Xjalam-uuch laj Moises sa’ li Tzuul Nebo, © Providence Collection/licensed from goodsalt.com

16–22 mayo

Deuteronomio 6–8; 15; 18; 29–30; 34

Chak’e reetal maare anchal taasachq sa’ laa ch’ool li Qaawa’

Tz’il rix chan ru taawoksiheb’ li kok’ k’anjel re li tusleb’ aatin a’in choq’ re li k’a’ru neke’raj ru li kok’al. Wi eb’ li kok’al toj kok’eb’, naru nakatenq’aheb’ chixkawresinkileb’ rib’ choq’ re li kub’iha’ rik’in roksinkil li na’leb’ “Xpaab’ankileb’ lin sumwank naxk’am chaq wosob’tesinkil” li wan sa’ li perel reheb’ li kok’al ak ninqeb’.

Tz’iib’a li nakak’oxla

Xkanab’ankileb’ chi wotzok

Patz’ reheb’ li kok’al naq te’xwotz li xe’xtzol chirix laj Moises sa’ li Tzoleb’aal reheb’ li Kok’al malaj sa’ kab’l chiruheb’ li xamaan xe’nume’. Wi na’ajman ru, k’uteb’ xjalam-uuch junjunq xcha’al lix yu’am laj Moises re xtenq’ankileb’ chixjultikankil. Ye reheb’ naq tat-aatinaq chirixeb’ li na’leb’ kixk’ut laj Moises sa’ xraqik lix yu’am sa’ li ruchich’och’.

Xk’utb’al li tzol’leb’: Kok’al toj ka’ch’ineb’ xyu’am

Deuteronomio 6:5

Naru ninra li Qaawa’ chi anchal inch’ool.

Laj Moises kixk’ut chiruheb’ li ralal xk’ajol laj Israel naq tento te’xra li Qaawa’ chi anchaleb’ xch’ool, xmetz’ew, ut li raam. K’oxla chan ru taatenq’aheb’ li kok’al chixnimob’resinkil lix paab’aaleb’ chirix li qaChoxahil Yuwa’ ut li Kolonel.

Kok’ k’anjel naru chi b’aanumank

• Yiib’ jun aamej, jun junxaqalil, ut jun tel kaw xmetz’ew chiru li pizarron. Il Deuteronomio 6:5, ut k’uteb’ li jalam-uuch naq taayaab’asiheb’ li aatin “laa waam,” “laa ch’ool,” ut “laa metz’ew.” Patz’ reheb’ li kok’al naq te’xk’ut ajwi’ chiruq’eb’ li jalam-uuch naq eb’ lix komon yooqeb’ chixyaab’asinkil li raqal.

• B’ichahomaq jun li b’ich li na’aatinak chirixeb’ lix yo’ob’tesihom li Dios, maare “Raabʼilin xbʼaan li Dios saʼ choxa” (B’ichleb’aal choq’ reheb’ li Kok’al,16–17). Tenq’aheb’ li kok’al chixtawb’aleb’ aatin sa’ li b’ich li neke’xk’ut naq li qaChoxahil Yuwa’ nokoxra. Tenq’aheb’ chixk’oxlankil chan ru naru naqak’ut chiruheb’ naq neke’qara ajwi’.

Deuteronomio 6:6–9

Eb’ li loq’laj hu a’an raatin li Dios.

Li na’leb’ wan sa’ Deuteronomio 6:6–9 kik’eeman re xtenq’ankileb’ laj Israelita re naq “ink’a’ taasach sa’ xch’ool li Qaawa’ ” ut li raatin (raqal 12). Chan ru taatenq’aheb’ li kok’al chiroksinkil li naxye li loq’laj hu sa’ xyu’ameb’?

Kok’ k’anjel naru chi b’aanumank

• Patz’ re junaq ch’ina al naq tixmuq li loq’laj hu sa’ li tzoleb’aal ut xkomoneb’ chik li kok’al te’xmutz’ li ru. Chirix a’an patz’ reheb’ li kok’al naq te’xte li ru ut te’xsik’ li loq’laj hu. Rik’in roksinkil junjunq aatin re Deuteronomio 6:6–9, wotz rik’ineb’ li kok’al naq laj Moises kixye reheb’ laj Israelita naq te’xk’e li loq’laj hu chi kutankil re naq te’tzoloq chi sa’ wulaj wulaj. Tenq’aheb’ li kok’al chixk’oxlankileb’ li na’ajej sa’ rochocheb’ b’ar wi’ naru neke’xk’e li loq’laj hu re naq te’ril wulaj wulaj.

