Disyembre 27–Enero 2

Moises 1; Abraham 3

“Mao Kini ang Akong Buhat ug ang Akong Himaya”

Samtang magbasa ka sa unsay gisulti sa Dios ngadto kang Moises ug kang Abraham, hunahunaa kon unsa kahay Iyang isulti ngadto sa mga bata nga imong gitudloan. Unsaon nimo sila sa pagtabang aron mobati sila sa Iyang gugma alang kanila?

Irekord ang Imong mga Impresyon

Dapita ang Pagpaambit

Usahay ang kanta makatabang sa mga bata nga mahinumdom unsay ilang nakat-unan. Pagpatukar o pagkanta nga magkium ang ba-ba [hum] og pipila ka mga nota sa “Ako Anak sa Dios” (Songbook sa mga Bata, 2–3), ug ipatag-an sa mga bata ang kanta. Tabangi ang mga bata sa paghunahuna og mga paagi diin ang ilang mga ginikanan ug ang uban “miagak [kanila], mitudlo [kanila],” ug “mitabang [kanila] kon unsay buhaton.”

Itudlo ang Doktrina: Mas Gagmay nga mga Bata

Moises 1:1–4, 6

Ako anak sa Dios.

Unsay imong nakat-unan gikan sa Moises 1:1–4, 6 mahitungod sa imong relasyon sa Langitnong Amahan? Unsaon nimo sa pagtabang ang mga bata nga makat-on unsay ipasabut sa pagkahimong anak sa Dios?

Posible nga mga Kalihokan

• Basaha ngadto sa mga bata unsay giingon sa Dios ngadto kang Moises: “Ikaw mao ang akong anak” (Moises 1:4). Pagdapit og usa ka bata sa pag-adto sa atubangan, ug hangyoa ang mga bata sa pagsubli og sulti dungan nimo, “[Ngalan sa bata], ikaw anak sa Dios.” Sublia ang hugpong sa mga pulong [phrase] alang sa matag bata diha sa klase.

• Pagpakita og ubay-ubay nga mga litrato sa mga bata, ug pangutan-a ang mga bata kon kining tanang mga bataa mga anak ba sa Dios. Ipasabut pag-ayo nga ang matag usa anak sa Dios. Papuli-puliha ang mga bata sa pagpanamin, ug sa pagpamatuod nga sila mga anak usab sa Dios.

• Kantaha ang “Ako Anak sa Dios” (Songbook sa mga Bata, 2–3) dungan sa mga bata. Pakolori nila kini nga pahina sa kalihokan karong semanaha, ug gamita kini sa pagribyu sa mga kamatuoran nga gitudlo niini nga awit.

  

  Si Kristo ug ang Paglalang, ni Robert T. Barrett

Abraham 3:22–28

Nagpuyo ako kauban sa Langitnong Amahan sa wala pa ko matawo.

Ang pagkahibalo mahitungod sa atong premortal nga kinabuhi makadasig kanato sa paghimo og mga pagpili base sa mahangturong mga kamatuoran. Samtang magtuon ka sa Abraham 3:22–28, ikonsiderar kon unsaon nimo sa pagtudlo ang mga bata mahitungod sa ilang mahangturon nga pagkatawo.

Posible nga mga Kalihokan

• Gamita ang “Mahitungod sa Daang Tugon” (nga naa sa Mga Istorya sa Daang Tugon) sa pagtudlo sa mga bata mahitungod sa premortal nga kinabuhi. Pagkahuman, dapita ang mga bata sa pagsugilon og balik sa istorya diha nimo. Nganong ang Langitnong Amahan mipadala kanato dinhi sa yuta? Tabangi ang mga bata sa pagdiskobre og tubag samtang magbasa ka ngadto kanila sa Abraham 3:25.

• Kantaha uban sa mga bata ang awit mahitungod sa plano sa Dios para kanato (sama sa “Sundon Ko ang Plano sa Dios” [Songbook sa mga Bata, 86–87]). Tabangi sila nga makasabut sa mahangturong mga kamatuoran nga gitudlo diha sa mga pulong sa kanta.

