Li xEster, xb’aan laj James Johnson

25–31 julio

Ester

“Xatwulak … re qatenq’ankil sa’ li rahilal a’in”

Naq nakawil lix hu li xEster, tz’aama naq li Musiq’ej tixk’e li na’leb’ li tz’aqal tatxtenq’a, ut tz’iib’a li na’leb’ nakak’ul.

Tz’iib’a li nakak’oxla

Wankeb’ naab’al li na’leb’ sa’ lix hu li xEster li maare chanchan naq yal chi jo’kan naq ke’k’ulman. Chan chik ru taach’olob’amanq naq jun ch’ina ixqa’al neb’a’ aj Judio kiwulak choq’ ixqi rey re Persia tz’aqal sa’ li hoonal naq te’raj ru xkolb’aleb’ rix lix tenamit? Chan ru naq li rech alal xEster, laj Mardokeo, tz’aqal kirab’i chan ru naq ke’xk’uub’ xkamsinkil li rey? Ma anchal ke’k’ulman yal xjunes rib’ a’in, malaj k’uub’anb’ileb’ xb’aan li Dios? Li Elder Ronald A. Rasband kixye: “Li k’a’ru anchal nak’ulman yal xjunes rib’, chi tz’aqal yaal wan chi ilb’il chaq xb’aan li qaYuwa’. … Li Qaawa’ wan sa’ qayu’am toj sa’ li k’a’ru ka’ch’in” (“Chi k’oxlanb’il xb’aan li Dios,” Jolomil ch’utub’aj-ib’ re octubre 2017). Wan naq ch’a’aj xk’eeb’al reetal li ruq’ li Qaawa’ sa’ li “k’a’ru ka’ch’in.” A’b’an naqatzol rik’in xEster naq a’an naru tixk’am li qab’e ut tooxkawresi choq’ re li hoonal naq toowanq jo’ k’anjeleb’aal sa’ ruq’ re xb’aanunkil li rajom a’an (chi’ilmanq Ester 4:14).

Re xtzolb’al k’a’ru wan sa’ li hu Ester, chi’ilmanq “Ester” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

Li xEster

Li Qaawa’ naru tinroksi jo’ k’anjeleb’aal re rosob’tesinkileb’ li was wiitz’in.

Li Hermana Anne C. Pingree kixye: “Li ok jo’ k’anjeleb’aal sa’ ruq’ li Dios, a’an nimla osob’tesiik ut loq’laj teneb’aak. Maak’a’ naxye b’ar wanko, chan ru wanko, ma sumsuuko, malaj jarub’ chihab’ wan qe, li Qaawa’ naraj ru naq li junjunq qe tixb’aanu li qak’anjel re xkab’lankil li rawa’b’ejihom sa’ roso’jikeb’ li kutan a’in” (“Conocer la voluntad del Señor con respecto a ustedes,” Liahona, noviembre 2005, 112).

Naq nakawil ru li seraq’ chirix xEster, k’oxla chan ru naq li aatin a’in wan xyaalal sa’ xyu’am. K’e reetal li k’a’ru kixb’aanu li Qaawa’ re xtenq’ankil chixkolb’aleb’ laj Judio (chi’ilmanq, Ester 2:21–23; 3:10–14; 4:14–16). Chirix a’an, k’oxla chan ru naq xatxb’eresi sa’ laa yu’am chixtenq’ankileb’ laa was aawiitz’in. Ma naru nakak’oxlaheb’ hoonal ut kristiaan xatxb’eresi wi’ chixtenq’ankileb’? (Chi’ilmanq Ester 4:14). Wi ak xak’ul jun rosob’tesihom li yuwa’b’ejil aj k’anjel, naru taawil ru re xtzolb’al k’a’ru naraj li Qaawa’ naq taab’aanu.

Ester 3; 5:9–14; 7

Li q’etq’etil ut li josq’il nokohexk’e chi t’ane’k.

Sa’ lix hu li xEster, naqataw qana’leb’ rik’in xtiikilal chi paab’ank xEster ut laj Mardokeo, jo’ ajwi’ rik’in xq’etq’etil ut xjosq’il laj Aman. Naq nakawil Ester 3; 5:9–14, k’e reetal k’a’ru kireek’a, kixye, ut kixb’aanu laj Aman. K’a’ru naxk’ut a’an chirix li rajom xch’ool? K’a’ru xq’ajkamunkil? (chi’ilmanq Ester 7). Li seraq’ chirix laj Aman maare tatxk’e chixtz’il rix li rajom aach’ool sa’ li nakaweek’a ut li nakab’aanu. Ma wan k’a’ru taawaj xjalb’al? Chan ru taasik’ xtenq’ li qaChoxahil Yuwa’?

Chi’ilmanq ajwi’ Proverbios 16:32; Alma 5:28.

Ester 3–4; 5:2–3; 8:11–12

Li kuyuk sa’ naxk’ut naq aajel ru li Qaawa’ sa’ lin yu’am.

