Xjalam-uuch li xDebora sa’ xjolomileb’ li teep aj pleet aj Israel, © Lifeway Collection/licensed from goodsalt.com

30 mayo–5 junio

Jueces 2–4; 6–8; 13–16

“Li Qaawa’ kixwaklesi jun aj kolol reheb’ ”

Wankeb’ naab’al li chaab’il seraq’ sa’ Jueces 2–4; 6–8; 13–16. K’oxla chan ru taawoksiheb’ li seraq’ a’in re xtenq’ankileb’ li kok’al chi nach’ok rik’in li Kolonel ut chixtaaqenkil.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz jun seraq’ xe’xtzol toje’ sa’ li loq’laj hu. Chirix a’an, patz’ reheb’ naq te’xwotz li na’leb’ xe’xtzol sa’ li seraq’.

Xk’utb’al li tzol’leb’: Kok’al toj ka’ch’ineb’ xyu’am

Jueces 3:9

Li Jesukristo a’an lin Kolonel.

Naq eb’ laj Israelita ke’tijok chiru li Qaawa’, kiwakli chaq jun aj k’amol b’e chiruheb’. Tenq’aheb’ li kok’al chirilb’al li Jesukristo jo’ jun aj k’amol b’e kiwaklesiik xb’aan li Dios choq’ qe.

Kok’ k’anjel naru chi b’aanumank

• Ch’olob’ chiruheb’ li kok’al naq eb’ laj Israelita ke’xkanab’ xpaab’ankil lix taqlahom li Dios, ut xb’aan a’an ki’isiik lix kolb’al rixeb’ ut li xik’ neke’ilok reheb’ ke’numta sa’ xb’eeneb’. Il sa’ Jueces 3:9 li ch’ol aatin “toja’ naq eb’ laj Israel ke’xyaab’a xk’ab’a’ li Qaawa’.” K’a’ru ke’xb’aanu laj Israelita naq ke’raj ru xtenq’ankil? Wotz junaq seraq’ b’ar wi’ xattijok re xpatz’b’al aatenq’ankil ut li Dios xsume laa tij.

• Il sa’ Jueces 3:9 li ch’ol aatin “kixwaklesi jun aj k’amol b’e,” ut patz’ reheb’ li kok’al naq te’xk’iilasuti aawochb’een. Ch’olob’ naq jun aj k’amol b’e, a’an li nakolok qix. K’ut chiruheb’ li kok’al xjalam-uucheb’ kristiaan, maare jun xjalam-uuch li Jesukristo, ut k’eheb’ chi huphu chiru li tz’ak. Kanab’eb’ li kok’al chixb’alq’usinkileb’, re naq te’xtaw lix jalam-uuch li Jesus ut te’xchap chi kutankil. Ch’olob’ xyaalal naq li Jesukristo a’an laj k’amol b’e li kiwaklesiik chi yo’yo xb’aan li Dios re qakolb’al chiru li maak ut li kamk.

Laj Gideon kixpaab’ li Qaawa’. © Lifeway Collection/licensed from goodsalt.com

Jueces 6:11–16; 7:1–8

Li Qaawa’ naru naroksi li k’a’ru kok’ re xb’aanunkil jun nimla k’anjel.

Laj Gideon naxk’oxla naq yal a’an jun li neb’a’ ut maak’a’ xwankil, a’b’an li Dios naril jo’ jun “winq q’axal kaw rib’ ” (Jueces 6:12). Tenq’aheb’ li kok’al chirilb’al naq, us ta k’osb’ileb’ xwankil naq neke’reek’a, li Dios naru nak’anjelak rik’ineb’ a’an re xb’aanunkil li k’a’ru aajel ru (chi’ilmanq Alma 37:6–7).

Kok’ k’anjel naru chi b’aanumank

• Ye reheb’ li kok’al naq li Qaawa’ kiraj ru jun kristiaan li tixk’am raj xb’e Israel chixkolb’al rib’ chiruheb’ li xik’ neke’ilok, laj Madianita, ut kixsik’ ru laj Gideon. Yaab’asi Jueces 6:15 choq’ reheb’ li kok’al, ut patz’ reheb’ k’a’ut naq laj Gideon kixk’oxla naq ink’a’ raj taaruuq chixb’aanunkil li naraj li Qaawa’. Il li raqal 16, ut patz’ reheb’ ani kixye li Qaawa’ naq taatenq’anq re laj Gideon. Wotz resil junaq hoonal b’ar wi’ li Qaawa’ xpatz’ aawe naq taab’aanu junaq k’anjel ch’a’aj re k’anjelak chiru ut xaweek’a naq a’an xwan aawik’in.

