Xjalam-uuch laj Eliseo naq naxk’uteb’ li kawaay re xam chiru xmoos, © Review & Herald Publishing/licensed from goodsalt.com

4–10 julio

2 Reyes 2–7

“Wan jun profeet arin Israel”

Li kok’ k’anjel wankeb’ sa’ li tusleb’ aatin a’in k’uub’anb’ileb’ re aatenq’ankil chixtawb’al aana’leb’ laa’at. Rik’in li tzolok ut li tijok, naru nakataw aana’leb’ re taatenq’aheb’ li kok’al nakatzoleb’.

Tz’iib’a li nakak’oxla

Xkanab’ankileb’ chi wotzok

Re xwaklesinkileb’ xch’ool li kok’al chixwotzb’al li neke’xnaw chirix li profeet aj Eliseo, patz’ reheb’ naq te’xyiib’ xjalam-uuch junaq li na’leb’ kixb’aanu.

Xk’utb’al li tzol’leb’: Kok’al toj ka’ch’ineb’ xyu’am

2 Reyes 4–5

Li Dios naru naxb’aanu sachb’a-ch’oolej sa’ lin yu’am.

Rik’in li profeet aj Eliseo, li Qaawa’ kirosob’tesiheb’ naab’al li kristiaan rik’in sachb’a-ch’oolej. Tenq’aheb’ li kok’al chixk’eeb’al reetal li sachb’a-ch’oolej naxb’aanu li Qaawa’ sa’ xyu’ameb’.

Kok’ k’anjel naru chi b’aanumank

• Wotz jun malaj wiib’ oxib’ li sachb’a-ch’oolej tz’iib’anb’il resil sa’ 2 Reyes 4–5 (chi’ilmanq “Elias y Eliseo” ut “El profeta Eliseo” sa’ Relatos del Antiguo Testamento). Patz’ reheb’ li kok’al naq te’xwotz k’a’ru nawulak chiruheb’ sa’eb’ li seraq’ a’in. Patz’ reheb’ naq te’xwotz wi’chik li seraq’ chirib’ileb’ rib’.

• Ch’olob’ xyaalal naq li Qaawa’ naru naroksi lix wankil re xb’aanunkil ninqi k’a’aq re ru li toohe’xtenq’a. Eb’ a’an sachb’a-ch’oolej neke’qaye re. Wotz chan ru naq li Qaawa’ naxk’ut xrahom choq’ aawe chi nim malaj chi ka’ch’in. B’ichahomaq jun li b’ich li na’aatinak chirix lix rahom li Dios, maare “Raabʼilin xbʼaan li Dios saʼ choxa” (B’ichleb’aal choq’ reheb’ li Kok’al, 16–17). Patz’ reheb’ li kok’al naq te’xwotz chan ru neke’xnaw naq raab’ileb’ xb’aan li qaChoxahil Yuwa’.

2 Reyes 5:1–15

Naru ninsik’ ru xb’aanunkil li naxtaqla li Dios rik’in lix profeet.

Choq’ re laj Naaman kich’a’ajko’ xpaab’ankil naq li profeet aj Eliseo kixye re chan ru naq taak’iraaq li xox chirix. K’oxla chan ru taatenq’aheb’ li kok’al chixtawb’al ru k’a’ru li osob’tesiik nak’ulman xb’aan li paab’ank.

Kok’ k’anjel naru chi b’aanumank

• Wotz li seraq’ chirix laj Naaman (chi’ilmanq 2 Reyes 5:9–14; “El profeta Eliseo” sa’ Relatos del Antiguo Testamento; chi’ilmanq ajwi’ lix jalam-uuch laj Naaman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Jultika naq laj Naaman sa’ xtiklajik ink’a’ kiraj atink sa’ li nima’ Jordan, us ta laj Eliseo kixye re naq a’an taak’irtesinq lix yajel. Seraq’i junaq hoonal b’ar wi’ ink’a’ mas xawaj xb’aanunkil li us, ut tenq’aheb’ li kok’al chixk’oxlankil xnumsihomeb’ a’an. Chirix a’an, wotz chan ru naq ki’osob’tesiik laj Naaman naq kixsik’ ru xb’aanunkil li us.

