9–15 mayo

Numeros 11–14; 20–24

Meepo’resi eech’ool chiru li Qaawa’, chi moko chexxuwaq

Moko tento naq taab’aanu chi tustu li naxye li tusleb’ aatin a’in. Sa’ xna’aj a’an, oksi re xtawb’al aana’leb’ ut aamusiq’ankil re taanaw k’a’ru li kok’ k’anjel taab’aanu re taawosob’tesiheb’ li kok’al.

Tz’iib’a li nakak’oxla

Xkanab’ankileb’ chi wotzok

K’ut chiruheb’ li kok’al jun reheb’ li jalam-uuch li wan sa’ li perel a’in malaj sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ chixwotzb’al li k’a’ru neke’xnaw chirix li nak’ulman sa’ li jalam-uuch.

Xk’utb’al li tzol’leb’: Kok’al toj ka’ch’ineb’ xyu’am

Numeros 11:4–10

Naru ninb’antioxi li k’a’ru naxk’e we li Dios.

Us ta li Qaawa’ kixb’aanu xninqal ru k’a’aq re ru choq’ reheb’ li ralal xk’ajol laj Israel, junelik yookeb’ chixk’eeb’al reetal li k’a’ru maak’a’ reheb’. Tenq’aheb’ li kok’al chixtzolb’al xb’antioxinkil li k’a’ru naxk’e li Dios reheb’.

Kok’ k’anjel naru chi b’aanumank

• Patz’ reheb’ li kok’al ma nanaq sa’ xch’ooleb’ junjunq reheb’ li sachb’a-ch’oolej kixb’aanu li Qaawa’ re rosob’tesinkileb’ laj Israelita sa’ li yamyookil ch’och’. (Wi eb’ li kok’al neke’raj xtenq’, k’uteb’ li jalam-uuch sa’ li tusleb’ aatin re li 4–10 re abril sa’ Kim, Taaqehin—Choq’ reheb’ li komon ut li junkab’al; chi’ilmanq ajwi’ Exodo 14:21–22; 15:23–25; 16:4.) Chirix a’an, aatinan rik’ineb’ chirix Numeros 11:4–10, taach’olob’ naq li Qaawa’ ink’a’ sa xch’ool xb’aan naq eb’ laj Israelita yookeb’ chi wech’ink. Tenq’aheb’ li kok’al chixk’oxlankil chan ru te’xk’ut xrahom chiru li Qaawa’.

• B’ichahomaq sa’ komonil jun li b’ich chirix li b’antioxink, maare “Kʼe saʼ ajl li kʼiila usilal” (Eb’ li B’ich, 153). Patz’ reheb’ li kok’al naq te’xyiib’ xjalam-uuch li osob’tesiik xk’ehom li Dios choq’ reheb’ a’an malaj reheb’ lix junkab’al. Waklesi xch’ooleb’ chixk’oxlankil malaj chirilb’al li jalam-uuch rajlal sut naq te’aaleeq chi wech’ink chirix li k’a’ru maak’a’ reheb’.

Numeros 13:17–33; 14:6–9

Li paab’aal naru nikinixtenq’a chirisinkil lin xiw.

Naq laj Moises kixtaqlaheb’ 12 chi winq re xtz’ilb’al rix li yeechi’inb’il ch’och’, 10 reheb’ a’an te’xuwaq naq ke’q’aj chaq xb’aan xnimal xwankil li tenamit li wan aran. Wiib’eb’ reheb’ a’an, laj Kaleb ut laj Josue, ink’a’ ke’xuwak xb’aan naq wankeb’ xpaab’aal chirix li Qaawa’.

Kok’ k’anjel naru chi b’aanumank

• Oksiheb’ xjalam-uuch li uuv, li miel, ninqi winq, ut kok’ xul re xseraq’inkil reheb’ li kok’al chirixeb’ li 12 chi winq kixtaqla laj Moises chixtz’ilb’al rix li yeechi’inb’il ch’och’ (chi’ilmanq Numeros 13:17–33; chi’ilmanq ajwi’ “40 años en el desierto” sa’ Relatos del Antiguo Testamento). Ch’olob’ naq naab’al li ru che’ ke’xtaw ut wankeb’ chik xkomon li tzakemq (patz’ reheb’ li kok’al naq te’xpak’ naq yookeb’ chi wa’ak), a’b’an yookeb’ ajwi’ xxiw xb’aan naq jwal ninqeb’ ut kaweb’ rib’ li kristiaan wankeb’ aran (patz’ reheb’ li kok’al naq te’xpak’ naq yookeb’ xxiw). K’ut xjalam-uuch li Jesus ut ye naq wiib’ reheb’ laj Israelita, laj Kaleb ut laj Josue, ink’a’ ke’xuwak xb’aan naq wankeb’ xpaab’aal chirix li Jesukristo.

