xDebora rik’ineb’ li teep aj pleet

Xjalam-uuch li xDebora sa’ xjolomileb’ li teep aj pleet aj Israel, © Lifeway Collection/licensed from goodsalt.com

30 mayo–5 junio

Jueces 2–4; 6–8; 13–16

“Li Qaawa’ kixwaklesi jun aj kolol reheb’ ”

Eb’ li loq’laj hu neke’xch’olob’ xyaalal li Jesukristo. K’oxlaheb’ li seraq’ xawil sa’ li hu Jueces ut chan ru naq nakate’xtenq’a chi jilok rik’in a’an.

Tz’iib’a li nakak’oxla

Chiqajunilo ak naqanaw chan ru li maakob’k, li yot’e’k xb’aan li qamaak, ut xjalb’al qak’a’uxl ut xyeeb’al naq ink’a’ chik taqab’aanu. A’b’an, wan naq nasach sa’ qach’ool li ak xqaye, ut, naq noko’aaleek, nokomaakob’k wi’chik. A’in li rahilal ke’xk’iilasuti laj Israelita sa’ li hu Jueces. Chi q’unob’resinb’ileb’ xch’ool xb’aan lix na’leb’eb’ ut lix paab’ahomeb’ laj Kanahanita—li ke’ralinasi raj sa’ li ch’och’ a’b’an ink’a’ ke’xb’aanu—eb’ laj Israelita ke’xq’et lix sumwank rik’in li Qaawa’ ut ke’xkanab’ xloq’oninkil. Xmaak a’an, ink’a’ chik ke’kole’ rix xb’aan ut ke’ok sa’ preexil. A’ut naq kik’ulman a’an, li Qaawa’ junelik kixkanab’eb’ chixjalb’al xk’a’uxl ut kixwaklesi ani li taakoloq reheb’, jun taqlanel sa’ xteepeb’ aj pleet, “aj raqol aatin” kiyehe’ re. Moko tiikeb’ ta chixjunileb’ laj raqol aatin sa’ li hu Jueces, a’b’an ke’wan li ke’xk’anjela xnimal lix paab’aaleb’ re xkolb’aleb’ li ralal xk’ajol laj Israel ut xk’ojob’ankileb’ wi’chik sa’ sumwank rik’in li Qaawa’. Eb’ li seraq’ a’in neke’xjultika qe naq maak’a’ naxye k’a’ru xooxnajtob’resi rik’in li Jesukristo, a’an aj Kolol re Israel ut junelik naraj qakolb’al ut qak’ulb’al wi’chik.

Re xtzolb’al k’a’ru wan sa’ li hu Jueces, chi’ilmanq “Jueces” sa’ li K’utul Raqal reheb’ li Loq’laj Hu.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Jueces 2:1–19; 4:1–16

Li Qaawa’ naxyeechi’i inkolb’al naq nasach inb’e.

Li hu Jueces naxk’e qaq’usb’al; us ta ak naqak’ul lix wankilal li Qaawa’ sa’ li qayu’am, toj naru taasachq qab’e. Li hu naxwaklesi ajwi’ xch’ool li ani ak xsach xb’e, xb’aan naq li Qaawa’ naru tixtenq’a chi sutq’iik. Naq nakawil Jueces 2:1–19, k’e reetal k’a’ru ke’xb’aanu laj Israelita re najto’k rik’in li Qaawa’, ut k’a’ru kixb’aanu li Qaawa’ re xkolb’aleb’. K’a’ru neke’xk’ut li raqal a’in chawu chirix li Qaawa’? K’a’ru taab’aanu re kanaak junelik chi tiik chixpaab’ankil?

Taataw reetalil li po’resink ch’oolej, li raho’k, ut li kole’k chi k’iilasutinb’il sa’ li hu Jueces (che’ilmanq li ch’ol 3, 4, 6, ut 13). Naq nakawil ru li hu Jueces, k’oxla k’a’ru ke’xb’aanu laj raqol aatin re xkolb’al Israel, ut k’a’ru naxb’aanu li Kolonel naq nakawaj ru aakolb’al.

Wan jun chaab’il seraq’ chirix xDebora, li kitenq’an chixkolb’al Israel. Il resil a’an sa’ Jueces 4:1–16, ut k’e reetal k’a’ru kixb’aanu choq’ reheb’ li kristiaan sa’ xyu’am. K’a’ru kixye ut kixb’aanu xDebora li naxk’ut naq kiwan xpaab’aal chirix li Qaawa’? K’a’ru nakak’oxla naq kiraj xyeeb’al xDebora sa’ li raqal 14 naq kixye: “Li Qaawa’ a’an aj k’amol b’e chawu”?

Chi’ilmanq ajwi’ Alma 7:33; Tzol’leb’ ut Sumwank 84:87–88.

Jueces 2:13

Ani laj Bahal ut xAstarot?

Laj Bahal, jun dios re kaq-sut-iq’, ut xAstarot, jun dios re alank kok’al, ke’loq’oniik xb’aaneb’ laj Kanahanita. Eb’ li dios a’in naxk’ut naq nim xwankil li ruuchinihom li ch’och’ jo’ ajwi’ li kristiaan choq’ reheb’ laj Kanahanita. A’b’an xloq’oninkileb’ li pak’b’il dios a’an—wan naq rik’in li yumb’etaak ko’b’etaak ut xmayejankileb’ li kok’al—jwal yib’ ru sa’ rilob’aal li Qaawa’.

