Xjalam-uuch laj Moises naq naxk’ojob’ laj Josue, xb’aan laj Darrell Thomas

23–29 mayo

Josue 1–8; 23–24

“Yal aaq’e ut kawaq aach’ool”

Naq taawil Josue 1–8 ut 23–24, tz’iib’a li na’leb’ taak’ul rik’in li Musiq’ej. K’a’ru taab’aanu re xtawb’al k’a’ru li neke’raj ru li kok’al xtzolb’al sa’eb’ li ch’ol a’in?

Tz’iib’a li nakak’oxla

Xkanab’ankileb’ chi wotzok

Yiib’ chiru li pizarron xjalam-uuch junaq reheb’ li na’leb’ wankeb’ sa’ Josue 1–8 ut 23–24, ut k’e reetal ma te’ruuq li kok’al chixq’ehinkil k’a’ru li seraq’ na’el wi’ chaq. Maare taayib’ junaq nima’ malaj li nimla ramleb’ chirix junaq tenamit.

Xk’utb’al li tzol’leb’: Kok’al toj ka’ch’ineb’ xyu’am

Josue 1:8

Naru nink’oxla li loq’laj hu chi q’eq ut chi kutan.

Li Qaawa’ kixye re laj Josue naq wi naxtz’il rixeb’ li loq’laj hu ut naxb’aanu li neke’xye, chaab’il taa’elq sa’ xk’amb’aleb’ xb’e laj Israelita sa’ li yeechi’inb’il ch’och’. K’a’ru taab’aanu re xk’utb’al chiruheb’ li kok’al li xninqal ru osob’tesiik li neke’chal xb’aaneb’ li loq’laj hu?

Kok’ k’anjel naru chi b’aanumank

• K’e re li junjunq chi kok’al jun xjalam-uuch li saq’e ut li po. Yaab’asi Josue 1–8: “Chak’oxla rix [li loq’laj hu] chi q’eq ut chi kutan.” Ch’olob’ naq li k’oxlak a’an xtz’ilb’al rix junaq na’leb’. K’iilasuti li ch’ol aatin ut patz’ reheb’ li kok’al chixtaqsinkil li saq’e naq taaye “chi kutan” ut li po naq taaye “chi q’eq.” Kanab’eb’ li kok’al chixka’sutinkil li aatin aawik’in.

• Patz’ reheb’ li kok’al naq te’xye k’a’ru neke’xb’aanu chi kutan ut k’a’ru neke’xb’aanu chi q’eq. Ye reheb’ naq kiyeeman re laj Josue naq tixk’oxlaheb’ li loq’laj hu chi kutan ut chi q’eq. Tenq’aheb’ chixk’oxlankileb’ li seraq’ malaj na’leb’ wankeb’ sa’eb’ li loq’laj hu li naru neke’xkoxla chi kutan ut chi q’eq. Patz’ reheb’ naq te’xyiib’ xjalam-uuch a’an malaj lix junkab’aleb’ naq neke’xtzol li loq’laj hu. K’a’ut naq nawulak chiruheb’ xtzolb’al li loq’laj hu? Chan ru neke’osob’tesiik naq neke’xb’aanu a’an?

Josue 3

Tento taakub’eeq inha’ re naq tin’ok sa’ li rawa’b’ejihom li choxa.

Li seraq’ chirix laj Josue nax kixb’eresiheb’ laj Israelita chiru li nima’ Jordan toj sa’ li yeechi’inb’il ch’och’, a’an jun chaab’il seraq’ re xk’utb’al chiruheb’ li kok’al naq tento taak’ub’eeq qaha’ re naq too’ok sa’ li rawa’b’ejihom li choxa.

Kok’ k’anjel naru chi b’aanumank

• Aatinan b’ayaq chirix li seraq’ chirixeb’ li ralal xk’ajol laj Israel naq ke’xq’ax ru li nima’ Jordan re wulak sa’ li yeechi’inb’il ch’och’ (chi’ilmanq “Josue” sa’ Relatos del Antiguo Testamento). Chirix a’an, k’ut jun xjalam-uuch li Jesus naq kikub’e xha’ ut ye reheb’ li kok’al naq li Jesus kikub’e xha’ sa’ li nima’ a’an. Patz’ reheb’ li kok’al naq te’xwotz k’a’ chik ru neke’xnaw chirix lix kub’iha’ li Jesus.