• B’ichahomaq jun li b’ich na’aatinak chirix li loq’laj hu, maare “Tintzol, tink’oxla, tintijoq” (B’ichleb’aal choq’ reheb’ li Kok’al, 66). Wotz xnawom aach’ool naq eb’ li loq’laj hu a’an li raatin li Dios, ut ye reheb’ li kok’al chan ru naq neke’rosob’tesi laa yu’am.

Li Jesukristo, a’an li profeet jo’ laj Moises.

Deuteronomio 18:15–18

Eb’ li profeet neke’k’utuk chirix li Jesukristo.

Laj Moises kixye naq li Jesukristo taachalq ut naq tento raj taqab’i li aatin tixye li Jesus.

Kok’ k’anjel naru chi b’aanumank

• Tenq’a jun reheb’ li kok’al chirilb’al Deuteronomio 18:18, ut ye reheb’ naq li profeet jo’ laj Moises li tixwaklesi chi yo’yo li Dios, a’an li Jesukristo. Re xtenq’ankileb’ li kok’al chirilb’al k’a’ru xjuntaq’eetil laj Moises rik’in li Jesus, k’ameb’ xjalam-uuch li k’a’ru kixb’aanu laj Moises ut li k’a’ru kixb’aanu li Jesukristo, ut kanab’eb’ li kok’al chixk’eeb’al reetal a’an. Maare naru taak’am xjalam-uuch laj Moises ut li Jesus naq neke’k’ojob’an ut neke’k’utuk (chi’ilmanq Hu reheb’ li Jalam-uuch re li Evangelio, 15, 16, 38, 39).

• K’ut chiruheb’ li kok’al jun xjalam-uuch li qaprofeet sa’ li kutankil a’in, ut wotz junaq na’leb’ kixk’ut chirix li Kolonel. Patz’ reheb’ li kok’al chixyiib’ankil xjalam-uuch li profeet re naq te’xwotz reheb’ lix junkab’al.

Xk’utb’al li tzol’leb’: Kok’al ak ninqeb’

Deuteronomio 6:6–9

Naru nink’uula li raatin li Dios sa’ li waam.

Laj Moises kixk’ut naq tento taqak’am li raatin li Dios sa’ li qaam, ut kixch’olob’ chiruheb’ laj Israelita chan ru te’xk’am li raatin li Dios junelik rik’ineb’. Chan ru taawaklesi xch’ooleb’ li kok’al chixtzolb’al li raatin li Dios wulaj wulaj?

Kok’ k’anjel naru chi b’aanumank

• Chiru li pizarron, tz’iib’a aatin re Deuteronomio 6:6–9 li naxye jo’q’e ut chan ru naq eb’ laj Israelita ke’xjultika li raatin li Dios (maare chunlaak, b’eek, yoklaak, ut ochoch). Patz’ reheb’ li kok’al naq te’xtaweb’ li aatin a’an sa’eb’ li raqal. K’a’ru neke’xk’ut li aatin a’an chirix roksinkileb’ li loq’laj hu sa’ li qayu’am wulaj wulaj? Patz’ reheb’ li kok’al k’a’ru te’xb’aanu re xjultikankil li raatin li Dios sa’ xyu’ameb’.

• K’e reheb’ li kok’al jun perel li hu ut patz’ reheb’ naq te’xtz’iib’a jun aatin re Deuteronomio 6 li wan xyaalal choq’ reheb’. Patz’ reheb’ naq te’xwotz k’a’ut naq xe’xsik’ ru li aatin a’an. Ye reheb’ naq naru te’rutz’u’uji lix hu ut te’xk’am sa’ kab’l re xjultikankil. Waklesi xch’ooleb’ li kok’al chixtz’iib’ankil ut chixk’utb’al jalan chik aatin te’xtaw sa’eb’ li loq’laj hu.

Deuteronomio 15:7–11

Naru nintenq’aheb’ li wankeb’ rajom ru chi sa inch’ool.

