Enero 3–9

Genesis 1–2; Moises 2–3; Abraham 4–5

“Sa Sinugdan Gibuhat sa Dios ang mga Langit ug ang Yuta”

Samtang magtuon ka sa Genesis 1–2, Moises 2–3, ug Abraham 4–5, hunahunaa ang mahitungod sa mga bata nga imong gitudloan, ug pamalandungi unsa nga mga kamatuoran ang imong ikatabang kanila nga masabtan gikan niini nga mga kapitulo.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit og usa ka butang nga gilalang sa Langitnong Amahan ug ni Jesukristo nga sila mapasalamaton. Ang pagpakita og mga litrato gikan sa outline karong semanaha sa Dali, Sunod Kanako—Alang sa mga Indibidwal ug mga Pamilya makahatag kanila og mga ideya.

Itudlo ang Doktrina: Mas Gagmay nga mga Bata

Moises 2

Si Jesus milalang sa yuta.

Ang pagkahibalo mahitungod sa Paglalang makatabang sa mga bata nga mobati sa gugma sa Dios ug molambo ang ilang pagpasalamat sa kalibutan. Unsaon nimo sa paghimo nga ang pagkat-on mahitungod sa Paglalang makadasig?

Posible nga mga Kalihokan

• Pagpakita sa mga bata og mga litrato nga nagrepresentar sa managlahing kapanahunan sa Paglalang (sigun sa gihulagway diha sa Moises 2; tan-awa usab ang “Jesus Nagbuhat sa Kalibutan,” diha sa Mga Istorya sa Daang Tugon), ug tabangi ang mga bata sa paghunahuna og mga aksyon nga haum sa mga litrato. Sama pananglit, pwede nilang ikumo ang ilang kamot sa pagrepresentar sa uga nga yuta o iwara-wara ang ilang mga kamot sama sa mga balud sa tubig (tan-awa sa Moises 2:9–10). Ipaambit ang imong pagpamatuod nga si Jesukristo mihimo niining mga butanga tungod kay Siya ug ang Langitnong Amahan nahigugma kanato.

• Kantaha ang usa ka awit mahitungod sa mga butang nga gilalang ni Jesukristo, sama sa “Mahimayaon ug Matahum ang Kalibutan” (Songbook sa mga Bata, 122). Hangyoa ang mga bata sa pagdrowing og mga litrato sa mga gipanglalang nga gihulagway diha sa kanta.

  

  Paglalang, ni Joan Hibbert Durtschi

Moises 2:26–27

Gilalang ako diha sa hitsura sa Dios.

Kon ang mga bata makasabut nga gilalang sila diha sa hitsura sa Dios, mapalambo nila ang pagbati sa balaang pagtahud ug pagrespeto sa ilang kaugalingon ug sa ubang lawas.

Posible nga mga Kalihokan

• Tabangi ang mga bata sa pagsulti og balik sa makadaghang higayon sa “Ako, ang Dios, milalang og tawo diha sa akong kaugalingon nga hitsura” (Moises 2:27). Ipasabut nga ang Langitnong Amahan milalang sa atong mga lawas nga sama sa Iyang lawas. Dapita ang mga bata nga itudlo ang mga bahin sa ilang lawas samtang nganlan nimo kini, o mokanta og usa ka awit mahitungod sa atong mga lawas, sama sa “Ulo, Abaga, Tuhod ug Tiil” (Songbook sa mga Bata, 129).

• Dapita ang mga bata nga i-aksyon ang mga butang nga pwede nilang buhaton sa ilang mga lawas, samtang ang ubang mga bata motag-an unsay ilang gihimo. Dapita ang mga bata sa pagpaambit nganong mapasalamaton sila sa ilang mga lawas.

• Pagdrowing og usa ka porma [outline] sa usa ka lawas diha sa papel, ug paghimo og puzzle pinaagi sa paggunting-gunting niini aron mabahin-bahin. Ipasa ang mga ginunting, ug patabangi sa mga bata ang pagporma og balik sa usa ka lawas. Hangyoa ang mga bata sa pagpaambit sa mga butang nga pwede nilang buhaton diha sa matag bahin. Ipaambit ang imong pagpamatuod nga ang atong mga lawas gilalang diha sa hitsura sa Dios.