• Yaab’asi Numeros 14:9 reheb’ li kok’al ut aatinan chirix junaq hoonal kiwan wi’ aaxiw, a’b’an laa paab’aal chirix li Jesukristo xatxtenq’a chixkawob’resinkil aach’ool. Tenq’aheb’ li kok’al chixk’oxlankil xnumsihomeb’ ajwi’ a’an.

  

  Lajeeb’ reheb’ li ke’taqlaak chixtz’ilb’al rix li yeechi’inb’il ch’och’ ke’xuwak; laj Josue ut laj Kaleb ke’wan xpaab’aal. © Lifeway Collection/licensed from goodsalt.com

Numeros 21:6–9

Naru nin’ilok wan wi’ li Jesukristo.

Jo’ naq eb’ li ralal xk’ajol laj Israel ke’k’irtesiik xb’aan rilb’al li k’anti re q’an ch’iich’, eb’ li kok’al neke’xk’ul xkolb’al naq neke’ril li Kolonel.

Kok’ k’anjel naru chi b’aanumank

• Rik’in roksinkil li perel re kok’ k’anjel re li xamaan a’in malaj li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ye reheb’ li kok’al k’a’ru kik’ulman naq li “k’anti’ li neke’kamsink” ke’ok b’ar wi’ neke’hilan laj Israelita (chi’ilmanq Numeros 21:6–9). Tenq’aheb’ chirilb’al k’a’ru xjuntaq’eetil li k’anti re q’an ch’iich rik’in li Jesukristo (chi’ilmanq Jwan 3:14–15). Chirix a’an, kanab’eb’ li kok’al chiroksinkil li jalam-uuch re xwotzb’al li seraq’ chirib’ileb’ rib’.

• Patz’ reheb’ naq te’xmutz’ li ru ut taamuq xjalam-uuch li Kolonel sa’ junaq na’ajej sa’ li tzoleb’aal. Toja’ naq taapatz’ reheb’ naq te’xte li ru, te’xsik’ li jalam-uuch, ut te’ril. Kanab’eb’ chixmuqb’al li jalam-uuch sa’ junaq na’ajej. Rajlal sut naq te’xtaw li jalam-uuch, tenq’aheb’ chixk’oxlankil junaq na’leb’ li naru neke’xb’aanu re te’iloq wan wi’ li Kolonel.

Xk’utb’al li tzol’leb’: Kok’al ak ninqeb’

Numeros 12

Li Qaawa’ naraj naq tintaaqe lix profeet.

Sa’ Numeros 12 wan li na’leb’ li naru naxtenq’aheb’ li kok’al naq neke’rab’i li kristiaan chixmajewankil lix profeet li Qaawa’ malaj eb’ laj jolominel sa’ li Iglees.

Kok’ k’anjel naru chi b’aanumank

• Ye reheb’ li kok’al naq jun sut, li Qaawa’ moko sa ta xch’ool rik’in laj Aaron ut xMiriam, li ras ut li ranab’ laj Moises. Patz’ reheb’ naq te’ril Numeros 12:1–2 re te’xsik’ k’a’ut. Jo’ naxye li raqal 5–8, k’a’ru kireek’a li Qaawa’ chirix laj Aaron ut xMiriam naq ke’xmajewa lix profeet?

• Tenq’aheb’ li kok’al chixk’oxlankileb’ resil kristiaan sa’eb’ li loq’laj hu li ke’xtaaqe li profeet ut ke’osob’tesiik (chi’ilmanq Genesis 7:7; 1 Nefi 3:7). B’ar wan junjunq li na’leb’ naxk’ut chiqu li qayo’yookil profeet? Chan ru noko’osob’tesiik naq naqataaqe lix k’utum?

Numeros 21:4–9

Li Jesukristo wan xwankil re ink’irtesinkil sa’ musiq’ej.

Naab’al reheb’ laj Israelita ke’kam xb’aan naq ink’a’ ke’xpaab’ naq te’k’irtesiiq xb’aan li Qaawa’ wi te’ril li k’anti re q’an ch’iich’ (chi’ilmanq Alma 33:18–20). Chan ru taatenq’aheb’ li kok’al chixpaab’ankil naq li Kolonel Jesukristo wan xwankil re k’irtesink?

