Laj Elias naxwech’eb’ laj tij re laj Bahal, xb’aan laj Jerry Harston

27 junio–3 julio

1 Reyes 17–19

“Wi li Qaawa’ a’an li tz’aqal Dios, paab’omaq”

Naq nakawileb’ ru li loq’laj hu, yookat chixk’anjelankil laa paab’aal, li naxkawresi laa ch’ool ut laa k’a’uxl chirab’inkil li ch’ina xyaab’ xkux li Musiq’ej li q’un na’aatinak (chi’ilmanq 1 Reyes 19:12).

Tz’iib’al li nakak’oxla

Choqinb’il chik lix junkab’al laj Israel. Li junajil ut li usilal ke’wan wi’ chiru rawa’b’ejil laj David ut laj Salomon ak numenaq junxil, ut eb’ lix sumwank rik’in Qaawa’ ak sachb’ileb’ sa’ xch’ooleb’ lix k’ihaleb’ li tenamit. Li awa’b’ejihom re Israel ak jachb’il ru, lajeeb’ reheb’ li teepal ke’wan sa’ li awa’b’ejihom re Israel sa’ xnim li saq’e, ut wiib’ reheb’ li teepal ke’wan sa’ li awa’b’ejihom re Juda sa’ xtz’e li saq’e. Moko sa ta ke’wan li wiib’ chi awa’b’ejihom sa’ li k’a’ru re musiq’ej, jolominb’ileb’ xb’aaneb’ li rey li neke’xq’et lix sumwankeb’ rik’in li Qaawa’ ut li ke’xk’eheb’ li tenamit chixb’aanunkil ajwi’ chi jo’kan (chi’ilmanq 1 Reyes 11–16). A’b’an li q’etok paab’ank jwal nim wi’chik sa’ li awa’b’ejihom sa’ xnim li saq’e, b’ar wi’ li rey aj Ajab ke’xk’eheb’ laj Israel chixloq’oninkil li pak’b’il dios laj Bahal.

Sa’ li ch’a’ajkilal kutan a’in kib’oqe’ laj Elias chi jultikank aatin. Li resilal lix k’anjel naxk’ut chi saqen ru naq li tiikeb’ xch’ool toj naru te’xpaab’ li Qaawa’, us ta sutsuukeb’ xb’aan li maa’usilal. Wan naq li Qaawa’ naxsume li paab’aal a’an rik’in xninqal ru sachb’a-ch’oolej, jo’ rik’in xam li nat’ane’ chaq sa’ choxa. A’b’an naxb’aanu ajwi’ xka’ch’inal ru sachb’a-ch’oolej, jo’ xk’eeb’al li na’ajman ru choq’ re jun xmalka’an tiik chi paab’ank ut lix yum. Ut chi kok’ aj xsa’ naxb’aanu li sachb’a-ch’oolej sa’ junjunqal, ut ka’ajwi’ li ani nak’uluk re naxk’e reetal—maare naq li Qaawa’ naxk’utb’esi rib’ ut li rajom rik’in jun ch’ina xyaab’ kuxej q’un na’aatinak (chi’ilmanq 1 Reyes 19:12).

Re xtzolb’al xkomon chik chirix laj Elias, chi’ilmanq “Elias” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

1 Reyes 17:1–16

Li b’oqok chi mayejak, a’an jun b’oqok chixk’anjelankil lin paab’aal.

Sa’ xtiklajik, maare ch’a’aj xtawb’al ru k’a’ut naq li profeet aj Elias kixpatz’ re li xmalka’an sa’ Sarepta naq tixch’olani naq maji’ nawa’ak a’an ut lix yum li yoo xtz’okajik. A’b’an lix tz’aam laj Elias, a’an jun li osob’tesink choq’ re li ch’ina junkab’al a’in. Ke’raj ru osob’tesiik xb’aan li Qaawa’, ut chi kok’ aj xsa’ li mayejak naxk’e li osob’tesiik—jo’ ajwi’ lix kawresinkil li qapaab’aal.

Naq nakawil li seraq’ a’in, k’oxla k’a’ raj ru kab’aanu wi ta katwan sa’ xna’aj li xmalka’an. K’a’ru nawulak chawu chirix li xmalka’an? K’oxla chan ru naru taak’anjela laa paab’aal—jo’ ajwi’ jo’q’e naru tatmayejaq. Chan ru tatwanq jo’ li xmalka’an a’an?

Chi’ilmanq ajwi’ Mateo 6:25–33; Lukas 4:24–26; Lynn G. Robbins, “El diezmo: Un mandamiento incluso para los más pobres,” Liahona, mayo 2005, 34–36.

1 Reyes 18

“Wi li Qaawa’ a’an li tz’aqal Dios, paab’omaq.”

Maare eb’ laj Israelita ke’xk’oxla naq us raj xloq’oninkil laj Bahal us ta li Qaawa’ kixtaqla, “Miwank jalan chik aadios chiwu laa’in” (Exodo 20:3). Laj Bahal, a’an li dios re kaq-sut-iq’ ut li hab’, ut chirix oxib’ chihab’ maak’a’ wi’ li hab’, ke’raj ru naq taat’ane’q li hab’. Jo’kan ajwi’ li rey ut rixaqil ke’xye naq us xloq’oninkil laj Bahal. Naq nakawil 1 Reyes 18, k’oxla li k’a’ru xak’ul sa’ aayu’am li chanchan li ke’wan wi’ laj Israelita. Ma wan hoonal naq nawiib’an aach’ool chixtaaqenkil li Qaawa’ xb’aan naq chanchan naq chaab’il jalan chik li b’e? (chi’ilmanq 1 Reyes 18:21). Sa’ li ch’ol a’in, k’a’ru nakak’oxla naq li Qaawa’ kiraj xk’utb’al chiruheb’ li tenamit chirix a’an ut chirix laj Bahal? K’a’ru ak xak’ul laa’at li kixk’ut li na’leb’ a’in chawu?