• Yaab’asi 2 Reyes 5:13 reheb’ li kok’al ut ch’olob’ naq laj Naaman kitenq’aak xb’aaneb’ lix moos chixpaab’ankil li profeet aj Eliseo. Tenq’aheb’ li kok’al chixk’oxlankil chan ru te’xtenq’aheb’ li ramiiw malaj lix junkab’aleb’ chirab’inkil ut chixpaab’ankil li profeet.

2 Reyes 6:8–17

Li Qaawa’ yoo chiwilb’al.

Naq lix moos laj Eliseo kiril naq ke’sute’ xb’aan lix ch’uut aj pleet Siria, numtajenaq naq kixuwak. A’b’anan, laj Eliseo kixye re “matxuwak” xb’aan naq li Qaawa’ wan rik’ineb’ (2 Reyes 6:16).

Kok’ k’anjel naru chi b’aanumank

• Yaab’asi 2 Reyes 6:15 reheb’ li kok’al, malaj ye rik’in aawaatin re naq te’xtaw ru. Patz’ reheb’ li kok’al naq te’xk’oxla naq sutsuukeb’ xb’aan jun nimla ch’uut aj pleet rik’ineb’ li kawaay ut li kareet, jo’ kiril lix moos laj Eliseo. K’a’ raj ru te’reek’a? K’a’ raj ru te’xb’aanu? Patz’ reheb’ naq te’xmutz’ li ru, ut laa’at taayaab’asi 2 Reyes 6:16–17. Naq tatwulaq b’ar wi’ naxye “kixte xsa’ ru,” patz’ reheb’ li kok’al naq te’xte li ru. Ch’olob’ chiruheb’ k’a’ru kiril lix moos laj Eliseo li kixkoleb’ rix. Wotz chan ru naq nakanaw naq li Qaawa’ yoo chiqilb’al.

• B’ichahomaq jun li b’ich li naxye naq li Dios nokoril, maare li xb’een raqal re “Ex kok’al, li Dios texril” (Eb’ li B’ich, 51). Jal b’ayaq ru li raatinul li b’ich rik’ineb’ xkab’a’ li kok’al re xjultikankil wi’chik naq yookeb’ chi ile’k xb’aan li Dios.

Xk’utb’al li tzol’leb’: Kok’al ak ninqeb’

2 Reyes 4–5

Li Dios naru naxb’aanu sachb’a-ch’oolej sa’ lin yu’am.

Sa’ lix k’anjel, laj Eliseo kixk’irtesiheb’ ut kirosob’tesiheb’ naab’al li kristiaan. Chan ru naq eb’ li sachb’a-ch’oolej li wankeb’ sa’ 2 Reyes 4–5 naru naxtenq’aheb’ li kok’al chixk’eeb’al reetal li ruq’ li qaChoxahil Yuwa’ sa’ lix yu’ameb’?

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a chiru li pizarron chixjunileb’ li sachb’a-ch’oolej naru neke’xk’oxla sa’ li loq’laj hu. Chirix a’an, k’e xhoonaleb’ chirilb’al 2 Reyes 4–5 ut xtz’iib’ankil wiib’ oxib’ chik (chi’ilmanq 2 Reyes 4:1–7, 14–17, 32–35, 38–41, 42–44; 5:10–14). K’a’ru neke’xk’ut li sachb’a-ch’oolej a’in chirix li k’a’ru nareek’a li qaChoxahil Yuwa’ choq’ qe?

• Patz’ reheb’ li kok’al naq te’aatinaq chirix k’a’ru jun li sachb’a-ch’oolej. Wi neke’raj xtenq’, naru te’ril “Sachb’a-ch’oolej” sa’ li K’utul Raqal reheb’ li Loq’laj Hu. Patz’ reheb’ naq te’xwotz junjunq li sachb’a-ch’oolej kixb’aanu li Jesus. Wotz chan ru nakawil lix wankil li Dios sa’ laa yu’am. Naru nakat-aatinak chirix li kok’ sachb’a-ch’oolej jo’ li tuqtuukilal, li yu’am rajlal kutan, malaj laa tenq’ankil nakak’ul sa’ laa k’anjel wulaj wulaj. Patz’ reheb’ li kok’al naq te’xwotz li sachb’a-ch’oolej neke’xk’ul sa’ xyu’ameb’, maare ninq malaj kok’.

