Li Kaqi Palaw

4–10 abril

Exodo 14–17

“Xaqab’omaq eerib’ ut ilomaq lix kolb’a-ib’ li Qaawa’ ”

Li Dios kixtaqla naq laj Moises tixtz’iib’a li k’a’ru kixk’ul “sa’ li hu re naq junelik wanq sa’ eech’ool,” ut naq “tixyaab’asi sa’ xxik” laj Josue (Exodo 17:14). Xtz’iib’ankil li na’leb’ naxk’e li Musiq’ej sa’ laa k’a’uxl tatxtenq’a laa’at ut laa komon chixk’oxlankil lix chaab’ilal li Qaawa’.

Tz’iib’a li nakak’oxla

Maajun li b’e ke’ru wi’ chi eelelik laj Israelita. Chi uub’ej wan li Kaqi Palaw, ut chi ixb’ej wan li teep aj pleet re laj Farahon. Anchal naq aran taaraqe’q li reelelikeb’ chaq sa’ Egipto. A’b’an li Dios kiraj naq junelik taajultiko’q reheb’ laj Israelita li aatin a’in: “Mexxiwak. Li Qaawa’ taayaloq cherix” (Exodo 14:13–14).

Chalen chaq li kutan a’an, naq na’ajman xpaab’aal ut xkawilal xch’ool lix tenamit li Dios, chi kok’ aj xsa’ neke’xk’oxla li resil lix sachb’a-ch’oolejil kolb’al laj Israelita. Naq laj Nefi kiraj xwaklesinkil xch’ooleb’ li ras, a’an kixye, “Kawaq qib’ jo’ laj Moises; xb’aan naq a’an kiraatina chi yaal lix ha’il li Kaqi Palaw, ut kixjach rib’ chi ka’pak’al, ut eb’ li qayuwa’ ke’nume’ chaq, relikeb’ chaq chi preexil, chiru chaqi b’e” (1 Nefi 4:2). Naq li rey aj Limhi kiraj naq lix tenamit “te’xtaqsi lix jolom, ut te’saho’q sa’ xch’ool,” a’an kixk’ut li seraq’ a’in chiruheb’ (Mosiah 7:19). Naq laj Alma kiraj xch’olob’ankil xyaalal lix wankilal li Dios chiru li ralal, a’an ajwi’ kiroksi li seraq’ a’in (chi’ilmanq Alma 36:28). Naq laa’o naqaj ru qakolb’al—naq na’ajman xkomon chik li qapaab’aal, naq na’ajmanq naq “kawaq qach’ool ut taqil li kolb’a-ib’ tixk’e qe li Qaawa’ ”—naru taajultiko’q qe naq “sa’ li kutan a’an li Qaawa’ kixkoleb’ laj Israel sa’ ruq’eb’ laj Egipto” (Exodo 14:13, 30).

Li na’leb’ re xtzolb’aleb’ li loq’laj hu aajunes

Exodo 14

Li Dios naru tinixkol.

Naq nakawil Exodo 14:1–10, k’oxla li k’a’ru ke’reek’a laj Israelita naq ke’ril chi nach’ok li teep aj pleet re laj Farahon. Maare nakaweek’a naq taa’ajmanq jun li sachb’a-ch’oolej re tatruuq chixnumsinkil laa ch’a’ajkilal. K’a’ru nakatzol sa’ Exodo 14:13–31 li naru tatxtenq’a chixsik’b’al laa kolb’al rik’in li Dios sa’ laa yu’am? K’a’ru ak xatzol chirix li kole’k naxk’e li Dios sa’eb’ li qach’a’ajkilal? K’oxla chan ru ak xawil lix wankilal re kolok sa’ laa yu’am.

Chi’ilmanq ajwi’ Tzol’leb’ ut Sumwank 8:2–3; L. Tom Perry, “El poder de librarse,” Liahona, mayo 2012, 94–97; Eb’ li Reetalil Ch’och’ re li Santil Hu, 2, “Li relikeb’ chaq laj Israel sa’ Egipto ut li rokikeb’ sa’ Kanahan.”

Exodo 15:22–27

Li Qaawa’ naru tixk’e xki’al li k’a’ru k’a.

Naq nakawil resil lix b’eenikeb’ laj Israelita sa’ xjayal li yeechi’inb’il ch’och’ sa’ Exodo 15:22–27, k’oxla li k’a’ru wanjenaq “xk’ahil” sa’ laa yu’am, chanchan li ha’ Mara. K’oxlaheb’ li patz’om a’in naq nakawileb’ li raqal a’in: Chan ru naru li Qaawa’ chixk’eeb’al xki’al li k’a’ru k’a sa’ laa yu’am? K’a’ut naq nim xwankil li k’a’ru ak xanumsi sa’ laa yu’am? K’a’ru naxye li raqal 26 ut 27 chirix li osob’tesink li naxk’e li Qaawa’ naq naqab’i lix yaab’ xkux?

Exodo 15:23–27; 16:1–15; 17:1–7

Naru tinpaab’ li Qaawa’, sa’ ajwi’ lin ch’a’ajkilal.

Maare wan naq naqaj xyeeb’al naq moko tiikeb’ ta laj Israelita xb’aan naq ke’ok chi wech’ink sa’ xch’a’ajkilaleb’, us ta chixjunil li kixb’aanu li Dios choq’ reheb’. A’b’an, naq nakawil Exodo 15:23–27; 16:1–15; 17:1–7, k’oxla ma xab’aanu ajwi’ a’an sa’ laa yu’am. K’a’ru nakatzol rik’ineb’ laj Israelita li tatxtenq’a chixkanab’ankil li wech’ink ut chi ok b’an chixkanab’ankil aawib’ sa’ ruq’ li Dios? Ma nakak’e reetal naq jalan wi’ li ke’xb’aanu laj Israelita rik’in li kixb’aanu laj Moises? K’a’ru nakatzol sa’eb’ li raqal a’in chirix li Dios?

