litrato sa yuta ug sa bulan

Enero 3–9

Genesis 1–2; Moises 2–3; Abraham 4–5

“Sa Sinugdan Gibuhat sa Dios ang mga Langit ug ang Yuta”

Bisan kon ikaw nakabasa na kaniadto mahitungod sa Paglalang, kanunay adunay daghan pang makat-unan gikan sa mga kasulatan. Pag-ampo alang sa paggiya gikan sa Espiritu Santo sa pagtabang kanimo sa pagkaplag og bag-ong panabut.

Irekord ang Imong mga Impresyon

Tungod kay ang kalibutan nga naglibut kanato hilabihan sa kanindot ug kaambongan, kini malisud sa paghanduraw sa yuta sa dihang kini “awa-aw, ug walay sulod” (Genesis 1:2; Abraham 4:2). Usa ka butang nga gitudlo kanato sa istorya sa Paglalang mao nga ang Dios makahimo og usa ka butang nga matahum gikan sa usa ka butang nga wala mahan-ay. Kana makatabang nga hinumduman kon ang kinabuhi nagkaguliyang. Ang Langitnong Amahan ug si Jesukristo mga Tiglalang, ug ang Ilang mamugnaon nga buhat uban kanato wala mahuman. Makahimo sila nga mapahayagan ang mangitngit nga mga higayon sa atong mga kinabuhi. Makaumol sila og solido nga baruganan taliwala sa mga unos sa kalisud sa kinabuhi. Sila makamando sa mga elemento [sa kinaiyahan], ug kon kita mosunod ang Ilang pulong makausab kanato ngadto sa maanindot nga mga nilalang nga kita gituyo nga mahimo. Kana kabahin sa unsay gipasabut nga gilalang sumala sa dagway sa Dios, ingon sa pagkasama Kaniya (tan-awa sa Genesis 1:26). Kita adunay kalagmitan nga mahimong sama Kaniya: gibayaw, gihimaya, nga celestial nga mga tawo.

Alang sa kinatibuk-ang pagsabut sa basahon sa Genesis, tan-awa ang “Genesis” diha sa Giya ngadto sa mga Kasulatan.

icon sa personal nga pagtuon

Mga Ideya alang sa Personal nga Pagtuon sa Kasulatan

Genesis 1:1–25; Moises 2:1–25; Abraham 4:1–25

Ubos sa direksyon sa Langitnong Amahan, gilalang ni Jesukristo ang kalibutan.

Miingon si Elder D. Todd Christofferson, “Bisan unsa pa ang mga detalye sa proseso sa paglalang, nasayud kita nga dili kini aksidente apan gisugo kadto sa Dios nga Amahan ug giimplementar ni Jesukristo” (“Nganong Kaminyoon, Nganong Pamilya,” Liahona, Mayo 2015, 51). Samtang adunay daghan nga wala nato mahibaloi sa eksakto mahitungod kon giunsa paglalang ang kalibutan, pamalandonga unsa ang imong nakat-unan mahitungod sa Paglalang gikan sa unsay gipadayag sa Dios diha sa Genesis 1:1–25; Moises 2:1–25; ug Abraham 4:1–25. Unsa ang imong namatikdan niini nga mga asoy nga susama? Unsa ang imong namatikdan nga lahi? Unsa nga mga hunahuna ikaw aduna mahitungod sa Langitnong Amahan ug ni Jesukristo samtang ikaw nagbasa mahitungod sa Paglalang?

Tan-awa usab sa Doktrina ug mga Pakigsaad 101:32–34.

hapin sa kama [quilt] nga nagpakita sa lain-laing ang-ang sa paglalang

Creation [Paglalang], ni Joan Hibbert Durtschi

Genesis 1:27–28; 2:18–25; Moises 3:18, 21–25; Abraham 5:14–19

Ang kaminyoon tali sa lalaki ug sa babaye gi-orden sa Dios.

“Si Adan ug si Eva gihiusa diha sa kaminyoon alang sa karon ug alang sa tanang kahangturan pinaagi sa gahum sa [ang] mahangturong pagkapari” (Russell M. Nelson, “Mga Leksyon gikan ni Eva,” Ensign, Nob. 1987, 87). Nganong importante nga mahibaloan kini nga kamatuoran? Pamalandonga kini samtang ikaw magbasa sa Genesis 1:27–28; 2:18–25; Moises 3:18, 21–25; ug Abraham 5:14–19. Kon ikaw gusto nga makakat-on pa og dugang mahitungod sa kaminyoon sulod sa plano sa Dios, basaha ug pamalangdonga ang mga kapanguhaan nga gilista sa ubos. Unsa ang giaghat kanimo niini nga mga kapanguhaan nga buhaton sa pagpalambo sa imong kaminyoon o sa pag-andam alang sa kaminyoon sa umaabut?

Tan-awa usab sa Mateo 19:4–6; 1 Mga Taga-Corinto 11:11; Linda K. Burton, “Magdungan Kita’g Saka,” Liahona, Mayo 2015, 29–32; “Ang Pamilya: Usa ka Pamahayag ngadto sa Kalibutan,” ChurchofJesusChrist.org.

Genesis 2:2–3; Moises 3:2–3; Abraham 5:2–3

Gipanalanginan ug gibalaan sa Dios ang Igpapahulay nga adlaw.

