Disyembre 27–Enero 2

Moises 1; Abraham 3

“Kini Mao ang Akong Buhat ug ang Akong Himaya”

Samtang ikaw nagbasa unsa ang gisulti sa Dios ngadto ni Moises ug ngadto ni Abraham. pamalandunga unsa kaha usab ang Iyang isulti nganha kanimo.

Irekord ang Imong mga Impresyon

Ang Biblia nagsugod uban sa mga pulong “sa sinugdanan gibuhat sa Dios ang mga langit ug ang yuta” (Genesis 1:1). Apan unsa ang anaa didto sa wala pa kini nga “sinugdanan”? Ug nganong gilalang sa Dios ang tanan niini? Pinaagi ni Propeta Joseph Smith, ang Ginoo nagpasabut kabahin niini nga mga pangutana.

Sama pananglit, Siya mihatag kanato sa rekord sa usa ka panan-awon diin si Abraham nakakita sa atong pagpakabuhi isip mga espiritu “sa wala pa matukod ang kalibutan” (tan-awa sa Abraham 3:22–28). Ang Ginoo mihatag usab kanato og usa ka dinasig nga hubad o giusab nga unang unom ka mga kapitulo sa Genesis, nga gitawag og ang basahon ni Moises––nga wala magsugod og “sa sinugdanan.” Hinoon, kini nagsugod sa kasinatian ni Moises nga naghatag og pipila ka mga sitwasyon alang sa bantugang istorya sa Paglalang. Nag-uban, kini nga mga kasulatan sa ulahing adlaw mga maayong dapit sa pagsugod sa atong pagtuon sa Daang Tugon tungod kay kini nagtubag sa pipila ka importanting mga pangutana nga makahan-ay sa atong pagbasa: Kinsa ang Dios? Kinsa kita? Unsa ang buhat sa Dios, ug unsa ang atong bahin niini? Ang pambukas nga mga kapitulo sa Genesis masabut isip ang tubag sa Ginoo ngadto sa hangyo ni Moises: “Pagmaloloy-on sa imong sulugoon, O Dios, ug sultihi ako mahitungod niini nga yuta, ug sa mga lumulupyo niini, ug usab sa mga langit” (Moises 1:36).

Mga Ideya alang sa Personal nga Pagtuon sa Kasulatan

Moises 1

Isip anak sa Dios, ako adunay balaan nga padulngan.

Gitudlo ni Presidente Dieter F. Uchtdorf, “Kadaghanan sa kalibug nga atong gisinati niini nga kinabuhi nagagikan sa yano nga wala makasabut kon kinsa kita” (“The Reflection in the Water” [Church Educational System fireside alang sa batan-ong mga hamtong, Nob. 1, 2009], ChurchofJesusChrist.org). Nahibalo ang Langitnong Amahan niini, ug ingon man si Satanas. Ang unang mensahe sa Dios ngadto ni Moises naglakip sa mga kamatuoran “ikaw mao ang akong anak” ug “ikaw mao ang may pagkasama sa akong Bugtong Anak” (Moises 1:4, 6). Ang kalainan, si Satanas mitawag ni Moises isip usa lamang ka “anak sa tawo” (Moises 1:12). Sa unsa nga paagi ang imong kinabuhi ug mga desisyon malahi kon ikaw naghunahuna sa imong kaugalingon sama sa gusto ni Satanas kanimo nga mohunahuna, isip usa ka “anak nga lalaki [o anak nga babaye] sa tawo”? Sa unsa nga paagi ang pagkahibalo ug paghinumdom nga ikaw usa ka anak sa Dios nagpanalangin sa imong kinabuhi?

Unsa nga mga bersikulo o hugpong sa mga pulong diha sa Moises 1 ang naghatag kanimo og pagbati sa imong balaang bili?

Si Kristo ug ang Paglalang, ni Robert T. Barrett

Moises 1:12–26

Ako makasagubang sa impluwensya ni Satanas.

Ingon nga klarong gipakita sa Moises 1 ang gamhanang mga kasinatian dili mopalingkawas kanato gikan sa tintasyon. Gani, usa sa mga taktika ni Satanas mao ang pagtintal kanato sa pagduda niadto nga mga kasinatian o sa unsa ang atong nakat-unan gikan niini. Samtang ikaw nagbasa mahitungod sa tubag ni Moises ngadto ni Satanas diha sa mga bersikulo 12–26, unsa ang imong nakat-unan nga makatabang kanimo sa pagpabilin nga matinuoron ngadto sa pagpamatuod nga imong nadawat? Unsa ang nagtabang kanimo sa pagsagubang sa uban nga mga tintasyon ni Satanas? (tan-awa, sama pananglit sa, mga bersikulo 15 ug 18).

Pinasikad sa unsay imong nakat-unan, makahimo ka og usa ka plano alang sa pagsagubang sa tintasyon. Sama pananglit, makakompleto ka sa pahayag “Kon ako tintalon sa , ako mo .”

Tan-awa usab diha sa Mateo 4:1–11; Helaman 5:12; Gary E. Stevenson, “Ayaw Paglingla Kanako,” Liahona, Nob. 2019, 93–96; “I Am a Son of God” (video), ChurchofJesusChrist.org.

Moises 1:27–39; Abraham 3

Ang buhat sa Dios ug himaya mao ang pagtabang kanako nga makaangkon og kinabuhing dayon.