Moises 3:2–3

Ang adlaw nga Igpapahulay balaan.

Ang mga bata kinsa makapalambo og kinaiya sa pagbalaan sa adlaw nga Igpapahulay samtang batan-on pa sila malagmit nga motuman niini nga sugo kon mas magkadaghan ug mas magkalisud na unya ang mga buluhaton sa kinabuhi.

Posible nga mga Kalihokan

• Basaha ang Moises 3:2–3, ug hangyoa ang mga bata sa pagpaminaw kon unsay gibuhat sa Dios sa ikapito nga adlaw. Pagdala og mga litrato (o paghimo og sayon nga mga drowing) sa mga butang nga buhaton nato sa adlawng Dominggo aron sa paghimo niini nga usa ka adlaw nga balaan ug sa mga butang nga atong buhaton sa laing mga adlaw. Ipabahin sa mga bata ang mga litrato ngadto sa duha ka hut-ong, ang usa para sa Dominggo ug ang usa alang sa laing mga adlaw. Ipamatuod kon nganong importante ang pagbalaan sa adlaw nga Igpapahulay.

• Pipila ka adlaw sa dili pa magklase, dapita ang usa sa mga bata ug ang iyang mga ginikanan sa pag-anha nga andam nga mopaambit sa mga butang nga ilang buhaton sa ilang pamilya aron sa pagbalaan sa adlaw nga Igpapahulay. Dapita ang ubang mga bata sa pagpaambit unsay buhaton sa ilang mga pamilya.

Itudlo ang Doktrina: Mas Dagko nga mga Bata

Moises 2

Si Jesukristo milalang sa yuta ubos sa pagdumala sa Langitnong Amahan.

Pwede nimong gamiton ang Moises 2 sa pagtabang aron makita sa mga bata nga ang kalibutan gilalang uban sa katuyoan isip kabahin sa plano sa Dios. Samtang magbasa ka niini nga mga kapitulo, unsa nga mga ideya ang moabut sa imong hunahuna nga makatabang sa paglig-on sa mga pagpamatuod sa mga bata mahitungod sa Paglalang?

Posible nga mga Kalihokan

• Tabangi ang mga bata sa paghunahuna og mga panahon dihang mihimo sila og butang pinaagi sa pagsunod sa mga direksyon sa laing tawo. Sama pananglit, tingali mihimo sila og usa ka resipe nga adunay usa ka ginikanan o igsoon nga naggiya kanila. Isulat ang Kinsa ang milalang sa yuta? diha sa pisara, ug dapita ang mga bata sa pagpangita sa tubag diha sa Moises 2:1. Ipamatuod nga si Jesukristo milalang sa yuta ubos sa pagdumala sa Langitnong Amahan.

• I-assign ang mga bata og mga bersikulo diha sa Moises 2 nga may kalabutan sa usa sa mga adlaw sa paglalang, ug hangyoa siya sa pagdrowing og usa ka litrato sa mga butang nga gilalang sa Langitnong Amahan ug ni Jesus nianang adlawa. Hangyoa ang mga bata sa paggunit sa ilang gidrowing nga mga litrato ug mobarug subay sa pagkasunod-sunod nga mga adlaw sa Paglalang, ug dayon dapita ang matag bata sa pagtudlo sa nahibiling uban pang mga bata kon unsay nahitabo sa adlaw nga gi-assign diha nila. Unsa may atong makat-unan mahitungod sa Langitnong Amahan ug ni Jesukristo gikan sa istorya bahin sa Paglalang?

Moises 2:26–27

Si Adan ug si Eva gilalang diha sa hitsura sa Dios.