• K’uteb’ xjalam-uuch kok’al malaj saaj li nim neke’xb’aanu sa’ xk’anjel li Dios (chi’ilmanq Hu reheb’ li Jalam-uuch re li Evangelio, 19, 23, 90, 102), malaj wotz junjunq seraq’ aawilom chirix a’an. Tenq’aheb’ li kok’al chixk’oxlankil chan ru te’tz’aqonq sa’ lix k’anjel li Dios, ut patz’ reheb’ naq te’xyiib’ xjalam-uuch naq yookeb’ chixb’aanunkil li k’a’aq re ru a’an.

• Oksi li perel re kok’ k’anjel re li xamaan a’in re xk’utb’al chiruheb’ li kok’al chan ru naq li Qaawa’ kixk’os xwankil li ch’uut aj pleet re Israel re naq eb’ laj Israelita te’xnaw naq ke’kole’ rix rik’in lix wankil a’an. Ye k’a’ru li kok’ k’a’aq re ru neke’xb’aanu xninqal ru k’anjel, maare naq li saq k’aw neke’xch’utub’ xya’al li utz’u’uj re xyiib’ankil li kab’. Wotz xnawom aach’ool naq li Dios naru nokoxtenq’a chixb’aanunkil xnimal ru k’anjel, us ta naqeek’a naq k’osb’il qawankil.

Xk’utb’al li tzol’leb’: Kok’al ak ninqeb’

Jueces 3:7–9, 12–15

Li Jesukristo a’an aj k’amol inb’e.

Jueces 3 naxch’olob’ jun na’leb’ naru nakawoksi re xk’utb’al chiruheb’ li kok’al naq li Dios nokorach’ab’ chiru li maak sa’ xk’ab’a’ li Kolonel Jesukristo.

Kok’ k’anjel naru chi b’aanumank

• Tz’iib’aheb’ li aatin a’in chiru li pizarron: “ke’xb’aanu li k’a’ru ink’a’ nawulak chiru li Qaawa’,” “ke’xyaab’a xk’ab’a’ li Qaawa’,” ut “kixwaklesi jun aj k’amol b’e.” Patz’ reheb’ junjunq li kok’al naq te’xsik’ li ch’ol aatin a’an sa’ Jueces 3:7–9, ut patz’ reheb’ junjunq chik naq te’xsik’ sa’ Jueces 3:12–15. Ch’olob’ chiruheb’ li kok’al naq sa’ li hu Jueces naxye naq eb’ laj Israelita k’iila sut “ke’xb’aanu li k’a’ru ink’a’ nawulak chiru li Qaawa’.” Chirix a’an, naq li xik’ neke’ilok reheb’ ke’wulak chi tawasink, “ke’xyaab’a xk’ab’a’ li Qaawa’,” ut li Qaawa’ “kixwaklesi jun aj k’amol b’e” re xtenq’ankileb’. K’a’ru naqatzol chirix lix na’leb’ li Qaawa’ arin?

• B’ichahomaq jun li b’ich li tixtenq’aheb’ li kok’al chixtawb’al ru naq li Jesukristo a’an laj Tojol rixeb’ ut aj k’amol xb’eheb’, maare “Kixtaqla li Ralal” (B’ichleb’aal choq’ reheb’ li Kok’al, 20–21). Patz’ reheb’ li kok’al naq te’xwotz li reek’ahomeb’ chirix li k’a’ru xb’aanu li Qaawa’ re xkolb’al qix chiru li maak, li aaleek, li rahilal, ut li kamk.

Jueces 4:1–15

Naru ninpaab’ chi tiik li Qaawa’ us ta eb’ li was wiitz’in ink’a’ tiikeb’.

Us ta naab’aleb’ laj Israelita ke’risi rib’ sa’ lix b’e li Qaawa’, junjunq chik toj ke’kana chi tiik chiru ut ke’xtenq’aheb’ junjunq chik chi q’ajk sa’ li tiikilal. Chan ru taawaklesi xch’ooleb’ li kok’al chixpaab’ankil li Qaawa’ chi tiik, maak’a’ naxye li neke’xb’aanu li ras riitz’in?

