Adan ug Eva nagkuyog og lakaw

Adam and Eve [Adan ug Eva], ni Douglas M. Fryer

Enero 10–16

Genesis 3–4; Moises 4–5

Ang Pagkapukan ni Adan ug ni Eva

Samtang ikaw nagtuon sa Genesis 3–4 ug sa Moises 4–5, hunahunaa kon unsay gitinguha sa Ginoo sa pagtudlo kanimo. Irekord kini nga mga kamatuoran ug ang imong espiritwal nga mga impresyon, ug pamalandonga kini sa tibuok semana.

Irekord ang Imong mga Impresyon

Sa una, ang istorya sa Pagkapukan ni Adan ug ni Eva ingon og sama sa usa ka trahedya. Gipapahawa si Adan ug si Eva sa maanindot nga Tanaman sa Eden. Gibutang sila ngadto sa usa ka kalibutan diin ang sakit, kasakit, ug kamatayon kanunay nga anaa (tan-awa sa Genesis 3:16–19). Ug sila nabulag gikan sa ilang Langitnong Amahan. Apan tungod sa mga kamatuoran nga gipahiuli pinaagi ni Propeta Joseph Smith diha sa basahon ni Moises, kita nahibalo nga ang istorya kabahin ni Adan ug ni Eva sa tinuod usa ka istorya sa paglaum–– ug usa ka importanting bahin sa plano sa Dios alang sa Iyang mga anak.

Ang Tanaman sa Eden maanindot. Apan si Adan ug si Eva nagkinahanglan og usa ka butang labaw pa kay sa maanindot nga mga palibut. Nagkinahanglan sila––ug kitang tanan nagkinahanglan––og usa ka oportunidad sa paglambo. Ang pagbiya sa Tanaman sa Eden mao ang gikinahanglan nga unang lakang padulong sa pagbalik ngadto sa Dios ug sa katapusan mahimong sama Kaniya. Kana nagpasabut og pag-atubang sa oposisyon, pagbuhat og mga sayop, pagkat-on sa paghinulsol, ug sa pagsalig sa Manluluwas, kansang Pag-ula naghimong posible sa kauswagan ug “sa kalipay sa atong katubsanan” (Moises 5:11). Busa kon ikaw magbasa mahitungod sa Pagkapukan ni Adan ug Eva, ayaw paghatag og importansya sa ingon og trahedya apan diha sa mga posibilidad––dili sa nawala nga paraiso ni Adan ug Eva apan diha sa himaya nga ang ilang pagpili nagtugot kanato nga makadawat.

icon sa personal nga pagtuon

Mga Ideya alang sa Personal nga Pagtuon sa Kasulatan

Genesis 3:1–7; Moises 4; 5:4–12

Ang Pagkapukan usa ka gikinahanglan nga bahin sa plano sa Dios sa pagtubos sa Iyang mga anak.

Ang Pagkapukan ni Adan ug ni Eva midala og pisikal ug espiritwal nga kamatayon nganhi sa kalibutan. Kini nagdala usab og kalisdanan, kasub-anan, ug kasal-anan. Kining tanan ingon og mga rason sa pagmahay sa Pagkapukan. Apan ang Pagkapukan usa ka bahin sa plano sa Langitnong Amahan sa pagtubos ug paghimaya sa Iyang mga anak pinaagi “sa sakripisyo sa Bugtong Anak sa Amahan” (Moises 5:7). Samtang ikaw nagtuon sa Genesis 3:1–7; Moises 4; 5:4–12, unsa nga mga kamatuoran ang imong nakaplagan nga nagtabang kanimo sa pagsabut sa Pagkapukan ug giunsa kini pagbuntog sa Pag-ula ni Kristo? Ang mga pangutana nga sama niini mahimong makatabang:

• Sa unsa nga paagi ang Pagkapukan nakaapekto ni Adan ug ni Eva? Sa unsa nga paagi kini nakaapekto kanako?

• Nganong si Adan ug si Eva mihalad og mga sakripisyo? Unsa ang gisimbolo niadto nga mga sakripisyo? Unsa ang akong makat-unan gikan sa mga pulong sa anghel niini nga mga bersikulo?

• Nganong si Adan ug si Eva “nalipay” human sa Pagkapukan? Unsa ang akong makat-unan gikan niini nga asoy mahitungod sa plano sa Dios sa pagtubos kanako pinaagi ni Jesukristo?

Tungod sa Basahon ni Mormon ug sa ubang mga pagpadayag sa ulahing adlaw, kita adunay lahi nga panan-aw sa Pagkapukan. Sama pananglit, hunahunaa unsa ang gitudlo ni propeta Lehi sa iyang pamilya mahitungod ni Adan ug ni Eva diha sa 2 Nephi 2:15–27. Giunsa sa mga pagtulun-an ni Lehi pagtataw unsa ang nahitabo didto sa Tanaman sa Eden ug sa pagtabang kanato sa pagsabut nganong kini importante?

Tan-awa usab sa 1 Mga Taga-Corinto 15:20–22; Mosiah 3:19; Alma 12:21–37; Doktrina ug mga Pakigsaad 29:39–43; Mga Artikulo sa Hugot nga Pagtuo 1:3; Dallin H. Oaks, “Ang Dako nga Laraw,” Liahona, Mayo 2020, 93–96; Dallin H. Oaks, “Oposisyon sa Tanang mga Butang,” Liahona, Mayo 2016, 114–17; Jeffrey R. Holland, “Asa ang Hustisya, Gugma, ug Kalooy Mag-abut,” Liahona, Mayo 2015, 104–6.