K’e reetal k’a’ut naq xEster ut eb’ laj Judio ke’xkuy xsa’ (chi’ilmanq Ester 3:13; 4:1–3, 10–17). Chan ru ke’osob’tesiik naq ke’xkuy xsa’? (chi’ilmanq Ester 5:2–3; 8:11–12). K’a’ut naq li Qaawa’ naxpatz’ naq taqakuy qasa’? (chi’ilmanq Temas del Evangelio, “Ayuno y ofrendas de ayuno,” topics.ChurchofJesusChrist.org). K’oxla k’a’ru taab’aanu re naq xkuyb’al aasa’ taa’ok choq’ nimla osob’tesiik sa’ laa yu’am.

Chi’ilmanq ajwi’ Isaias 58:6–12; Mateo 4:1–4; 17:14–21; “Ayuno: Amanda, de un barrio de jóvenes adultos solteros” (video), ChurchofJesusChrist.org.

Ester 3:1–11; 4:10–17; 5:1–4

Re xb’aanunkil li us, tento naq kawaq qach’ool.

Naq laj Mardokeo ut xEster ke’xxaqab’ rib’ chixkolb’al rix lix paab’ahomeb’, kiru raj naq te’kamsiiq. Maare ink’a’ jwal xuwajel xq’ajkamunkil li b’e naqasik’ ru laa’o, a’b’an toj tento naq kawaq qach’ool re xb’aanunkil li us. K’a’ru nakatzol sa’ Ester 3:1–4; 4:10–17 chirix xkawilal li ch’oolej sa’ xb’aanunkil li us? K’e reetal lix jalanil li kixk’ul laj Mardekeo rik’in li kixk’ul xEster chirix naq ke’xk’ut xpaab’aaleb’ (chi’ilmanq Ester 3:5–11; 5:1–4). K’a’ raj ru tento tixnaw junaq chirix li Dios re xb’aanunkil li ke’xb’aanu xEster ut laj Mardokeo—a’an xb’aanunkil li us maak’a’ naxye k’a’ru taachalq?

Sa’ xkoxlankil k’a’ru taak’ul rik’in xb’aanunkil li us, maare taataw xkawilal aach’ool rik’in li raatin xEster sa’ Ester 4:16. Maare taaye aawib’, “Naq ninsik’ ru li us, wi [nikine’xkanab’ li wamiiw], chi jo’kan naq [nikine’xkanab’ li wamiiw].”

Chi’ilmanq ajwi’ Thomas S. Monson, “Tengan Valor,” Liahona, mayo 2009, 123–127.

Li xEster chiru li rey, xbʼaan li xMinerva K. Teichert

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Ester 1–10.Chirix rilb’al li seraq’ chirix xEster (chi’ilmanq “Ester” sa’ Relatos del Antiguo Testamento malaj li video “Para esta hora,” ChurchofJesusChrist.org), maare taawulaq chiru laa junkab’al xyiib’ankil kok’ muñeek jo’ reetalileb’ li kristiaan sa’ li seraq’ (chi’ilmanq li perel re kok’ k’anjel re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al). Naru teeroksiheb’ li muñeek re xk’utb’esinkil li seraq’. Naru ajwi’ teeb’icha jun li b’ich chirix wank chi kaw ch’oolej, jo’ “Sik’ xb’aanunkil li tiikilal” (B’ichleb’aal choq’ reheb’ li Kok’al, 80) malaj “Us taab’aanu” (Eb’ li B’ich, 149). K’a’ru naxye li b’ich li naxjultika xEster qe?

Ester 2:5–7.K’a’ru naqatzol rik’in laj Mardokeo chirix xtenq’ankil li qajunkab’al sa’ li ch’a’ajkilal? Ani sa’ li qajunkab’al naraj ru tenq’aak? K’uub’ahomaq chan ru teetenq’a.

Ester 4:15–17.Lix kawilal xch’ool xEster naru tixmusiq’a laa junkab’al chi aatinak chirix xtawb’al xkawilal qach’ool re xkolb’al rix li yaal sa’ qayu’am. K’a’ru naraj naxye li raatin li xEster, “Ut wi tine’xkamsi, kamqin”? K’a’ru xyaalalil li raatin a’an choq’ qe naq tento kawaq qach’ool? Naru teetaw eena’leb’ sa’ li video “Valor” (ChurchofJesusChrist.org).

Ester 9:26–32.Kixaqab’aman li Purim, jun xninq’eheb’ laj Judio, re xjultikankil li seraq’ chirix xEster. Naq texwa’aq chiru li xamaan a’in, naru teewotz seraq’ chirix lee junkab’al, jo’ ajwi’ lee xe’toonil, naq xe’xtenq’a li ras riitz’ineb’ naq xe’xxaqab’ rib’ chixkolb’al rix li us, jo’ li xEster.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sik’ xb’aanunkil li tiikilal,” B’ichleb’aal choq’ reheb’ li Kok’al, 80.

Xkawresinkil qib’ jo’ aj k’utunel

B’aanu jo’ li kixb’aanu li Kolonel. “Lix wankil li Kolonel chi k’utuk ut chi waklesink ch’oolej kichal rik’in chan ru xyu’am, ut chan ru a’an jo’ winq. Wi yalyo wi’chik aaq’e chi wank sa’ laa yu’am jo’ chanru kiwan li Jesukristo, q’axal wi’chik tatruuq chi k’utuk jo’ chanru kik’utuk a’an” (Li k’utuk jo’ li Kolonel, 13).

Li xEster, rixaqil li rey, xb’aan li xMinerva K. Teichert, © laj William ut xBetty Stokes