Moises 1:39

Ang Langitnong Amahan gusto nga ako makapuyo og balik uban Kaniya.

Sa unsang paagi ang mga kamatuoran diha sa Moises 1:39 mipanalangin sa imong kinabuhi? Unsay imong mahimo sa pagtabang sa mga bata nga makasinati usab niana nga mga panalangin?

Posible nga mga Kalihokan

• Ipasabut pag-ayo ang mga pulong nga “mao kini ang akong buhat” ug “kinabuhi nga dayon” diha sa Moises 1:39, ug tabangi ang mga bata sa pagsubli og sulti niini nga mga pulong. Sultihi ang mga bata mahitungod sa buluhaton nga inyong buhaton matag adlaw. Tudloi sila nga ang buluhaton sa Langitnong Amahan mao ang pagtabang kanato nga makaangkon og kinabuhing dayon, nagpasabut nga mahimong sama Kaniya ug magpuyo uban Kaniya pag-usab.

• Pagdapit og usa ka ginikanan nga moadto sa klase ug moistorya mahitungod kon unsay iyang bation kon ang usa ka anak mouli human nahilayo (sama pananglit, sa pag-eskwela o sa pagmisyon), o ipaambit ang nasinati nimong mga pagbati atol niini nga mga kasinatian. Gamita kini nga ehemplo sa pagtudlo sa mga bata kon unsa kadako ang tinguha sa Langitnong Amahan nga kita makabalik ngadto Kaniya.

Itudlo ang Doktrina: Mas Dagko nga mga Bata

Moises 1:4, 30, 37–39; Abraham 3:22–28

Ako anak sa Dios, ug gusto Siya nga motabang kanako nga makabalik ngadto Kaniya.

Ang Moises 1:4, 37–39 ug Abraham 3:22–28 nagtudlo og bililhong mga kamatuoran mahitungod sa atong relasyon sa Dios ug sa Iyang katuyoan sa pagpadala kanato dinhi sa yuta. Pamalandungi unsaon nimo sa pagtabang ang mga bata sa pagkat-on niini nga mga kamatuoran.

Posible nga mga Kalihokan

• Basaha dungan sa mga bata ang Moises 1:4, 37–39 ug Abraham 3:24–25. Hatagi sila og mga oportunidad nga makapangutana ug makapaambit og paboritong mga pulong o hugpong sa mga pulong gikan niini nga mga bersikulo. Unsa ang atong makat-unan gikan niini nga mga bersikulo mahitungod sa atong Langitnong Amahan? mahitungod sa atong mga kaugalingon?

• Pagpakita sa mga bata og mga litrato sa pipila ka mga nilalang [creations] sa Langitnong Amahan. Basaha ang Moises 1:30, ug ipasabut nga si Moises nangutana sa Dios mahitungod sa katuyoan niini nga mga paglalang. Tabangi ang mga bata sa pagsiksik diha sa bersikulo 39 sa pagpangita sa tubag sa Dios. Ipamatuod nga ang katuyoan sa Dios mao ang pagtabang sa matag bata nga makaangkon og kinabuhing dayon.

• Tabangi ang mga bata sa paghunahuna og mga sitwasyon diin sila mopili kon sila mobuhat ba o dili “sa tanang mga butang bisan unsa ang isugo sa Ginoo nga ilang Dios” (Abraham 3:25). Ipapraktis nila o ipahisgot ang posibling mga tubag niana nga mga sitwasyon. Sa unsang paagi ang Manluluwas makatabang nato kon makahimo kita og sayop nga pagpili?

Moises 1:12–26

Makabatok ako sa mga tintasyon ni Satanas.

Samtang magtuon ka sa Moises 1:12–26, pangita og mga butang nga gihimo ni Moises sa pagbatok ni Satanas. Sa unsang paagi nga ang ehemplo ni Moises makatabang sa mga bata kon mag-atubang sila og mga tintasyon?

