Paghulagway ni Abraham ug Sara, ni Dilleen Marsh

Pebrero 7–13

Genesis 12–17; Abraham 1–2

“Mahimo nga usa ka Labaw nga Sumusunod sa Pagkamatarung”

Samtang ikaw nagbasa mahitungod ni Abram ug Sarai (sa kadugayan gitawag og Abraham ug Sara) ug sa ilang pamilya, pamalandonga giunsa sa ilang mga ehemplo pagdasig kanimo. Irekord ang imong mga impresyon mahitungod sa unsa ang imong mabuhat nga “mahimo nga usa ka labaw nga sumusunod sa pagkamatarung” (Abraham 1:2).

Irekord ang Imong mga Impresyon

Tungod sa pakigsaad nga gihimo sa Dios uban kaniya, si Abraham gitawag og “ang amahan sa matinud-anon” (Doktrina ug mga Pakigsaad 138:41) ug “ang Higala sa Dios” (Santiago 2:23). Minilyon nagpasidungngog kaniya karon isip ilang personal nga katigulangan, ug ang uban gisagop ngadto sa iyang pamilya pinaagi sa pagkakabig sa ebanghelyo ni Jesukristo. Gani si Abraham sa iyang kaugalingon mismo nagagikan sa gubot nga pamilya––ang iyang amahan kinsa mibiya sa tinuod nga pagsimba sa Dios, misulay sa paghalad ni Abraham ngadto sa mini nga mga dios-dios. Bisan pa niini, ang tinguha ni Abraham mao ang “mahimo nga usa ka labaw nga sumusunod sa pagkamatarung” (Abraham 1:2), ug ang asoy sa iyang kinabuhi nagpakita nga ang Dios mitamud sa iyang tinguha. Ang kinabuhi ni Abraham nagbarug isip usa ka pagpamatuod nga dili igsapayan unsa pa ang kasaysayan sa pamilya sa tawo, ang umaabut mahimong mapuno sa paglaum.

Mga Ideya alang sa Personal nga Pagtuon sa Kasulatan

Abraham 1:1–19

Ang Ginoo mopanalangin kanako tungod sa akong hugot nga pagtuo ug matarung nga mga tinguha.

Sama sa kadaghanan kanato, si Abraham mipuyo sa usa ka dautan nga dapit, apan gitinguha niya nga mahimong matarung. Gitudlo ni Presidente Dallin H. Oaks ang importansya sa pagbaton og matarung nga mga tinguha: “Ingon nga kini importante nga mawala ang matag tinguha sa pagpakasala, ang mahangturong kinabuhi nagkinahanglan pa og dugang. Aron makab-ot ang atong mahangturong padulngan, kita magtinguha ug maningkamot sa pagbaton og mga kinaiya nga gikinahanglan aron mamahimong usa ka mahangturong binuhat. … Kon kini mora og lisud kaayo—ug sa pagkatinuod dili kini sayon alang ni bisan kinsa kanato—nan atong sugdan uban sa usa ka tinguha alang niana nga mga kinaiya ug mangayo og tabang sa atong mahigugmaon nga Langitnong Amahan kalabut sa atong mga pagbati.[tan-awa sa Moroni 7:48]” (“Tinguha,” Liahona, Mayo 2011, 44–45). Samtang ikaw nagbasa sa Abraham 1:1–19, hunahunaa kon giunsa niini nga mga bersikulo sa pagpakita unsa ang gitudlo ni Presidente Oaks. Ang mga pangutana nga sama niini mahimong makatabang:

• Unsa ang gitinguha ug gipaningkamot ni Abraham? Unsa ang iyang gibuhat aron sa pagpakita sa iyang hugot nga pagtuo?

• Unsa ang imong mga tinguha? Aduna bay usa ka butang nga imong gibati nga kinahanglan nimong buhaton sa pagputli sa imong mga tinguha?

• Unsa ang mga hagit nga giatubang ni Abraham tungod sa iyang matarung nga mga tinguha? Giunsa siya pagtabang sa Dios?

• Unsa nga mensahe aduna kini nga mga bersikulo alang niadtong kinsa nga mga sakop sa pamilya wala magtinguha og pagkamatarung?

Tan-awa usab sa Mateo 7:7; “Deliverance of Abraham [Pagkaluwas ni Abraham]” (video), ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org).

Abraham 2:10–11

Kinsa ang naapil sa Pakigsaad sama kang Abraham?

Sa dihang ang Ginoo mihimo sa Iyang pakigsaad uban ni Abraham, misaad Siya nga kini nga pakigsaad mopadayon diha sa kaliwatan, o “binhi” ni Abraham, ug nga “kutob sa modawat niini nga Ebanghelyo … pagaiphon nga imong binhi” (Abraham 2:10–11). Kini nagkahulugan nga ang mga saad sa pakigsaad sama kang Abraham magamit ngadto sa mga miyembro sa Simbahan karon, matinuod man nga mga kaliwat ni Abraham o gisagop ngadto sa iyang pamilya pinaagi sa bunyag ug pagkanakabig ngadto sa ebanghelyo ni Jesukristo (tan-awa sa Mga Taga-Galacia 3:26–29; Doktrina ug mga Pakigsaad 132:30–32). Aron maihap isip binhi ni Abraham, ang usa ka tawo kinahanglan gayud nga mosunod sa mga balaod ug mga ordinansa sa ebanghelyo.

Genesis 12:1–3; 13:15–16; 15:1–6; 17:1–8, 15–22; Abraham 2:8–11

Ang pakigsaad sama kang Abraham nagpanalangin kanako ug sa akong pamilya.

