Laj Elias naxwech’eb’ laj tij re laj Bahal, xb’aan laj Jerry Harston

27 junio–3 julio

1 Reyes 17–19

“Wi li Qaawa’ a’an li tz’aqal Dios, paab’omaq”

Jwal neke’wulak li esil chiruheb’ li kok’al. Tenq’aheb’ li kok’al chixk’eeb’aleb’ reetal li na’leb’ sa’eb’ li seraq’ sa’ 1 Reyes 17–19 li tixkawob’resi xpaab’aaleb’ chirix li Jesukristo.

Tz’iib’a li nakak’oxla

Xkanab’ankileb’ chi wotzok

K’ut chiruheb’ li kok’al li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Patz’ reheb’ naq te’xwotz k’a’ru neke’xnaw chirixeb’ li seraq’ neke’k’utb’esiman sa’eb’ li jalam-uuch. K’a’ru naqatzol sa’eb’ li seraq’ a’in?

Xk’utb’al li tzol’leb’: Kok’al toj ka’ch’ineb’ xyu’am

1 Reyes 17

Li Qaawa’ narosob’tesiheb’ li wankeb’ xpaab’aal.

Sa’ 1 Reyes 17 wankeb’ naab’al reetalil xnimal paab’aal. Xb’aan xnimal lix paab’aal, laj Elias kich’olaniik xb’aaneb’ li tz’ik chiru li we’ej, jun xmalka’an ut li ralal ke’tamresiik xtz’ekemq, ut laj Elias kixwaklesi chaq sa’ xyanqeb’ li kamenaq li ralal li xmalka’an.

Kok’ k’anjel naru chi b’aanumank

• K’uteb’ jalam-uuch malaj k’a’aq re ru li naxk’am rib’ rik’ineb’ li seraq’ re 1 Reyes 17, jo’ li tz’ik, kaxlan wa, malaj jun ch’ina al. Wotzeb’ li seraq’ a’in rik’ineb’ li kok’al (“El profeta Elias” sa’ Relatos del Antiguo Testamento naru natenq’an), ut patz’ reheb’ naq te’xtaw li jalam-uuch malaj li k’a’aq re ru li naxk’am rib’ rik’in li junjunq chi seraq’. Jultika naq laj Elias ut li xmalka’an ke’wan xpaab’aal chirix li Jesukristo ut ke’xk’ul rosob’tesinkil.

• Tenq’aheb’ li kok’al chixk’oxlankil chan ru naru neke’xk’ut xpaab’aal chirix li qaChoxahil Yuwa’ ut li Jesukristo, li naraj naxye naq neke’xpaab’eb’ ut neke’xkanab’ rib’ sa’ ruq’eb’. B’ichahomaq jun li b’ich chirix li paab’aal, maare “Yo’yo lin Dios, ninnaw” (B’ichleb’aal choq’ reheb’ li Kok’al, 8).

1 Reyes 18:17–39

Naru ninsik’ ru xtaaqenkil li Jesukristo.

Laj Elias kixwaklesi xch’ool li tenamit Israel re naq te’xsik’ ru xtaaqenkil li Jesukristo. Tenq’aheb’ li kok’al chirilb’al naq naru neke’xsik’ ru ajwi’ a’an.

Kok’ k’anjel naru chi b’aanumank

• Ch’olob’ chiruheb’ li kok’al naq eb’ li kristiaan sa’ lix kutankil laj Elias ink’a’ jwal neke’raj xtaaqenkil li Qaawa’. Wotz chan ru naq laj Elias kixb’oqeb’ chixsik’b’al ru xtaaqenkil li Qaawa’, li natawman sa’ 1 Reyes 18:17–39 (chi’ilmanq ajwi’ “Elias y los sacerdotes de Baal” sa’ Relatos del Antiguo Testamento). Ch’olob’ chiruheb’ li kok’al k’a’ut naq nakasik’ ru xtaaqenkil li Jesukristo, ut patz’ reheb’ a’an k’a’ut naq neke’xsik’ ru xtaaqenkil.

• Laj Elias kixye re li tenamit: “Wi li Qaawa’ a’an li tz’aqal Dios, paab’omaq” (1 Reyes 18:21). K’a’ru naraj naxye xpaab’ankil li Jesukristo? Tenq’aheb’ li kok’al chixk’oxlankil k’a’ru te’xb’aanu re te’xtaaqe li Jesukristo, ut patz’ reheb’ naq te’xyiib’ xjalam-uucheb’ naq yookeb’ chixb’aanunkil li k’a’aq re ru a’an.