Human makatan-aw og panan-awon sa mga nilalang sa Dios, si Moises mihimo og usa ka hangyo sa Ginoo: “Sultihi ako … ngano nga kini nga mga butang naingon” (Moises 1:30). Unsa ang nakapadani kanimo mahitungod sa tubag sa Ginoo diha sa Moises 1:31–39?

Si Abraham usab adunay usa ka kasinatian sa pagkakita og panan-awon, girekord diha sa Abraham 3. Unsa ang imong nakaplagan sa mga bersikulo 22–26 nga makatabang sa pagtubag sa hangyo ni Moises?

Hunahunaa ang paglista og ubang mga kamatuoran nga nakat-unan ni Moises ug Abraham diha sa ilang mga panan-awon: mga kamatuoran mahitungod sa Dios, mahitungod sa ilang mga kaugalingon, ug mahitungod sa mga katuyoan sa mga nilalang sa Dios. Sa unsa nga paagi kini nga mga kamatuoran nakaapekto sa paagi sa imong pagtan-aw sa imong kaugalingon ug sa kalibutan nga nagpalibut kanimo?

Tan-awa usab sa Dieter F. Uchtdorf, “Kamo Importante ngadto Kaniya,” Liahona, Nob. 2011, 19–22; Gospel Topics, “Premortality,” topics.ChurchofJesusChrist.org.

Abraham 3:22–23

Ang uban ba gawas ni Abraham “napili sa wala pa [sila] natawo”?

“Sa kalibutan nga wala pa dinhi sa yuta, ang Dios mitudlo og pipila ka mga espiritu sa pagtuman og piho nga mga misyon sa panahon sa ilang mortal nga mga kinabuhi. Gitawag kini og gi-orden nang daan. … Ang doktrina kabahin sa gi-orden nang daan magamit ngadto sa tanang mga miyembro sa Simbahan, dili lamang ngadto sa Manluluwas ug sa Iyang mga propeta” (Gospel Topics, “Foreordination,” topics.ChurchofJesusChrist.org).

Giunsa nato pagkuha ang mga basahon ni Moises ug Abraham?

Ang basahon ni Moises mao ang unang bahin sa dinasig nga hubad ni Joseph Smith sa Biblia. Ang Basahon ni Abraham gipadayag ngadto ni Joseph Smith sa panahon sa iyang pagtrabaho sa Ehiptohanon nga papyri. Kini nga mga basahon, makaplagan karon diha sa Perlas nga Labing Bililhon, naghatag og daghang impormasyon mahitungod ni Moises, Abraham, ug sa ubang mga propeta nga dili makaplagan diha sa Daang Tugon. Aron sa pagkat-on pa og dugang mahitungod kon giunsa nato pagkuha niini nga mga basahon, tan-awa sa “Joseph Smith Translation of the Bible” (Church History Topics, ChurchofJesusChrist.org/study/history/topics) ug “Translation and Historicity of the Book of Abraham” (Gospel Topics, topics.ChurchofJesusChrist.org).

Mga Ideya alang sa Pamilya nga Pagtuon sa Kasulatan ug Family Home Evening

Moises 1:2–6; Abraham 3:11–12.Makadapit ka og mga miyembro sa pamilya sa pagpangita alang sa mga pundok sa mga pulong diha sa awit “Ako Anak sa Dios” (Songbook sa mga Bata, 2–3) nga kalabut ngadto sa mga kamatuoran nga gitudlo diha sa mga kasulatan.

Moises 1:4, 30–39.Malingaw ba ang imong pamilya nga magtan-aw sa pipila “sa mga binuhat sa kaugalingon nga mga kamot sa [Dios]”? (bersikulo 4). Tingali mahimo nimong basahon kini nga mga bersikulo diha sa usa ka parke o ubos sa mga bitoon sa gabii. Dayon ikaw makasulti mahitungod kon nganong gilalang sa Dios ang kalibutan ug mahitungod kon unsaon kanato sa pag-apil diha sa Iyang “buhat ug [Iyang] himaya” (bersikulo 39).

Moises 1:18.Unsa nga tambag ang mahimo natong ipakigbahin sa pagtabang sa usag usa “sa paghukom tali” sa Dios ug ni Satanas? (Tan-awa usab sa Moroni 7:12–18; Doktrina ug mga Pakigsaad 50:23–24.)

Abraham 3:24–26.Makahatag ka sa mga sakop sa pamilya og kalingawan apan mahagiton nga buluhaton nga magtugot kanila sa pagmatuod nga sila makasunod og mga panudlo, sama sa pagpilo og papel nga eroplano o pagsunod og resipe. Sa unsa nga paagi kini nga kalihokan susama sa katuyoan sa atong mortal nga kinabuhi ingon nga gihulagway niini nga mga bersikulo?

Alang sa dugang nga mga ideya sa pagtudlo sa mga bata, tan-awa sa latid [outline] niini nga semana sa Dali, Sunod Kanako—Alang sa Primary.

Gisugyot nga awit: “Ako Anak sa Dios,” Songbook sa mga Bata, 2–3.

Pagpalambo sa Personal nga Pagtuon

Pangita og mga kamatuoran sa ebanghelyo. Diha sa mga kasulatan, usahay ang mga kamatuoran sa ebanghelyo direkta nga gipahayag; usahay kini gipasabut pinaagi sa ehemplo o istorya. Pangutan-a ang imong kaugalingon, “Unsa nga mahangturong kamatuoran ang gitudlo niini nga mga bersikulo?”

Moises Nagbuntog ni Satanas, ni Joseph Brickey