Kok’ k’anjel naru chi b’aanumank

• Patz’ reheb’ li kok’al naq te’xyiib’ xjalam-uuch li xe’ril sa’ Numeros 21:4–9. Kanab’eb’ chiroksinkil lix jalam-uuch re te’xwotz li seraq’. Patz’ reheb’ li kok’al naq te’xsik’ ru jun reheb’ li raqal a’in ut te’xwotz k’a’ru neke’xye chirix li seraq’ xe’ril: Jwan 3:14–15; 1 Nefi 17:41; Alma 33:18–20; Helaman 8:13–15; Tzol’leb’ ut Sumwank 6:36.

• Tz’iib’a chiru li pizarron jun li patz’om, maare K’a’ru taqab’aanu re rilb’al “li Ralal li Dios rik’in paab’aal”? (Helaman 8:15). K’e reheb’ chixjunil li kok’al jun perel li hu ut patz’ reheb’ naq te’xtz’iib’a chixjunil li te’xk’oxla re xsumenkil li patz’om. Ch’utub’eb’ li hu, yaab’asi junjunq reheb’ li k’a’ru xe’xtz’iib’a, ut patz’ reheb’ li kok’al naq te’aatinaq chirix chan ru naq xb’aanunkil li k’a’aq re ru a’an tooxtenq’a naq naqaj ru lix wankil aj k’irtesinel li Kolonel.

Numeros 22–24

Naru ninb’aanu li k’a’ru naraj li Dios, us wankeb’ li neke’yehok we naq ink’a’ tinb’aanu.

Laj Balak kixyal xq’unb’esinkil laj Balaham re naq tixmajewaheb’ laj Israelita, a’b’an laj Balaham naxnaw naq moko a’an ta li naraj li Dios. Li k’a’ru kixb’aanu laj Balaham naru naxtenq’aheb’ li kok’al naq neke’mine’ ru chixq’etb’al li rajom li Dios.

Kok’ k’anjel naru chi b’aanumank

• Wotz Numeros 22:1–18 rik’ineb’ li kok’al, ut ye chan ru naq laj Balaham kixq’et rib’ chixmajewankil lix tenamit li Dios, us ta laj Balak, li rey re Moab, kixyeechi’i xk’eeb’al xwankil ut xb’ihomal. Patz’ reheb’ li kok’al naq te’xsik’ ch’ol aatin sa’eb’ li raqal a’in li neke’xk’ut lix kawil xch’ool laj Balaham chixtaaqenkil li Dios: Numeros 22:18; 23:26; 24:13. Patz’ reheb’ li kok’al naq te’xsik’ ru jun aatin li nawulak chiruheb’ ut te’xtz’iib’a chiru junaq ch’ina hu re te’xjultika naq tento te’ab’inq chiru li Qaawa’.

• Aatinan rik’ineb’ li kok’al chirixeb’ li hoonal b’ar wi’ maare eb’ li ramiiw malaj jalan chik kristiaan te’xyal xminb’aleb’ ru chixb’aanunkil li k’a’ru ink’a’ us, jo’ kixb’aanu laj Balak rik’in laj Balaham. Chan ru naq kitenq’aak laj Balaham xb’aan lix kawil xch’ool chixpaab’ankil li Qaawa’? Patz’ reheb’ li kok’al naq te’xtzol k’a’ raj ru te’xye sa’eb’ li hoonal jo’ kixb’aanu laj Balaham.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz junaq na’leb’ rik’ineb’ lix junkab’al, maare jun jalam-uuch, jun raqal, malaj jun b’ich li tixk’ut li xe’xtzol sa’ li Tzoleb’aal reheb’ li Kok’al.

Xkawresinkil qib’ jo’ aj k’utunel

K’e aach’ool chixk’ulb’al li na’leb’ tixk’e li Musiq’ej. “Chi kok’ aj xsa’ li k’utuk q’axal chaab’il nak’ulman chi ink’a’ nawb’il rub’elaj—qayehaq, naq anihaq naxwotz jun na’leb’ malaj naxpatz’ jun patz’om li naxtikib’ jun chaab’il seraq’. … Wanq aach’ool chixjalb’al li k’a’ru xak’uub’ wi na’ajman ru naq taab’aanu li k’a’ru naxye aawe li Musiq’ej” (Li k’utuk jo’ li Kolonel, 10).