Xjalam-uuch li Jehova naq naxk’ut rib’ chiru laj Moises ut 70 chi xb’eenil aj Israel, xb’aan laj Jerry Harston

25 abril–1 mayo

Exodo 24; 31–34

“Laa’in tin’ochb’eeninq aawe”

Naq laj Moises kixkawresi rib’ re xk’amb’al xb’eheb’ li ralal xk’ajol laj Israel sa’ li yeechi’inb’il ch’och’, li Qaawa’ kixye: “Laa’in tin’ochb’eeninq aawe” (Exodo 33:14). Naq yooqat chixkawresinkil aawib’ re xtzolb’aleb’ li kok’al, k’oxla chan ru taab’oq xwankil li Qaawa’ “chawochb’eeninkil.”

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xchap jun li hu wan rajlil chiru. Oksiheb’ li ajl a’an re xtusb’aleb’ ru li kok’al re naq te’xwotz junaq na’leb’ yookeb’ chixtzolb’al sa’ li loq’laj hu, maare sa’ kab’l malaj sa’ li tzoleb’aal reheb’ li kok’al.

Xk’utb’al li tzol’leb’: Kok’al toj ka’ch’ineb’ xyu’am

Exodo 31:13, 17

Roxloq’inkil li hilob’aal kutan a’an reetalil li qarahom choq’ re li Qaawa’.

Li Qaawa’ kixye re laj Moises naq sa’ li hoonal naq eb’ li ralal xk’ajol laj Israel ke’roxloq’i li hilob’aal kutan, ke’xk’ut chiru naq neke’raj wank choq’ xtenamit.

Kok’ k’anjel naru chi b’aanumank

• Yiib’ jun aamej chiru li pizarron ut patz’ reheb’ li kok’al k’a’ru naraj naxye li jalam-uuch a’an. Tenq’aheb’ chixk’oxlankil k’a’ chik chi eetalil neke’reetali ajwi’ li rahok, jo’ jun q’alunk malaj li tenq’ank. Yaab’asi Exodo 31:13 reheb’. Tenq’aheb’ chixtawb’al ru naq wi naqoxloq’i li hilob’aal kutan, naqak’utb’esi chiru li Qaawa’ naq naqara.

• Ch’olob’ chiruheb’ li kok’al chan ru naq nakayal aaq’e xk’utb’al laa rahom chiru li Qaawa’ sa’ li hilob’aal kutan. Kanab’eb’ chixwotzb’al ma neke’xb’aanu ajwi’ a’an rik’ineb’ lix junkab’al. Patz’ reheb’ naq te’roksi li perel re kok’ k’anjel re li xamaan a’in re te’xtaw xkomon xna’leb’.

  

  Naq naqoxloq’i li hilob’aal kutan, naqak’ut li qarahom choq’ re li Qaawa’.

Exodo 32:1–8, 19–24

Naru nink’e li Qaawa’ sa’ xb’een na’ajej sa’ lin yu’am.

Naq laj Moises wan chaq chi aatinak rik’in li Qaawa’ sa’ li tzuul Sinai, eb’ li ralal xk’ajol laj Israel ke’ok chixloq’oninkil jun li pak’b’il dios oor sa’ xna’aj li Qaawa’. Li seraq’ a’in naru naxjultika reheb’ li kok’al naq tento naq ink’a’ te’qak’e xna’aj jalan chik k’a’aq re ru sa’ xna’aj li Qaawa’.

Kok’ k’anjel naru chi b’aanumank

• Jultika sa’ junpaat reheb’ li kok’al li Lajeeb’ chi Taqlahom, ut taach’olob’ li wiib’ sa’ xtiklajik (chi’ilmanq Exodo 20:3–6). Oksi “Los Diez Mandamientos” (sa’ Relatos del Antiguo Testamento) re xwotzb’al li seraq’ wan sa’ Exodo 32:1–8, 19–24. Wi naru, kanab’eb’ li kok’al chatenq’ankil chixwotzb’al li seraq’. Tenq’aheb’ li kok’al chixk’eeb’al reetal k’a’ru li ink’a’ us ke’xb’aanu laj Israelita sa’ li seraq’ a’in (wi nakawaj, jultika reheb’ li kok’al li wiib’ chi taqlahom sa’ xtiklajik li Lajeeb’ chi Taqlahom). K’a’ raj ru tento ke’xb’aanu laj Israelita sa’ xna’aj li ke’xb’aanu?

