapita ang mga bata sa pagkolor niini nga pahina sa kalihokan karong semanaha, apan hatagi lang sila og usa ka kolor nga magamit. Nganong mas maayo man kaha ang adunay mga kapilian sa ingon niini nga sitwasyon? Magdungan sa pagbasa sa Moises 4:1–4 sa paghisgot kon nganong ang mga pagpili importante sa plano sa Dios.

• Dapita ang mga bata sa pagpaambit og personal nga kasinatian sa dihang kinahanglan sila nga mopili tali sa husto ug sayop. Tuguti sila nga maghisgot sa posibling mga sangputanan sa matag pagpili.

Moises 5:4–15

Tungod kang Jesukristo, ako makahinulsol ug makapuyo og balik sa Dios.

Ang Langitnong Amahan mipadala kang Jesukristo sa pagluwas kanato gikan sa mga sangputanan sa Pagkapukan. Pinaagi sa Iyang makatubos nga sakripisyo, gihimong posible ni Jesus nga kita mabanhaw human kita mamatay ug mapasaylo sa atong mga sala kon kita maghinulsol.

Posible nga mga Kalihokan

• Pagsulat og duha ka ulohan diha sa pisara: Tungod ni Adan ug ni Eva ug Tungod ni Jesukristo. Tabangi ang mga bata sa pag-ila sa mga sangputanan sa Pagkapukan samtang magdungan kamo sa pagbasa sa Moises 4:25; 6:48; Mga Taga-Roma 5:12; 2 Nephi 2:22–23. Ipasulat nila unsay ilang nakat-unan ubos niini nga ulohan. Dayon tabangi sila sa pag-ila kon sa unsang paagi si Jesukristo mibuntog sa sala ug kamatayon samtang magdungan kamo sa pagbasa sa Moises 5:8–11, 14–15; 6:59; Alma 11:42. Pasulata sila unsay ilang nakat-unan ubos sa ikaduhang ulohan [second title]. Nganong mapasalamaton man kita tungod ni Jesukristo?

• Pagpasalida og video mahitungod sa Pag-ula sa Manluluwas, sama sa “Tungod Kaniya” (ChurchofJesusChrist.org). Dapita ang mga bata sa pagpaambit kon unsay ilang gibati mahitungod ni Jesukristo.

• Pipila ka adlaw sa dili pa moabut, hangyoa ang pipila ka bata sa pagpili og usa ka kasulatan o awit mahitungod sa Pag-ula sa Manluluwas nga ipaambit diha sa klase. Awhaga sila sa paghisgot nganong ganahan sila niini. Kantaha ang usa o mas daghang mga awit nga magdungan.

Awhaga ang Pagkat-on diha sa Panimalay

Dapita ang mga bata sa pagpaambit niini nga pahina sa kalihokan karong semanaha uban sa ilang mga pamilya ug hisguti ang mahitungod sa mga panalangin nga ania kanato tungod sa Pagkapukan ni Adan ug ni Eva.

Pagpalambo sa Atong Pagtudlo

Pagtinguha og imong kaugalingon nga inspirasyon. Ayaw og hunahunaa kini nga mga outline sa leksyon isip mga instruksyon nga kinahanglan gayud nimong sundon samtang magtudlo ka. Kondili, gamita kini isip tinubdan sa mga ideya aron sa pagdasig sa imong kaugalingong inspirasyon samtang mamalandong ka sa mga panginahanglan sa mga bata nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)