Laj David sa’ xb’een li k’ojarib’aal, xb’aan laj Jerry Miles Harston

20–26 junio

2 Samuel 5–7; 11–12; 1 Reyes 3; 8; 11

“Laa k’ojarib’aal k’ojk’ooq sa’ xna’aj chi junelik”

“Chixjunil li loq’laj hu, a’an musiq’anb’il xb’aan li Dios ut nak’anjelak re k’utuk, re q’usuk, re k’ehok na’leb’, jo’ ajwi’ re xtzolb’aleb’ li kristiaan sa’ li tiikilal” (2 Timoteo 3:16).

Tz’iib’a li nakak’oxla

Kitikla li rawa’b’ejil laj David sa’ chaab’ilal. Chixjunileb’ ke’xk’e reetal xkawilal lix paab’aal naq kinumta sa’ xb’een laj Goliat. Jo’ rey, a’an kixk’e Jerusalen choq’ xjolomil tenamit ut kixjunaji Israel (chi’ilmanq 2 Samuel 5). K’a’jo’ wi’chik xkawilal li awa’b’ejihom. A’ut laj David ki’aaleek ut kisach chiru lix musiq’ejil wankilal.

Li rawa’b’ejil laj Salomon, li ralal laj David, kitikla ajwi’ sa’ chaab’ilal. Chixjunileb’ ke’xxk’e reetal xnimal ut xchaab’ilal xna’leb’ li chalenaq sa’ choxa. Jo’ rey, a’an kixnimob’resi xmaril Israel ut kixkab’la jun xchaq’al ru santil ochoch choq’ re li Qaawa’. K’a’jo’ wi’chik xkawilal li awa’b’ejihom. A’ut, sa’ xjipilal, laj Salomon kixkanab’ naq lix ch’ool taajalb’ehiiq chixloq’oninkileb’ li jalanil dios.

K’a’ru naqatzol sa’eb’ li rahil seraq’ a’in? Jun na’leb’ naqatzol, a’an naq maak’a’ naxye k’a’ru ak qanumsihom, taawanq li qamusiq’ejil wankilal a’ yaal li naqasik’ ru xb’aanunkil anajwan. Naqil ajwi’ sa’eb’ li seraq’ a’in naq maawa’ li qametz’ew malaj xkawilal qach’ool malaj xchaab’ilal qana’leb’ li taakoloq qe—a’an b’an li Qaawa’. Eb’ li seraq’ a’in neke’xk’ut naq lix tz’aqal yo’onihom laj Israel—ut li qe laa’o—maawa’ laj David, laj Salomon, chi moko junaq chik li rey. A’an b’an jalan chik li “ralal laj David”: a’ li Jesukristo (Mateo 1:1), li Junelikil Rey li tixkuy xmaak lix tenamit wi te’chalq wi’chik rik’in (chi’ilmanq 1 Reyes 8:33–34).

Re xtzolb’al k’a’ru wan sa’ li hu 2 Samuel ut 1 Reyes, chi’ilmanq “Samuel, profeet sa’ li Najter Chaq’rab’ ” ut “Reyes (eb’ li awa’b’ej)” sa’ li K’utul Raqal reheb’ li Loq’laj Hu.

Li na’leb’ re xtzolb’aleb’ li loq’laj hu aajunes

2 Samuel 5:17–25

Li Qaawa’ naru tixk’am inb’e.

Chirix naq laj David kixjunaji Israel (chi’ilmanq 2 Samuel 5:1–5), ki’ajman xkolb’al rix lix tenamit chiruheb’ laj Filisteo. Naq nakawil 2 Samuel 5:17–25, k’oxla chan ru naq li kixb’aanu laj David truuq tatxtenq’a sa’ laa ch’a’ajkilal (chi’ilmanq ajwi’ 1 Samuel 23:2, 10–11; 30:8; 2 Samuel 2:1). Chan ru nakasik’ lix b’eresihom li Qaawa’ sa’ laa yu’am? Chan ru nakat-osob’tesiik naq nakayu’ami li na’leb’ k’utb’esinb’il chawu?

Chi’ilmanq ajwi’ 1 Cronicas 12; Richard G. Scott, “Cómo obtener revelación e inspiración en tu propia vida,” Liahona, mayo 2012, 45–47.

2 Samuel 7

K’a’ru li “ochoch” li kixyeechi’i li Qaawa’ re laj David?

Naq laj David kixyeechi’i xkab’lankil jun li ochoch, malaj li santil ochoch, choq’ re li Qaawa’ (chi’ilmanq 2 Samuel 7:1–3), li Qaawa’ kixye re naq li ralal laj David taakab’lanq re (che’ilmanq li raqal 12–15; chi’ilmanq ajwi’ 1 Cronicas 17:1–15). Li Qaawa’ kixye ajwi’ naq tixkab’la jun “ochoch” choq’ re laj David, li naraj naxye naq te’wanq ralal xk’ajol, ut naq lix k’ojarib’aal k’ojk’ooq sa’ xna’aj chi junelik (chi’ilmanq 2 Samuel 7:11, 16, 25–29; Salmos 89:3–4, 35–37). Kitz’aqob’resiik ru li yeechi’ihom a’in rik’in li Jesukristo, li qaJunelikil Rey, a’an ralal xk’ajol laj David (chi’ilmanq Mateo 1:1; Lukas 1:32–33; Jwan 18:33–37).

2 Samuel 11; 12:1–14

Junelik tento tinwil wib’ re naq ink’a’ tinmaakob’q.