Eva naggunit og bunga

Leaving Eden [Pagbiya sa Eden], ni Annie Henrie Nader

Genesis 3:16; Moises 4:22

Unsa ang kahulugan nga si Adan “magabuot” ni Eva?

Kini nga tudling sa kasulatan usahay sayop ang pagkasabut nga nagkahulugan nga ang bana may katarungan sa pagtagad sa iyang asawa nga walay kalooy. Sa atong panahon, ang mga propeta sa Ginoo mitudlo nga bisan tuod ang usa ka bana kinahanglan modumala diha sa panimalay sa pagkamatarung, kinahanglan siya nga motan-aw sa iyang asawa isip parehas nga magkauban (tan-awa sa “Ang Pamilya: Usa ka Pamahayag ngadto sa Kalibutan” [ChurchofJesusChrist.org]). Si Elder Dale G. Renlund ug Sister Ruth Lybbert Renlund mipasabut nga ang usa ka matarung nga bana “maningkamut sa pagpangalagad; siya moangkon og kasaypanan ug maninguha og kapasayloan; dali siya nga mohatag og pagdayeg; siya mahunahunaon sa mga gusto sa sakop sa pamilya; mobati siya sa dakong gibug-aton sa responsibilidad sa paghatag ‘sa mga kinahanglanon sa kinabuhi ug sa pagpanalipod’ alang sa iyang pamilya; motagad siya sa iyang asawa uban sa labing dakong pagtahud ug pagtagad. … Siya mopanalangin sa iyang pamilya” (The Melchizedek Priesthood: Understanding the Doctrine, Living the Principles [2018], 23).

Moises 5:4–9, 16–26

Modawat ang Dios sa akong mga sakripisyo kon ako mohalad niini uban sa usa ka andam ug masulundon nga kasingkasing.

Nahibaloan ni Adan ug ni Eva nga ang hayop nga mga sakripisyo simbolo sa sakripisyo sa pag-ula ni Kristo, ug sila mihimo niini nga “mahibaloan ngadto sa ilang anak nga mga lalaki ug sa ilang anak nga mga babaye” (Moises 5:12). Samtang ikaw nagtuon sa Moises 5:4–9, 16–26, hunahunaa ang lain-laing mga kinaiya sa duha sa ilang anak nga mga lalaki, si Cain ug Abel, ngadto niini nga mga sakripisyo. Nganong gidawat sa Ginoo ang sakripisyo ni Abel apan wala ang kang Cain?

Unsa nga mga matang sa sakripisyo nangayo ang Ginoo kanimo? Anaa bay bisan unsa diha sa Moises 5:4–9, 16–26 nga nag-usab sa paagi sa imong paghunahuna mahitungod niadto nga mga sakripisyo?

Tan-awa usab sa Mga Salmo 4:5; 2 Mga Taga-Corinto 9:7; Omni 1:26; 3 Nephi 9:19–20; Moroni 7:6–11; Doktrina ug mga Pakigsaad 97:8; Jeffrey R. Holland, “Tan-awa ang Kordero sa Dios,” Liahona, Mayo 2019, 44–46.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Genesis 3; Moises 4.Unsa ang imong mabuhat sa pagtabang sa imong pamilya nga mas makasabut sa Pagkapukan ni Adan ug ni Eva? Makahimo ka sa pagkopya sa mga hulagway gikan sa “Adan ug si Eva” (sa Mga Istorya sa Daang Tugon) ug guntinga kini. Dayon pag-uban kamo sa pagtrabaho sa pagsunod-sunod sa mga hulagway samtang kamo naghisgot sa mga kasinatian ni Adan ug ni Eva. Ngano nga ang Pagkapukan gikinahanglan sa plano sa kaluwasan sa Langitnong Amahan? Ang pagtan-aw sa video “The Fall” (ChurchofJesusChrist.org) makatabang sa pagtubag niini nga pangutana.

Moises 4:1–4.Unsa ang atong makat-unan mahitungod sa Dios, Jesukristo, ug Satanas gikan niini nga mga bersikulo? Ngano nga ang kabubut-on importante kaayo ngadto sa plano sa Dios nga si Satanas gusto nga moguba niini?

Moises 5:5–9.Unsa ang gimando sa Dios ni Adan ug ni Eva nga buhaton sa pagtabang kanila sa paghunahuna mahitungod sa Manluluwas? Unsa ang gihatag sa Dios kanato sa pagtabang kanato sa paghunahuna mahitungod sa Manluluwas?

Moises 5:16–34.Unsay buot ipasabut sa “magbalantay sa igsoong lalaki”? Sa unsa nga paagi kita mahimo nga mas maayong moamuma alang sa usag usa isip usa ka pamilya?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Pilia ang Matarung nga Paagi,”Songbook sa mga Bata, 82–83.

Pagpalambo sa Personal nga Pagtuon

Gamita ang mga tabang sa pagtuon sa kasulatan. Samtang ikaw magtuon sa mga kasulatan, gamita ang mga footnotes, , , Giya ngadto sa mga Kasulatan, ug uban nga mga tabang sa pagtuon sa pag-angkon og dugang nga mga panabut.

anghel nagduaw ni Adan ug ni Eva

Similitude [Pagkasama], ni Walter Rane