Gihimo sa Dios ang Igpapahulay nga adlaw nga balaan, ug Siya naghangyo kanato sa paghupot niini nga balaan. Gitudlo ni Elder David A. Bednar, “Ang Igpapahulay mao ang panahon sa Dios, usa ka sagrado nga panahon nga piho nga gilahi alang sa pagsimba Kaniya ug sa pagdawat ug paghinumdom sa Iyang dagko ug bililhong mga saad” (“Bililhon ug Dagko Uyamut nga mga Saad,” Liahona, Nob. 2017, 92). Unsaon nimo paggamit kini nga pahayag ug ang Genesis 2:2-3; Moises 3:2–3; o Abraham 5:2–3 sa pagpasabut ngadto sa usa ka tawo kon ngano nga ikaw mipili sa pagtahud sa Igpapahulay nga adlaw? Sa unsa nga paagi ikaw napanalanginan sa Ginoo tungod sa pagbalaan sa Iyang adlaw?

Tan-awa usab sa Isaias 58:13–14; Doktrina ug mga Pakigsaad 59:9–13; “The Sabbath Is a Delight” (video), ChurchofJesusChrist.org.

family study icon

Mga Ideya alang sa Pamilya nga Pagtuon sa Kasulatan ug Family Home Evening

Genesis 1:1–25; Moises 2:1–25; Abraham 4:1–25.Unsaon nimo paghimo ang pagtuon mahitungod sa Paglalang nga makalingaw alang sa imong pamilya? Mahimo nimong dad-on ang imong pamilya sa pagpangita sa gawas alang sa mga matang sa mga butang nga gihimo atol sa matag yugto sa istorya sa Paglalang, sama sa mga bitoon, mga kahoy, o mga hayop. Mahimo ka usab mopakita og mga hulagway sa mga butang nga gilalang sa matag yugto ug sa pagdapit og mga sakop sa pamilya sa paghan-ay sa mga hulagway human mabasa sa tanan og dungan ang usa sa mga asoy sa Paglalang. Unsa ang gitudlo kanato niining mga paglalang mahitungod sa Langitnong Amahan ug ni Jesukristo?

Genesis 1; Moises 2; Abraham 4.Usa ka paagi sa pagsugod sa istorya sa Paglalang mao ang pagdapit sa imong pamilya sa pagpangita kon kapila diha sa Genesis 1 o sa Moises 2 ang Dios nagtawag sa mga butang nga iyang gihimo nga “maayo.” Unsa ang gisugyot niini mahitungod kon unsaon nato sa pag-atiman ang mga nilalang sa Dios––lakip ang atong mga kaugalingon? Unsa ang atong nakat-unan gikan sa paagi sa paggamit og pulong niini nga mga hitabo diha sa Abraham 4?

Genesis 1:26–27; Moises 2:26–27; Abraham 4:26–27.Nganong importanting mahibaloan nga kita gilalang sa dagway sa Dios? Giunsa pag-apekto niini sa paagi kita mobati mahitungod sa atong mga kaugalingon, sa uban, ug sa Dios?

Kon ikaw adunay gagmay nga mga anak, mahimong magdungan kamo og basa sa Moises 2:27 ug magdula og yanong dula: Pagpakita og litrato nga naghulagway sa Langitnong Amahan ug ni Jesukristo, sama sa litrato 90 diha sa Libro sa mga Hulagway sa Ebanghelyo (2009), ug hangyoa ang mga sakop sa pamilya sa pagpuli-puli sa pagtudlo ngadto sa usa ka parte sa lawas sa Langitnong Amahan o ni Jesus. Dayon ang ubang mga sakop sa pamilya makatudlo ngadto nianang sama nga parte diha sa ilang mga lawas.

Genesis 1:28; Moises 2:28; Abraham 4:28.“Ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman” (“Ang Pamilya: Usa ka Pamahayag ngadto sa Kalibutan,” ChurchofJesusChrist.org). Ang mga sakop sa pamilya maka role-play kon unsaon sa pagpasabut sa atong mga tinuohan mahitungod niini nga sugo ngadto niadtong kinsa wala mahibalo niini nga kamatuoran o kinsa nagtuo sa lahi nga paagi.

Genesis 1:28; Moises 2:28; Abraham 4:28.Unsa ang gipasabut sa “magbaton kamo sa pagbulot-an … ibabaw sa tanan nga binuhat nga buhi nga nagalihok sa ibabaw sa yuta”? (tan-awa usab sa Doktrina ug mga Pakigsaad 59:16–21). Unsaon sa atong pamilya pagtuman sa atong responsibilidad sa pag-atiman sa yuta?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Gihigugma Ako sa Langitnong Amahan,” Songbook sa mga Bata, 16–17.

Pagpalambo sa Atong Pagtudlo

Paggamit sa mga kasulatan diha sa atong mga kinabuhi. Human makabasa og usa ka tudling sa kasulatan, dapita ang mga sakop sa pamilya sa paggamit niini nganha sa ilang mga kinabuhi. Sama pananglit, sa unsa nga paagi ang Moises 3:1–3 magamit sa atong pagtuman sa Igpapahulay sa matag semana? (Tan-awa sa Pagtudlo sumala sa Pamaagi sa Manluluwas, 21.)

Jesukristo nagbarug taliwala sa mga panganod

The Creation [Paglalang], ni Annie Henrie Nader