Chi’ilmanq ajwi’ 1 Nefi 2:11–12; “El pecado de la murmuración” (video), ChurchofJesusChrist.org.

Li Dios kixch’olaniheb’ laj Israelita sa’ tib’elej rik’in li mana; laa’o ajwi’ naqaj ru ch’olaniik sa’ musiq’ej wulaj wulaj. B’onb’il jalam-uuch xb’aan laj Leopold Bruckner

Exodo 16

Tento tinsik’ inch’olaninkil sa’ musiq’ej wulaj wulaj.

Wan naab’al li musiq’ejil na’leb’ naru naqatzol rik’in li sachb’a-ch’oolejil mana, li nayeeman resil sa’ Exodo 16. K’e reetal naq kich’olob’aman chiruheb’ laj Israelita chan ru te’xch’utub’, te’roksi, ut te’xk’uula li mana (chi’ilmanq Exodo 16:16, 19, 22–26). K’a’ru nakataw sa’ li aatin a’an li tatxtenq’a chixsik’b’al aach’olankinkil sa’ musiq’ej wulaj wulaj?

Chi’ilmanq ajwi’ Jwan 6:31–35, 48–58 ut eb’ li video “El pan de cada día: Modelos,” “El pan de cada día: Experiencia,” ut “El pan de cada día: Cambio” (ChurchofJesusChrist.org).

Exodo 17:1–7

Li Jesukristo, a’an lin musiq’ejil saqoonaq ut lin yo’yookil ha’.

K’oxla li Kolonel naq nakawil Exodo 17:1–7. Chan ru naq li Jesukristo chanchan jun saqoonaq sa’ laa yu’am? (chi’ilmanq Salmos 62:6–7; Helaman 5:12). Chan ru naq chanchan li ha’? (chi’ilmanq Jwan 4:10–14; 1 Korintios 10:1–4; 1 Nefi 11:25).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Exodo 14:13–22.Maare taawulaq chiru laa junkab’al “chixjachb’al ru” li ha’ sa’ jun li sek’ malaj pila, jo’ kixb’aanu laj Moises rik’in li Kaqi Palaw. Tenq’aheb’ chixtawb’al ru naq ink’a’ naru xjachb’al ru li Kaqi Palaw, ka’ajwi’ rik’in lix wankilal li Dios. Chan ru ak xqil lix wankilal li Dios sa’ li qayu’am ut sa’ xyu’am li qaxe’ qatoon?

Exodo 15:1–21.Chirix naq ke’xq’ax ru li Kaqi Palaw, eb’ laj Israelita ke’xb’icha jun b’ich re loq’onink li nawb’il ru jo’ xb’ich laj Moises, li wan sa’ Exodo 15:1–21. Jo’ junkab’al, tz’ileb’ rix li raqal a’in re xtawb’al li aatin li naxch’olob’ xyaalal lix b’aanuhom li Dios choq’ reheb’ laj Israelita. Toja’ naq naru te’xb’icha jun b’ich li naxjultika re laa junkab’al k’a’ru xb’aanuhom li Dios choq’ eere.

Exodo 16:1–5; 17:1–7.Rilb’al ru Exodo 16:1–5 ut 17:1–7 naru texxtenq’a chi aatinak chirix li Kolonel jo’ lix Wahil li Yu’am, li Yo’yookil Ha’, ut li qaSaqoonaq. Chan ru nokohe’xtenq’a li seraq’ a’in chixk’oxlankil li naxb’aanu li Jesukristo choq’ qe? Naq yookex chi aatinak, naru teeril Jwan 4:10–14; 6:29–35, 48–51; Helaman 5:12; Tzol’leb’ ut Sumwank 20:77, 79.

Exodo 17:8–16.Naru teek’utb’esi li seraq’ chirix laj Aaron ut laj Hur naq ke’xtaqsi li ruq’ laj Moises, ut tex’aatinaq chirix xxaqab’ankileb’ xwankil li ani b’oqb’il xb’aan li Dios re qajolominkil. Naru taawil xjalanil lix b’aanuhom laj Aaron ut laj Hur rik’in lix wech’b’al rix laj Moises xb’aaneb’ laj Israelita (li yeeb’il resil sa’eb’ li ch’ol 15–17). Chan ru taqatenq’aheb’ ut taqaxaqab’ xwankileb’ laj jolominel qe? Sa’ xb’aanunkil a’an, k’a’ruheb’ li usilal taqak’ul laa’o ut laj jolominel qe?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “At xDios Israel,” Eb’ li B’ich, 5.

Xkawresinkil aawib’ chi tzolok

Sik’ aamusiq’ejil na’leb’. Naq nakattzolok aajunes ut sa’ junkab’al, ink’a’ ka’ajwi’ taatzoleb’ li raqal sa’eb’ li tusleb’ aatin a’in. Naru naq li Qaawa’ naraj xk’eeb’al aawe li na’leb’ li ink’a’ natawman arin. Tz’aama sa’ tij naq tatb’eresiiq xb’aan li Musiq’ej.

Xjalam-uuch laj Moises naq naxjach ru li Kaqi Palaw, xb’aan laj Robert T. Barrett