  

  Naru naqasik’ ru xtaaqenkil li Jesukristo.

1 Reyes 19:9–12

Li Santil Musiq’ej nikinraatina chi q’un xyaab’ xkux.

Chi ch’olob’anb’il b’ayaq chiruheb’, li kok’al toj kok’eb’ naru neke’xk’e reetal lix wankil li Musiq’ej sa’ xyu’ameb’. K’oxla chan ru taatenq’aheb’.

Kok’ k’anjel naru chi b’aanumank

• K’os ru li seraq’ wan sa’ 1 Reyes 19:9–12 choq’ reheb’ li kok’al, ut yaab’asiheb’ li raqal 11–12. Patz’ reheb’ naq te’xk’utb’esi li kawil iq’, li hiik, ut li xam. Chirix a’an, patz’ reheb’ naq te’chunlaaq chi timil timil naq yooqat chirilb’al chi timil lix raqik li raqal 12: “chirix chik li xam aka’ chik li mayuus, timil timil ki’eek’ank.” Patz’ reheb’ naq te’xyal aatinak chi timil ut chi ch’anch’o. Seraq’i reheb’ jo’q’e aaweek’ahom lix wankil li Santil Musiq’ej.

• Tenq’aheb’ li kok’al chixk’eeb’al reetal jo’q’e maare xe’reek’a lix wankil li Santil Musiq’ej. Ab’ihomaq malaj b’ichahomaq jun li b’ich na’aatinak chirix li Jesus, ut patz’ reheb’ k’a’ru neke’reek’a naq neke’xk’oxla a’an. Patz’ reheb’ k’a’ru neke’reek’a sa’ jalan chik kok’ k’anjel b’ar wi’ na’ajman oxloq’ink, maare naq neke’tijok rik’ineb’ lix junkab’al malaj naq neke’tz’aqon sa’ li loq’laj wa’ak. Ch’olob’ naq eb’ li eek’ahom a’an neke’chal chaq rik’in li Santil Musiq’ej. Ye reheb’ li kok’al chan ru naq lix wankil li Santil Musiq’ej narosob’tesi laa yu’am.

Xk’utb’al li tzol’leb’: Kok’al ak ninqeb’

1 Reyes 17:8–16

Naq li Qaawa’ naxpatz’ we naq tinmayejaq, naru tin’ab’inq rik’in paab’aal.

Li xmalka’an aj Sarepta kixkanab’ rib’ sa’ ruq’ li Qaawa’ ut lix profeet, us ta kipatz’e’ re naq tixb’aanu jun nimla mayej. Li seraq’ a’in naru naxtenq’aheb’ li kok’al naq li Qaawa’ naxpatz’ reheb’ naq te’mayejaq.

Kok’ k’anjel naru chi b’aanumank

• Yaab’asi 1 Reyes 17:8–16 reheb’ li kok’al. Patz’ reheb’ naq te’xk’utb’esi li seraq’ naq taawil xka’ sutil. Taakanab’ rilb’al sa’ xyanq li seraq’ ut taapatz’ reheb’ k’a’ raj ru te’reek’a wi ta a’aneb’ laj Elias malaj li xmalka’an. Patz’ reheb’ naq te’xwotz li neke’xtzol sa’ li seraq’ a’in.

• Patz’ re jun reheb’ li kok’al naq tixyiib’ xjalam-uuch chiru li pizarron k’a’ru kixpatz’ li Qaawa’ re li xmalka’an naq tixk’e re laj Elias (chi’ilmanq 1 Reyes 17:12–13). Patz’ re jun chik naq tixyiib’ xjalam-uuch k’a’ru kixk’ul li xmalka’an (chi’ilmanq 1 Reyes 17:15–16). B’ar wan junjunq li k’a’aq re ru li naxpatz’ qe li Qaawa’ naq taqamayeja? Patz’ reheb’ li kok’al naq te’xwotz chan ru naq neke’osob’tesiik xb’aan li mayejak.

1 Reyes 18:17–39

Naru ninsik’ ru xtaaqenkil li Jesukristo.

Eb’ laj Israelita ink’a’ jwal ke’raj xtaaqenkil li Qaawa’. K’oxla chan ru taawaklesi xch’ooleb’ li kok’al re naq te’xteneb’ rib’ sa’ lix k’anjeleb’ jo’ tzolom.