2 Reyes 5:1–15

Naru ninsik’ ru wank chi tiik, chi tuulan, ut tin’ab’inq.

Laj Naaman kiraj naq taak’iraaq lix xox, a’b’an ink’a’ jo’ kixye laj Eliseo re: “Ayu ut atin wuqub’ sut sa’ li nima’ Jordan” (2 Reyes 5:10). K’oxla chan ru taawoksi li seraq’ a’in re xtzolb’aleb’ li kok’al chirix li paab’aal chirix li Jesukristo, li tuulanil, ut li ab’ink chiru.

Kok’ k’anjel naru chi b’aanumank

• Tz’iib’a paab’aal, tuulanil, ut ab’ink chiru chiru li pizarron, ut patz’ reheb’ li kok’al k’a’ru naraj neke’xye li aatin a’an (chi’ilmanq Leales a la fe, 90–92, 103–104, 126–127). Patz’ reheb’ li kok’al naq te’ril 2 Reyes 5:9–14. Naru ajwi’ nakak’ut xcha’al li video “Naamán y Eliseo” (ChurchofJesusChrist.org). Chan ru naq laj Naaman kipaab’an, kituulano’, ut ki’ab’in chiru li Qaawa’? K’a’ut naq aajel ru xtawb’aleb’ li chaab’ilal a’in?

• Patz’ reheb’ li kok’al naq te’xwotz resil junaq hoonal b’ar wi’ ke’tenq’aak xb’aan junaq ramiiw chixsik’b’al ru li us. Wotz ajwi’ junaq aanunmsihom laa’at. Ilomaq 2 Reyes 5:10–13 re xnawb’al chan ru naq laj Naaman kitenq’aak xb’aaneb’ lix moos chi ab’ink chiru li profeet. K’a’ru taqab’aanu anajwan re xtenq’ankil qib’ chiqib’il qib’ chixtaaqenkil li qaprofeet?

• Patz’ reheb’ li kok’al naq te’xtz’aqob’resi ru li perel re kok’ k’anjel ut te’xwotz rik’ineb’ lix junkab’al malaj junaq ramiiweb’ jun na’leb’ xe’xtzol sa’ li seraq’ chirix laj Naaman sa’ 2 Reyes 5:1–15.

2 Reyes 6:8–17

Moko injunes ta wankin.

Eb’ li kok’al maare neke’reek’a naq chanchaneb’ lix moos laj Eliseo, chi ink’a’ neke’xnaw chan ru te’xnumsiheb’ li ch’a’ajkilal neke’xtaw. Naru nakawoksi li seraq’ wan sa’ 2 Reyes 6:8–17 re xk’utb’al chiruheb’ naq “me’xuwak” xb’aan naq moko neke’kanab’aak ta xjuneseb’ xb’aan li Qaawa’.

Kok’ k’anjel naru chi b’aanumank

• Ilomaq 2 Reyes 6:15–17. Patz’ re jun reheb’ li kok’al naq tixk’utb’esi naq a’an lix moos laj Eliseo ut eb’ lix komon te’xpatz’ re k’a’ru kireek’a naq li ch’uut aj pleet re Siria ke’xsut rix li tenamit malaj naq kiril lix ch’uut aj pleet li Dios. Aatinan rik’ineb’ li kok’al chirix li hoonal li maare neke’reek’a wi’ naq xjunes wankeb’ naq neke’xyal xyu’aminkil li evangelio. Chan ru nokoxtenq’a li Qaawa’ chixnawb’al naq moko qajunes ta wanko?

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz jo’q’e xk’ehomeb’ reetal li ruq’ li Dios sa’ xyu’ameb’. Waklesiheb’ xch’ool chixpatz’b’al reheb’ li komon sa’ lix junkab’aleb’ naq te’xwotz ajwi’ xnumsihomeb’.

Xkawresinkil qib’ jo’ aj k’utunel

Eb’ li kok’al neke’tzolok chi jalan jalanq ru. “Q’axal chaab’il xyalom aaq’e chixtzolb’aleb’ li kok’al naq jalan jalanq paay chan ru nakatzoleb’,” rik’in roksinkil li seraq’, li k’a’ru ilb’il, ut li wajb’ (Li k’utuk jo’ li Kolonel, 25).