Us raj xk’eeb’al reetal li k’a’ru kixye ut kixb’aanu laj Elias sa’ li ch’ol a’in li naxk’ut lix paab’aal chirix li Qaawa’. K’a’ru nakatzol rik’in laj Elias chirix li paab’aal?

Chi’ilmanq ajwi’ Josue 24:15; 2 Nefi 2:26–28; D. Todd Christofferson, “La elección y el compromiso” (ch’utam choq’ reheb’ li saaj sa’ chixjunil li ruchich’och’, 12 enero, 2020), ChurchofJesusChrist.org.

Jun reetalil 1 Reyes 19:11–12. Li Profeet, © Robert Booth Charles/Bridgeman Images

1 Reyes 19:1–18

Li Qaawa’ na’aatinak chi kok’ aj xsa’ rik’in jun ch’ina xyaab’ kuxej.

Naq xJesabel, li rixaqil li rey, kirab’i li ke’xk’ul laj tij sa’ li Tzuul Karmelo, ink’a’ kixjal xch’ool—kijosq’o’ b’an. Kixk’oxla laj Elias naq maare taakamsiiq, jo’kan naq ki’eelelik toj sa’ li yamyookil ch’och’ ut kixmuq rib’ sa’ jun li ochochpek. Aran, chi rahob’tesinb’il xb’aan li junaatal ut rahilal xch’ool, kixk’ul jun na’leb’ rik’in li Qaawa’ li jwal jalan wi’chik chiru li kixk’ul sa’ li Tzuul Karmelo. K’a’ru naxk’ut lix numsihom laj Elias sa’ 1 Reyes 19:1–18 chawu chirix li naxye li Qaawa’ aawe naq nakawaj ru tenq’aak? K’oxlaheb’ li hoonal sa’ laa yu’am naq xawab’i lix yaab’ xkux. K’a’ru tento taab’aanu re naq tatb’eresiiq rajlal xb’aan?

Tz’ileb’ rix li aatin li wankeb’ sa’eb’ li raqal a’in li neke’xch’olob’ chan ru naq li Qaawa’ na’aatinak qik’in: Helaman 5:30; 3 Nefi 11:3–7; Tzol’leb’ ut Sumwank 6:22–23; 8:2–3; 9:8–9; 11:12–14; 36:2.

Chi’ilmanq ajwi’ Salmos 46:10; 1 Nefi 17:45; Russell M. Nelson, “Chawab’i a’an!” Jolomil ch’utub’aj-ib’ re abril 2020.

1 Reyes 19:19–21

Li k’anjelak chiru li Qaawa’ jwal aajel wi’chik ru chiru yalaq chik li ruchich’och’il k’anjel.

Ke’wan kab’laju lix b’ooyx laj Eliseo, ut a’an naxk’ut naq maare jwal b’ihom a’an. K’a’ru nawulak chawu chirix lix b’aanuhom sa’ 1 Reyes 19:19–21? Chan ru taataaqe lix b’aanuhom laj Eliseo?

Chi’ilmanq ajwi’ Mateo 4:18–22.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

1 Reyes 17:1–16.Li video “Elías y la viuda de Sarepta” (ChurchofJesusChrist.org) ut li jalam-uuch sa’ li tusleb’ aatin a’in naru te’xtenq’a laa junkab’al chixtawb’al ru li seraq’ sa’ 1 Reyes 17:1–16. Chirix rilb’aleb’ li raqal ut li k’anjeleb’aal a’in, eb’ li komon sa’ li junkab’al naru te’xtz’iib’aheb’ lix chaab’ilal li xmalka’an. K’a’ru naxpatz’ li Qaawa’ naq taqab’aanu re xk’utb’al li qapaab’aal?

1 Reyes 18.Li ch’ol “Elías y los sacerdotes de Baal” (sa’ Relatos del Antiguo Testamento) naru tixtenq’a laa junkab’al chixtzolb’al li seraq’ sa’ 1 Reyes 18. Ma wan li k’a’ru nokoxram chi k’anjelak chiru li Qaawa’ chi anchal qach’ool? Chan ru taqak’ut li qajom chixtaaqenkil? (chi’ilmanq li raqal 21).

1 Reyes 19:11–12.K’a’ru tixtenq’a laa junkab’al chixtawb’al ru naq aajel ru rab’inkil li ch’ina xyaab’ kuxej q’un na’aatinak? Chi q’un xyaab’ eekux, naru teeril 1 Reyes 19:11–12, malaj teeb’icha jun li b’ich chirix li Musiq’ej, maare “Li Santil Musiq’ej” (B’ichleb’aal choq’ reheb’ li Kok’al, 56). Naru taab’aanu li choqink re reetalinkil naq laj Satanas naxyal qaramb’al chirab’inkil li ch’ina xyaab’ kuxej q’un na’aatinak. Eb’ laa komon naru te’xye k’a’ru neke’xb’aanu re rab’inkil xyaab’ xkux li Musiq’ej.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li Santil Musiq’ej,” B’ichleb’aal choq’ reheb’ li Kok’al, 56.

Xkawresinkil aawib’ chi tzolok

Tz’iib’a li nakak’oxla. Naq nakak’e reetal naq li Musiq’ej yoo chi aatinak aawik’in, k’oxla xtz’iib’ankil li nakaweek’a naq naxye aawe. Xtz’iib’ankil li nakak’oxla naru tatxtenq’a chixtz’ilb’al rix ut chixk’uulankil.

Li xmalka’an aj Sarepta, xb’aan li xRose Datoc Dall