• B’ichahomaq jun li b’ich chirix li kub’iha’, maare “Li kub’iha’ ” (Bichleb’aal choq’ reheb’ li kok’al, 54). Tenq’aheb’ chixk’eeb’al reetal k’a’ru naxk’ut li b’ich a’in chirix naq k’a’ut naq kikub’e xha’ li Jesus ut k’a’ut naq tento taqab’aanu ajwi’ a’an laa’o. Kanab’eb’ li kok’al chixwotzb’al li reek’ahomeb’ chirix li kub’iha’. Ye reheb’ li kok’al k’a’ru naru neke’xb’aanu anajwan re te’xkawresi rib’ choq’ re lix kub’iha’ naq te’xket waqxaqib’ chihab’.

  

  Tento taak’ub’eeq qaha’ re naq too’ok sa’ li rawa’b’ejihom li choxa.

Josue 24:15

Naru ninsik’ ru k’anjelak chiru li Jesukristo.

Lix ch’otojik li na’leb’ kixk’e laj Josue re lix tenamit, a’an naq naru te’kanaaq chi k’anjelak chiru li Qaawa’ malaj naru neke’xtz’eqtaana. Jo’ ajwi’ naq laj Josue kixra lix tenamit, naru nakawaklesi xch’ooleb’ li kok’al rik’in rahok chixsik’b’al ru k’anjelak chiru li Qaawa’ “chiru li kutan a’in.”

Kok’ k’anjel naru chi b’aanumank

• Patz’ reheb’ li kok’al naq te’xye k’a’ru junjunq li xe’xsik’ ru xb’aanunkil chiru li kutan a’in. Yaab’asi Josue 24:15 reheb’ li kok’al: “Sik’omaq ru anajwan ani chi aj-u teeraj k’anjelak; … laa’in ut lin junkab’al took’anjelaq chiru li Qaawa’.” Chan ru naq eb’ li kok’al neke’k’anjelak chiru li Qaawa’ anajwan? Chan ru naru naqasik’ ru k’anjelak chiru a’an wulaj wulaj?

• B’ichahomaq jun li b’ich na’aatinak chirix xsik’b’al ru li us, maare “Tinsik’ ru li us” (B’ichleb’aal choq’ reheb’ li Kok’al, 82–83). K’a’ru naqeek’a naq naqasik’ ru k’anjelak chiru li Jesukristo? Patz’ reheb’ li kok’al naq te’xyiib’ xjalam-uucheb’ naq yookeb’ chi k’anjelak chiru li Qaawa’. Wotz junaq seraq’ re laa yu’am malaj re junaq li hu re li Iglees chirix xsik’b’al ru k’anjelak chiru li Qaawa’.

Xk’utb’al li tzol’leb’: Kok’al ak ninqeb’

Josue 1–4; 6

“Yal aaq’e ut kawaq aach’ool.”

Chirix naq laj Josue kiwulak choq’ aj jolominel reheb’ laj Israelita, li Qaawa’ kixwaklesi xch’ool rik’in xyeeb’al re: “Yal aaq’e ut kawaq aach’ool” (Josue 1:6). K’a’ru neke’xtzol li kok’al rik’in laj Josue chirix li yalok q’e ut li wank chi kaw li ch’oolej choq’ re li Kristo?

Kok’ k’anjel naru chi b’aanumank

• Patz’ reheb’ li kok’al naq te’xsik’ li ch’ol aatin naka’sutiman sa’ Josue 1:6, 9, ut 18, ut tz’iib’a chiru li pizarron (chi’ilmanq ajwi’ raqal 7). Tenq’aheb’ li kok’al chixk’oxlankil k’a’ut raj naq toowulaq chirajb’al ru li na’leb’ a’in, jo’ kixb’aanu laj Josue. Ilomaqeb’ junjunq reheb’ li seraq’ sa’ Josue 1–4; 6 (chi’ilmanq ajwi’ “Josue” ut “Rahab y los espías” sa’ Relatos del Antiguo Testamento), ut patz’ reheb’ li kok’al naq te’xk’e reetal chan ru naq eb’ li kristiaan sa’eb’ li seraq’ a’in ke’xyal xq’e ut kaweb’ xch’ool.

