Better than Paradise [Mas Maayo kay sa Paraiso], ni Kendal Ray Johnson

Enero 17–23

Genesis 5; Moises 6

“Pagtudlo Niini nga mga Butang sa Gawasnon nga Paagi ngadto sa Imong mga Anak”

Samtang ikaw nagbasa ug namalandong sa Genesis 5 ug sa Moises 6, irekord ang espiritwal nga mga impresyon nga imong madawat. Unsa nga mga mensahe ang imong nakaplagan nga bililhon kanimo ug sa imong pamilya?

Irekord ang Imong mga Impresyon

Kadaghanan sa Genesis 5 mao ang usa ka lista sa mga henerasyon tali ni Adan ug ni Eva ug ni Noe. Atong nabasa ang daghang mga ngalan, apan dili daghan ang atong nahibaloan mahitungod kanila. Dayon atong mabasa ang mahitungod ni Enoch, unom ka mga henerasyon gikan ni Adan, kinsa gihulagway uban niining makadani apan walay pagpasabut nga linya: “Ug si Enoch naglakaw uban sa Dios: ug nawala siya; kay gikuha siya sa Dios” (Genesis 5:24). Sa tinuod adunay usa ka istorya nga nagpaluyo niana. Apan sa walay dugang nga pagpasabut, ang lista sa mga henerasyon nagpadayon.

Salamat na lang, ang Moises 6 nagpadayag sa mga detalye sa istorya ni Enoch––ug kini nindot kaayo nga istorya. Atong nahibaloan ang kamapainubsanon ni Enoch, ang iyang mga pagkakulang og pagsalig sa kaugalingon, ang potensyal nga nakita sa Dios diha kaniya, ug ang importanting buhat nga iyang gihimo isip propeta sa Dios. Nakakuha usab kita og usa ka mas tataw nga hulagway sa pamilya ni Adan ug ni Eva samtang kini miuswag ngadto sa mga henerasyon. Atong nabasa ang kang Satanas nga “dakong kamandoan” apan usab sa mga ginikanan kinsa mitudlo sa mga anak “sa mga pamaagi sa Dios” ug sa mga “tigsangyaw sa pagkamatarung” kinsa “namulong ug nanagna” (Moises 6:15, 21, 23). Ilabi na sa ka bililhon mao ang unsay atong nakat-unan mahitungod sa doktrina nga gitudlo niini nga mga ginikanan ug mga tigsangyaw: hugot nga pagtuo, paghinulsol, bunyag, pagdawat sa Espiritu Santo (tan-awa sa Moises 6:50–52). Kana nga doktrina, sama sa pagkapari nga nag-uban niini, “diha sa sinugdanan [ug] maanaa usab sa katapusan sa kalibutan” (Moises 6:7).

Mga Ideya alang sa Personal nga Pagtuon sa Kasulatan

Moises 6:26–36

Ang propeta usa ka manalagna.

Samtang ikaw nagtuon sa Moises 6:26–36, unsa ang imong nakat-unan mahitungod sa mga mata, kangitngit, ug pagtan-aw? Sa panahon ni Enoch, kinsa ang dili “makakita sa layo”? Nganong kini nga mga tawhana dili makakita sa kamatuoran? Unsa ang nakita ni Enoch? Unsa ang nakapalig-on sa imong hugot nga pagtuo nga ang mga propeta sa modernong panahon mga manalagna? (tan-awa ang bersikulo 36; Giya ngadto sa mga Kasulatan, “Manalagna,” scriptures.ChurchofJesusChrist.org).

Moises 6:26–47

Ang Dios nagtawag kanato sa paghimo sa Iyang buhat bisan pa sa atong mga kakulangan.

Kini dili kasagaran nga mobati nga masanapan sa unsay gitawag sa Ginoo kanato nga ipabuhat. Bisan si Enoch mibati niana nga paagi sa dihang siya gitawag sa Ginoo nga mahimong usa ka propeta. Samtang ikaw magbasa sa Moises 6:26–36, pangita kon nganong si Enoch mibati nga nasanapan ug unsa ang gisulti sa Ginoo sa paghatag kaniya og kaisug. Sa mga bersikulo 37–47, pangitaa ang mga paagi nga ang Ginoo misuporta ni Enoch ug mihatag kaniya og gahum sa paghimo sa Iyang buhat (tan-awa usab sa Moises 7:13). Mahimo nimong itandi ang kasinatian ni Enoch ngadto nianang uban nga mga propeta kinsa mibati og pagkadili sarang sama ni Moises (tan-awa sa Exodo 4:10–16), Jeremias (tan-awa sa Jeremias 1:4–10), Nephi (tan-awa sa 2 Nephi 33:1–4), ug Moroni (tan-awa sa Ether 12:23–29). Unsa sa imong paminaw ang gusto sa Dios kanimo nga makat-unan gikan niini nga mga kasulatan mahitungod sa buhat nga Siya mihatag kanimo nga buhaton?

Tan-awa usab sa Jacob 4:6–8.

Moises 6:48–68

Ang doktrina ni Kristo importante sa plano sa Dios sa kaluwasan.