Tungod kay ang tanan nga mga miyembro sa Simbahan nalakip sa pakigsaad sama kang Abraham, mahimo kang mogahin og pipila ka panahon nga mamalandong nganong kini nga pakigsaad makahuluganon sa imong kinabuhi. Irekord ang imong mga hunahuna mahitungod sa mosunod nga mga pangutana:

Unsaon sa mga saad nga makaplagan sa Abraham 2:8–11 pagpanalangin kanako ug sa akong pamilya? (tan-awa usab sa Genesis 12:1–3; 13:15–16).

Unsa ang akong makat-unan mahitungod sa pakigsaad sama kang Abraham gikan sa Genesis 15:1–6; 17:1–8, 15–22?

Unsa sa ako nadasig sa pagbuhat aron sa pagtabang og tuman sa saad nga ang “tanan nga mga banay sa yuta pagapanalanginan”? (Abraham 2:11).

Mahimo nimong hunahunaon nga ang pipila sa mga yutan-ong mga panalangin nga gisaad ngadto ni Abraham ug Sara, sama sa pagpanunod og usa ka gisaad nga yuta ug mahimong mga ginikanan sa usa ka dakong kaliwatan, adunay mahangturong mga pagkasama. Kini naglakip og panulundon didto sa celestial nga gingharian (tan-awa sa Doktrina ug mga Pakigsaad 132:29) ug mahangturong kaminyoon uban sa mahangturong kaliwatan (tan-awa sa Doktrina ug mga Pakigsaad 131:1–4; 132:20–24, 28–32). Kini “dinha sa templo,” gitudlo ni Presidente Russell M. Nelson, nga “kita magdawat sa atong labing taas nga mga panalangin, isip ang binhi ni Abraham, Isaac, ug Jacob” (“Ang Pagpundok sa Nagkatibulaag nga Israel,” Liahona, Nob. 2006, 80).

Tan-awa usab sa Hubad ni Joseph Smith, Genesis 15:9–12; 17:3–12 (sa Giya ngadto sa mga Kasulatan), “Abraham, pakigsaad sama kang”; “Mga Hunahuna nga Hinumduman: Ang Pakigsaad,” dinhi niini nga kapanguhaan.

Mga Ideya alang sa Pamilya nga Pagtuon sa Kasulatan ug Family Home Evening

Genesis 13:5–12.Unsa ang gibuhat ni Abraham sa paghimo og kalinaw sa iyang pamilya? Tingali ang imong pamilya makabansay sa pagkamaghuhusay sama ni Abraham pinaagi sa pagrole-play kon unsaon sa pagsulbad sa mga away nga malagmit mahitabo sa imong pamilya.

Genesis 13:16; 15:2–6; 17:15–19.Unsaon nimo pagtabang sa imong pamilya sa pagsabut sa saad sa Ginoo niini nga mga bersikulo––nga bisan tuod si Abraham ug Sara wala pay mga anak, ang ilang kaliwatan mahimong sama kadaghan sa abug sa yuta, sa mga bitoon sa langit, o sa balas sa baybayon? (tan-awa usab sa Genesis 22:17). Tingali makapakita ka sa mga sakop sa pamilya og usa ka sudlanan sa balas, makapatan-aw sa mga bitoon, o makagamit sa hulagway nga nag-uban niini nga latid [outline]. Unsaon nato pagsalig sa mga saad sa Dios bisan kon kini ingon og imposible?

Genesis 14:18–20.Unsa ang atong makat-unan mahitungod ni Melchizedek gikan sa Hubad ni Joseph Smith, Genesis 14:25–40? (sa Giya ngadto sa mga Kasulatan; tan-awa usab sa Alma 13:13–19). Sa unsa nga paagi kita “[makatukod] og pagkamatarung” sama sa gihimo ni Melchizedek? (bersikulo 36). Unsa pa ang mahitungod sa pagpangalagad ni Melchizedek ang nakadasig kanato?

Melchizedek Blesses Abraham [Melchizedek Nagpanalangin ni Abraham], ni Walter Rane

Genesis 16.Ang pagbasa mahitungod ni Agar mahimong usa ka oportunidad sa paghisgot kon unsaon sa Ginoo pagtabang kanato kon kita gidaot. Mahimo nimong ipasabut nga ang “Ismael” nagkahulugan nga ang “Dios naminaw.” Kanus-a nato gibati nga ang Ginoo naminaw ug mitabang kanato sa dihang kita gidaot? (tan-awa sa Genesis 16:11).

Alang sa dugang nga mga ideya sa pagtudlo sa mga bata, tan-awa sa latid karong semanaha sa Dali, Sunod Kanako—Alang sa Primary.

Gisugyot nga awit: “Gusto ko nga Mosunod sa Ebanghelyo,” Songbook sa mga Bata, 72.

Pagpalambo sa Atong Pagtudlo

Pagkamaanaa ug dali nga maduol. Ang pipila sa labing maayo nga mga higayon sa pagtudlo magsugod sa usa ka pangutana o kabalaka diha sa kasingkasing sa usa ka sakop sa pamilya. Pahibaloa ang imong mga sakop sa pamilya pinaagi sa imong mga pulong ug mga lihok nga ikaw matinguhaon sa pagpamati kanila. (Tan-awa sa Pagtudlo sumala sa Pamaagi sa Manluluwas, 16.)

Ang Dios misaad nga ang kaliwatan ni Abraham ug Sara modaghan “ingon sa mga bitoon sa langit” (Genesis 22:17). Pondering God’s Promise [Namalandong sa Saad sa Dios], ni Courtney Matz.