Posible nga mga Kalihokan

• I-summarize ang kasinatian ni Moises diha sa Moises 1:12–26 sa kaugalingon nimong mga pulong, o paghangyo og usa sa mga bata sa paghimo niini. ([ChurchofJesusChrist.org]). Dapita ang mga bata sa pagsiksik niini nga mga bersikulo sa pagkat-on kon sa unsang paagi nabuntog ni Moises si Satanas. (Kon nagkinahanglan sila og tabang, paadtoa sila sa mga bersikulo 13, 15, 18, 20–22, 26.)

• Pagdala og kahon sa mga kahimanan [tools] (o litrato sa mga kahimanan), ug sulati ang matag kahimanan og usa ka paagi nga atong mabatukan ang mga tintasyon (sama sa pag-ampo, pagkanta og himno, pagbasa sa mga kasulatan, o pagserbisyo sa uban). Pakuhaa ang matag bata og usa ka kahimanan ug pasultiha mahitungod sa usa ka sitwasyon diin ang aksyon nga gisulat diha sa kahimanan makatabang nato sa pagbatok og tintasyon. Magdungan sa pagbasa sa mga bersikulo 25–26, ug ipamatuod nga ang Dios motabang nato kon nag-atubang kita og tintasyon.

Abraham 3:22–28

Nagpuyo ako kauban sa Langitnong Amahan sa wala pa ko matawo.

Kining mga bersikulo nga naghulagway sa panan-awon ni Abraham sa atong premortal nga kinabuhi makatabang sa mga bata sa pagtubag sa mga pangutana nga “Diin ako gikan?” ug “Nganong ania ko dinhi?” Unsaon nimo sa pagtabang nga makit-an nila ang mga tubag?

Posible nga mga Kalihokan

• Diha sa pisara, isulat ang mga pangutana nga may kalabutan sa Abraham 3:22–28, sama sa Unsay nahitabo didto sa atong kinabuhi sa wala pa kita matawo? Kinsa ang tua didto? Nganong gilalang ang kalibutan? Dapita ang mga bata sa pagbasa niini nga mga bersikulo sa pagpangita og mga tubag.

• Kon dunay bag-ong natawo diha sa ward, dapita ang mga ginikanan sa pagdala kaniya diha sa klase ug ipaambit ang ilang mga pagbati mahitungod sa paghangop niini nga bata dinhi sa kalibutan. (Pwede sab kang magpakita og usa ka litrato sa bag-ong natawo nga bata.) Istoryahi ang mga bata mahitungod kon asa ang espiritu sa batang masuso sa wala pa siya moanhi sa yuta. Nganong importante para niini nga batang masuso ang pagkat-on nga siya anak sa Dios?

• Kantaha ang mga awit mahitungod sa plano sa Dios alang kanato, sama sa “Ako Nasayud Akong Amahan Buhi” o “Sundon ko ang Plano sa Dios” (Songbook sa mga Bata, 8, 86–87). Dapita ang mga bata sa pagdrowing og mga litrato nga mohaum sa mga pulong. Ipagamit nila ang ilang mga gidrowing nga litrato alang sa pagtudlo sa usag usa sa mga kamatuoran gikan sa mga kanta.

Awhaga ang Pagkat-on diha sa Panimalay

Paghunahuna og mga paagi nga ang pagkat-on nga nahitabo sa imong klase sa Primary makaawhag, makasuporta, o makadugang sa pagkat-on nga mahitabo diha sa mga panimalay sa mga bata. Sama pananglit, pwede nimong dapiton ang mga bata sa pagpaambit niini nga pahina sa kalihokan karong semanaha diha sa ilang mga pamilya.

Pagpalambo sa Atong Pagtudlo

Ang mga bata makakat-on sa daghang paagi. Ang mga bata malingaw sa pagkat-on pinaagi sa bag-o ug lainlain nga mga kasinatian. Gamita ang mga kalihokan nga makatabang kanila nga molihok, mogamit sa tanan nilang mga balatian [senses], ug mosulay og bag-ong mga butang. (Tan-awa sa Pagtudlo sumala sa Pamaagi sa Manluluwas, 25–26.)