Rebeca

Paghulagway ni Rebeca ni Dilleen Marsh

Pebrero 21–27

Genesis 24–27

Ang Pakigsaad Gihatag Pag-usab

Samtang ikaw nagbasa sa Genesis 24–27, hatag og pagtagad ngadto sa espiritwal nga mga panabut nga imong madawat. Pag-ampo nga makahibalo kon unsaon sa mga baruganan nga imong makaplagan may kalabutan sa imong kinabuhi.

Irekord ang Imong mga Impresyon

Ang pakigsaad sa Dios uban ni Abraham milakip sa saad nga pinaagi ni Abraham ug sa iyang kaliwatan “ang tanan nga mga banay sa yuta pagapanalanginan” (Abraham 2:11). Kana dili usa ka saad nga matuman sa usa ka henerasyon: sa daghan nga mga paagi, ang Biblia mao ang istorya sa Dios nga nagpadayon sa katumanan sa Iyang saad. Ug misugod Siya pinaagi sa pagbalik sa pakigsaad ngadto sa pamilya ni Isaac ug Rebeca. Pinaagi sa ilang mga kasinatian, atong nahibaloan ang usa ka butang mahitungod sa pagkamay labut sa pakigsaad. Ang ilang mga ehemplo nagtudlo kanato mahitungod sa kalooy, pailub, ug pagsalig diha sa gisaad sa Dios nga mga panalangin. Ug atong nakat-unan nga kini takus gayud ang pagbiya sa bisan unsa nga kalibutanong “mapulapula nga linat-an” (Genesis 25:30) aron sa pagsiguro sa mga panalangin sa Dios alang sa atong mga kaugalingon ug sa atong mga anak alang sa mga hererasyong moabut.

icon sa personal nga pagtuon

Mga Ideya alang sa Personal nga Pagtuon sa Kasulatan

Genesis 24

Ang kaminyoon mahinungdanon sa mahangturong plano sa Dios.

Karon daghang mga tawo naghimo sa kaminyoon nga usa ka ubos nga prayoridad o gani naghunahuna niini nga usa ka palas-anon. Si Abraham adunay lahi nga panan-aw––ngadto kaniya, ang kaminyoon sa iyang anak nga lalaki nga si Isaac usa ka hilabihan ka dako og importansya. Ngano sa imong hunahuna importante kaayo kini kaniya? Samtang ikaw nagbasa sa Genesis 24, paghunahuna mahitungod sa importansya sa kaminyoon diha sa plano sa Dios sa kaluwasan. Mahimo usab nimong basahon ang kang Elder D. Todd Christofferson nga mensahe “Nganong Kaminyoon, Nganong Pamilya” (Liahona, Mayo 2015, 50–53) ug hunahunaa ngano nga “ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo” (pahina 52).

Ang mga pangutana sama sa mosunod mahimong makatabang kanimo sa paghunahuna sa ubang importante nga mga baruganan dinhi niini nga kapitulo:

Genesis 24:1–14. Unsa ang gibuhat ni Abraham ug sa iyang sulugoon aron sa pag-apil sa Ginoo diha sa ilang mga paningkamot sa pagpangita og asawa alang ni Isaac?

Genesis 24:15–28, 55–60. Unsa nga mga kalidad ang imong nakita ni Rebeca nga imong gustong sundon?

Unsa ang uban nga mga panabut ang imong nakaplagan?

Tan-awa usab sa Doktrina ug mga Pakigsaad 131:1–4; “Ang Pamilya: Usa ka Pamahayag ngadto sa Kalibutan,” ChurchofJesusChrist.org.

Genesis 25:29–34

Ako makapili tali sa diha-diha dayon nga katagbawan ug sa mga butang nga mas dako og bili.

Sa kultura ni Abraham, ang kamagulangan nga anak nga lalaki sa pamilya kasagaran nagdawat sa posisyon sa pagkapangulo ug pribilehiyo, nga gitawag og katungod sa pagkapanganay. Kini nga anak nga lalaki makadawat og mas dako nga panulundon gikan sa iyang mga ginikanan, uban sa mas dako nga mga responsibilidad alang sa pag-amuma sa nahibilin sa pamilya.

Samtang ikaw nagbasa sa Genesis 25:29–34, hunahunaa nganong si Esau nahimong andam unta nga motugyan sa iyang katungod sa pagkapanganay agi og ilis alang sa usa ka tingkaon. Unsa nga mga leksyon ang imong nakaplagan alang sa imong kaugalingon dinhi niini nga asoy? Sama pananglit, aduna bay bisan unsa nga “mapulapula nga linat-an” nga nakapalinga kanimo gikan sa mga panalangin nga mga labing bililhon nganha kanimo? Unsa ang imong gibuhat aron sa paghatag og gibug-aton ug pagpasalamat niini nga mga panalangin?

Tan-awa usab sa Mateo 6:19–33; 2 Nephi 9:51; M. Russell Ballard, “Ang Mahinungdanon Mao ang Molungtad og DugayWhat Matters Most Is What Lasts Longest,” Liahona, Nob. 2005, 41–44.

Genesis 26:1–5

Ang pakigsaad nga sama sa kang Abraham gihatag pag-usab pinaagi ni Isaac.

Ang pakigsaad nga gihimo sa Dios uban ni Abraham gituyo nga magpadayon ngadto sa daghang mga henerasyon, busa ang kang Abraham ug Sara nga kabilin sa paghupot sa pakigsaad kinahanglang ipasa ngadto ni Isaac, Jacob, ug sa ubang matinud-anong mga babaye ug mga lalaki taliwala sa ilang kaliwatan. Samtang ikaw nagbasa sa Genesisi 26:1–5, pangita alang sa pipila ka mga panalangin sa pakigsaad nga gihisgutan sa Dios. Unsa ang imong nakat-unan mahitungod sa Dios gikan niini nga mga bersikulo?