Li na’leb’ wan sa’ Deuteronomio 15:7–11 naru naxtenq’aheb’ li kok’al chixtawb’al ru naq li tenq’ank moko ka’ajwi’ ta a’an li eek’asink malaj paqonk k’a’aq re ru. Tento naq taa’uxmanq chi anchal li ch’oolej.

Kok’ k’anjel naru chi b’aanumank

• Tz’iib’a ani, k’a’ut, ut chan ru chiru li pizarron. Patz’ reheb’ li kok’al naq te’ril Deuteronomio 15:7–11 re te’xsik’ ani tento taqatenq’a, k’a’ut naq taqatenq’a, ut k’a’ru taqeek’a chirix xtenq’ankil. Kanab’eb’ chixtz’iib’ankil chiru li pizarron li k’a’ru te’xtaw. B’ichahomaq jun li b’ich li tixtz’aqob’resi ru li na’leb’ wankeb’ sa’eb’ li raqal a’in, maare “Ma chaabʼil anajwan xinbʼaanu arin?” (Eb’ li B’ich, 143).

• Patz’ reheb’ li kok’al naq te’xk’oxla junaq kristiaan li te’xtenq’a, maare sa’eb’ lix junkab’al. K’e xhoonaleb’ re naq te’xtz’iib’a k’a’ru te’xb’aanu chiru li xamaan a’in re xtenq’ankil li kristiaan a’an. Wi naru, k’uub’amaq chi xik sa’ ch’uut chixtenq’ankil junaq kristiaan li wan rajom ru.

Deuteronomio 30:8–10

Xpaab’ankileb’ li sumwank naxk’am chaq li osob’tesiik.

Jo’eb’ li ralal xk’ajol laj Israel, naqaj ru xjultikankil chi kok’ aj xsa’ naq taqapaab’ li qasumwank. Rilb’al Deuteronomio 30:8–10 naru naxtenq’aheb’ li kok’al chixtawb’al ru chi us k’a’ru jun li sumwank ut naru naxmusiq’aheb’ chixpaab’ankileb’ lix sumwank.

Kok’ k’anjel naru chi b’aanumank

• Patz’ reheb’ li kok’al k’a’ru jun li sumwank (wi neke’raj xtenq’ankil, sik’omaq “Sumwank” sa’ li K’utul Raqal reheb’ li Loq’laj Hu. Yiib’ jun li kaaxukuut chiru li pizarron chi wiib’ jachal ru ut tz’iib’aheb’ li aatin a’in chi sa’: Xyeechi’ihomeb’ laj Israelita ut Xyeechi’ihom li Dios. Patz’ reheb’ li kok’al naq te’ril Deuteronomio 30:8–10 ut te’xnujob’resi li kaaxukuut. (Wi na’ajman ru, tenq’aheb’ li kok’al chixtawb’al ru li aatin sa’ li raqal 9.) Ch’olob’ xyaalal li osob’tesiik nakak’ul xb’aan xpaab’ankileb’ li sumwank.

• Patz’ reheb’ li kok’al naq te’xtz’iib’a chiru li pizarron k’a’ru naqayeechi’i sa’ li kub’iha’ ut k’a’ru naxyeechi’i li qaChoxahil Yuwa’ qe (chi’ilmanq Tzol’leb’ ut Sumwank 20:37, 77). K’a’ru taqab’aanu re xjultikankil chi junelik li Kolonel ut xpaab’ankileb’ li qasumwank?

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’oxla naq laa’at jun komon sa’ lix junkab’al ut patz’ reheb’ naq te’xye k’a’ru xe’xtzol chiru li kutan a’in. Waklesi xch’ooleb’ chixwotzb’al li te’xye re junaq komon sa’ lix junkab’aleb’ naq te’wulaq sa’ kab’l.

Xkawresinkil qib’ jo’ aj k’utunel

Oksiheb’ li musiq’anb’il patz’om. Oksiheb’ li patz’om li tixb’oqeb’ li kok’al chixwotzb’al resil li xe’xtzol ut chixwotzb’al ajwi’ xnawomeb’ xch’ool chirix li evagelio. Wi yookex chi aatinak chirixeb’ li taqlahom, naru nakapatz’ reheb’ li kok’al naq te’xwotz chan ru naq neke’osob’tesiik xb’aan xpaab’ankileb’ li taqlahom.