Lix tiikilal laj David chixpaab’ankil li Qaawa’ junxil moko kixkol ta tz’aqal rix chiru li aaleek naq yoo chi b’eek sa’ xb’een li rochoch, ut “kiril chaq jun li ixq yoo chi atink” (2 Samuel 11:2). K’a’ru nakatzol rik’in li kixk’ul laj David? Eb’ li patz’om a’in maare tate’xtenq’a chixtz’ilb’al rix li seraq’ a’in:

• K’a’ru kixb’aanu laj David li kixk’e chi b’eek sa’ xb’ehil li maak? K’a’ru li tiikil na’leb’ kiru raj chixsik’b’al ru ruuchil a’an?

• Chan ru naq laj tza naxyal aatiikisinkil sa’ xb’ehil li maak sa’ laa yu’am? K’a’ru taab’aanu anajwan re taakol aawix?

Chi’ilmanq ajwi’ 2 Nefi 28:20–24; “Volcar la mirada” (video), ChurchofJesusChrist.org.

1 Reyes 3:1–15

Li maatan re tz’ilok-ix nikinxtenq’a chixsik’b’al ru li us malaj li ink’a’ us.

Wi ta li Qaawa’ tixye aawe, “Tz’aama chiwu li k’a’ru taawaj ut laa’in tink’e aawe” (1 Reyes 3:5), k’a’ raj ru taatz’aama chiru? K’a’ru nawulak chawu chirix lix tz’aam laj Salomon. K’oxla k’a’ut naq chaab’il maatan “li na’leb’ re b’eresink,” re “xnawb’al b’ar wan li us ut li ink’a’ us” (raqal 9). Kʼaʼru naru taabʼaanu re xsik’b’al li maatan a’in?

Chi’ilmanq ajwi’ 2 Cronicas 1; Moroni 7:12–19; David A. Bednar, “Prestos para observar,” Liahona, diciembre 2006, 15–20.

1 Reyes 8:12–61

Li santil ochoch a’an rochoch li Qaawa’.

Chiru k’iila cient chihab’, lix wanjik li Qaawa’ ki’eetaliik xb’aan li loq’laj muheb’aal li kixyiib’ laj Moises. Us ta laj David kiraj xkab’lankil li rochoch li Dios, li Dios kixsik’ ru naq laj Salomon, li ralal laj David, tixkab’la li santil ochoch choq’ re li Qaawa’. Naq nakawil ru lix tij laj Salomon ut li k’a’ru kixye re lix tenamit naq kitz’aqlo xkab’lankil li santil ochoch, k’e reetal k’a’ru kireek’a chirix li Qaawa’ ut li rochoch. Naru ajwi’ taatz’iib’aheb’ li osob’tesink kixpatz’ laj Salomon naq kitijok. K’a’ru nakawil rik’ineb’ li osob’tesink a’an? Chan ru naq osob’tesinb’ilat xb’aan li rochoch li Qaawa’ sa’ li qakutankil?

Chi’ilmanq ajwi’ 2 Cronicas 6.

Li santil ochoch re Barranquilla Colombia

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

2 Samuel 5:19, 23.Jo’q’e “koopatz’ok chiru li Qaawa’ ” naq tixk’am qab’e ut tooxb’eresi? Chan ru naq xooxsume?

2 Samuel 7:16.Naq li Qaawa’ kixye re laj David: “Laa k’ojarib’aal k’ojk’ooq sa’ xna’aj chi junelik,” yoo chi aatinak chirix jun rey sa’ xyanqeb’ li ralal xk’ajol laj David li taa’awa’b’ejinq chi junelik: a’ li Jesukristo. Maare taawulaq chiru laa junkab’al xyiib’ankileb’ li koroon rik’in hu naq yookex chixyeeb’al k’a’ut naq nekeb’antioxi naq li Jesukristo nawan choq’ lee Junelikil Rey.

2 Samuel 11.Rilb’al ru lix maak laj David naru texxtenq’a chi aatinak chirix li pornografia, li yib’ ru na’leb’, ut li yumb’etaak ko’b’etaak. Eb’ li hu a’in naru texxtenq’a sa’ li aatinak: li aatin re octubre 2019 li wan sa’ li Liahona, lix tenq’ li Iglees chirix li pornografia (ChurchofJesusChrist.org/addressing-pornography), ut eb’ li video “¿Qué debo hacer si veo pornografía?” ut “Cuida tus pasos” (ChurchofJesusChrist.org). Jo’ junkab’al, naru teek’uub’ k’a’ru teeb’aanu naq teetaw eerib’ rik’in li pornografia.

1 Reyes 11:9–11.K’a’ruheb’ li “jalanil dios” (raqal 10) li truuq raj te’xjalb’ehi li qach’ool rik’in li Qaawa’? K’a’ru taqab’aanu re xjayalinkil li qach’ool rik’in li qaChoxahil Yuwa’ ut li Jesukristo?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “K’e insantilal,” Eb’ li B’ich, 74.

Xkawresinkil qib’ jo’ aj k’utunel

K’e aach’ool rik’in li jar raqal chi na’leb’ li te’osob’tesinq re laa junkab’al. Naq nakatzol li raatin li Dios rik’in tijok, patz’ aawib’, “K’a’ru nintaw arin li tz’aqal taawanq xwankil choq’ re lin junkab’al?” (chi’ilmanq Li k’utuk jo’ li Kolonel, 17).

Xjalam-uuch li santil ochoch re laj Salomon, xb’aan laj Sam Lawlor