Kok’ k’anjel naru chi b’aanumank

• Ye reheb’ li kok’al naq sa’ li hoonal naq eb’ laj Israelita wankeb’ sa’ li maak, jun li ixq tiik xch’ool, xDebora xk’ab’a’, ut laj jolominel re li ch’uut aj pleet, laj Barak, ke’rach’ab’ Israel sa’ ruq’eb’ li xik’ neke’ilok reheb’ (chi’ilmanq Jueces 4:1–15). Ilomaq sa’ komonil Jueces 4:14, ut patz’ reheb’ li kok’al naq te’xsik’ junaq na’leb’ kixye xDebora li naxk’ut naq kaw lix paab’aal chirix li Qaawa’. Chirix a’an patz’ reheb’ naq te’ril Tzol’leb’ ut Sumwank 84:88 re te’xsik’ junaq na’leb’ li natawman ajwi’ sa’ Jueces 4:14. Waklesi xch’ooleb’ chixwotzb’al k’a’ru naraj naxye choq’ reheb’ a’an lix yeechi’ihom li Qaawa’ naq kixye: “Laa’in aj k’amol b’e chawu.”

• B’ichahomaq jun li b’ich chirix xpaab’aankileb’ li taqlahom, maare “Sik’ li us” (Eb’ li B’ich, 151) malaj “Tinsik’ ru li us” (B’ichleb’aal choq’ reheb’ li Kok’al, 82–83). Chan ru taqakol rix li tiikilal ut taqapaab’eb’ li taqlahom us ta eb’ li kristiaan ink’a’ neke’xb’aanu a’an?

Jueces 7

Lix b’e li Dios jalan chiruheb’ lix b’e li ruchich’och’.

Li Qaawa’ kixpatz’ re laj Gideon naq tixb’aanu li k’a’ru maare ink’a’ naxtaw ru sa’ li hoonal a’an. B’ar xcha’al li seraq’ nakatxmusiq’a? Chan ru naq maare taarosob’tesiheb’ li kok’al?

Kok’ k’anjel naru chi b’aanumank

• Patz’ reheb’ li kok’al naq te’xk’oxla naq neke’raj ru xk’uub’ankil jun li ch’uut aj pleet re xik chi pleetik. Jarub’eb’ raj li kristiaan te’raj sa’ li ch’uut aj pleet a’an? Rik’in Jueces 7:4–7, patz’ reheb’ li kok’al naq te’reetali chan ru naq li Qaawa’ kixtenq’a laj Gideon chixsik’b’al ru li ch’uut aj pleet li taa’ach’ab’anq re Israel sa’ ruqeb’ laj Madianita. K’a’ut naq li Qaawa’ kiraj naq ka’ch’inaq lix ch’uut aj pleet laj Gideon? (chi’ilmanq Jueces 7:2). K’a’ut naq maare ch’a’aj choq’ re laj Gideon ut lix ch’uut aj pleet xb’aanunkil li k’a’ru kixtaqla li Qaawa’? Patz’ reheb’ li kok’al naq te’xwotz resil junaq hoonal b’ar wi’ ke’xtzol xkanab’ankil rib’ sa’ ruq’ li Qaawa’ us ta ch’a’aj.

• Patz’ reheb’ li kok’al naq te’xyiib’ xjalam-uuch jun li yok’leb’ ch’iich’, jun li ramleb’, jun li trompeet, jun li kandeel, ut jun li kuk. Patz’ reheb’ li kok’al b’ar wan reheb’ li k’a’aq re ru a’an te’xk’am raj sa’ jun li pleetik. Patz’ reheb’ naq te’ril Jueces 7:16 re te’xnaw k’a’ru ke’xk’am lix ch’uut aj pleet laj Gideon. K’a’ut naq ki’ajman xkawil xch’ooleb’ re xb’aanunkil a’an? Ilomaq Jueces 7:19–21 re teetzol chan ru ke’roksi li trompeet ut li kuk re numtaak sa’ xb’eeneb’ laj Madianita. K’a’ru naqatzol chirix li Qaawa’ sa’ li seraq’ a’in?

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’in junaq komon sa’ lix junkab’aleb’ junaq na’leb’ xe’xtzol li tixtenq’aheb’ chixpaab’ankil li taqlahom.

Xkawresinkil qib’ jo’ aj k’utunel

Oksiheb’ li kok’ k’anjel re xb’aanunkil li ajb’il ru. Maawileb’ li tusleb’ aatin a’in jo’ li na’leb’ tento taataaqe. Oksiheb’ b’an jo’ jun xyo’leb’aal li na’leb’ li te’tenq’anq aawe chixk’ulb’al aamusiq’ankil naq yooqat chi k’oxlak chirixeb’ li rajom ru li kok’al nakatzoleb’. Wan sut naq naru nakaweek’a naq musiq’anb’ilat chiroksinkil jun ch’ina k’anjel reheb’ li kok’al toj ka’ch’ineb’ xyu’am re xtzolb’aleb’ li kok’al ak ninqeb’, malaj chi b’alq’usinb’il.