Genesis 26:18–25, 32–33

Si Jesukristo mao ang atabay sa buhi nga tubig.

Imong mamatikdan nga ang mga atabay ug mga tubod ug ubang mga tinubdan sa tubig adunay importanting mga tahas diha sa daghang mga istorya sa Daang Tugon. Kini dili ikatingala, tungod kay kadaghanan niini nga mga istorya nahitabo sa uga kaayo nga mga dapit. Samtang ikaw nagbasa sa Genesis 26 mahitungod sa atabay ni Isaac, pamalandunga unsa ang simbolo sa tubig diha sa mga kasulatan. Unsa nga mga panabut ang imong makaplagan mahitungod sa espiritwal nga mga atabay sa “buhi nga tubig”? (tan-awa sa Juan 4:10–15). Sa unsa nga paagi ikaw nagkalot sa espiritwal nga mga atabay sa imong kinabuhi? Sa unsa nga paagi ang Manluluwas sama sa buhi nga tubig nganha kanimo? Hinumdumi nga “gitabunan” sa mga Filistihanon ang mga atabay (tan-awa sa Genesis 26:18). Aduna bay bisan unsa sa imong kinabuhi nga nagtabon sa imong mga atabay sa buhi nga tubig?

usa ka karaang atabay

Usa ka atabay sa karaang Beer-seba, diin si Abraham ug Isaac mikalot og mga atabay.

Genesis 27

Sayop ba si Rebeca ug Jacob sa paglingla ni Isaac?

Wala kita mahibalo sa mga rason nga nagpaluyo sa paagi ni Rebeca ug Jacob sa pagkuha sa panalangin alang ni Jacob. Makatabang ang paghinumdom nga ang Daang Tugon ingon nga kita karon aduna dili kompleto (tan-awa sa Moises 1:23, 41). Tingali adunay impormasyon nga nawala gikan sa orihinal nga mga rekord nga mopasabut unsay ingon og nagsamok kanato. Hinoon, kita nahibalo nga kadto kabubut-on sa Dios alang ni Jacob sa pagdawat sa panalangin gikan ni Isaac tungod kay si Rebeca dihay pagpadayag nga si Jacob mao ang magmando ibabaw ni Esau (tan-awa sa Genesis 25:23). Human si Isaac midawat nga iyang napanalanginan hinoon si Jacob kay ni Esau, siya nanghimatuod nga si Jacob “mabulahan” (Genesis 27:33)––nagsugyot nga ang kabubut-on sa Dios pagatumanon.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Genesis 24:2–4, 32–48.Misugo si Abraham og usa ka kasaligan nga sulugoon sa pagpangita og asawa alang ni Isaac, ug ang sulugoon nakigsaad kang Abraham nga siya mobuhat. Giunsa pagpakita sa sulugoon ni Abraham ang pagkamatinud-anon sa paghupot sa iyang pakigsaad? Unsaon nato pagsunod ang iyang ehemplo?

Genesis 24:15–28, 55–60.Ang imong pamilya makatan-aw niini nga mga bersikulo alang sa mga hiyas nga mihimo ni Rebeca nga usa ka takus nga mahangturong kauban alang ni Isaac. Awhaga ang mga sakop sa pamilya sa pagpili og usa niini nga mga hiyas nga ilang gibati nga kinahanglan nilang palambuon.

Genesis 25:19–34; 27.Sa pagribyu sa mga istorya kon giunsa ang katungod sa pagkatawo ug mga panalangin ni Esau naadto hinoon ni Jacob, ikaw makasulat og mga kapahayag gikan sa “Jacob ug Esau” (sa Mga Istorya sa Daang Tugon) diha sa lain nga gilis sa mga papel. Ang mga sakop sa pamilya makatrabaho og dungan sa pagbutang sa mga kapahayag sa hustong pagkasunod-sunod.

Samtang ikaw maghisgot ni Esau nga nagbaligya sa iyang katungod sa pagkapanganay, mahimo kang makigsulti mahitungod sa unsay labing importante ngadto sa imong pamilya, sama sa inyong mga relasyon ngadto sa Langitnong Amahan ug ni Jesukristo. Tingali ang mga sakop sa pamilya makakaplag og mga butang o mga litrato nga nagrepresentar sa unsay ilang gihunahuna nga may mahangturong bili. Hangyoa sila sa pagpasabut kon nganong ilang gipili kadto nga mga butang.

Genesis 26:3–5.Aron sa pagtabang sa imong pamilya sa pagsabut sa pakigsaad nga sama sa kang Abraham, ikaw makadapit kanila sa pagpangita sa mga saad nga gihulagway niini nga mga bersikulo. Nganong importante alang kanato nga mahibalo mahitungod niini nga mga saad karon? (tan-awa sa “Mga Hunahuna nga Hinumduman: Ang Pakigsaad,” dinhi niini nga kapanguhaan).

Genesis 26:18–25, 32–33.Nganong importante ang mga atabay? Sa unsa nga paagi si Jesukristo sama sa usa ka atabay sa tubig?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Gisugyot nga awit: “Pilia ang Matarung,” Mga Himno, nu. 146.

Pagpalambo sa Personal nga Pagtuon

Pagmemorya og kasulatan. Si Elder Richard G. Scott mitudlo, “Ang namemorya nga kasulatan mao ang higalang molahutay nga dili magkahuyang sa paglabay sa panahon” (“Ang Gahum sa Kasulatan,” Liahona, Nob. 2011, 6).

Esau ug Jacob

Esau Sells His Birthright to Jacob [Esau Nagbaligya sa Iyang Katungod sa Pagkapanganay ngadto ni Jacob], ni Glen S. Hopkinson