Jueces 6–8

Li Qaawa’ naru naxk’anjela li sachb’a-ch’oolej naq ninpaab’ lix na’leb’.

Re xk’ulb’aleb’ lix sachb’a-ch’oolej li Dios sa’ qayu’am, tento taqapaab’ xna’leb’ a’an, us ta chanchan naq jwal jalan. Li seraq’ chirix laj Gideon, li wan sa’ Jueces 6–8, nareetali a’in chi us. Chan ru naq li Qaawa’ kixk’anjela jun sachb’a-ch’oolej naq lix teep aj pleet aj Gideon kinumta sa’ xb’eeneb’ laj Madianita? K’a’ru nakak’oxla naq li Qaawa’ naraj xk’utb’al chawu? Chan ru xawil li Qaawa’ chixb’aanunkil lix k’anjel us ta chanchan naq sachb’a-ch’oolej?

Chi’ilmanq ajwi’ Russell M. Nelson, “With God Nothing Shall Be Impossible,” Ensign, mayo 1988, 33–35.

Jueces 13–16

Nink’ul inmetz’ew naq tinpaab’eb’ insumwank rik’in li Dios.

Kilaj xmetz’ew laj Sanson sa’ tib’elej jo’ ajwi’ sa’ musiq’ej naq kixq’et xsumwank rik’in li Dios, jo’eb’ li sumwank okenaqeb’ wi’ laj Nasareo (re xtawb’al xkomon chik li na’leb’ chirixeb’ laj Nasareo, chi’ilmanq Numeros 6:1–6; Jueces 13:7). Naq nakawil li seraq’ chirix laj Sanson sa’ Jueces 13–16, k’oxlaheb’ laa sumwank. Chan ru naq osob’tesinb’ilat rik’in metz’ew naq nakapaab’eb’ laa sumwank? K’a’ru nakatzol sa’ lix seraq’ laj Sanson li nakatxmusiq’a chixpaab’ankileb’ laa sumwank rik’in li Dios?

laj Sanson naxt’aneb’ li oqech

Laj Sanson naxt’aneb’ li oqech, xb’aan laj James Tissot ut xkomoneb’ chik

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Jueces 2:10.Chirix naq kikam laj Josue, eb’ laj Israelita li yookeb’ chi k’iik “ink’a’ neke’xnaw ru li Qaawa’.” Aatinan rik’in laa junkab’al chirix xnawb’al ru li Qaawa’ ut “li kilajxb’aanu” sa’ qak’ab’a’. Chan ru teek’uula li nawom a’in choq’ reheb’ lee ralal eek’ajol?

Jueces 3:7–10.Eb’ li raqal a’in neke’xk’ut li k’a’ru kik’ulman k’iila sut sa’ li hu Jueces. Naq nekerileb’ li raqal a’in jo’ junkab’al, naru teeye k’a’ru ke’xb’aanu laj Israel re xnajtob’resinkil rib’ rik’in li Qaawa’, ut k’a’ru kixb’aanu li Qaawa’ re xkolb’aleb’. K’a’ru tixk’e naq taasachq li Qaawa’ sa’ qach’ool? Chan ru tooxkol? K’a’ru taqab’aanu re naq junelik taqapaab’ a’an?

Jueces 6:13–16, 25–30.Kaw xch’ool laj Gideon sa’ xpaab’ankil li Qaawa’, us ta ink’a’ sa ilb’il xb’aanuhom xb’aaneb’ li kristiaan. K’a’ru naxpatz’ li Qaawa’ naq taqab’aanu li maare ink’a’ naraj li ruchich’och’? Chan ru naq li kixye li Qaawa’ re laj Gideon sa’eb’ li raqal 13–16 tooreek’asi chixb’aanunkil li us?

Jueces 7.Ma wan jun k’anjel naru teeb’aanu jo’ junkab’al re xtawb’al eena’leb’ rik’in li kixnumsi lix teep aj pleet aj Gideon sa’ li ch’ol a’in? Chan ru naq li raatin li Qaawa’ sa’ li ch’ol a’in (che’ilmanq li raqal 2 ut 15) naru taak’anjelaq sa’ qayu’am?

Jueces 13:5.Lix sumwank laj Sanson rik’in li Qaawa’ kixk’e xmetz’ew, jo’ chanru naq li qasumwank naxk’e qametz’ew laa’o. Maare taawulaq chiru laa junkab’al xb’aanunkil li ejercicio, ut teeye chan ru naq li ejercicio naxk’e qametz’ew. K’a’ru taqab’aanu re xk’ulb’al qametz’ew sa’ musiq’ej? Re teetaw eena’leb’, naru teeril Mosiah 18:8–10; Tzol’leb’ ut Sumwank 20:77, 79. Chan ru naq xpaab’ankil li qasumwank naxk’e qametz’ew sa’ musiq’ej?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “At xDios Israel,” Eb’ li B’ich, 5.

Xkawresinkil aawib’ chi tzolok

K’anjela li k’a’ru nakatzol. Naq yookat chi tzolok, patz’ aawib’ chan ru taayu’ami li na’leb’ nakatzol, toja’ naq taak’e aach’ool chixb’aanunkil. Kanab’ li Musiq’ej chab’eresinkil. (Chi’ilmanq Li k’utuk jo’ li Kolonel, 35.)

laj Gideon ut lix teep aj pleet

Lix teep aj pleet laj Gideon, xb’aan laj Daniel A. Lewis