Ang kalibutan mohatag sa mga bata og daghang sayop nga mga mensahe mahitungod sa ilang mga lawas. Ang doktrina diha sa Moises 2:26–27 usa ka impluwensyal nga pangdasig alang sa pagrespeto ug pag-atiman sa atong mga lawas.

Posible nga mga Kalihokan

• Magdungan sa pagbasa sa Moises 2:26–27. Unsa ang gitudlo niini nga mga bersikulo mahitungod sa atong mga lawas? Idula ang usa ka dula nga “Ang Inyong Lawas Usa ka Templo” (Liahona, Ago. 2019, 65). Mahimo usab ninyo nga basahon og dungan ang may kalabutan nga mga kinutlo gikan sa mensahe ni Presidente Russell M. Nelson sa “Ang Inyong Lawas: Usa ka Talagsaong Gasa nga Angay Mahalon” (Liahona, Ago. 2019, 50–55) nga makatabang sa mga kabataan nga mobati og pagkamapasalamaton ngadto sa Langitnong Amahan alang sa ilang mga lawas.

• Pagdrowing og usa ka porma sa lawas diha sa pisara, ug dapita ang mga bata sa pagpili og usa ka bahin sa lawas ug isulat sa tupad niini nganong sila mapasalamaton niini. Ipahayag ang imong pasalamat sa imong lawas, ug ipamatuod nga kita gilalang diha sa hitsura sa Dios.

Genesis 2:2–3

Ang adlaw nga Igpapahulay balaan.

Tingali ang mga bata kinahanglang mopasabut ngadto sa ilang mga higala nganong lahi ang ilang pagtagad sa adlawng Dominggo gikan sa ubang mga adlaw. Ang Genesis 2:2–3 nagtudlo ngano nga ang adlawng Igpapahulay usa ka adlaw nga balaan. Unsay imong mahimo sa pagtabang sa mga bata aron mas makasabut ug mapasabut kini nga doktrina?

Posible nga mga Kalihokan

• Sa unsang paagi nga ang pagbalaan sa adlaw nga Igpapahulay magpakita sa atong gugma ug pagrespeto sa Langitnong Amahan ug ni Jesukristo? Tabangi ang mga bata sa pagdrama-drama sa mga sitwasyon diin mopasabut sila ngadto sa usa ka higala nganong sila mipili sa paghimo og mga butang sa adlawng Dominggo nga nagtahud sa Langitnong Amahan ug ni Jesus. Isugyot nga ilang gamiton ang Genesis 2:2–3 diha sa ilang mga pagpasabut.

• Hatagi ang mga bata og pipila ka minutos sa pagsulat og usa ka lista sa daghang butang kutob sa ilang mahunahunaan nga sila makahimong balaan sa adlawng Igpapahulay. Dapita ang mga bata sa pagpaambit sa ilang mga gilista, ug awhaga sila sa pagdugang diha sa ilang mga lista samtang magpaambit ang uban sa ilang mga gisugyot nga wala nila mahunahunai. Isugyot nga ang mga bata modala sa mga lista ngadto sa ilang mga panimalay ug motan-aw niini kon nagkinahanglan sila og mga ideya sa maayong mga butang nga buhaton sa Igpapahulay.

Awhaga ang Pagkat-on diha sa Panimalay

Tabangi ang mga bata sa paghunahuna kon unsaon nila sa paghimo og kalihokan uban sa ilang mga pamilya nga susama sa imong gihimo sa klase. Basin pwede nimo silang tabangan sa paghimo og mubo nga sulat sa pagpahinumdom sa ilang kaugalingon.

Pagpalambo sa Atong Pagtudlo

Tabangi ang mga bata nga makapahayag sa ilang pagkamamugnaon. Kon ang mga bata magbuhat, magdrowing, o magkolor og usa ka butang nga may kalabutan sa istorya o baruganan nga ilang gikat-unan, kasagaran mas mahinumduman nila kini. Awhaga sila sa paggamit sa ilang mga minugna sa pagtudlo sa ilang pamilya. (Tan-awa sa Pagtudlo sumala sa Pamaagi sa Manluluwas, 25.)