• K’ut jun xjalam-uuch li Jesukristo, rik’ineb’ xjalam-uuch jalan chik k’a’aq re ru li maare neke’xnumsi wi’ xhoonal li kok’al, jo’ li b’atz’unk. Patz’ reheb’ li kok’al naq te’xsik’ ru li jalam-uuch li tento raj jwal aajelaq ru choq’ qe. Wotz rik’ineb’ li kok’al chan ru nakat-osob’tesiik xb’aan naq nakak’e li Qaawa’ sa’ xb’een chixjunil sa’ laa yu’am.

Exodo 33:11

Li Qaawa’ ki’aatinak sa’ kristiaanil rik’in laj Moises.

Chirix naq laj Moises kixjor li pak’b’il dios oor, “li Qaawa’ na’aatinak tz’aqal chiru laj Moises jo’ na’aatinak junaq winq rik’in li ramiiw.” Xnawb’al a’an naru naxkawob’resi xpaab’aaleb’ li kok’al naq li Qaawa’ a’an jun yo’yookil kristiaan ut naq neke’rahe’ xb’aan.

Kok’ k’anjel naru chi b’aanumank

• Ye reheb’ li kok’al k’a’ru nakaweek’a naq nakat-aatinak rik’in junaq aawamiiw ut patz’ reheb’ k’a’ru neke’reek’a a’an. Yaab’asi choq’ reheb’ li xb’een raqal sa’ Exodo 33:11. Patz’ reheb’ li kok’al k’a’ru neke’xk’oxla naq kireek’a li profeet aj Moises. Seraq’i reheb’ li kok’al jo’q’e aaweek’ahom naq nach’ wankat rik’in li Qaawa’ us ta ink’a’ aawilom ru.

• B’ichahomaq sa’ komonil jun li b’ich li naxye k’a’ru neke’reek’a li qaChoxahil Yuwa’ ut li Jesukristo choq’ qe, maare “Li Jesus narahok qe” (B’ichleb’aal choq’ reheb’ li Kok’al, 37). K’uteb’ xjalam-uuch li Kolonel b’ar wi’ naxk’ut xrahom chiruheb’ li ras riitz’in (chi’ilmanq Hu reheb’ li Jalam-uuch re li Evangelio, 36, 41–43, 46–47). Waklesi xch’ooleb’ li kok’al chixwotzb’al k’a’ru neke’reek’a chirix li qaChoxahil Yuwa’ ut li Jesus.

Xk’utb’al li tzol’leb’: Kok’al ak ninqeb’

Exodo 31:12–17

Roxloq’inkil li hilob’aal kutan a’an reetalil li qarahom choq’ re li Qaawa’.

Xsantob’resinkil li hilob’aal kutan maare ink’a’ ch’a’ajaq—ut sahaq wi’chik—choq’ reheb’ li kok’al naq neke’xk’e reetal naq a’an reetalil qajom chi k’anjelak chiru li Qaawa’.

Kok’ k’anjel naru chi b’aanumank

• Oksi junjunqeb’ li patz’om re xtenq’ankileb’ li kok’al chixtawb’al ru k’a’ru naraj naxye jun eetalil, maare, “K’a’ru li eetalil naxk’ut chiqu naq chal re li saq’ehil, malaj naq chal re li ke?” Patz’ reheb’ naq te’ril Exodo 31:13, 16–17 ut te’xsik’ li aatin “reetalil.” K’a’ru kixye li Qaawa’ naq a’an jun eetalil sa’ qayanq laa’o rik’in a’an? K’a’ut naq q’axal aajel ru li eetalil a’an?

• Patz’ reheb’ li kok’al naq te’xch’olob’ k’a’ut naq neke’xsik’ ru roxloq’inkil li hilob’aal kutan. Li video “En mi día santo—Honrar el día de reposo” (ChurchofJesusChrist.org) naru texxtenq’a.