Kok’ k’anjel naru chi b’aanumank

• K’e reheb’ li kok’al junjunq li raqal re 1 Reyes 18:17–39 ut te’xyiib’ jun xjalam-uuch li neke’xye li raqal. Tenq’aheb’ li kok’al chixtawb’aleb’ ru li raqal wi na’ajman ru. Chirix a’an patz’ reheb’ naq te’roksi lix jalam-uucheb’ re naq te’xwotz li seraq’. K’a’ru naxk’ut chiqu li seraq’ a’in chirix li Qaawa’?

• Patz’ reheb’ li kok’al naq te’aatinaq chirixeb’ li hoonal b’ar wi’ tento naq xe’xsik’ ru jun ajwi’ k’a’aq re ru. K’a’ru xtenq’ank reheb’ chixsik’b’al ru li k’a’ru xe’xsik’ ru? Tenq’aheb’ chixk’oxlankil jo’q’e maare te’raj ru xsik’b’al ru ma te’xtaaqe li Jesukristo malaj ink’a’. K’a’ruheb’ li na’leb’ li wankeb’ sa’ 1 Reyes 18:17–39 li naru natenq’ank reheb’ chi sik’ok-u?

1 Reyes 19:9–12

Li Santil Musiq’ej nikinraatina chi q’un xyaab’ xkux.

Sa’ li ruchich’och’ numtajenaq li choqink li naxch’a’ajkob’resi rab’inkil xyaab’ xkux li Santil Musiq’ej. Chan ru taatenq’aheb’ li kok’al chirab’inkil?

Kok’ k’anjel naru chi b’aanumank

• Patz’ reheb’ li kok’al naq te’ab’inq naq taawil 1 Reyes 19:11–12 chi q’un xyaab’ aakux. Patz’ reheb’ naq te’xsik’ 1 Reyes 19 re naq te’xtaw li raqal xawil ru ut te’xtzol k’a’ru yoo chixb’aanunkil laj Elias. Aatinan chirix li k’a’ru tento xe’xb’aanu re naq te’rab’i li yookat chixyeeb’al, ut tenq’aheb’ chixjuntaq’eetankil a’an rik’in li tento taqab’aanu re rab’inkil li “q’unil ut timil xyaab’ xkux” li Musiq’ej. Patz’ reheb’ junjunq li kok’al naq te’ril ru xkomoneb’ chik li raqal sa’ 1 Reyes 19 chi q’un xyaab’ xkuxeb’ ut xkomoneb’ chik te’xsik’eb’ li raqal a’an sa’ li loq’laj hu.

• Wotz reheb’ li kok’al junjunq chik li raqal li neke’xch’olob’ chan ru naq li Musiq’ej na’aatinak qik’in (chi’ilmanq li K’utul Raqal reheb’ li Loq’laj Hu, “Musiq’ank, Musiq’anb’il”). Patz’ reheb’ li kok’al naq te’aatinaq chirix jo’q’e reek’ahomeb’ naq li Santil Musiq’ej kixk’am xb’eheb’ malaj kich’olob’an chiruheb’. K’a’ru yookeb’ chixb’aanunkil? K’a’ru naru naramok qe chirab’inkil li Musiq’ej? Ilomaq Moroni 4:3, ut waklesi xch’ooleb’ li kok’al chixsik’b’al ru jun na’leb’ te’xb’aanu re naq “taaruuq taawanq junelik lix Musiq’ rik’ineb’.”

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla junaq na’leb’ neke’raj xb’aanunkil xb’aan li xe’xtzol anajwan. Naru neke’xk’e junaq xmeta re musiq’ej, re k’a’uxleb’aal, re tib’elej, malaj re komonil wank re te’wulaq mas wi’chik jo’ li Jesukristo.

Xkawresinkil qib’ jo’ aj k’utunel

Tenq’aheb’ li kok’al chixk’eeb’al reetal li Musiq’ej. “Jun reheb’ li k’anjel q’axal aajel ru naru taab’aanu jo’ aj k’utunel a’an xtenq’ankileb’ li kok’al chixk’eeb’aal reetal lix wankil li Santil Musiq’ej. … Tenq’aheb’ [li kok’al] chixk’eeb’al reetal naq juntaq’eet li musiq’ejil reek’ahom rik’in lix wankil li Santil Musiq’ej.” (Li k’utuk jo’ li Kolonel, 11.)