• Patz’ reheb’ li kok’al naq te’aatinaq chirix junaq kristiaan neke’xnaw ru li naxyal xq’e ut kaw xch’ool choq’ re li Jesukristo. Waklesi xch’ooleb’ chixtz’iib’ankil k’a’ru te’raj xb’aanunkil re naq te’xyal xq’e ut kawaq xch’ooleb’ choq’ re li Kristo.

Josue 1:8

Naru nink’oxlaheb’ li loq’laj hu chi q’eq ut chi kutan.

Jun li na’leb’ kitenq’aak wi’ laj Josue xb’aan li Qaawa’ chixkawresinkil rib’ choq’ reheb’ li ch’a’ajkilal kixtaweb’, a’an naq kib’oqe’ “chixk’oxlankileb’ ” li loq’laj hu “chi q’eq ut chi kutan.” Chan ru naq li na’leb’ a’an naru narosob’tesiheb’ li kok’al?

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a jo’k’ihal li hoonal neke’roksi sa’ li jalan jalanq k’anjel neke’xb’aanu. Chirix a’an patz’ reheb’ naq te’ril Josue 1:8 re te’xsik’ junaq na’leb’ li tento taqab’aanu chiqajunilo wulaj wulaj ut rajlal q’ojyin. Patz’ reheb’ naq te’xsik’ li aatin sa’ li raqal a’in li na’aatinak chirix li osob’tesiik neke’chal xb’aan xtzolb’aleb’ li loq’laj hu. Chan ru naq xk’oxlankileb’ li loq’laj hu naru nokoxtenq’a chixb’aanunkil chi us li k’a’ru tento taqab’aanu wulaj wulaj?

• Patz’ reheb’ li kok’al naq te’ril Josue 1:8; 1 Nefi 15:23–24; 2 Nefi 31:20; 32:3; Jakob 4:6; Helaman 3:29–30. Patz’ reheb’ li kok’al naq te’xsik’ jun aatin sa’ li junjunq chi raqal li na’aatinak chirix li wankilal naxk’e xtzolb’aleb’ li loq’laj hu. K’a’ru li meta naru neke’xk’ojob’ re xtzolb’aleb’ li loq’laj hu sa’ junjunqal?

Josue 24:15

Naru ninsik’ ru k’anjelak chiru li Jesukristo.

Sa’ xyanqeb’ lix ch’otojik li raatin laj Josue choq’ reheb’ laj Israelita wan jun li tz’aam li naxye, “Sik’omaq ru anajwan ani chi aj-u teeraj k’anjelak.” K’oxla chan ru naq li na’leb’ a’in naru narosob’tesiheb’ li kok’al.

Kok’ k’anjel naru chi b’aanumank

• Patz’ reheb’ li kok’al naq te’xtz’iib’a junjunq aatin re Josue 24:15 chiru jun nimla perel hu. Kanab’eb’ chixwotzb’al li xe’xtz’iib’a ut te’xch’olob’ k’a’ut naq xe’xsik’ ruheb’ li aatin a’an. Chan ru taqak’ut chiru li Dios naq naqasik’ ru k’anjelak chiru?

• Patz’ reheb’ li kok’al naq te’xye jo’q’e maare tento te’xsik’ ru k’anjelak chiru li Dios malaj xb’aanunkil jalan chik k’anjel. Patz’ reheb’ naq te’xk’oxla k’a’ raj ru te’xb’aanu. K’a’ut naq aajel ru “xsik’b’al ru anajwan” sa’ xna’aj naq toj taawulaq xkutankil li k’a’ru tento taqab’aanu? Chan ru naq too’osob’tesiiq wi naqasik’ ru li us?

Xb’oqb’aleb’ chi tzolok sa’ kab’l

Patz’ reheb’ li kok’al naq te’xsik’ ru junaq reheb’ li na’leb’ xe’tzolman li te’raj xwotzb’al rik’ineb’ lix junkab’al. Waklesi xch’ooleb’ chixk’oxlankil chan ru naq te’xwotz chiru li xamaan chal re.

Xkawresinkil qib’ jo’ aj k’utunel

Tenq’aheb’ li kok’al chi tzolok chi chaab’il. Li ajom naq nakatzoleb’ li kok’al moko ka’ajwi’ ta xk’utb’al li yaal chiruheb’. Tento taatenq’aheb’ ajwi’ chi wulak chi wank jo’ tz’aqal chaab’il kristiaan li neke’xsik’ li yaal xjuneseb’ rib’.