• Patz’ reheb’ li kok’al naq te’xtz’iib’a chixjunil li k’a’aq re ru neke’xk’oxla naq naru te’xb’aanu sa’ li hilob’aal kutan re xk’utb’al chiru li Qaawa’ naq neke’xra. Waklesi xch’ooleb’ chixwotzb’al junjunq reheb’ li k’a’aq re ru xe’xtz’iib’a. Patz’ reheb’ naq te’xk’am sa’ rochocheb’ li xe’xtz’iib’a, te’xwotz rik’ineb’ lix junkab’al, ut te’ril naq te’raj xnawb’al k’a’ raj ru te’xb’aanu sa’ li hilob’aal kutan.

Exodo 32:1–8, 19–24

Naru nink’e li Qaawa’ sa’ xb’een na’ajej sa’ lin yu’am.

Jun na’leb’ wan sa’ Exodo 32 a’an naq aajel ru xpaab’ankileb’ li wiib’ chi taqlahom sa’ xtiklajik li Lajeeb’ chi Taqlahom—naq maa’ani chik junaq te’xloq’oni sa’ xna’aj li Qaawa’.

Kok’ k’anjel naru chi b’aanumank

• Patz’ reheb’ li kok’al naq te’xwotz chixjunil li neke’xnaw chirix laj Aaron naq kixyiib’ li ch’ina wakax re oor re naq te’xloq’oni laj Israelita. Wi neke’raj xtenq’ankil, ye reheb’ naq te’ril Exodo 32:1–8, 19–24, malaj wotz rik’ineb’ “Los Diez Mandamientos” (sa’ Relatos del Antiguo Testamento). K’a’ut naq moko us ta naq eb’ laj Israelita te’xloq’oni jun pak’b’il dios? (Naru nakak’ut chiruheb’ li kok’al li wiib’ chi taqlahom sa’ xtiklajik li Lajeeb’ chi Taqlahom sa’ Exodo 20:3–6.)

• Tenq’aheb’ li kok’al chixk’oxlankil k’a’ raj ru li maare te’rataw xloq’oninkil li kristiaan sa’ xna’aj li Qaawa’—li k’a’ru naxnajtob’resi qak’a’uxl rik’in a’an. Chirix a’an patz’ reheb’ naq te’xye k’a’ru natenq’ank reheb’ chixjayalinkil xk’a’uxleb’ rik’in li Kolonel ut chixloq’oninkil.

Exodo 32:1–5, 21–24

Naru ninkol rix li tiikilal.

Naq eb’ laj Israelita ke’xye re laj Aaron naq tixyiib’ jun pak’b’il dios re oor, ki’ok chixb’aanunkil, us ta moko us ta li na’leb’ a’an (chi’ilmanq Deuteronomio 9:20). K’oxla chan ru taawaklesi xch’ooleb’ li kok’al chixkolb’al rix li tiikilal, us ta wankeb’ li ink’a’ neke’ajok re naq te’xb’aanu.

Kok’ k’anjel naru chi b’aanumank

• Patz’ reheb’ li kok’al naq te’ril Exodo 32:1–5, 21–24 sa’ junjunqal malaj sa’ ka’kab’il, ut te’xwotz k’a’ru neke’xk’oxla naq tento raj kixb’aanu laj Aaron naq eb’ laj Israelita ke’xpatz’ re naq tixyiib’ jun li ch’ina wakax re oor. Chan raj ru naq laj Aaron kixtenq’aheb’ raj li kristiaan?

• Tenq’aheb’ li kok’al chixk’oxlankil naq maare wan naq eb’ li kristiaan te’xpatz’ k’a’ruhaq reheb’ li neke’xnaw naq ink’a’ us. Patz’ reheb’ li kok’al naq te’xwotz k’a’ raj ru te’xb’aanu sa’ li hoonal a’an.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al li na’leb’ xe’rab’i chirix xsantob’resinkil li hilob’aal kutan.

Xkawresinkil qib’ jo’ aj k’utunel

Patz’ reheb’ li kok’al naq te’xwotz lix nawom xch’ool. Eb’ li patz’om taawoksi naru naxwaklesi xch’ooleb’ li kok’al chixwotzb’al k’a’ru neke’reek’a chirix li Kolonel ut chan ru naq neke’osob’tesiik xb’aan xyu’aminkil li evangelio. Naq neke’xb’aanu a’an, yookeb’ chixwotzb’al lix nawom xch’ool. (Chi’ilmanq Li k’utuk jo’ li Kolonel, 11, 32.)