Tungod kay kita aduna sa basahon ni Moises, nahibalo kita nga ang Dios nagtudlo kanunay sa Iyang mga anak unsaon pagkakaplag og kapasayloan ug katubsanan sukad pa sa sinugdan. Diha sa mga kasulatan, kini nga mga pagtulun-an usahay gitawag og ang doktrina ni Kristo (tan-awa sa 2 Nephi 31:13–21). Samtang ikaw magtuon sa Moises 6:48–68, pagsiksik alang sa unsay kinahanglan gayud natong mahibaloan ug buhaton aron matubos. Mahimo nimong mahibaloan nga makatabang ang pagsulat sa imong kaugalingong summary sa unsay gitudlo ni Enoch. Nganong importanting mahibaloan nga kining mga kamatuoran gitudlo sukad sa mga adlaw ni Adan ug ni Eva? Unsa ang gibati nimo nga nag-aghat sa pagbuhat isip resulta sa pagtuon niini nga mga pagtulun-an?

Moises 6:51–62

“Pagtudlo niini nga mga butang sa gawasnon nga paagi ngadto sa imong mga anak.”

Si Adan ug si Eva gitudloan sa bililhong mga kamatuoran sa ebanghelyo ni Jesukristo. Apan ang mga pulong sa Ginoo diha sa Moises 6:27–28 naghimo niini nga tin-aw nga sa mga henerasyon sa wala si Enoch, daghang mga tawo ang wala na magpuyo niadto nga mga kamatuoran. Ang Ginoo gusto ni Enoch nga ipahiuli ang mga kamatuoran nga nawala––uban sa sugo nga orihinal nga gihatag ngadto ni Adan: “Pagtudlo niini nga mga butang sa gawasnon nga paagi ngadto sa imong mga anak” (Moises 6:58). Samtang ikaw nagbasa sa Moises 6:51–62, unsa ang imong nakat-unan mahitungod ni Jesukristo? Unsa ang imong nakaplagan nga mahimong ilabi ka bililhon ngadto sa nagtubo nga henerasyon? Unsa ang imong mabuhat sa pagtabang og pasa niini nga mga kamatuoran ngadto sa umaabut nga mga henerasyon?

Ang mga ginikanan kinahanglan nga motudlo sa ilang mga anak sa ebanghelyo.

Mga Ideya alang sa Pamilya nga Pagtuon sa Kasulatan ug Family Home Evening

Genesis 5; Moises 6:5–25, 46.Ang pagbasa sa “basahon sa handumanan” nga gitago sa pamilya ni Adan ug ni Eva mahimong modasig sa imong pamilya sa paghimo sa inyong kaugalingong basahon sa handumanan. Paghisgot isip usa ka pamilya unsa ang inyong gusto nga ilakip. Tingali kamo adunay mga litrato, mga istorya, o mga dokumento gikan sa kasaysayan sa inyong pamilya. Mahimo kang mopili sa paglakip sa mga butang nga nagpanghitabo sa inyong pamilya karon. Unsa ang makaplagan sa umaabut nga mga henerasyon nga bililhon? Mahimo usab nga ikaw makighisgot kon giunsa sa mga pundok sa mga pulong “pinaagi sa espiritu sa pagdasig” (Moises 6:5) ug “sa sumbanan nga gihatag pinaagi sa tudlo sa Dios” (Moises 6:46) paggiya sa imong mga paningkamot. Hunahunaa ang paghipos og impormasyon gikan sa imong basahon sa handumanan diha sa FamilySearch.org.

Moises 6:53–62.Unsaon nato pagtubag ang pangutana ni Adan nga makaplagan sa Moises 6:53? Unsa nga mga tubag ang atong makaplagan sa mga bersikulo 57–62?

Moises 6:59.Unsa ang kahulugan sa “matawo pag-usab ngadto sa gingharian sa langit”? Unsa ang atong mabuhat sa pagpadayon nga matawo pag-usab sa tibuok natong mga kinabuhi? Alang sa tabang, tan-awa sa Alma 5:7–14, 26; Giya ngadto sa mga Kasulatan, “Born Again, Born of God” scriptures.ChurchofJesusChrist.org; David A. Bednar, “Kanunay nga Magbaton og Kapasayloan sa Inyong mga Sala” (Liahona, Mayo 2016, 59–62).

Moises 6:61.Unsa ang atong makat-unan mahitungod sa Espiritu Santo gikan niini nga bersikulo?

Moises 6:63.Unsa ang pipila sa mga butang nga “nagpamatuod ni [Kristo]”? (tan-awa usab sa 2 Nephi 11:4). Hunahunaa ang pagdapit og mga sakop sa pamilya sa pagpakigbahin og usa ka butang nga ilang nakita nga “anaa sa mga langit” o “ibabaw sa yuta” nga nagtabang kanila sa pagkat-on mahitungod ni Jesukristo. Sama pananglit, sa unsa nga paagi ang mga kahoy, dagkong mga bato, o ang adlaw nagpahinumdom kanato sa Manluluwas? Unsa ang gitudlo kanato sa mga ulohan “buhi nga tubig” ug “tinapay sa kinabuhi” mahitungod Kaniya? (Juan 4:10–14; 6:35).

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Moadto Ako Bisan Asa sa Pagbuot Mo,” Mga Himno, nu. 168.

Pagpalambo sa Personal nga Pagtuon

Pangitaa ang mga simbolo. Diha sa mga kasulatan, mga butang o mga hitabo kasagaran makarepresentar o makasimbolo og espiritwal nga mga kamatuoran. Kini nga mga simbolo makapalambo sa imong pagsabut sa doktrina. Sama pananglit, unsa ang imong nakat-unan gikan sa mga simbolo sa mga mata ug lapok sa Moises 6:35?

Adam and Eve Teaching Their Children [Adan ug Eva Nagtudlo sa Ilang mga Anak], ni Del Parson